Read A'ingae Génesis 49 Bible Online

Génesis 49 - A'ingae bible

Génesis 49

¹Jacobja poiyi'cco tise dutssiyendeccuma ttu'sepa su: “Ñanga catse'faja ña que'inga condaye jai'ngae ma'caen daya'choma:

²Ñanga catse'faja Jacob dutssiyendeccu.Catsepa paña'faja que yaya Israel su'choma.

³Rubén, que qui ña dutssi'ye coenza.Que qui ña quin'sui'ccu me'ttia'ye tetacho naqquia'caen ña quin'sui'ccu aisheve isu'cho.Que qui o'tie joccapitssipa osha'choma oshacho.

⁴Tsa'ma ja'ñota qui tsa'cambi.Jongoesu shave'pa'caen qui injansembe injangae tsincon.Nane tsa'camba qui ña ambian'choi'ccu ña ana'jen'chonga ccuipa egae tsincon.

⁵Simeón toya'caen Levíta tsu antianaccu.Tise'pa matichija faesuma dañoñe'ñi tson'jen'cho.

⁶Minga'ni'qque gi tise'pa tsa'onga fae'ngae boye in'jambi.Nane iyicca'yepa qui aindeccuma fi'tti'fa.Aqquia injanga iyicca'yepa qui vaura tsu'ttema uccasho'fa.

⁷Ega tsu. Ñoa'me ega tsu que'i ttesia'caen iyicca'ye'fa'choja.Ña gi que'ima metsse attufaeña poi Israel andeni canse'faya'chove.

⁸Judá, que antiandeccu tsu quema ñotsse in'jamba afa'faya.Tsifoye indipa patsuqquia'caen qui quema iyiccayesundeccuma patsuya.Ñoa'me que antiandeccu'qque tsu quenga ccarupa dyai'faya.

⁹Queta qui ttesi du'shua'can.Que indipa an'choma catipa ansundepa ccuipa ronda'je.Nane rande ttesia'caen qui andenga ccui.Tsa'caen ccui'ninda, ¿majan tsu quema noñangiaña?

¹⁰Ni majañi'qque tsu Judá manda'je'choma itsaya'bi.Ni tise tiveni an'bian'cho coen quini'ccoma'qque itsa'faya'bi tsa quini'cco na'su jiya'ngae.Tsama tsu poi canqquesundeccu paña'faya.

¹¹Tsa tsu tise boro du'shuma ofatsajanga tandaña.Tise ondiccu'jema tsu vinoi'ccu ma'ppaña.Nane bochoatsaja tsa'ccui'ccu tsu cashiya.

¹²Tise tso'feta tsu vinoma ti'tsse si'an.Tise tte'ttoja vaura chochoma ti'tsse tototssi.

¹³Zabulónda tsu mar otafani canseya.Tse'tti tsu barco ccattufa'je'ttiya.Nane tise ande utufaja Sidón andepi nepiya.

¹⁴Isacarta tsu andu'choma andu'su boro'can.Tise ñofaje'cho tsu oveja ttuccu enttinge.

¹⁵Nane ande ñotssiama attepa tseni ño'faye ñotssimanda tise sepaccoma canjaen andupa angaye.Ni poini afambe'yi tsangae sema'suve da.

¹⁶Danda tsu tise aindeccuma mandaya fae'ngae faesu Israe'su aindeqquia'caen.

¹⁷Toya'caen Danda tsu iyoa'caen tsoña.Nane iyo tsaiquini tsu ccui cavayo tsu'ttema sinttuye cuintsu tsani dyai'suja amppiye.Tsa'caen tsu Danjan patsuya.

¹⁸Ña Na'su, ¡ronda'je qui que ñama ccushaeñe!

¹⁹Gadmanda tsu sundarondeccu iyiccoye ji'faya.Tsa'ma omboe tsu tiseja patsupa mandiaña.

²⁰Aserta tsain'bitsse panme an'biamba nasundeccunga'qque anqque'suma afe'jeya.

²¹Neftalíta tsu shan'ccoa'caen opatsse jacan. Tise dushundeccu'qque me'detssi'fa tsu.

²²Joséta tsu quini'cco na'en otafani ccutsupa ñotsse namba ttuccu ccafanga'qque furiqquia'can.

²³Battittiansundeccu tsu tisema chi'gapa noñangiamba pa'cco a'ta battittian'jen'fa.

²⁴Tsa'ma Joséja tise tive quin'amba oyambitsse tise battittianccuma indipa poini battittian'jen.¡Ñotssi tsu Jacobmbe Chiga Osha'choma Oshacho'cho!¡Ñotssi tsu coira'sumbe inise. Tise tsu israendeccuma angacan!

²⁵José, ¡ñotssi tsu que yaya'yembe Chiga! Tsa tsu quema fuiteya.Tsa Chiga Osha'choma Oshacho'cho tsu quema ñotsse tsoña'chone afaya.¡Nane sefaccone tsu quema ñotsse tsoña!¡Mar tsosine'qque tsu quema ñotsse tsoña!Toya'caen quema ñotsse tsonsi tsu que'su pushesundeccuja tsain'bio du'shuve isupa chochoemba coeña'faya.

²⁶Ña que yayata gi ña yaya'ye ñama ñotsse tsoña'chove su'choma ti'tsse quema ñotsse tsoña'chove afa'je.Nane Chiga Joséma tise antiandeccu'ye ttu'sesi tsu ccotta'cco sefaya'ngae va ñotsse tsoña'cho su'choja José aindeccunga tsoña.

²⁷Benjamínda tsu putsa'su ain'can.Nane sinte tise indi'choma amba sime tise an antteye'choma attufaen.”

²⁸Vandeccu tsu Israel aindeccu'su doce naccu. Toya'caen tsa'caen tsu tise'pa yayaja poiyi'cco tise dutssiyendeccunga tise'pa jai'ngae ma'caen daya'chove afa. Jacob pa'cho

²⁹Fae a'ta Jacobja tise dutssiyendeccunga qquen manda: —Ca'tsa tsu ña paya'cho nepiji. Ña pa'ninda ña tayopi'su coenzandeccuyi'ccu pporotsse ñama'qque a'tu'faja. Nane hitita'su a'i Efrón ande'su fattocco changonga ñama a'tu'faja.

³⁰Tsa tsu Macpela fattocco chango Mamre canqque isevetsse Canaán andeni. Abraham'ye tsu tsa fattocco chango, toya'caen tse'tti'su andema'qque Efrómbema chava tise aindeccuma tsanga atu'jeye.

³¹Tse'ttinga tsu a'tu'fa Abraham, tise pushe Sarama'qque, toya'caen Isaac, tise pushe Rebecama'qque. Toya'caen gi ña'qque tse'ttinga Leama a'tu.

³²Tsa ande toya'caen tsa changota tsu hititandeccuma chava'cho.

³³Jacobja tsa'caen tise dutssiyendeccunga condase nanimba ccase ana'jen'chonga ccuipa pa.