Read Aimol MANJETNA 15 Bible Online

MANJETNA 15 - Aimol bible

MANJETNA 15

¹Kei ning van chunga khodengthei nale pong na ranga khat ka mu, thaneithiang sari le ripui sari anmani hi a torna anni, ajarko anmani jiang Pathian lung thak na rakip ha an ri sua pet.

²Hava suale kein tuionglian na mengsial anga mei kan jel ha ka mu, sa ngai rakip anmani hale an ral mi an ming malngai le tuionglian mengsial kol la an ngirra an kut sa nan ta ngaiha a nod an om.

³Anmani ning Pathian nai Mousi la an lui tho han belram la ham an tho: “Irakip a tor pu Puma Pathian, i duk a lian a ngak pa ha mo ani! a chuan ngaihi jat rakip reng ha na ni, na lam pui ngaiha i duk a lian mo ani adik lam mo ani!

⁴Puma na ming liana le chit lui le mahok, manpak lui rang mi om nanti mo? Tu ning mo na lian na ha a ri lui rang? Nang jak hi Pathian ha na ni. Jat le phung rakip ning chubei na buk rase u, ajarko na chuan dik ha mitam ning an mu.”

⁵Han vanram ma a thiang mun ha a kan long hava sunga Pathian a om ka mu.

⁶Thaneithiang sari ripui sari a lek ngai ning a thiang mun tenna a hong puan thiang a var ha an shi hale sana peti ha an konga an khit.

⁷Jiba manli ngai karra an khat ning thaneithiang sari jiang amongli buia a ring Pathian ama lung thak na ning a sip. Sana kheng kam sari an pek, anmani ning amongtibuia om rang an nijui.

⁸Hale in thiang na Pathian mahok na lianpui na jarra mei khu ning Pumsip alui sip jui, hale a thiang thaneithiang rirai saringai an tor mak kar je tu khat om hava in thiang sunga lui lut tor ma u.