Read A'ingae Lucas 1 Bible Online

Lucas 1 - A'ingae bible

Lucas 1

¹In'jan'cho Teófilo: Majan a'i tseyi me'ttia'ye Jesúsi'ccu can'jemba osha'choma attepa va ñotsse condase'choma inginga conda'fa. Tsain'bio a'i pañamba pa'ccoma tansintsse tevaen'fa. Ña'qque bo'tssingae osha'choma ñotsse atesupa ja'ño asi'ttaemba gi in'jan tansintsse quenga tevaeñe.

³(null)

⁴Qquen tevaensi qui tansintsse que osha'chove paña'choma atesuya. Juanma isuya'chone condase'cho

⁵Tayopi Herodes Judea ande na'suite Chigama afa'su Zacaríasja can'jen. Tisei'ccu fae'ngae Chigama afaye semasundeccuja Abiasundeccu tsu. Zacarías pushe'qque Chigama afa'su Aarón aindeccu'su pushesu tsu. Tise iniseja Elisabet.

⁶Tsendeccuja Chigave in'jamba ño'a'fa. Pa'cco Chiga manda'choma ñotsse pañamba shaca mecho canse'fa.

⁷Elisabetja du'shuve isumbe'yi coenza ccasheve da. Zacarías'qque ccashe'ye.

⁸Tseyi tise Abiasundeccu Chiga ettini semajeinte Zacarías'qque Chigama afa'suve sema'jen.

⁹Chigama afasundeccu in'janqquia'caen quini'ccocho'ccoma attufaen'fa majan Chiga ettinga ca'nimba ñome'bama oque oraeña'chove atesuye. Tsequi a'ta tsu quini'ccoja canjaen Zacarías ca'niña'chove.

¹⁰Zacarías ca'nimba ñome'bama oque oraen'jen'ni poiyi'cco a'i tsotefanga ccutsupa Chigama iñajan'jen'fa.

¹¹Tsa'caen Zacarías tisuyi ca'nisi Chigama sefacconi'su shondo'suja tisenga attian ñome'bama oque'je'chombe tansinfani ccutsupa.

¹²Zacaríasja tisema attepa asi'ttaemba dyo.

¹³Tsa'ma Chigama sefacconi'su shondo'suja tisema su: —Dyojama Zacarías. Tayo tsu Chiga Quitsaja que iñajan'choma paña. Que pushe Elisabetja tsandie du'shuve tsu isuya. Tisema qui inisian'faya Juanme.

¹⁴Que'i qui avujatssi'faya. Tisema isusi tsain'bio a'i'qque avujatssi'faya.

¹⁵Nane Tiseja Na'su Chiga joccapitssia a'iya tsu. Osha'cho ccusianqque'suma tiseja cu'iya'bi. Tsa'ma toya isumbi'te tsu Chiga Qquendya'pa tisenga ca'nimba in'jaeña.

¹⁶Du'shuja coenzave dapa tsu tsain'bio israendeccuma in'jaeña cuintsu Chiga Quitsama tise'pa Na'suve tta'tta'faye.

¹⁷Tiseja Na'suma o'tie tsu jiya. Tayopi'su Chiga Aya'fama afa'su Elías injama'choma an'bianqquia'caen tise'qque osha'choma oshaya. Tiseja aindeccuma in'jaeña cuintsu yayandeccu tise'pa dushundeccuma in'jan'faye; cuintsu egae tsinconsundeccu'qque ño'a a'i in'jan'chove ttatta'faye. Tsa'caen aindeccuma in'jaensi tise'paja Na'suma shondo'faya.

¹⁸Tsa'ma Zacaríasja Chigama shondo'suma su: —¿Ma'caen gi in'jaña que su'choja tansintssia've? Ñajan coenza ccashe'ye. Ña pushe'qque coenza ccashe.

¹⁹Tsa'caen iñajampañasi Chigama sefacconi'su shondo'suja su: —Ña gi Gabriel. Ña gi Chiga can'jeni ccutsu'cho. Tiseja ñama moen va ñotsse condase'choma quenga condaseye.

²⁰Tsa'ma ¡que canjan! Ña suqquia'caen tsu ñoa'me tsoña. Tsa'ma queja ña su'choma in'jambipa qui ayafambie dapa can'jeña que pushe du'shuma isuya'ngae.

²¹Tsa'caen condase'je'ni aindeccuja tsotefani Zacaríasve ro'ndá can'jen'fa. Junde sombombisi asi'ttaen'fa.

²²Tsa'caen asi'ttaen'jen'fani Zacaríasja sombopa afaye oshambipa tise tivei'ccu canjan'jaen. Tsa'caen afaye oshambisi poiyi'cco a'i in'jan'fa tise Chiga ettini can'jemba sefacconi'su attian'choma atte'chove.

²³Tsomba Zacarías Chiga ettini sema'jen'choma nanimba tise tsaoni ja.

²⁴Omboe tise pushe Elisabet surie dapa cinco ccovuve tsaoni can'jen. Can'jemba qquen in'jan:

²⁵“Ñajan du'shu mechopa ansangé can'jen. Tsa'ma Na'su Chiga ñama in'jamba ñama ñotsse tson cuintsu cca'i ñama afambe can'faye.” Jesúsma isuya'chone condase'cho

²⁶Seis ccovu pasasi Chigaja Tisema sefacconi'su shondo'su Gabrielma mandamoen Galilea ande'su Nasaret canqqueni.

²⁷Mandasi ja, chu'a pushesu, Maríanga condaye. Tsaja, toya tsandiema atesumbi'choa. Tsa'ma fae tsandie, José, tisema pusheye tayo iñajan. Joséja tayopi'su israe Na'su David a'i.

²⁸Gabrielja jipa Maríama ttu'sepa su: —¡María! Que qui Chiga in'jan'cho. Chigaja quei'ccu can'jen.

²⁹Tsama pañamba Maríaja injama'choni dyo. Jongoesie tsa'caen chigambian'chove atesumbipa asi'ttaen.

³⁰Tsa'caen dyosi Chigama sefacconi'su shondo'suja ti'tsse condase: —Dyombe canjan, María. Chigaja ñoa'me quema ñotsse in'jan.

³¹Surie dapa qui tsandie du'shuve isuya. Tisema qui inisiaña Jesúsve.

³²Tise tsu joccapitssiaya. “Joccapitssia Chigambe Dutssi'ye” qquen tsu poiyi'cco tisema afa'faya. Nane Tayopi'su Na'su Davidnga mandaye antteqquia'caen Na'su Chigaja tisenga'qque antteya cuintsu na'suve dapa mandaye.

³³Tsangae tsu tiseja israe aindeccuma manda'jeya. Tise na'suve da'choja minga'ni'qque pasaya'bi tsu.

³⁴Tsama pañamba Maríaja su: —¿Ma'caen tsu tsa'caen tsoña ñajan tsa'ndu mechoamajan?

³⁵Tsa'ma Chigama sefacconi'su shondo'suja su: —Chigaja osha'choma joccapitssiapa osha'choma oshacho. Chiga Qquendya'pa quenga ca'nisi Joccapitssia Chigaja quema oppoeña. Tsa'caen oppoensi que du'shuja ñoa'me egave mechosi tsu Chiga Dutssi'ye qquen su'faya.

³⁶Toya'caen que antian coenza Elisabet ccasheve dajipa surie da. Tsa du'shuve mechoa qquen su'cho tsu ja'ñojan surie dapa seis ccovuve can'jen.

³⁷Nane Chigaja osha'choma oshacho.

³⁸Tsonsi Maríaja su: —Dasu'. Ña gi Na'su Chigama shondo'su pushesu. Cuintsu Tiseja que suqquia'caen ñanga tsonjan. Tsa'caen susi Chigama sefacconi'su shondo'suja ja. María Elisabetma can'su ja'cho

³⁹Tsonsi Maríaja ñoñamba Judea ande'su ccotta'cco'su canqqueni pasia'su ja.

⁴⁰Japa Zacarías tsa'onga ca'nimba Elisabetma chigambian.

⁴¹María chigambian'choma Elisabet pañasi tise du'shuja ttopa'ye quia'me oya. Tse'faei'ccuyi Chiga Qquendya'pa in'jaensi

⁴²Elisabetja quia'me afapa su: —Quema tsu Chigaja poiyi'cco pushesuma ti'tsse'tsse injancho. Que du'shuma'qque tsu ñoa'me injancho.

⁴³Ña na'su chan ñama can'su jisi gi ñoa'me avuja.

⁴⁴Nane que chigambian'choma ña pañasi tsu tse'faei'ccuyi ña du'shu'qque avujapa ña ttopa'ye quia'me oya.

⁴⁵Chigaja Tise su'choma ñoa'me tsoña. Tsama pañamba in'jamba qui ñoa'me avujatssiya.

⁴⁶Tsonsi Maríaja su:—Ña injama'choi'ccu gi Na'su Chigama ñotsse afa.

⁴⁷Chiga ñama ccushaen'su can'jensi tsu ña qquendya'pa'qque avujatssi.

⁴⁸Ña gi utu'ccoa Chigama shondo'su. Tsa'ma Chigaja ñama attepa ñotsse in'jan.Tsa'cansi poiyi'cco a'i tsu ja'ño, jai'ngae'qque conda'faya ma'caen Chiga ñama ñotsse in'jan'choma.

⁴⁹Tiseja Joccapitssiapa ñama ñotsse tson. Tise inise tsu Ño'a.

⁵⁰Poiyi'cco majan Tise've in'jamba canse'nijan tsendeccuma tsu mendeyeya.

⁵¹A'i quin'an tisu tivema canjaenqquia'caen Chigaja osha'choma oshapa canjaen.Aindeccu “Ña gi ño'a” qquen in'jan'ni'qque Chigaja tise'pama joqquitssian maña.

⁵²Tiseja Nasundeccuma joqquitssiamba bove'ccondeqquiama tsu ti'tsse'tssia've tson.

⁵³Qquipoe'sundeccuma o'fianqquia'caen ñotssiama afe.Tsa'ma osha'choma an'biansundeccumajan me'ccoeyi maña.

⁵⁴Israendeccuja Tisema shondosundeccusi Chigaja tise'pama fuite.Tayopi suqquia'caen tise'pamajan anttembe'yi tsangae mendeye'je.

⁵⁵Tsa'caen Chigaja ingi tayopi'su coenzandeccuma conda.Nane Abraham, tise dushundeccuma'qque tsa'caen fuiteye conda.

⁵⁶Maríaja tsa'caen Chigama ñotsse afapa tres ccovuve Elisabeti'ccu can'jemba toequi tise tsaoni ja. Juanma isu'cho

⁵⁷Elisabet du'shuma isuya'cho napisi tsandie du'shuve isu.

⁵⁸Pporotsse can'jensundeccu, antiandeccu'qque Chiga tisema ñotsse tson'choma pañamba fae'ngae avuja'fa.

⁵⁹Ocho a'ta pasasi israendeccu in'janqquia'caen du'shumbe ttonoma chhiyitevaeñe poiyi'cco a'i bo'fa. Bopa du'shuma tise yaya iniseningae Zacaríasve inisiañe in'jan'fa.

⁶⁰Tsa'ma chan tsu su: —Me'i. Tsa'cambi. Juanme tsu inisiaña'cho.

⁶¹Tsonsi tisema su'fa: —Tsa'ma me'i'on tsu que antian tsesu iniseve.

⁶²Tsomba du'shumbe yaya Zacaríasma iñajampañañe in'jamba tivei'ccu canjan'jen'fa cuintsu du'shuma jongoesuve inisiaña'choma condaye.

⁶³Tsonsi Zacaríasja canjan'jen'choma in'jamba canjan'jen cuintsu tisenga tevaenqque'suma afe'faye. Isupa tevaen: “Tise iniseja Juan.” Qquen tevaensi poiyi'cco a'i asi'ttaemba can'boen'fa.

⁶⁴Tse'faei'ccuyi Zacaríasja ccase afaye oshapa Chigama ñotsse afa.

⁶⁵Tsonsi pporotsse can'jensundeccuja dyopa can'boen'fa. Tsa'caen tson'chone tsain'bitsse condasecco'fa. Nane pa'cco ccotta'cco'su Judea ande'ye tsa'caen tson'chone condasecco'fa.

⁶⁶Poiyi'cco majan tsane pañamba injama'choni in'jamba su'fa: —¿Micoña tsu va du'shuja? Chigaja ñoa'me tisema in'jamba fuitepa angacan. Zacarías settapoen'cho

⁶⁷Chiga Qquendya'pa tisenga ca'nisi du'shumbe yaya, Zacaríasja, Chiga in'jaensi afa'choma afa:

⁶⁸“Ñotssi tsu israe Na'su Chiga Quitsa.Tise aindeccuma can'su jipa ccushaemba Tiseja ñotssi.

⁶⁹Tisema shondo'su David omba'su dutssiyendeccu'su quin'an ccushaen'suma ttu'sepa inginga moen.

⁷⁰Tayopi Chiga Tisema afasundeccuma in'jaensi tise'paja ingi ccushaya'chone afa'fa.

⁷¹Ingima iyiccayesundeccu'ye, ingima chi'gasundeccuye'qque Chigaja ingima ccushaeña.

⁷²Ingi tayopi'su coenzandeccuma mende'yeya qquen su'chopa tsu tsa'caen tsoña.

⁷³Nane Chigaja Abrahami'ccu condasepa ñoa'me tsoña'choma tansintsse conda.

⁷⁴Ma'caen ingija ingima iyiccayesundeccu'ye ccushapa tisema dyombi'tsse shondo can'faya'choma.

⁷⁵Tisema shondocamba gi ño'ame dapa tsangae egae tsincombe'yi tisei'ccu can'jen'faya.

⁷⁶Que, ña du'shuja, Sefacconi'su Chigama afa'su qui. Tsa'cansi tsu poiyi'cco a'i su'faya:‘Na'suma o'tie japa tsu Tise jiya'chove ñoñaña.’

⁷⁷Egae tsincon'choma joqquitssiaña'chone tsu poiyi'cco a'inga condaya cuintsu atesu'faye tsa'caen Chiga a'ima ccushaeña'choma.

⁷⁸Chiga Quitsa ñoa'me ingima mende'yepa tsa'caen tsoña.Nane a'ta a'taqquia'caen Chiga sefacconi ingima attiaña.

⁷⁹Tsa'caen tsu paya'chondeccunga attiaña cuintsu tise'pa sinttia'ni can'jen'choma catipa a'tatssianga ji'faye.Inginga'qque attiaña cuintsu ingi'qque Tise've in'jamba cansepa dyombi'tsse opatsse canse'faye.” Tsa'caen tsu Zacaríasja Chigama ñotsse afa.

⁸⁰Du'shu Juan Chigave in'jamba coen. Tayo coemba a'i menia japa bo'tsse tseni can'jen. Nane tise israendeccuma candusiaña'cho napiya'ngae tseni ro'ndá can'jen.