Read Aimol MANJETNA 18 Bible Online

MANJETNA 18 - Aimol bible

MANJETNA 18

¹Hiva suale kei ning thaneithiang a dang khat ka mu vanram tenna a hong suak, ama ranak a lian na a nei, a rat na ha ramuol la pum vara a var.

²A man rasa ringa a hong khek a hong chul! “Babilon a lian na a kui jui hale thavang saluingai om nale thavang saluingai le ma tirrang om tak vatengai om na mun lam a chang jui.

³Ajarko jat rakip ning hava khopui salui a om chuan rakip ha an jui, a salui tak omchan ha ko taksa hui na lam ngaiha ani, ramuol la rengngai ning om ramuol la taksa hui na omchan salui ha an lui che, ramuol la lal uol rakip om ama ama omchan salui ha an mak torlui jarra nei na a tam an lui nei.”

⁴Hava suale kein rasa khat vanram tenna a hong khek ha ka jet, “ka mingai hong suakru! hava a saluingai tenna, nang niko ama siatna rakip han chul maru, ama khodengthei na ha ko chul maru.

⁵A ma siatna ngaiha vanram ang khanna a hong sang jui, hale Pathian in ama omchan salui chuan lam rakip ha a ngaidon jui.

⁶A man i na pek angnga nang ni om pekru hale a man i tho pek na dan anni a thoru. In ranga a naman jel pek kok lai anni dan pekro.

⁷A ma jiang pong na khodengthei na a tam pekru, a man ramuol la hui na rakip ha a man hui jui, ajarko a man a ti, kei hi rengnu ka ni, kei mei thai ni making, kein khodengthei na ha jet chil noning.

⁸Hava jarra ni khat ko pong nale butang ala mu rang ke, hale ama hi mei ning lakang nati, ajarko ama chunga Pathian chong jen pu ator pa ani.”

⁹Rengngai ning ama chunga an man hui mingai han, ama ning mei khu karra pong nale thina a mu karra, anmanin chap nan ta khopui ha an en rang ke.

¹⁰Anmanin a lak om nanti, ajarko ama pong na ha an chit, anmanin an lui ti, “I duk khodengthei na mo ani jui, chit na a om, chit na a om, khopuilian tak Babilon! a rat khopui nang hi, pungkhat sunga nang chunga chong jenna a hong jui.”

¹¹Lal uol mirakip om ama ranga an chap, ajarko tu khat ning om ama jiang phur chok lai ma u.

¹²Tu khat ning om anmani sana ruphai, a man tam lung, puan sat le asat phur rakip, thir le marable a man tam ngaiha chok pe lai ma u.

¹³A ma ning thairim hui, juthai, gehu, sarat, belram, sakor ngaile suakngai rakip ham miring thavangngai alui chang.

¹⁴Lal uol pa ning ama jiang anti, phur asat rakip nang in natok ngaiha a mang jui, hale na lal na thum havarakip ha vei khat mu lai noni che u.

¹⁵A nei kan chong pa lal uol pangai ham a lak om rang anni, ajarko anmani ning hiva khodengthei na hi mu jot ma u, anmanin chap nanta anti rang ke.

¹⁶Ningdong a om! i duk a hui khopui ha! ama ning limon puon nal puon sat a kan sin hei a thai rim hui le a man tam lung alui kan hap.

¹⁷Pungkhat sunga a neia lal a thum rakip hi a mang jui, hale ro kuang a jap le a chuang mingai ham, a lak an om jui, tuipuilian na han.

¹⁸Anmanin khopui a kang mei khu an mu karra, an chap hava khopui anga a dang khopui la mu ma u.

¹⁹Anmanin vutdi ngaiha an lu chunga an lui vurra an chap, ningdong a om hiva khopuilian ranga! Hiva khopui hi mirakip ning an ro kuang an jap a lal an hong nei ani, tak-ha pungkhat sunga irakip hi a mang pet jui.

²⁰Nan ning man satru, vanram ma, hiva a manmang jarra nan ning man satru, Pathian mingai le a nuk jui mingai, Pathian chong jui ngai, ajarko Pathian ning ama a tho na chunga lui jot pe mak.

²¹Hiva suale thaneithiang in lung a lian tak khat alui a tuionglian na apeija a ti, hiva ang hin Babilon khopuilian hi an la pei rang ke, hale mu khir chillai noni che u.

²²Mi ning an tho la hui rasa pengkul an tum ngai i te mu khir lai noni che u! Nang ni chunga lal uol mi tute khat om mu khir lai noni che u, hale chakiri rasa jet chil lai noni che u.

²³Nang ni jiang vei khat thai mei var ha mu lai noni che u, nang ni ning mui ruainu le mui ruaipa rasa ha jet khir ret lai noni che u, nang ni lal uol mingai ning ramuol chunga a tor pa nan ni rang ke, nang ni ning ani lui nan tho doi han ramuol la mirakip nan lui huang jui.

²⁴Babilon khopui ning khodengthei na a mu na ajarko Pathian chong ri le mingai thisen ha khopui hin a chul, hale ramuol la Pathian mingai thisen han alui om.