Read A'ingae Génesis 38 Bible Online

Génesis 38 - A'ingae bible

Génesis 38

¹Tseite Judája tise antiandeccu'ye joqquitssipa Adulam canqque'su a'i Hira tsaoni can'jen.

²Tseni can'jemba cananeo'su a'i Súa onque'ngema attepa tsama pushe. Tisei'ccu can'jensi

³surie dapa tsandie du'shuve isusi tsa du'shuma inisian Er.

⁴Can'jemba ccase surie dapa faesu tsandie du'shuve isusi tsa du'shuma inisian Onán.

⁵Toya'caen ccase faesu tsandie du'shuve isusi tisema inisian Sela. Nane Judá Quezibni can'jen'ni tsu Selama isu.

⁶Dutssi'ye coenza Er coensi Judája fae pushesu Tamarnga tisema antte.

⁷Tsa'ma Na'su Chigaja Er egae tsincomba cansesi chi'gapa tisema fi'tti.

⁸Er pasi tise yaya Judája Onánma su: —Que quindya'ye pa'nijan tsa panjen'choma pushepa du'sianjan cuintsu que quindya'ye'qque omba'su dushundeccuve an'biañe.

⁹Tsa'ma Onánjan du'siansi tsa du'shuja tise'beya'bi qquen in'jan. Tsa'caen in'jamba ñoa'me du'siañe in'jambipa aqquia tsincon tise du'siansi tise quindya'yembe omba'su dushundeccuve sombosa'ne.

¹⁰Tsa'caen tsinconsi Na'su Chigaja tise tsincon'choma chi'gapa Onánma'qque fi'tti.

¹¹Tsonsi Judája tise china Tamarma su: —Panjen'choyi canseja que yaya tsaoni ña dutssi'ye Sela coenzave dasi tisema afeya'ngae. Nane Judája Sela'qque tise quindyandeqquia'caen paya qquen in'jamba tsa'caen su. Tsa'caen susi Tamarja tise yaya tsaoni can'jeñe ja.

¹²Tsa'caen jasi can'jemba Judá pushe, tsa Súa onque'ngeja pa. Tise pushe pasi ñombi'ye'choma pasapa Judája Timnat canqqueni ja tise ovejandeccu tosema chattujeni. Adulamita'su a'i Hira'qque tise amigopa tisei'ccu fae'ngae ja.

¹³Tamarja tise quitsa ccashe'ye Timnatni tise ovejandeccu tosema chattu'su jayi qquen pañamba

¹⁴panjen'chove canjaeñe ondiccucho'choma oshichhapa tisu camba'juma oppoen cuintsu majañi'qque tise've attembe can'faye. Tsa'caen oppoemba japa Enaim canqqueni cani'jen'tti dyai, Timnatni ja'je'cho tsaiquini. Nane tayo Sela coenzave dasi tise yaya tisenga afembisi tsu tsa'caen tson.

¹⁵Judája tsangaé panshaenjimba tsa pushesuma attepa in'jan tisu ai'voi'ccu gana'su pushesu qquen. Nane tsa pushesuja tisu camba'juma picco'chosi tsu tsa'caen in'jan.

¹⁶Tsa'caen in'jamba tsaiqui utufa'ye tsa pushesunga catseye ja, tsa pushesuja tise china qquen atesumbipa. Catsepa su: —¿Antte ti qui ña quei'ccu ccuiye? Pushesuja su: —Ñai'ccu ccui'ta, ¿jongoesuma qui ñanga afeya?

¹⁷Tsonsi Judája su: —Ña chivo naccu'suma gi fae'ccoe afeya. Tsonsi pushesuja su: —Ñotssi tsu. Tsa'ma, jongoesu quembema ñanga afeja que chivoma moeña'ngae ña an'biañe.

¹⁸Tsonsi Judá iñajampaña: —¿Jongoesu ñambema quenga catiye qui in'jan? Pushesuja su: —Que pisa tevaen'jen'choma tise andu'fai'ccu, toya'caen que accuicco'choma'qque ñanga afeja. Tsa'caen susi Judája tsesuma afepa tisei'ccu ccuipa jasi Tamarja toequi tise yaya tsaoni japa tisu oppoen'choma fettapa panjen'cho ondiccucho'choma ccase ondiccu. Can'jemba surie da.

²⁰Omboe Judája tise amigo adulamitanga chivoma moe cuintsu pushesunga angapa afesi ccane'qque tise afe'choma toequi moeñe. Tsa'ma tise amigoja japa tsa pushesuve attembi.

²¹Attembipa tseni'su tsandiendeccuma qquen iñajampaña: —¿Mani tsu tsa Enaini'su pushesu, tisu ai'voi'ccu gana'suja can'jen, tsa tsaiqui utufani dyai'su? Tsa'ma tsendeccuja su'fa: —Va canqquenija ni fae tisu ai'voi'ccu gana'su pushesuyi'qque can'jen'fambi.

²²Tsa'caen su'fasi toequi Judá can'jeni jipa su: —Attembi gi tsa pushesuve. Toya'caen tseni'su tsandiendeccuja su'fa tsenijan tsesu pushesu can'jen'fambi.

²³Tsonsi Judája su: —Cuintsu tsa osha'cho ñambeja tsangae nepija aindeccu pañamba ingi'ccu feña'fasa'ne. Ñoa'metsse tisenga afeya gi ñajan chivoma moe'ma qui tisema attembi.

²⁴Tres ccovu pasasi Judánga jipa conda'fa: —Tamar, tsa que china, tsu faesu tsandiei'ccu ccuipa ja'ñojan surie dapa can'jen. Pañamba Judája fundopa su: —¡Tsa'o'ye somboemba tisema oque cati'faja!

²⁵Tsa'ma tisema oqueye somboenjin'fasi Tamarja tise quitsa ccashe'yeve aya'fae moe: “Va osha'chombe na'su tsu ñamajan surive tson. Ñotsse camba atesuja majambe tsu va pisa tevaen'jen'cho tise andu'fai'ccu toya'caen va accuicco'choja.”

²⁶Judája tsama attepa tise'be qquen atesupa su: “Va pushesuja ñotsse tsu tson. Tsa'ma ña gi egae tson. Nane ña dutssi'ye Selama tisenga afembisi tsu tsa'caen tson.” Tsa'caen supa ni minga'ni'qque ccase tisei'ccu tsa'caen cansembi.

²⁷Isuya'cho a'ta nepisi Tamarja dos du'shuve isu.

²⁸Ñoa'me isu'jequi fae du'shuja tiveyi sombo. Sombosi isian'suja iro cu'ai'ccu du'shu tivema tandamba su: “Va tsu o'tie sombo'cho.”

²⁹Tsa'ma tse'faei'ccuyi tsa du'shuja tise tivema toequi zuña. Tsa'caen zuñasi faesu du'shuja ñoa'me sombo. Tsa'cansi tsu fuite'suja “¿Ma'caen qui pashamba ji?” qquen supa Faresve inisian.

³⁰Omboe faesu du'shuja sombo, tsa cu'a iroi'ccu tivema tandan'cho. Tsama inisian Zara.