Read A'ingae Juan 11 Bible Online

Juan 11 - A'ingae bible

Juan 11

¹Fae a'i paji'su Betaniani can'jen. Tise inise Lázaro. María, tise she'she Marta'qque tseni can'jen'fa.

²Tsa Maríaja paji'su Lázaro she'she tsu. Tsa tsu Na'su Jesús tsu'ttema ñome'bai'ccu onjoemba tise tosei'ccu sanjan'su.

³Lázaro pajisi tise she'shepa Jesúsnga aya'faen moen'fa qquen supa: —Na'su, que in'jan'cho amigo tsu paji.

⁴Jesúsja tsama pañamba su: —Va paqque'suja ñoa'me pan'jaeña'bi tsu. Tsa'ma Chigaja ti'tsse'tssia qquen canjaeña'cho tsu. Toya'caen tsu canjaeña ña Chiga Dutssi'ye'qque gi ti'tsse'tssia.

⁵Jesúsja Marta, tise que'ttema, tise quinshin Lázaroma'qque ñotsse in'jan.

⁶Tsa'ma Lázaro paji qquen paña'an'qque toya dos a'ta can'jen tise can'jeni.

⁷Tsomba Jesúsja inginga su: —Jinge ccase jaye Judeani.

⁸Tsonsi ingija su'fa: —Atesian'su, voeyi tsu tseni'su israendeccuja patui'ccu quema fi'ttiye in'jan'fa. Tse'an qui ccase jaye in'jan.

⁹Jesúsja ingima su: —Dyombe can'faja. ¿Ñoa'membi ti fae a'ta doce horave coe'je de'jeye? A'ija a'ta jacan'da iñaccaya'bi tsu coe'je desi attepa can jacamba.

¹⁰Tsa'ma cose jacan'da iñaccaya tsu a'ta shacasi. Chigaja a'tatssi ingima coiraye.

¹¹Tsomba Jesúsja su: —Ingi amigo Lázaroja tayo tsu ana. Tisema qquendyaen'su gi jayi.

¹²Tsonsi ingija su'fa: —Na'su, ana'da tsu ccushaye tson'jen.

¹³Tsa'ma Jesúsja Lázaro tayo pa qquen suye in'jansi ingija pañamba aqquia ana'suma su qquen in'jan'fa.

¹⁴Tsonsi Jesúsja a'tatssia've conda: —Lázaroja tayo tsu pa.

¹⁵Tseni can'jembipa gi avuja. Tsa'caen tsu ñotssi que'i attepa in'jan'faye. Tsa'ma jinge can'gaye.

¹⁶Tsonsi Tomás, tsa Gemelo qquen su'choja, inginga su: —Jinge ingi'qque jaye Jesúsi'ccu fae'ngae paye. Jesúsja Qquendyaen'su, cansian'su

¹⁷Tseni napipa gi paña'fa tayo cuatro a'ta tsu Lázaroma a'tu'choja.

¹⁸Betaniane'da Jerusaléni biambicco –tres kilometroa'can.

¹⁹Tsain'bitssia israendeccu Marta, Maríama can'su ji'je'fa, tise quinshi pa'chone fae'ngae ñombi'yepa fuiteye.

²⁰Jesús pan napiji qquen pañamba Marta cachui'su ja. Tsa'ma Maríaja tsaoni catiye.

²¹Cachuipa Martaja Jesúsnga su: —Na'su, va'tti que can'jen'choecan'da meinte tsu ña quinshi'ñejan paye'can.

²²Tsa'ma ñanda gi atesu Chiga tsu afeya pa'cco que iñajan'choma.

²³Jesúsja su: —Que quinshi'ñenda tsu ccase qquendyaya.

²⁴Martaja su: —Ju, atesu gi ccase tsu qquendyaya poi pa'chondeccui'ccu osefaeña'cho a'ta napisi.

²⁵Tsonsi Jesúsja su: —Ña gi qquendyaen'su, cansian'su. Majan ñama in'jan'chota tsu pa'a'qque ccase qquendyaya.

²⁶Nane poiyi'cco majan toya canse'chondeccu ñama in'jan'da minguite'qque payambi tsu. ¿Queta ti qui in'jan?

²⁷Tiseja su: —Ju, Na'su. Ñajan in'jan gi queja Cristo, Chiga Dutssi'ye, va andenga ji'cho. Jesúsja Lázaro'yene i'na

²⁸Tsomba Marta tise que'tte Maríama ttuse'su japa a'tutsse su: —Atesian'su tsu tayo jipa queve ttuse'je.

²⁹Tse'faei'ccuyi tsama pañamba Maríaja Jesúsma can'su ja.

³⁰Nane Jesúsja canqqueni ca'nimbipa toya Marta cachui'ttini can'jen.

³¹María cunshoa'me sombopa jasi tse'tti tsaoni can'jen'cho fae'ngae ñombi'yepa fuite'su israendeccu atte'fa. Attepa atu'ttini ina'su jayi qquen in'jamba tise'pa'qque fae'ngae omboe ja'fa.

³²Tsonsi Maríaja ingi can'jeni napipa Jesús tsutteccofanga ccaru dyaipa su: —Na'su, va'tti que can'jen'choecan'da meinte tsu ña quinshi'ñejan paye'can.

³³María, tisei'ccu ji'cho israendeccu'qque i'nasi attepa Jesúsja injama'cho tsosipie ñombi'yepa quia'me qquendyaccopa

³⁴iñajampaña: —¿Mani qui a'tu'fa? Tise'paja su'fa: —Na'su, jipa can'gija.

³⁵Tsonsi Jesúsja i'na.

³⁶I'nasi israendeccuja su'fa: —Min'ge'e tsu in'jan.

³⁷Tsa'ma cca'indeccuja su'fa: —Vaja binima ccushaen'suta, ¿ma'caen'qqueta ti tsoña'bi Lázaro'ye pambecañe? Lázaro ccase qquendya'cho

³⁸Atu'ttinga catsepa Jesúsja ccase injama'cho tsosipie ñombi'ye. Atu'ttija fattocco chango tsu patui'ccu picco'cho.

³⁹Jesúsja su: —Joqquitssian'faja patuma. Marta, pa'chombe sheshe'yeja su: —Na'su, tayo tssu'jutssiya tsu. Cuatro a'ta tsu tise pa'choja.

⁴⁰Tsa'ma Jesúsja su: —¿Minga gi su'a: “In'jan'da qui atteya Chigaja ti'tsse'tssiave.”?

⁴¹Tsonsi patuma joqquitssian'fasi Jesúsja sefacconima camba su: —Yaya, Queja ñama pañasi gi Quene ñotsse afa'je.

⁴²Ñajan atesu gi Que ñama paña'jen'choma. Tsa'ma qquen gi Quene ñotsse afa'je cuintsu vani can'jensundeccu pañamba in'jañe Que ñama moen'chove.

⁴³Tsa'caen supa quia'me fundopa afa: —Lázaro, tse'ttie somboja:

⁴⁴Tse'i pa'choja sombo tsu'tte, tivema sarupafai'ccu findi'fa'cho; tsoveju'qque pañeroi'ccu oppoen'cho. Jesúsja su: —Ccupa'faja cuintsu jaye. Jesúsma fi'ttiye asi'ttaen'fa'cho

⁴⁵Tsa'caen tsonsi tsain'bio Maríama can'su ji'chondeccu Jesús tson'choma attepa Jesúsve in'jan'fa.

⁴⁶Tsa'ma majandeccuja tsendeccu'su fariseondeccunga japa condase'fa ma'caen Jesús tson'choma.

⁴⁷Tsonsi Chigama afa'su nasundeccu, fariseondeccu'qque bopa su'fa: —¿Ma'caen gi tson'faya? Va a'ija ñoa'me ñotssiama tsu canjaen'jen.

⁴⁸Ingi can antte'nijan poiyi'cco tsu tise've in'jan'faya. Tsonsi Romano nasundeccu mandasi tsu sundarondeccu jipa va Chiga ettima asitta cati'faya. Ingi aindeccuma'qque tsu sefoen'faya.

⁴⁹Tsa'ma fa'e na'su, Caifás qquen inise'cho'cho, tsa canqque'fane Chigama afa'su na'suve ca'ni'choja qquen tsu su: —Que'ija atesu'fambi qui.

⁵⁰Ni in'jan'fambi qui –ñotssi tsu ingine'jan fae a'iyi poiyi'ccone paye, romanondeccu poiyi'cco ingi aindeccuma sefoen'fasa'ne.

⁵¹Nane Caifásja tisuyi in'jamba tsa'caen sumbi. Tsa'ma tiseja tsa canqque'fa Chigama afa'su na'supa Chiga tisema in'jaensi tsa'caenjan su Jesúsja poiyi'cco israendeccune paya'chove.

⁵²Tsa'ma israendeccuneñimbi tsu Jesús paya'choja. Poiyi'cco attufa'cco'cho Chiga dutssiyendeccu'qque fae a'iyiqquia'caen da'faye tsu Jesúsja paya'cho.

⁵³Caifás tsa'caen susi tsequi a'ta ashaemba israe'su nasundeccuja condasecco'fa ma'caen Jesúsma fi'ttiya'chove.

⁵⁴Tsa'cansi Jesúsja a'tatsse jacambi israendeccuni. Tsa'ma Judea andene sombopa Efraín canqqueni japa ingi'ccu can'jen'fa. Tsa canqqueja a'i menia pporotsse.

⁵⁵Israendeccu Chiga panshaen'cho injienge'cho fiesta pan napiji. Tsa'ma fiesta toya napimbi'te tsain'bio a'i tise'pa canqque'ye sombopa Jerusaléni jaja'fa asettupa onjoñe.

⁵⁶Jesúsve tta'ttapa Chiga ettini can'jemba tisupapora iñajansepoencco'fa: —¿Jongoe qquen qui in'jan'fa? ¿Jiya ti fiestangaja?

⁵⁷Nane Fariseondeccu, Chigama afa'su nasundeccu'qque tayo qquen manda'a: —Majan mani Jesús can'jen'choma atte'ta conda'faja tisema indiye.