Read A'ingae Génesis 48 Bible Online

Génesis 48 - A'ingae bible

Génesis 48

¹Tsa'caen tsonsi can'jencca'ta Joséja paña tise yaya paji'choma. Pañamba can'su jayipa tise dos du'shuma, Manasés toya'caen Efraínma anga.

²Tise dutssi'ye José ji'choma conda'fasi pañamba Jacobja vanamba tise ana'jen'cho'ye jangi dyai.

³Jangi dyaipa Josénga su: —Tsa Chiga Osha'choma Oshacho'cho tsu Canaán ande'su Luz canqqueni ñanga attiamba ñotsse afapa

⁴qquen su: ‘Que canjan, ña gi tsoña cuintsu queja tsain'bio du'shuve atapasi que omba'su dushundeccu'qque tsain'bio ande'suve dapa fae naccufaya'chove. Toya'caen gi que omba'su dushundeccunga va andema afeya. Afesi tsangae tsu tise'pambeve daya.’

⁵Ja'ñojan ñotssi tsu. Mapán ña toya va Egiptoni quei'ccu canseye toya jimbi'te Efraín toya'caen Manasésve isu'cho'qque, ñambe'fa tsu. Tsendeccu tsu ñoa'me ñambe'fa ña Rubén toya'caen Simeóncan'fa.

⁶Que vandeccuma omboe isu'cho tsu quembe'faya. Tsa'ma tsendeccu Efraín, Manasés antiandeccupa tsu tise'pa quindyandeccu aindeccui'ccu fae'ngae isu'faya.

⁷Nane ñajan Padan-aramni japa shandapa jiñasi que mama Raquelja pa. Nane Canaán andeni nepipa toya Efratani nepimbe'yi tsu pa. Tsa'caen pasi gi Efrata'su tsaiquinga a'tu. Tse'tti tsu ja'ñojan Belén.

⁸Tse'faei'ccuyi Israelja José dushundeccuma attepa iñajampaña: —Vandeccuja, ¿ma'candeqquia tsu?

⁹Joséja su: —Vandeccu tsu Chiga va Egiptoni ñanga afe'cho dushundeccu. Tsa'caen susi tise yayaja su: —Chigáne tise'pama ñanga catsianjan ña pporaemba tise'panga ñotsse tsoña'chove afaye.

¹⁰Israelja coenza ccashe'yeve dapa tso'fe dañongepa ñotsse atteye oshambi. Tsa'cansi Joséja tise dushundeccuma tise yayanga catsian. Catsiansi Israelja tise'pama mochapa munsin.

¹¹Tsomba Joséma su: —Minga'ni'qque quema atteya'bi qquen in'jan'cho gi Chiga anttesi quema attepa toya'caen que dushundeccuma'qque atte.

¹²Tsa'caen susi Joséja tise dushundeccuma tise yáya'ye joqquitssiamba camba'jui'ccu andenga puntssan ccui.

¹³Omboe Joséja tansinfa'su tivei'ccu Efraínma indipa ccutsian tise yayambe pavefanga. Tsomba pavefa'su tivei'ccu Manasésma indipa ccutsian tise yayambe tansinfanga.

¹⁴Tsa'ma Israelja tise tivema avujaccove yasapa tansinfai'ccu Efraín, tsa chu'ambe tsovema pporaen. Toya'caen pavefai'ccuja Manasés, tsa aisheve isu'chombe tsovema pporaen.

¹⁵Tsa'caen pporaen'chopa Josénga ñotsse tsoña'chove qquen afa:“Chiga Quitsa, ña yayandeccu Abraham'ye toya'caen Isaac'ye quema ñotsse pañamba canse'fa.Que qui ñama isu'cho a'ta ashaemba ja'ñoa'ngae ñama ñotsse coira'je.

¹⁶Toya'caen quema sefacconi'su shondo'suja osha'cho ega'ye ñama ccushaen.Chigáne va ña dushundeccuma ñotsse tsonjan cuintsu tsendeccu'ye ña inisema aqque'pambitsse canse'faye;toya'caen ña yayandeccu, Abraham'ye toya'caen Isaac'ye inisema'qque injan'jen'faye.Va dushundeccuma ñotsse tsonjan cuintsu tsain'bie atapapa poi ande on'batsse canse'faye.”

¹⁷Tsa'ma Josénejan tsa'caen tise yaya tansinfa'su tivei'ccu Efraín tsovema pporaen'choja ega qquen in'jan. Tsa'caen in'jamba tise yaya tivema indi, Efraín tsove'ye itsapa Manasés tsovenga indiañe in'jamba.

¹⁸Indipa su: —¡Me'in, qquen tsonjama, yaya! Va tsu coenza. Vambe tsovenga tansinfa'su tivei'ccu pporaenjan.

¹⁹Tsa'ma tise yayaja tsa'caen tsoñe in'jambipa su: —¡Tayo gi in'jan, jaricho, tayo gi in'jan! Toya'caen tsa'qque tsu joccapitssia aindeccuve atapaya. Tsa'ma tise quinshin tsu tisema ti'tsse joccapitssiya. Nane tsambe omba'su dushundeccu tsu ti'tsse tsain'bitsse atapa'faya.

²⁰Tsequi a'tayi Jacobja ñotsse tsoña'chone afapa qquen su: —Poi israendeccu ñotsse tsoña'chone su'choma afaye in'jan'da tsu que'i inisema afapa qquen su'faya: ‘Cuintsu Chiga Quitsaja Efraín toya'caen Manasésnga tsonqquia'caen quenga'qque tsoñe.’ Tsa'caen tsu Israelja Manasésma ti'tsse'tssia've Efraínma afa antte.

²¹Omboe Joséma su: —Que canjan, paye gi tson'jen. Tsa'ma Chiga tsu quei'ccu can'jemba toequi que tayopi'su coenzandeccu'ye canse'cho andeni angaya.

²²Toya'caen quenga gi que antiandeccuma ti'tsse'tsse afe. Nane Siquem canqquema gi quenga afe, tsa amorreo aindeccui'ccu ña iyiccopa itsa'cho andema.