Read Aimol MANJETNA 3 Bible Online

MANJETNA 3 - Aimol bible

MANJETNA 3

¹Sardis biakrup hin a om thaneithiang jiang jiakro, hivahi Pathian thavang sari le arsi saringai jiang tenna a hong chong ha ani. I mo nan tho ha kein ka jet, nang ni hi a ring kan ni tia nan om, tak-ha a thi sa nan nijui.

²Thui taru nang nin khang ratru nan thi mak ma hin rat na thoru, ajarko nan tho chuan rakip ha Puma madonna adik ha nimak.

³Nang jiang ka na manjet ngaiha ngaidon khir taro, imo na jet ha juiro, na siatna ha mak nang na thui mak aninko kein a ruk anga ka hong rang ke, ka hong rang a pha nang in jet noni che.

⁴Sardis hin a om mi aviar ko puan thiangsi a, puanngui tho nan ta kei le chuan tho nanti, ajarko nang ni hi kei le kan ruai jot mi ha nan ni.

⁵Hiva rakip a tho mi han hiva puanngui tho anga nan ni, hale a renga hiva ring na rabu hin nan ming a om ha manmang noni king, Puma madonna le thaneithiangngai madonna ka mi anni tia ki jot pe rang ke.

⁶A kuor a om mi ning ngai rase, thavang ning biakrup rakip jiang a ri ha.

⁷Philadelphia biakrup thaneithiang jiang jiakro, hivahi a thiang le adik ama tenna chong pek ani, ama jiang David a sow a om, ama ning a long karra tu khat innom khar thei noni u, hale a man a khar karra tu khat ning om long thei noni u.

⁸Nang in imo na tho tihi kein ka jet, nang jiang ranak aviar a om ha nang in ka chong ri na jui, nan madonna inn khar kalong hivahi tu khat ning om khar thei ma u.

⁹keini Jiw kan ni tia a omngai ha leisei anni, hale seitan jiang a omngai ha anni, hava ngaiha kein nan ke nuaija chubei ki na man buk rang ke, ka na lungsiat na hi anmani ning an la jet rang ke.

¹⁰Ka chong ri ngaihi nang nin khang thei le nan jui aninko, ramuol la takngai mirakip dan an en karra pong na rakip an phut nang ni ha kein ka na san rang ke.

¹¹Kei a rak hong rang ka ni nan takngai na lu khu asat otitru, tu khat ning om nang ni tenna ruktor noni u.

¹²Hava a tor ama ha kein Puma biakrup a chopui ka manchang rang ke, hava mun tenna a man kan thit lai noning, ka puma a ming le akhopui ming va ram tenna a hong, a thar Jerusalem ha kein ama chunga ming a thar ka jiak rang ke.

¹³Thavang ning biakrup rakip a ri chongngai hi, a kuor a om i ning ngairu.

¹⁴“Laodesia biakrup a thaneithiang jiang jiakro,” “Hiva chong hi Pathian a jui adik tho pa ama jiang tenna ani, Amen, ama hi Pathian kut sin rakip karra a phut na ha ani.”

¹⁵Nang in imo ni lui tho ha kein ka jet, kan jet nai a lum ha nima che, a hip ham nima che, nang in a lum animakle a hip ha nang in niro.

¹⁶Nang in a lum ham na ni lui, a hip ham na ni lui, ka bai sunga chil anga na ni jarra ka bai sung tenna an phut na sa thuon rang ka ni.

¹⁷Nang in nati, kei hi irakip ka nei pet a vat om mak, tak-ha jet ma che, i duk khodengthei lungsiat ruai ha mo na ni? Nang ko a mitdel a riang puan bui ha na ni,

¹⁸kei jiang a thiang sana ha chokro, kan chong na chang na rang, hale na shi ranga puan ham chokro, puan buia na om hi jak na a om, hale kei jiang thairim hui ha chokro na mit sung not ranga, ha aninko a var ha mu rang na ni.

¹⁹Kein ka lungsiat mi ha ka ran, ka man pong, hong lutro na siatna tenna hong kirro.

²⁰Ngairo! kein inn khar kunga ka ngirra, inn khar kave, ka rasa a jet mingai ning in khar an long, kein ama inn sung lut ka ta ama le bu kan nek suam rang ke ani.

²¹Kein hivahi ka torna ka pa reng ong na mun na kiong anga hiva a tor mi ngai ning ka kol la ki man ong rang ke, ka reng ong na mun han.

²²Thavang ning a ri chongngai hi, “A kuor a om rakip in jet rase u.”