Read A'ingae Lucas 3 Bible Online

Lucas 3 - A'ingae bible

Lucas 3

¹Poi ande'suma joccapitssia na'su, Tiberio César, quince canqque'fave tayo mandasi Poncio Pilato, Judea ande'su governarorve can'jemba manda. Toya'caen Herodesja Galilea ande na'su tsu. Tise quinshin, Felipe tsu Iturea ande na'su. Traconite andema'qque manda. Lisaniasja Abilinia ande na'su.

²Chigama afa'su nasundeccuja Anas, toya'caen Caifás'qque. Tsendeccu tsu Chiga ettini manda'fa. Poiyi'cco tsendeccu tsa'caen manda'fasi Zacarías dutssi'ye Juan a'i menia ro'ndá can'jen'ni Chigaja Tisu Aya'fai'ccu tisema in'jaen.

³Tsa'caen in'jaensi pa'cco Jordán na'en utufa'ye candusiancan, a'i cuintsu tisu egae tsincon'choma catipa fettiye'faye, Chiga tise shacama aqquepoeñe.

⁴Tsa'caen tsomba tsu tayopi'su Chiga Aya'fa afa'su Isaías qquen tevaenqquia'caen tson:A'i aya'fama qui paña'faya a'i menia'ñe qquen fundo'je'choma:“Na'su jiya'chove ñoña'faja.Tise tsaiquima tansianqquia'caen ñoña'faja.

⁵Sinjun'ccumajan oviviya'cho.Ccotta'ccomajan joqquitssiamba sefaccoa andema fae'ngaeña'cho.Tsaiqui cca'rutticcoa'ma tansiaña'cho.Ande ccutticcoa'ma ovivipa fae'ngaeña'cho.

⁶Nane tsa'caen tsu injama'choma ñoñaña'cho poiyi'cco a'i Chiga tise'pama ccushaeña'choma in'jañe.”

⁷Tsain'bio a'i Juanga fetiyeye bo'fa. Tsa'caen bo'fasi Juanjan tise'pama iyu'upa su: —Ñoa'me qui iyo dushundeqquia'can'fa. ¿Majan tsu que'imajan dyoña? Chiga iyicca'yepa fi'ttiya'choma pañamba ¿fetiyepa ccushaye'ta ti qui in'jan'fa?

⁸Injama'choni egae tsincon'choma catiye qquen in'jamba tsu egae tsincombe'yi canse'faya'cho. Aqquia injanga “Tayopi'su Abraham ingi yayasi gi ccusha'faya” qquen su'fajama tisupa injama'choma ñoquiañe. Israendeccu'qque cca'indeccuma bove ñotssimbi tsu. Chigaja in'jan'da va patundundu'ye a'ive tsoñe osha Abraham dushundeccuve dapa cuintsu Tisema iñajan'faye.

⁹Nane quini'cco ñotsse nambisi a'ija tsama ttuttupa si'tsive oque'faya. Tsa'caen tsu Chigaja ttuttupoeñe ovacco'choma tsuiñaqquia'caen tayo ñoña que'i injama'choma somboeñe.

¹⁰Tsonsi a'i bo'fa'chondeccuja Juanma iñajampaña'fa: —Tsa'caenda ¿jongoesuve gi tson'faya?

¹¹Juanjan tise'pama su: —Tisupapora ñotsse tson'faja. Dos contome an'bian'da conto mechoa'nga fae'cco afeja. Aña'choma an'bian'da attufaen'faja.

¹²Govierno impuestoma isusundeccu'qque Juanga fetiyeye ji'fa. Juanma tsu iñajampaña'fa: —Atesian'su, ¿jongoesuve gi ingija tson'faya?

¹³Juan tise'pama su: —Govierno isuye manda'choma pan'sha'en isu'fajama.

¹⁴Toya'caen sundarondeccu'qque jipa iñajampaña'fa: —¿Jongoesuve gi ingija tson'faya? Juanjan su: —A'ima afopoemba cca'na'fajama. Ni cca'indeccuma tssai'fajama ti'tsse corifin'dima itsaye. Tsa'ma que'i na'su afepoen'choi'ccuyi opatsse canse'faja.

¹⁵Poiyi'cco a'i Cristo jiya'chove ro'ndá canse'fa. Tsa'camba injama'choni “¿Juanda ti Cristo?” qquen in'jan'fa.

¹⁶Tsa'ma Juanjan poiyi'cconga conda: —Ñajan tsa'ccui'ccu gi que'ima feti'je. Tsa'ma ñama ti'tsse'tssia tsu jiya. Ñajan utu'ccoa. Nane shaca gi tise sapato uga'choma ccupa'suve ca'niñe. Tise jipa tsu Chiga Qquendya'pai'ccu que'ima fetiya. Tsambi'ta si'ngei'ccu fetiqquia'caen tsu injama'choma somboeña.

¹⁷Trigoma qque'shopa fingiain'ccu ttonoma ufattovaenqquia'caen tiseja jiya fundui'sui'ccu giya'tsse funduipa ñotssia trigoma boñaqquia'caen tise a'ima ñoñañe. Tsa'ma trigo ttonoma oque catiqquia'caen tise've in'jambindeqquiama tsangae catiya.

¹⁸Tsa'caen candusiamba Juanjan Cristo jiya'chone ñotsse condase'choma a'inga conda.

¹⁹Toya'caen Juanjan ande na'su Herodesma iyu'u. Herodesja osha'cho egave tsomba tise quinshimbe pushe, Herodíasma, itsapa fae'ngae can'jen. Tsa'caen egae tsinconsi Juanjan tisema iyu'u. Iyu'usi Herodesja ti'tsse egae tsincomba iyicca'yepa Juanma picco'je'cho ettinga ca'niamba picco. Jesús Juanga fetiye'cho

²¹Juanjan toya piccoyembi'te poiyi'cco a'ima fetipa Jesúsma'qque feti. Jesús fetiyepa Chigama iñajansi Chigaja sefaccoma fetta.

²²Fettasi Chiga Qquendya'pa ppuppuju'choa'caen attiamba Jesúsnga ande. Tsonsi sefaccone afa'choma paña'fa qquen su'choma: —Que qui ña in'jan'cho Dutssi'ye. Ñoa'me gi quema ñotsse in'jan. Jesúsne tayopi'su coenzandeccu

²³Jesúsja treinta canqque'fave napiamba a'ima atesiañe ashaen. Tiseja José dutssi'ye qquen tsu poiyi'cco a'i in'jan'fa.Joséja Elí dutssi'ye tsu.

²⁴Elí Matat dutssi'ye.Matatja Leví dutssi'ye.Levíja Melqui dutssi'ye.Tsaja Jana dutssi'ye.Tsaja José dutssi'ye.

²⁵Tsaja Matatías dutssi'ye.Tsaja Amós dutssi'ye.Tsaja Nahúm dutssi'ye.Tsaja Esli dutssi'ye.Tsaja Nagai dutssi'ye.

²⁶Tsaja Maat dutssi'ye.Tsaja Matatías dutssi'ye.Tsaja Semei dutssi'ye.Tsaja Josec dutssi'ye.Tsaja Judá dutssi'ye.

²⁷Tsaja Joanán dutssi'ye.Tsaja Resa dutssi'ye.Tsaja Zorobabel dutssi'ye.Tsaja Salatiel dutssi'ye.Tsaja Neri dutssi'ye.

²⁸Tsaja Melqui dutssi'ye.Tsaja Adi dutssi'ye.Tsaja Cosam dutssi'ye.Tsaja Elmadam dutssi'ye.Tsaja Er dutssi'ye.

²⁹Tsaja Jesús dutssi'ye.Tsaja Eliezer dutssi'ye.Tsaja Jorim dutssi'ye.Tsaja Matat dutssi'ye.

³⁰Tsaja Leví dutssi'ye.Tsaja Simeón dutssi'ye.Tsaja Judá dutssi'ye.Tsaja José dutssi'ye.Tsaja Jonam dutssi'ye.Tsaja Eliaquim dutssi'ye.

³¹Tsaja Melea dutssi'ye.Tsaja Mena dutssi'ye.Tsaja Matata dutssi'ye.Tsaja Natán dutssi'ye.

³²Tsaja David dutssi'ye.Tsaja Isaí dutssi'ye.Tsaja Obed dutssi'ye.Tsaja Booz dutssi'ye.Tsaja Sala dutssi'ye.Tsaja Naasón dutssi'ye.

³³Tsaja Aminadab dutssi'ye.Tsaja Admin dutssi'ye.Tsaja Arni dutssi'ye.Tsaja Esrom dutssi'ye.Tsaja Fares dutssi'ye.Tsaja Judá dutssi'ye.

³⁴Tsaja Jacob dutssi'ye.Tsaja Isaac dutssi'ye.Tsaja Abraham dutssi'ye.Tsaja Taré dutssi'ye.Tsaja Nacor dutssi'ye.

³⁵Tsaja Serug dutssi'ye.Tsaja Ragau dutssi'ye.Tsaja Peleg dutssi'ye.Tsaja Heber dutssi'ye.Tsaja Sala dutssi'ye.

³⁶Tsaja Cainán dutssi'ye.Tsaja Arfaxad dutssi'ye.Tsaja Sem dutssi'ye.Tsaja Noé dutssi'ye.Tsaja Lamec dutssi'ye.

³⁷Tsaja Matusalén dutssi'ye.Tsaja Enoc dutssi'ye.Tsaja Jared dutssi'ye.Tsaja Mahalaleel dutssi'ye.Tsaja Cainán dutssi'ye.

³⁸Tsaja Enós dutssi'ye.Tsaja Set dutssi'ye.Tsaja Adán dutssi'ye.Adánjan Chiga dutssi'ye.