Read A'ingae Juan 2 Bible Online

Juan 2 - A'ingae bible

Juan 2

¹Tres a'ta pasasi casara'je'fa'cho jin Galilea ande'su Caná canqqueni. Jesús chan'qque tseni can'jen.

²Jesúsma, ingi tisema shondosundeccuma'qque ttu'se'fa casara'je'fa'chonga.

³Vino sefasi Jesús chanjan Jesúsnga conda: —Tayo tsu vino sefa.

⁴Tsa'ma Jesúsja pañamba su: —Mama, ¿jongoesie qui ñangaja conda? Toya tsu ña attiaña'cho napimbi.

⁵Tsa'ma tise chanjan cuiñasundeccuma su: —Ma'caen su'nijan tsa'caen pa'ccoma tson'faja.

⁶Tse'tti tsu seis patuma ñoña'cho tsoripa ccutsu'fa. Tsesu tsoripaja israendeccu asettupa onjon'jen'cho tsa'ccuma fiña'jen'cho: Nane majan ochenta, majan cien botiyave on'boeña'ga'o.

⁷Tsonsi Jesúsja manda cuiñasundeccuma: —Tsa'ccuma va tsoripanga on'boen'faja. Tsonsi on'batsse tsa'ccuma on'boen'fasi

⁸Jesúsja su: —Ja'ño re'riccoe ichhoipa fiesta na'sunga cui'ñajan. Tsa'caen tson'fasi

⁹fiesta na'su tsa'ccuma cuicansi tayo tsu vinome da. Tiseja atesumbi mania somboen'chove'qque. Tsa'ma cuiñasundeccuja atesu'fa tsa'ccuma ichhoi somboemba cui'ña'choma. Tsonsi fiesta na'suja casara'su tsandiema ttu'sepa

¹⁰tisenga su: —Poiyi'cco a'i tsu o'tie ñotssia vinoma cui'ñañe atesu'fa. Tsonsi cu'isundeccu tsain'bitsse cu'i'fasi bove ansimbi'choama tsu cui'ñaña'cho. Tsa'ma queja bove ñotssiama an'biamba ja'ño somboemba cui'ña.

¹¹Tsa'caen tsu Galilea'su Canáni Jesúsja me'ttia'ye canjaen tise osha'choma oshacho'choan. Ingi tisema shondosundeccu'qque attepa gi Tise've in'jan'fa.

¹²Tsomba tse'i Jesús Capernaum canqqueni jayisi tise chan, tise quinshingendeccu, ingi tisema shondosundeccu'qque fae'ngae jaja'fa. Tseni re'riccoe can'jencca'fa. Chiga etti'su chavaensundeccu

¹³Ingi israendeccu Chiga panshaen'cho injienge'cho fiesta pan napijisi Jesúsja Jerusaléni ja.

¹⁴Chiga ettini japa atte chavaensundeccuma. Majanda vaura, majanda oveja, majanda ppuppuju'choma chavaen'jen'fa. Toya'caen tse'tti corifin'dima cambiansundeccu'qque dyai'fa tise'pa mesa jin'tti.

¹⁵Tsama attepa Jesúsja simba'fama ma'ppi'fave ñoñamba chavaensundeccuma ma'ppimañajan Chiga etti'ye. Ovejama, vaurama'qque na'sui'ccu fae'ngae ma'ppimañajan. Corifin'dima cambiansundeccu mesama'qque qquitssa tovaccoemba pa'cco corifin'dima shequian moen.

¹⁶Toya'caen ppuppuju'choma chavaensundeccunga su: —Pa'cco vama joqquitssian'faja. ¿Ma'caen qui ña Yaya ettima chavaen'jen'ttive tson'fa?

¹⁷Tse'i ingija tayo'su Chiga Tevaen'jen qquen su'choma in'jan'fa: “Chiga Quitsa, Que ettima ñoa'me in'jamba gi paya'ngae dyombi'tsse coiraya.”

¹⁸Tsa'caen tsonsi israendeccuja Jesúsma iñajampaña'fa: —¿Jongoesuma qui canjaeña majan quema mandasi jova'caen tsincon'chove ingi atesuye?

¹⁹Qquen iñajampañasi Jesúsja su: —Va Chiga ettima osian'ninda gi tres a'tangae ccase ccutsiaña.

²⁰Tsa'ma israendeccuja su'fa: —Cuarenta y seis canqque'fanga va Chiga ettima tsao'ña'choanda ¿ma'caen qui queja tres a'tangae ccutsiaña?

²¹Tsa'ma Jesúsja Chiga ettine afaqquia'caen ñoa'me tisu ai'vone afa.

²²Tsa'caen supa papa ccase qquendyasi ingi tisema shondosundeccuja in'jan'fa Jesús su'choma. Tsa'caen injan'jemba gi Chiga tevaen'jeme in'jan'fa. Jesús su'chove'qque gi in'jan'fa. Jesúsja injama'choma atesucho

²³Chiga pashaen'cho injienge'cho fiesta napisi Jesús Jerusaléni can'jensi tsain'bio a'i tise canjaen'choma attepa tiseja Chiga moen'cho Cristo qquen in'jan'fa.

²⁴Tsa'ma Jesúsja poimbe injama'choma atesupa anttembi cuintsu tise'pa in'jan'choma tson'faye.

²⁵Nane Jesúsja poimbe injama'cho ma'caen jincho'choma atesuchosi tsu me'i'on tisenga ti'tsse a'ine conda'suve.