Read A'ingae Génesis 9 Bible Online

Génesis 9 - A'ingae bible

Génesis 9

¹Chigaja Noé, tise dutssiyendeccuma'qque ñotsse tsoñe in'jamba qquen su: “Pa'cco andeni japa can'jemba atapa'faja.

²Toya'caen tsu poiyi'cco va andeni canseqque'su, sefani chhajeqque'su chhiriria, andenga manguqque'su, marni'su avu'qque que'ima dyoe'sui'ccu in'jan'faya. Nane ña que'inga afesi qui poiyi'cco tsendeccuma manda'faya.

³Toya'caen pa'cco cansian jincho'cho tsu que'i anqque'su. Nane ande'ye sho'yoqque'su tetachoma anqque'suve que'inga afeqquia'caeñi gi osha'cho cansian jincho'choma'qque que'inga afe cuintsu amba canse'faye.

⁴Tsa'ma aña'cho na toya canseqquia'caen anjampapama qui an'faya'bi.

⁵Toya'caen poi a'i shacama, poi cansian jincho'cho shacama'qque gi iñajaña. Nane que'i anjampai'ccu qui afepoeña'cho. Poiyi'ccoma gi shacave iñajaña tisupapora canse'chone.

⁶Majan faesu a'ima fi'tti'nindafaesu a'i tsu tsama'qque fi'ttiya.Nane Chiga tisia'caen a'ive agattoen'choma fi'ttipa tsu tsa'caen paya.

⁷Tsa'ma que'ija poi andenga japatsain'bio du'shuve isupa ñotsse atapa'faja.”

⁸Toya'caen Chigaja Noéma, tise dutssiyendeccuma'qque su:

⁹“Que canjan. Que'i'ccu gi fae'ngae injanccopa toya'caen que'i omba'su dutssiyendeccui'ccu'qque fae'ngae injancco'faya.

¹⁰Nane poiyi'cco que'i'ccu tsa'o shavo'ye sombopa can'jendeccu —chhiriria, vaura'can, poi tsampini jincho'choi'ccu'qque gi fae'ngae injancco'faya.

¹¹Que'i'ccu cambian'masia've fae'ngae injanccopa gi su: Ccatsse gi poiyi'cco cansian jincho'choma ccase na'ei'ccu fi'ttiya'bi. Ni ccatsse gi pa'cco andema ccase na'ei'ccu piccopa dañoña'bi.

¹²Uttufasima gi canjaeña unjimbanga cuintsu que'i attepa Ña que'i'ccu ja'ño jai'ngae'qque poi cansian jincho'choi'ccu injancco'fa'choma injan'jeñe. Tsama attepa qui in'jan'faya Ña va ande'sui'ccu injancco'fa'choma.

¹⁴Nane ña mandasi unjimba jangisi uttufasima attepa

¹⁵gi Ña que'i'ccu, poi cansian jincho'choi'ccu fae'ngae injancco'fa'choma injan'jeña. Ccatsse tsu na'enjan ccase andema piccoya'bi poi cansian jincho'choma fi'ttiye.

¹⁶Nane uttufasi unjimbanga attiansi gi tsama attepa ña poi ande'su osha'cho cansian jincho'choi'ccu fae'ngae injancco'fa'choma injan'jeña.

¹⁷Tsa uttufasi tsu ña poi ande'su osha'cho cansian jincho'choi'ccu fae'ngae injancco'fa'choma canjaen'cho.” Tsa'caen tsu Chigaja Noéma su.

¹⁸Noé dutssiyendeccu tisei'ccu tsa'o shavo'ye sombo'chondeccu tsu Sem, Cam, toya'caen Jafet. Camjan Canaán quitsa tsu.

¹⁹Tsa tres Noé dutssiyendeccupa tise'pa omba'su dutssiyendeccui'ccu tsu pa'cco andenga atapa'fa.

²⁰Noéjan andema sema'su tsu. Tise tsu o'tie ofa tsajama joñe ashaen.

²¹Jomba tsa nasi nama taipa vinome cupaen. Vinome cupaemba cu'ipa ccusi. Ccusipa chu'cco ccui tise carpa tsaoni.

²²Tsa'caen ccuisi Cam, tsa Canaán quitsa, tise yaya chu'cco ccui'choma atte. Attepa sombopa tise antiandeccuma conda.

²³Pañamba Sem, Jafeti'ccu sarupama sepaccofanga indipa sepaccopayi carpa tsa'onga ca'nimba tise'pa yaya chu'cco ccui'choma picco'fa. Nane ccanima camba tise'pa yaya chu'cco ccui'choma atte'fambi.

²⁴Ccusipa pasasi qquendyapa Noéjan in'jan tise du'shu chu'a tisema tson'choma.

²⁵In'jamba su:“Egae tsu tsoña Canaánga.Nane tise antiandeccu tisema mandasi me'detssia sema'suve tsu daya.”

²⁶Toya'caen tsu Noéjan su:“Na'su ña Chiga tsu Semnga ñotsse tsoña.Nane Sem tsu Canaánma semoeña.

²⁷Chiga anttesi Jafetja ñoa'me atapaya.Atapapa Semi'ccu fae'ngae can'jemba tise'qque Canaánma semoeña.”

²⁸Na'en tsa'caen pa'cco andema piccopa sambasi Noéjan ti'tsse tresciento cincuenta canqque'fave can'jen.

²⁹Nane noveciento cincuenta canqque'fave an'biamba pa.