Read A'ingae Génesis 27 Bible Online

Génesis 27 - A'ingae bible

Génesis 27

¹Isaacja coenza ccashe'yeve dapa atte'jeye oshambi. Fae a'ta tise dutssi'ye coenza Esaúma ttu'sepa su: —¡Jaricho! Qquen susi Esaúja su: —Afaja, yaya.

²Tsonsi Isaacja su: —Tayo qui atte ña coenza ccashe'yeve da'choma. Maqui a'ta pa'ngae gi paya.

³Tsa'camba gi in'jan tsampini que battittianccui'ccu japa jongoesuveyi'qque fi'ttipa iye.

⁴Ipa ña añe in'janqquia'caen ya'yatssia aña'chove sho'ccoemba ija ña añe. Tsonsi gi toya pambi'te quenga ñotsse tsoña'chove afaya.

⁵Tsa'ma Rebecaja Isaac Esaúnga tsa'caen su'je'choma paña. Tsa'camba Esaú tsampini tise yayambe panza'su jasi

⁶Jacob, tise dutssi'ye chu'ama ttu'sepa su: —Paña gi que quindya Esaúnga que yaya qquen su'je'choma:

⁷‘Tsampini japa jongoesuveyi'qque fi'ttipa ña añe in'janqquia'caen ya'yatssia aña'chove sho'ccoemba ija ña añe. Amba gi toya pambi'te quenga ñotsse tsoña'chove afaya Na'su Chiga caña'jen'ni.’

⁸Tsa'cansi, jaricho, ña quenga su'choma ñotsse pañajan.

⁹Chivo ttuccuni japa dos chivo du'shu ñotssiama ñani ija. Ña gi que yaya in'janqquia'caen ya'yatssia aña'chove sho'ccoeña.

¹⁰Que qui ña sho'ccoen'choma angaya cuintsu amba quenga ñotsse tsoña'chove afaye toya tise pambi'te.

¹¹Tsa'ma Jacob tise mamanga su: —Ña quindyaja tosecco'oyi pa'cco ai'vo. Tsa'ma ñajan me'cho.

¹²Nane ña yaya ñama pporaemba atte'ta tsu in'jaña ñajan tisei'ccu cofe'je'chove. Tsomba tsu ñama ñotsse afambipa egave afaya.

¹³Tsa'ma tise mamajan su: —Jaricho, tsa egae afa'choja ñanga tsu antteyeya. Queja asi'ttaembe'yi ña suqquia'caen chivo du'shuma i'ngapa ija.

¹⁴Tsa'caen susi Jacobja chivo dushundeccuma i'ngapa afe tise mamanga. Tise mamajan isupa Isaac añe in'janqquia'caen ya'yatssia aña'chove sho'ccoen.

¹⁵Tsomba dutssi'ye coenza Esaú carpani an'bian'cho ñotssia ondiccu'jema somboemba dutssi'ye chu'a Jacobnga ondiqquian.

¹⁶Toya'caen chivo ttonoi'ccu Jacob tivenga tise catai'chonga'qque oppoen ma'tti tose me'ttianga.

¹⁷Tsa'caen ñoñamba tise sho'ccoen'cho, panma'qque tisenga afe cuintsu tise yayanga angapa afeye.

¹⁸Tsonsi Jacobja tise yaya can'jeni ca'nimba su: —¡Yaya! Tsonsi Isaacja su: —Va'tti gi can'jen. ¿Ma'can ña du'shu qui ji?

¹⁹Tsonsi Jacobja su: —Ña gi que dutssi'ye coenza Esaú. Tayo gi que suqquia'caen ñoñamba i. Chigáne jangi dyaipa ña panza'choma anjan. An nanimba Chiga ñanga ñotsse tsoña'chove afaja.

²⁰Tsonsi Isaacja iñajampaña: —¿Ma'caen qui jundeyi cachuipa panzapa ji, jaricho? Jacobja su: —Na'su que Chiga ñama fuitesi gi junde panza.

²¹Tsa'ma Isaacja su: —Ñanga catsepa antteja ña pporaencañe ñoa'me ña dutssi'ye Esaúve'se qui.

²²Tsa'caen susi Jacobja catse cuintsu tise yaya pporaencañe. Pporaencamba Isaacja su: “Aya'faja Jacob aya'fa. Tsa'ma tiveja Esaú tive'can.”

²³Nane Jacob tive tise quindya Esaú tive'caen tosa'vupasi Isaacja tisema atesuye oshambi. Tsa'ma tisenga ñotsse tsoña'chove afaye tson'jemba

²⁴ccase iñajampaña: —¿Ñoa'metsse ti qui ña dutssi'ye Esaú? Jacobja su: —Ju, ñanda gi Esaú.

²⁵Tsonsi tise yayaja su: —Afeja, jaricho, ña añe que panza'choma. An nanimba gi quenga ñotsse tsoña'chove afaya. Tsa'caen susi Jacobja aña'choma afe cuintsu añe. Toya'caen vinoma'qque afe cuintsu cui'ye. Isaacja amba cu'i nanimba

²⁶su: —Jaricho, ñanga catsepa mochaja.

²⁷Jacob mochaye catsesi Isaacja tise ondiccu'jema shonchhan. Tsa'caen shonchhamba tisenga ñotsse tsoña'chove qquen afa:“Ju, ña dutssi'yema shonchhansi Na'su Chiga nasipa'su andema ñotsse tsonsi ñoa'metsse tssu'jianqquia'can tsu.

²⁸Chiga tsu quenga sefani'su unjima afeya,Toya'caen ñotsse sho'yoya'cho andema.Tsonsi qui tsain'bio trigo, tsain'bio vinoma'qque an'biaña.

²⁹Tsain'bio a'i tsu quema paña'faya.Nane faesu ande'su aindeccu'qque quenga ccaru dyai'faya.Que antiandeccuma'qque qui mandaya.Nane que mamambe dushundeccu'qque quenga ccaru'faya.Majan quenga egae tsoña'chove afa'ninda Chiga tsu tisenga egae tsoña.Tsa'ma majan quenga ñotsse tsoña'chove afa'ninda Chiga tsu tisenga ñotsse tsoña.”

³⁰Isaac Jacobnga ñotsse tsoña'chove afa nanisi Jacob tise yayane somboin jasi tse'faei'ccuyi tsu Esaúja tsampine ji.

³¹Jipa tsa'qque ya'yatssia aña'chove sho'ccoemba tise yayani anga. Angapa su: —Yaya, jangipa anjan que dutssi'ye panzapa i'choma. Tsomba ñanga afaja ñanga ñotsse tsoña'chove.

³²Tsa'caen susi Isaacja iñajampaña: —¿Majan qui queja? Tsonsi Esaúja su: —Ña gi que dutssi'ye coenza, Esaú.

³³Tsa'caen susi pañamba Isaacja dyopa ttun'dundu'je afa: —Tsa'caenda, ¿majan tsu panzapa sho'ccoemba ya'yatssia aña'choma i? Que toya jimbi'te gi pa'cco tsa i'choma amba tsa i'suma ñotsse tsoña'chove afa. Tsa'caen ña susi tsu tisenga ñotsse tsoña.

³⁴Esaúja tise yaya su'choma pañamba quian'me i'namba fundopa afa: —Ñanga'qque ñotsse tsoña'chove afaja, yaya.

³⁵Tsa'ma Isaacja su: —Tayo tsu que antian jipa afopoemba quenga ñotsse tsoña'chove afaya'choma anga.

³⁶Tsonsi Esaúja su: —¡Ñoa'me tsa'cañasi ti qui Jacobve inisian'fa! Nane ja'ñojan dos se tsu ñambema qqueñamba itsa. Otie tsu dutssi'ye coenza isuya'choma itsa. Tsomba ja'ñojan ñanga ñotsse tsoña'chove afaya'choma'qque itsa. ¿An'biambi ti qui faesu afa'choveyi'qque ñanga ñotsse tsoña'chove afaye?

³⁷Tsa'caen susi Isaacja su: —Que canjan. Tayo gi Jacobnga afe que na'suve daya'chove. Nane poiyi'cco tise antiandeccu'qque tisema paña'faya. Toya'caen gi in'jan cuintsu tsain'bio trigo, tsain'bio vinoma'qque an'biañe. Tsa'camba, ¿jongoesuma gi quenga tsoña, jaricho?

³⁸Tsa'ma Esaúja quian'me iñajamba su: —¿Aqquia fae afa'choveyi ti qui an'bian, yaya? Chigáne ñanga'qque ñotsse tsoña'chove afaja. Tsa'caen supa ccase i'na fundo.

³⁹Tsa'caen i'nasi Isaacja su:“Nane queja ñotssia ande'ye joqquitssipa biani can'jeña, ni unjin'qque tui'jembinia.

⁴⁰Sundaroa'caen tisu matichi'ccu iyicco'jepa qui tisu andema an'biaña.Nane que antianma shondo'suve qui daya.Tsa'ma maqui a'ta quin'ame tson'da qui tise'ye ccushaya.” Jacob Esaúma dyopa ccuyin ja'cho

⁴¹Isaac Jacobma ñotsse tsoña'chove afasi Esaúja Jacobma chi'gapa qquen asi'ttaeñe ashaen: “Junde tsu ña yaya pasi i'naña'cho. I'na pasapa gi ña quinshin Jacobma fi'ttiya.”

⁴²Esaú tsa'caen in'jan'choma pañamba Rebecaja Jacobma ttu'seye manda. Ttu'sesi jisi tisema su: —Que canjan. Que quindya Esaú tsu que tson'chone quema fi'ttiye in'jan.

⁴³Tsa'cansi, jaricho, ñama pañajan: Jundeyi ccuyapa jaja Harán canqqueni, ña quindya Labán can'jeni.

⁴⁴Tseni canseccaja que quindya tise iyicca'ye'choma pasaya'ngae;

⁴⁵que tisenga tson'choma aqque'paya'ngae. Pasasi gi conda'suma moeña que ccase vani jiye. In'jambi gi fae a'tayi dos ña dushundeccu nepi'faye.

⁴⁶Omboe Rebecaja Isaacnga su: —Esaú pushe hititandeccu panshaen noñangiansi gi ñoa'me quimbipa paye in'jan. Jacob'qque va Canaán ande'su hititama pushe'ninda ñoa'me gi paya.