Read Aimol MANJETNA 20 Bible Online

MANJETNA 20 - Aimol bible

MANJETNA 20

¹Hava suale thaneithiang khat ning vamram tenna a hong chumma a man amongtibui mei khur hale arik thir rui ha a kut a lek ka mu.

²A ma ning a tuan laia ri reng ha a chur hava ha ko, khonam ani, a man kum lising khat ranga alui chur ani.

³Thaneithiang in amongtibui, mei khurra a thun na sho alui chal de jat rakip a hong mak, kum lising khat a khel maje, hava suale ama ha phat bongkhat ranga ma sua nati.

⁴Kei ning reng ong na mun ha ka mu, hava mun na a omngai jiang ranak le lian na ha a pek, chong jenna ranga hale kein Jisu ruija le Pathian chong an ri jarra an that mingai thavang ha kein ka mu, anmani ning sale mi ramil ha chubeibuk ma u, hale an challe an kut han nom sa ning jet na mun khat jak om lui om mak, anmanin an hong ringret, Jisu le kum lising khat reng a changa a om.

⁵Adang a thi ngai ha ko vei khat ringkhir lai ma u, kum lising khat a tor maje, hivahi a thi nga hi ning a rapatak an hong ringkhir ha ani.

⁶A rapatak a thi ngai karra a hong thui khir ngaiha, ravansat ha anni. Anmani jiang veini thina ha om lai no ning, anmani ha Pathian le Jisu chuan tho ha ni nati, anmani ning ama le kum lising khat vai hom nati.

⁷Kum lising khat suale seitan ha aviar ma sua nati, a pong na mun tenna.

⁸Hale a man che nata ramuol aki manli a om jat rakipngai hong tuang nati a mun rakip a a omngai ha mun khat da siak nati, ama ha Gog Magog ani, khonam ning an renga ral ranga hong khom nati. Tuionglian na a om leidi ang khan tam nanti.

⁹Anmani ning ramuol rakip han che nan ta Pathian ning adei khopui le mingai ha an hil tong, tak-ha vanram tenna a hong mei lom han anmani ha alui manmang.

¹⁰Mi huang khonam ha amongtibui mei khurra an lui thun, han ani luija Pathian chong ri ngaile sangai ham an thun ani, hava mei khur han jan le sunna an pong theng pet.

¹¹Han kein ka mu reng ong na a lian mun khat han ama ha a ong, vanram le ramuol ning ama tenna a tan jui, vei khat mu khir lai noni u.

¹²Hale kein a thi ngai ha ka mu, a lian le a sin le reng ong na madonna an ngirr ha ka mu, rabungai ha a kan longa hale a dang rabungai ham alui kan long hava ring na rabu alui ni, a thi ngai chunga chong an jen, anmanin an tho nuk juia rabu akan i ani.

¹³Tuionglian ning om hava sunga a om a thi ngai ha hale ramuol hin a om hava sunga a om a thi ngai rakip ha anmani an tho nuk juia chong jenna an lui nei.

¹⁴Hava suale a thi ngai le ramuol la a thi ngai ha mei khurra an thun jui, hiva mei khur hi veini chang na thina ha ani.

¹⁵Tu ang khat hiva rabu hin an ming a om lui ngaiha ko hiva mei khurra an thun ra ng a suak.