Read A'ingae Génesis 18 Bible Online

Génesis 18 - A'ingae bible

Génesis 18

¹Tsonsi Na'su Chiga ccase Abrahamnga attian Mamrembe roble quini'ccoccuni. Enttinge a'ta a'que'osi Abrahamjan tise carpa tsa'o'su sombo'ttini dyai.

²Dyaipa asuccocamba tres tsandiema atte tse'tti pporotsse ccutsu'fa'choma. Tise'pama attepa carpa'ye butto jangipa chigambiañe catse. Buttopa japa tise'panga catsepa tise tsovema andenga puntssamba ccuipa

³su: —Ña na'su, chigáne va'tti re'riccone dyaiccaja.

⁴Quema shondo'su gi. Que in'jan'ninda gi tsa'ccuve iñajamba afeya que'i tsu'ttema cashiye. Cashipa quini'cco'su tumbianccuni dyaicca'faja.

⁵Que'i tsa'caen ño'fa dyai'ninda gi panma iya cuintsu que'i an tteppuye. Nane va quema shondo'su tsaoni jipa qui tsa'caen an tteppupa ti'tsse jaya. Tsa'caen susi tise'paja Abrahamnga su'fa: —Ñotssi tsu. Tsa'caen tsonjan.

⁶Tsonsi Abrahamjan carpanga ca'nimba Sarama su: —Uta'tsseyi ñotssia harinama cuarenta librave isupa panme ñoñajan.

⁷Tsa'caen supa Abrahamjan vaura ttuccuni buttopa japa bove ñotssia vaura du'shuma indipa tise'be sema'sunga afe cuintsu fi'ttipa sho'ccoeñe.

⁸Tsonsi sho'ccoen nanimba chocho, quesoma'qque ipa pasiasundeccunga afe vaura nai'ccu añe. Tsendeccu quini'cco tumbianccuni dyaipa an'jen'fasi Abrahamjan tise'pama shondo'je.

⁹An nanimba Abrahamnga su'fa: —¿Mani tsu que pushe Saraja? Iñajampañasi Abrahamjan su: —Carpani tsu can'jen.

¹⁰Tsonsi fae'cco tsendeccu'suja su: —Fae canqque'fa panshansi gi ccase queni jiya. Ña jisi tsu que pushe Saraja tsandie du'shuve isuya. Tsa'caen su'je'choma Saraja Abraham sepaccofae a'tutsse carpani pañá ccutsu.

¹¹Nane Abrahamjan, Sara'qque coenza. Saraja coenza ccasheve dapa tayo samboen'cho.

¹²Tsa'camba Saraja pañamba feña. Nane feñamba asi'ttaen: “¿Ñoa'me ti gi tsa'caen avujaya? Ña, ña tsa'ndu'qque coenzata, ¿ma'caen?”

¹³Tsa'ma Na'su Chigaja tise asi'ttaen'choma in'jamba Abrahamnga su: —¿Micomba tsu Saraja feñamba “¿Ñoa'me ti gi coenza ccasheve dapa du'shuve isuya?” qquen su?

¹⁴¿Oshambi ti Na'su Chigaja osha'choma oshapa tsa'caen tsoñe? Nane ñoa'me fae canqque'fa pasasi ña ccase jisi tsu Saraja tsandie du'shuve isuya.

¹⁵Tsa'caen susi pañamba Saraja dyopa a'tiemba su: —Me'in, feñambi gi. Tsa'ma Na'su Chigaja su: —Atte gi que feña'choma. Sodomama ccusheñe iñajan'cho

¹⁶Tsa'caen condasepa an nanimba pasiasundeccu jangipa Sodoma canqqueni jaye ashaen'fa. Abrahamjan camoeñe in'jamba re'riccoe tise'pai'ccu fae'ngae ja.

¹⁷Tsonsi Na'su Chigaja qquen asi'ttaen: “Ñotssi tsu ña tsoña'choma Abrahamnga condaye.

¹⁸Nane tiseja tsain'bitssi a'ive atapasi joccapitssia aindeccuve tsu da'faya. Tisei'ccu gi poi ande'su aindeccuma ñotsse tsoña.

¹⁹Nane tisema gi in'jan cuintsu tise mandasi tise dushundeccu, tise omba'su dutssiyendeccu'qque ña su'choma pañamba ñotsse canse'faye. Tsa'caen tson'ninda gi pa'cco ña su'choma tsoña.”

²⁰Tsa'caen asi'ttaemba Na'su Chigaja su: —Sodoma canqque'su aindeccu, Gomorra canqque'su aindeccu'qque ñoa'me dyo'oe egae tsincon'fa. Tsa'caen tsincon'choma poi ande'su aindeccu in'jamba condasecco'fasi gi paña.

²¹Tsane gi japa atesuya tise'pa ña pañaqquia'caen tsincon'choma. Attepa gi in'jaña.

²²Tsa'caen su'je'ni tsa faesu dos pasiasundeccuja Sodomani jaye ja'fa. Tsa'ma Abrahamjan toya Na'su Chigai'ccu ccutsupa

²³ti'tsse catsepa iñajampaña: —¿Ñoa'me ti qui egae tsinconsundeccui'ccu fae'ngae ño'andeccuma'qque fi'ttiya?

²⁴¿Nane cincuenta ño'andeccu tseni can'jen'ni'qque ti qui poiyi'cco tsa canqquesundeccuma fi'ttiya? Tsambi'ta, ¿ño'andeccuma ccushaeñe ti qui antteya?

²⁵Ñoa'me qui oshambi tsa'caen ño'andeccuma egae tsinconsundeccui'ccu fae'ngae fi'ttiye. Nane tsendeccuja fae'ngae egae tsincon'fambi. Me'in, tsa'caen qui tsoña'bi. Nane queja poi aindeccu injama'choma somboen'su, ¿poiyi'ccoma ñotsse in'jan'da ti qui ñotsse tsoña?

²⁶Pañamba Na'suja su: —Cincuenta ño'andeccuma tseni atte'ta gi poiyi'cco tsa canqque'su aindeccuma ccushaeña.

²⁷Toya'caen tsu Abrahamjan su: —Queja Chiga. Ñajan aqquia a'i gi. Tsa'ma ña injanga qquen afasi ñama iyicca'yejama.

²⁸¿Cinco ño'andeccu cincuentave nepiya'cho shaca'ni'qque ti qui poiyi'cco tsa canqque'suma fi'ttiya? Tsonsi Na'suja su: —Cuarenta y cinco ño'andeccuma atte'ta gi poiyi'ccoma ccushaeña.

²⁹Toya'caen Abrahamjan su: —Da, ¿cuarenta ño'andeccuma tseni atte'ta–? Tsonsi Na'suja su: —Cuarenta can'jen'ninda gi antteya.

³⁰Ccase Abrahamjan su: —Ñama iyicca'yejama. Tsa'ma, ¿aqquia treintaveyi atte'ta–? Na'suja su: —Treintave atte'ta gi antteya.

³¹Ti'tsse tsu Abrahamjan su: —Ñoa'me opa gi ya'caen ña Na'suma afaye. Tsa'ma, ¿veinteveyi atte'ta ti qui antteya? Na'suja su: —Ju, veinteveyi atte'ta gi tsa canqque'su a'ima fi'ttiya'bi.

³²Toya'caen Abrahamjan su: —Chigáne, ña Na'su, ñama iyicca'yejama. Tsa'ma ti'tsse fae seyi gi afaya. ¿Mingae qui tsoña aqquia diez ño'andeccuma atte'ta? Tsonsi Na'suja su: —Nane ñoa'me ño'andeccuma diezve atte'ta gi tsa canqquesundeccuma fi'ttiya'bi.

³³Na'suja tsa'caen Abrahami'ccu afa nanimba ja. Abraham'qque toequi tise carpa tsaoni shanda.