Read A'ingae Juan 20 Bible Online

Juan 20 - A'ingae bible

Juan 20

¹Domingo a'ta, faesu avujaquive a'tasi María Magdalenajan sinte toya cose'yi atu'ttinga japa atte sombo'ttima picco'cho patu fettaye'choma.

²Tsa'caen attepa buttopa ji, ña, Jesús in'jan'cho, Simón Pedroi'ccu can'jeni. Jipa inginga su: —¡Na'su ai'voma atu'tti'ye anga'fasi gi mani ccuiña'chove'qque atesumbi!

³Tsa'caen susi ñajan Pedroi'ccu atu'ttima can'su ja'fa.

⁴Fae'ngae buttopa gi Pedroma ti'tsse quia'me buttopa o'tie napi.

⁵Ca'nimbe'yi ppoicamba gi Jesúsma findipa a'tu'cho sarupa ma'caen findipa a'tu'choja toengatssi cui'choma atte.

⁶Simón Pedroja ñama omboe napipa atu'ttinga ca'ni. Tise'qque findipa a'tu'cho sarupama atte.

⁷Jesús tsovema onccan'cho pañeroma'qque atte cca'ttinga ompangoemba cuiña'choma.

⁸Tsonsi ña, o'tie atu'ttinga napi'cho'qque ca'nimba attepa gi in'jan.

⁹Tsa'ma toyayi gi Chiga Tevaen'jen Jesús papa ccase qquendyaya'chone su'choma atesu'fambi.

¹⁰Tsa'caen attepa gi tisupa tsaoni ji'fa. Jesúsja María Magdalenanga attian

¹¹Tsa'ma Maríaja atu'ttini i'ná catiye. Ina'jemba atu'tti changoma ppoican.

¹²Ppoicamba atte dos Chigama sefacconi'su shondosundeccuma. Tsendeccuja totoa'ma ondiccupa Jesús ai'voma ccuiñaccuni dyai'fa, fa'eja tsovefani, faesuja tsutteccofani.

¹³Chigama sefacconi'su shondosundeccuja iñajampaña'fa: —Pushesu, ¿jongoesie qui ina'jen? Tiseja su: —Ña na'su ai'voma atu'tti'ye anga'fasi gi mani ccuiña'chove atesumbipa ina'jen.

¹⁴Tsa'caen supa Maríaja piyicamba Jesúsma atte. Tsa'ma Jesúsve atesumbi.

¹⁵Tsonsi Jesúsja iñajampaña: —Pushesu, ¿jongoesie qui ina'jen? ¿Majame qui tta'tta? Tiseja quinisisicco coira'su qquen in'jamba Maríaja su: —Coira'su, que Jesús ai'voma anga'pa mani ccuiña'da ñanga condaja ña angaye.

¹⁶Tsonsi Jesúsja su: —¡María! Maríaja piyipa hevreo aya'fangae su: —¡Ravoni! —atesian'su qquen su'cho.

¹⁷Jesúsja su: —Ñama pporo'roembe antteja. Toya gi sefacconi ña Yaya can'jeni jambi. Tsa'ma japa fae'ngae ñame in'jan'chondeccunga condaja: Ñanda gi ña Yaya, que Yayani jaya. Ña Chigani, que Chigani gi jaya.

¹⁸Tsonsi María Magdalena japa ingi Jesúsma shondosundeccunga conda: —¡Tayo gi Na'suma atte! Toya'caen Jesús tisenga su'choma'qque tsu conda. Shondosundeccunga attian'cho

¹⁹Tsequi a'ta, toya Domingo a'ta, cosesi ingi Jesúsma shondosundeccuja fae'ngae bojin sheque'fa. Israendeccuma dyojopa gi sombo'ttima piccojin can'jen'fa. Tsa'ma Jesúsja ingi enttingenga ji ccutsupa qquen chiga'bian: —¡Opatsse canse'faja!

²⁰Tsa'caen supa tise tivema, tise utuccu'ttima inginga canjaen. Ingija Na'suma attepa gi avuja'fa.

²¹Tsomba ccase Jesúsja inginga su: —¡Opatsse canse'faja! Ña Yaya ñama mandamoenqquia'caen gi ña'qque que'ima mandamoeña ñane condase'suve.

²²Tsa'caen supa inginga tise qquendya'pama ufapa su: —Chiga Ñotssia Qquendya'pama isu'faja.

²³Majan a'i egae tsincon'choma que'i aqquepoe'ninda ña'qque gi tsama tayo aqquepoen. Tsa'ma majan egae tsincon'choma que'i aqquepoembia'nda ña'qque gi tsama aqquepoeña'bi. Tomás Jesúsma attepa in'jan'cho

²⁴Tsa'ma Jesús jisi Tomás, tsa Gemelo qquen su'fa'choja, can'jembi. Tise'qque ingi doce'su

²⁵omboe jisi ingija su'fa: —Na'suma gi atte'fa. Tsa'ma Tomásja su: —Tivema cravoi'ccu oti'fa'choma attembi'ta, ña tsimian'ccoi'ccu tsanga tso'mimbi'ta, ña tivei'ccu tise utuccuma quiccu'chonga tso'mimbi'ta in'jaña'bi gi.

²⁶Ocho a'ta pasasi ccase ingija sombo'ttima piccojin dyai'fa tsaoni. Tsequija Tomás'qque can'jen. Tsa'caen piccojin dyai'fa'ni Jesúsja ingi enttingenga ji ccutsupa chigambian: —Opatsse canse'faja.

²⁷Tsomba Tomásnga su: —Ña tivema camba que tsimian'ccoi'ccu tsomijan. Ña utuccu'ttima que tivei'ccu tsomijan. “Nane ñajan in'jaña'bi” qquen sumbe'yi ¡ñame in'janjan!

²⁸Tsonsi Tomásja su: —¡Ña Na'su qui! ¡Ña Chiga qui!

²⁹Jesúsja su: —Tomás, ñama attepa qui in'jan. Ñoa'me avujatssi'fa tsu majan ñama attembe in'jan'chondeccu. Va tevaen'jen in'jan'cho

³⁰Toya'caen tsu Jesúsja ti'tsse inginga canjan'jen. Pa'ccoma tevaembi gi va tevaen'jenga.

³¹Tsa'ma tayo tevaen'choma gi tevaen cuintsu que'i pañamba in'jan'faye Jesúsja Cristo tsu, Chiga Dutssi'ye. Que'i tsa'caen tise've in'jan'da qui tise a'ive dapa tsangae canse'faya.