Read A'ingae Génesis 25 Bible Online

Génesis 25 - A'ingae bible

Génesis 25

¹Abrahamjan faesu pushesuma pushe, Cetura qquen inisecho'choma.

²Tsa'caen pushepa tsu ti'tsse dushundeccuve atapa. Nane tsendeccumbe inise tsu Zimram, Jocsán, Medán, Madián, Isbac toya'caen Súa.

³Jocsán tsu Seba toya'caen Dedán yaya. Dedán omba'su dutssiyendeccu tsu asureo'su, letuseo'su, toya'caen leumeo'su aindeccu.

⁴Madián dutssiyendeccu tsu Efa, Efer, Hanoc, Abida toya'caen Elda. Nane pa'cco vandeccu tsu Cetura dushundeccu.

⁵Isaac tsu isu pa'cco tise yaya Abraham pasi isuya'choma.

⁶Tsa'ma Abraham faesuma pushepa du'sian'chondeccuja aqquia afe'choma tsu isu'fa. Nane Abraham toya cansuite tise faesu dushundeccuma Isaac'ye joqquitssiamba chiga sombo'jefanga moe cuintsu tseni canse'faye. Abraham pasi a'tu'cho

⁷Abrahamjan ciento setenta y cinco canqque'fa an'biamba pa.

⁸Nane opatsse cansé coenza ccashe'yeve dapa pa. Papa tise tayopi'su coenzandeccu can'jen'ni (Chiga sefacconi) ja.

⁹Pasi tise dutssiyendeccu Isaac toya'caen Ismael tisema a'tu'fa Macpela fattocco changonga, tsa Mamre canqque chiga sombo'jefani'su chango. Nane Abrahamjan tsa changoma chava hitita aindeccu'su Zohar dutssi'ye Efrómbema. Tse'ttinga Abrahamma a'tu'fa tise pushe Sara'yei'ccu pporotsse.

¹¹Abraham tayo pasi Chigaja Isaacma ñotsse tson. Nane Isaacja “Chiga cansepa ñama atte” qquen inisecho'cho Lajairoi poso jin'ttini canse. Ismael omba'su dutssiyendeccu

¹²Vandeccu tsu Ismael dushundeccu, tsa Abraham Sarambe egipto'su sema'su Agarnga du'sian'chombe dushundeccu.

¹³Nane coenzai'ccu ashaensi tsu: Nebaiot, Cedar, Adbeel, Mibsam,

¹⁴Misma, Duma, Massa,

¹⁵Hadar, Tema, Jetur, Nafis toya'caen Cedema.

¹⁶Tsa'caen tsu inisian'fa Ismael doce dushundeccuma. Tise'pa iniseningae tsu tisu ande tise aindeccuma'qque inisian'fa. Nane poiyi'cco tsu tisupa ande'su na'suve da'fa.

¹⁷Ismaelja ciento treinta y siete canqque'fave an'biamba papa Chiga sefacconi tise tayopi'su coenzandeccu can'jen'ni ja.

¹⁸Tise dushundeccuja Asiriani ja'jequini can'jen'fa. Nane tsaja Egipto isevetssi tsu Havila, Sur enttingeni. Tise antiandeccumbe utufani can'jen'fa. Jacob, Esaúma'qque isu'cho

¹⁹Va tsu Abraham dutssi'ye Isaacne condase'cho.

²⁰Isaac cuarenta canqque'fave an'biamba Rebecama pushe, Betuel onque'nge tsa Labán que'ttema. Tsendeccuja arameondeccu, Padan-aramni cansesundeccu.

²¹Rebeca du'shuma isuye oshambisi Isaacja Na'su Chigama iñajan tise pushene. Iñajan'choma Chigaja pañasi Rebecaja surie da.

²²Dos du'shuve an'biansi toya isumbi'te tto'pani iyicco'je'fasi Rebecaja asi'ttaen: “¿Ma'camba tsu ña'ñejan qquen tsincon?” Tsa'caen asi'ttaemba Na'suma iñajansi tsu

²³tiseja su:“Que tto'panijan dos aindeccu tsu can'jen'fa.Nane dos canqquepa tsu toya isumbi'te iyicco'je'fa.Fae'cco tsu faesuma ti'tsse'tssiya.Nane coenza tsu chu'ama shondoya.”

²⁴Tise du'shuma isuya'cho nepisi Rebecaja dos du'shuve isu.

²⁵O'tie isu'choja cu'apa tosa'vu'cho'oyisi tisema inisian'fa Esaú.

²⁶Omboe tise quinshinme isusi tivei'ccu tise quindya Esaú tsu'ttema indi'cho. Tsa'caen sombosi tsu inisian'fa Jacob. Isaac sesenta canqque'fave an'bian'ni tsu Rebecaja tsa'caen du'shuma isu. Coenzanga afeya'choma chavaen'cho

²⁷Dushundeccuja coen'fa. Esaúja ñoa'me tsampini japa panzaye atesu'chove da. Tsa'ma Jacobja ppimppintssia a'ipa tsa'caen jacambipa pa'cco a'ta carpa tsaoni can'jen.

²⁸Isaacja Esaúma ñotsse in'jan tise panzapa i'je'choma an'jemba. Tsa'ma Rebecaja Jacobma ti'tsse in'jan.

²⁹Fae a'ta Jacob shoccoen'jen'ni Esaúja tsampine quimbipa jipa

³⁰su: —Chigáne ñanga afeja que sho'ccoen'cho'su cu'a se'vama. Qquipoe'supa gi paye tson'jen. (Tsa'caen'qque tsu Esaúma su'fa Edom, “cu'a” qquen suye.)

³¹Tsa'caen iñajansi Jacobja su: —Otie ñanga afeye suja quenga afeye su'choma, tsa dutssi'ye coenza isuya'choma, jai'ngae ña isuye.

³²Tsa'caen susi Esaúja su: —¿Jongoesune gi dutssi'ye coenza isuya'choma in'jaña qquipoe'supa paye tson'jen'da?

³³Tsa'caen susi Jacobja su: —Ja'ñoñi ñoa'metsse su'chove suja. Tsonsi Esaú ñoa'metsse supa dutssi'ye coenza isuya'choma Jacobnga antte cuintsu jai'ngae isuye.

³⁴Tsa'caen susi Jacobja pan toya'caen cu'a se'vama Esaúnga afe. Esaúja amba cu'i nanimba jangipa ja. Ni minga'vieyi'qque tisu isuya'choma afe'chone asi'ttaembe ja.