Read A'ingae Génesis 29 Bible Online

Génesis 29 - A'ingae bible

Génesis 29

¹Jacobja tise jayi'cho tsaiqui'ye japa chiga sombo'jeni'su andeni nepi.

²Tseni'su potreronga nepipa posoma atte. Tsa poso jin'tti tsu tres naccu oveja bojin ccui'fa. Nane tsa poso'su tsa'ccuma tsu tsendeccuja cu'iye atesu'fa. Poso chango'ttimajan rande patui'ccu picco'cho tsu.

³Nane poi naccu'su oveja tse'ttinga bosi tsu coirasundeccuja tsa patuma joqquitssiañe atesu'fa tise'pa ovejanga tsa'ccuma cui'ñañe. Oveja cu'i nanisi ccase tsu piccoya'cho.

⁴Jacobja catsepa oveja coirasundeccuma iñajampaña: —Antiandeccu, ¿que'ija manisundeccu qui? Tise'paja su'fa: —Ingija Harán'su'fa.

⁵Tsonsi Jacob ccase iñajampaña: —¿Que'ita ti qui atesu'fa Labán, tsa Nacor dutssi'yema? —Ju, atesu'fa gi —qquen tsu su'fa.

⁶Jacobja su: —¿Quinse'tssi ti can'jen? Coirasundeccuja su'fa: —Ju, Labánjan quinsetssi tsu. Que canjan, jovoe tsu tise onque'nge, Raquel, tise ovejandeccui'ccu vani jiña.

⁷Tsonsi Jacobja su: —Toya a'ta tsu. Nane toya tsu nepimbi ovejama piccoya'cho. ¿Mingapa qui tsa'ccuma cui'ñamba anga'fambi cuintsu shoshovima an'faye?

⁸Tsa'ma tsendeccuja su'fa: —Tsa'caen tsoñe osha'fambi gi. Nane ronda'jeya'cho tsu poi naccu'su oveja bosi coirasundeccuja va patuma joqquitssiamba ovejanga tsa'ccuma cui'ñañe.

⁹Tsa'caen Jacob tsendeccui'ccu afa'je'ni Raquelja nepi tise yaya ovejandeccui'ccu. Nane tise tsu ovejama coira'su.

¹⁰Tsa'caen tise ton'ton Labán ovejai'ccu jisi attepa tse'faei'ccuyi Jacobja posoma picco'cho patuma joqquitssiamba tise ton'ton Labán ovejandeccunga tsa'ccuma cui'ña.

¹¹Cui'ña nanimba Raquelma chigambiamba mochapa i'na.

¹²Tsomba Jacob tiseja Rebeca dutssi'ye, Labán quinshin qquen condasi pañamba Raquelja buttopa ja tise yayanga condaye.

¹³Labánjan tise que'ttembe du'shu Jacob ji'choma pañamba sombopa buttoin ja tisema cachuiye. Nepipa munsimba chigambiamba mocha. Tsomba tise tsaoni anga. Can'jemba Jacobja condase pa'cco tisu can'jeni tsomba ji'choma.

¹⁴Condase nanisi Labánjan su: “Ñoa'me qui queja ña anjampa'suyi.” Raquel, Leama pusheye Jacob sema'cho Jacobja fae ccovu pa'cco Labáni'ccu can'jen.

¹⁵Tsa'caen can'jensi Labánjan su: —Queja ña antian jipa aqquia ganambe'yi ñambe semaña'bi qui. Mi'nge'tsse in'jan'da ñanga condaja. Afepoeña gi.

¹⁶Labánjan dos onque'ngeme an'bian. Coenza tsu Lea; chu'aja Raquel.

¹⁷Leaja tise tso'fe ñotssimbi. Tsa'ma Raquelja tsu'ttene tsovepi me'detssi.

¹⁸Jacobja Raquelma injanchopa qquen su: —Que onque'nge chu'a Raquelne gi siete canqque'fa pa'cco quembe semaña.

¹⁹Tsa'caen susi Labánjan su: —Quenga afeye tsu ñotssi, faesu atesumbi'choanga afesa'ne. Ñai'ccu can'jemba semajan.

²⁰Tsa'caen susi Jacobja siete canqque'fa pa'cco Raquelne sema. Tsa'ma Raquelma ñotsse in'jamba tsa siete canqque'fama aqquia siete a'ta'canccoeyi in'jan.

²¹Siete canqque'fa pasasi Jacobja Labánma su: —Afeja ña pushema ña tisema pusheye. Tayo gi nani ña tisene semañe su'cho a'tama.

²²Tsa'caen susi Labánjan poiyi'cco tisei'ccu pporotsse canjensundeccuma ttu'se pushe'je'cho fiestave tsoñe.

²³Tsa'ma tsequi cose Labánjan Leama Jacobni anga. Angasi Jacobja tsai'ccu ana.

²⁴(Toya'caen Labánjan tise'be sema'su pushesu Zilpama afe, Leama coira'suve.)

²⁵Ccaqui a'ta sinte Jacobja tise Leai'ccu ana'choma in'jamba iyicca'yepa Labánma afa: —¿Ma'caen qui ñanga qquen tson? Ñajan Raquelne quembe sema. Tsa'camanda, ¿jongoesie qui ñanga afopoen?

²⁶Tsa'caen susi Labánjan su: —Vanisundeccuja coenzama otie chu'a tsa'nduye atesu'fambi.

²⁷Tsa'cansi va avuja'qui pushe'je'choma nanijan Leane. Tsomba faesu siete canqque'fave ñambe semañe in'jan'ninda gi Raquelma'qque quenga afeya.

²⁸Jacob pañamba in'jansi tsa Leane fiestaen'cho avuja'qui pasasi Raquelma'qque pusheye afe.

²⁹(Toya'caen Labánjan tise'be sema'su pushesu Bilhama afe, Raquelma coira'suve.)

³⁰Jacobja Raquelma'qque pushepa tise've Leama ti'tsse in'jamba faesu siete canqque'fave Labánmbe sema. Jacob dushundeccu

³¹Na'su Chigaja Jacob Leama chi'ga'choma attepa tisenga tson cuintsu du'shuma isuya'chove. Tsa'ma Raquelmajan dusumbive tson.

³²Leaja surive dapa fae tsandie du'shuve isu. Isupa su: “Na'su Chigaja ña ñombi'ye'choma atte. Tsa'cansi ja'ño tsu ña tsa'nduja ñama in'jaña.” Tsa'caen supa tsu tsa du'shuma inisian Rubén.

³³Can'jemba Leaja faesu tsandie du'shuve isu. Tsamajan inisian Simeón qquen supa: “Na'suja ñama chi'ga'choma pañamba faesu du'shuve ñanga afe.”

³⁴Toya'caen ccase tsandie du'shuve isupa su: “Ja'ño tsu ña tsa'nduja ñama in'jaña tres du'shuve an'biansi.” Tsa'caen supa tsu tsa du'shuma inisian Leví.

³⁵Lea ccase faesu tsandie du'shuve isupa su: “Ja'ño gi Na'su Chigama ñotsse afaya.” Tsa'caen supa tsu tsa du'shuma inisian Judá. Tse'ccoeyi isupa ti'tsse isumbe antte.