Read A'ingae Génesis 33 Bible Online

Génesis 33 - A'ingae bible

Génesis 33

¹Jacobja Esaú cuatrociento a'i'ccu jiña'choma attepa tise du'shuma attufaen tise'pa mamandeccui'ccu, nane Lea, Raquel, toya'caen tsa dos sema'su pushesundeccui'ccu.

²O'tie tsu dos sema'su pushesundeccuma tise'pa dushundeccui'ccu ccutsian. Tsendeccumbe sepaccofanga Leama tise dushundeccui'ccu ccutsian. Tsutopani Raquelmajan tise du'shu Joséi'ccu ccutsian.

³Tsa'caen tsomba tsendeccumbe otufanga japa siete se andenga puntssa'ñacca tise antianga catseye jayi.

⁴Tsa'ma Esaúja Jacobma attepa buttoin jipa munsin ancamba mocha. Tsa'caen tsomba poiyi'cco fae'ngae i'na'fa.

⁵I'na pasapa Esaúja pushesundeccu, dushundeccuma'qque attepa iñajampaña: —Vandeccuja, ¿ma'candeqquia tsu? Tsonsi Jacobja su: —Chiga quema shondo'suma ñotsse in'jamba afe'cho dushundeccu tsu.

⁶Tsonsi dos sema'su pushesundeccuja tise'pa dushundeccui'ccu catsepa andenga puntssan'fa.

⁷Omboe Leaja tise dushundeccui'ccu catsepa tsa'caeñi puntssan'fa. Tsambe omboe José, tise mama Raqueli'ccu catsepa tsa'caeñi tson'fa.

⁸Tse'faei'ccuyi Esaúja iñajampaña: —¿Ma'caen tsoñe qui in'jan tsa tsain'bitssi naccuve ña jiñamba atte'choma? Tsa'caen iñajampañasi Jacobja su: —Tsata tsu que ñama ñotsse tsoñe afe'je'cho.

⁹Tsa'ma Esaúja su: —Me'in, ña antian, nanitsse gi ña'qque an'bian. Quembema queyi an'bianjan.

¹⁰Tsa'ma Jacobja ccase su: —Me'in, que ñama ñotsse in'jan'da, chigáne tsa afe'choma isuja. Nane que tayo ñama ñotsse chigambiamba in'jansi gi avujatsse Chigama atteqquia'caen quema atte.

¹¹Tsa'cansi gi iñajan quenga afeye i'choma isuja. Nane Chiga tsu ñama ricove tsonsi gi osha'choma shacambitsse an'bian. Tsain'bitsse tsa'caen iñajansi Esaúja tsa afe'choma in'jamba isu.

¹²Isupa su: —Ñotssi tsu. Jinge va'ttie jaye. Ñajan quema o'tie gi jaya.

¹³Tsa'ma Jacobja su: —In'jan'cho antian, que'qque qui atesu du'shuja oshaya'bi. Toya'caen oveja suri, vaura surimanda tsu in'jaña'cho. Nane quian'me anga'nijan junde tsu quimbipa fae a'tayi poiyi'cco oveja paya.

¹⁴Bove ñotssi tsu queja injanga quema shondo'suma o'tie jaye. Tsonsi ñajan vasia've ma'caen ñama o'tie jayi'cho aiña'cho, toya'caen dushundeccu oshaqquia'caen jipa quema Seirni cachuiya.

¹⁵Tsonsi Esaúja su: —Ñotssi tsu. Tsa'ma antteja ñai'ccu ji'cho aindeccu'suma quenga catiye cuintsu quema fuite'faye. Tsa'ma Jacobja su: —Me'in, quema noñangiañe in'jambi gi.

¹⁶Tsequi a'tayi Esaúja toequi Seirni ja.

¹⁷Tsa'ma Jacobja Sucotni ja. Tse'ttinga tisumbe tsao'ñamba aiña'cho ttuccuve'qque ñoña. Tsa'cansi tsu tse'ttima inisian Sucot.

¹⁸Jacobja Padan-aramne sombopa quinsetssi mingae dambe'yi Canaán andeni nepipa Siquem canqque pporotsse tise carpama ccutsian.

¹⁹Nane cien corifin'di'ccu Hamor dutssiyendeccuma andeve chava tseni tise carpama ccutsiañe. Siquem'qque tsu Hamor dutssi'ye.

²⁰Can'jemba tsu Chiganga afe'jeya'chove ñoñamba inisian El-Elohe-Israel.