Read A'ingae Juan 18 Bible Online

Juan 18 - A'ingae bible

Juan 18

¹Jesús tsa'caen condase nanimba ingi'ccu Cedrón nai'quima isepa quinisisicco jinchonga japa ca'ni'fa.

²Judas, Jesúsma indiye afe'su'qque tsa quinisisiccoma atesucho, Jesúsja tsain'bitsse tseni ja'jesi ingi tisema shondosundeccui'ccu.

³Tsa'caen atesupa Judas'qque ca'ni tsain'bitssia sundarondeccui'ccu. Toya'caen Chigama afa'su nasundeccuja, fariseondeccuja Chiga etti'su sundarondeccuma'qque moen'fa Judasi'ccu. Poiyi'cco sundaro matichi'ccu jiji'fa. Cosesi tuño, rampariama'qque i'fa.

⁴Tsa'caen ji'fasi Jesúsja tisema indiye ji'fa'chove atesupa sombopa iñajampaña: —¿Majame qui ttatta'je'fa?

⁵Tsendeccuja su'fa: —Jesús Nasareno'suve Jesúsja su: —Ña gi. Judas, tisema indiye afe'suja tse'tti sundarondeccui'ccu ccutsu.

⁶Jesús “Ña gi” qquen susi poiyi'cco sepacconingae japa andenga amppi'fa.

⁷Tsonsi Jesúsja ccase iñajampaña: —¿Majame qui ttatta'je'fa? Tise'paja su'fa: —Jesús Nasareno'suve

⁸Tsonsi Jesúsja su: —“Ña gi” qquein tayo su'a. Ñame tta'tta'ta antte'faja cuintsu vandeccuja ja'faye.

⁹Tsa'caen tsu su tise tayoe suqquia'caen cuintsu tson'faye: “Chiga Quitsa in'jaensi ñame in'jan'chondeccuja majañi'qque qque'fambi tsu.”

¹⁰Tsonsi Simón Pedroja matichima du'siamba tsama shichha isupa a'i tansinfa'su tsosinama qquerui ttova. Tsa a'ija Malco qquen inisecho'cho, Chigama afa'su na'sumbe sema'su.

¹¹Tsa'ma Jesúsja Pedroma su: —Toengayi que matichima ppiñajan. Ña Yaya vanañe anttesi gi tsa'caen vanañe tson'jen. ¿Jongoesie qui eje ca'ni? Jesúsma anga'fa Chiga etti na'sunga

¹²Tsonsi sundarondeccu, tise'pa capitán, israe'su sundarondeccu'qque Jesúsma indipa tandan'fa.

¹³Tandamba Anás tsaoni anga'fa. Anásja Caifás quitsa ccashe'ye. Tsa canqque'fa Caifásja Chigama afa'su na'suve ca'ni.

¹⁴Tsa Caifás tsu israendeccunga qquen tayoeja su: “Bove ñotssi tsu ingine'jan fae a'iyi poiyi'ccone paye.” Pedro Jesúsne a'tien'cho

¹⁵Simón Pedro, ña'qque, Jesúsma omboe ja'fa. Ñamajan Chigama afa'su na'su atesuchosi gi Jesúsi'ccu fae'ngae ca'ni na'su tsa'o enttinge'su atandundunga.

¹⁶Tsa'ma Pedroja ca'nimbe'yi tsotefanga catiye. Tsa'cansi ñajan toequi sombopa sombo'ttima coira'su pushesui'ccu condasepa Pedroma ca'nian.

¹⁷Tsa'caen ca'niansi sombo'ttima coira'su pushesuja Pedroma iñajampaña: —¿Que'qqueta ti qui tsa a'ima shondo'sumbi? Pedroja su: —Me'i gi.

¹⁸Cha'ndiosi semasundeccu, Chiga etti'su sundarondeccu'qque si'ngema setsaemba sa'vu ccutsu'fa. Pedro'qque tise'pai'ccu fae'ngae ccutsupa si'ngenga savu'je. Jesúsma iñajampaña'fa'cho

¹⁹Chigama afa'su na'suja Jesúsma iñajansepoen tisema shondosundeccune, tise atesian'jen'chone'qque.

²⁰Jesúsja su: —Pa'cco a'i paña'jen'ni gi ñajan afa. Nane Chigane atesian'jen'ttinga, Chiga ettinga'qque ma'ttinga poiyi'cco israendeccu bo'nijan tseni gi atesian'je'an. Tsa'camba gi a'tutsse afambi.

²¹¿Jongoesie qui ñama iñajansepoen'fa? Iñajampañajan ña afasi pañasundeccuma cuintsu tsendeccu su'faye ña jongoe qquen su'choma. Tise'pa tsu ña su'choma atesu'fa.

²²Jesús tsa'caen susi Chiga etti'su sundaro tisei'ccu pporotsse ccutsu'su Jesús tsovejuma tssaipa qquen su: —¿Ya'caen ti qui afa Chigama afa'su na'suma?

²³Jesúsja su: —Ña egae su'nijan condaja ma'caen tsu ega. Tsa'ma ña su'cho ñotssiamajan ¿jongoesie qui ñama tssai?

²⁴Tsa'caen susi Anásja Jesúsma tayo tandan'choma Chigama afa'su na'su Caifásnga moen. Ccase Pedro Jesúsne a'tien

²⁵Toya Pedro ccutsupa si'ngenga savu'je'ni tisema su'fa: —¿Que'qqueta ti qui tsa a'ima shondo'sumbi'a? Pedroja a'tiemba su: —Me'i gi.

²⁶Tsonsi fa'e Chigama afa'su na'sumbe sema'su iñajampaña: (Tsaja tsosinama Pedro chattu'cho'sumbe antian.) —¿Quema attembi'a ti gi que tisei'ccu quinisisicconi can'jen'choma?

²⁷Pedro ccase a'tiensi tse'faei'ccuyi arapa gayoja se'yo. Jesúsma Pilato iñajansepoen'cho

²⁸Tsonsi Caifás tsaone sombopa Jesúsma anga'fa governaror tsa'onga tayo a'taningae. Israendeccuja governaror tsa'onga ca'ni'fambi tisupa asettu'je'choma dañosa'ne. Tsa'caen daño'da Chiga panshaen'cho injienge'cho aña'choma añe osha'faya'bi.

²⁹Tsa'camba ca'ni'fambisi governaror Pilatoja tise'pai'ccu afaye sombopa, qquen iñajampaña: —¿Jongoesu shacane qui va a'imajan i'fa?

³⁰Tise'paja su'fa: —Egae tsincon'biecan'da quengaja i'fa'yambi gi.

³¹Tsonsi Pilatoja su: —Que'iyi angapa que'i manda'cho mandaqquia'caen tise injama'choma somboen'faja. Tsa'ma israendeccuja su'fa: —Romano nasundeccu se'pisi ingi israe'su nasundeccuja majameñi'qque fi'ttiye mandaye osha'fambi.

³²Tsa'caen tsu su'fa Jesús suqquia'caen tsoñe. Nane Jesúsja tayoe su tiseja avuja'cconga paya'cho.

³³Tsonsi Pilato ccase tise tsaoni ca'nimba Jesúsma ttu'sepa iñajampaña: —¿Ñoa'me ti qui israe na'su?

³⁴Jesúsja su: —¿Tisuyi ti qui tsa'caen in'jamba ñama iñajansepoen? Tsambi'ta ¿faesu ñane quenga tsa'caen su'fasi ti qui iñajansepoen?

³⁵Pilatoja su: —¿Ñanda ti gi israe'su? Que israe'su aindeccu, israe'su Chigama afa'su nasundeccu'qque tsu quema ñanga afe'fa. ¿Jongoesian qui tso'an?

³⁶Jesúsja su: —Ñajan na'sia'caen mandambi gi va andeni. Ña'qque vani'su na'sia'caen can'jen'choecan'da ña aindeccuja iyicco'faye'can tsu, israendeccu ñama indi'fasa'ne. Tsa'ma ñajan vanima mandambi gi.

³⁷Tsa'caen susi Pilatoja su: —¿Tsuin'da que ti qui ñoa'me na'su? Jesúsja su: —Que suqquia'caen, ña gi na'su. Tsaneñi isu'fa'cho gi. Nane va andenga gi ji ñoa'me su'choma a'inga atesiañe. Majan a'i ñoa'me su'choma pañamba tson'da ñama tsu paña'fa.

³⁸Pilatoja su: —¿Jongoesu tsu ñoa'me su'choja? Jesúsma fi'ttiye manda

³⁹Tsa'ma que'i atesu'chopa in'janqquia'caen ñajan Chiga panshaen'cho injienge'cho fiestanga fae indiye'choma ccupaya'cho. ¿In'jan'fambi ti qui israe na'suma ña ccupaye'ja?

⁴⁰Tsa'caen susi poiyi'cco fundopa afa'fa: —¡Tsamajan me'i! ¡Barrabásma ccupaja! Tsa Barrabásja ccanamba tsu.