Read A'ingae Juan 4 Bible Online

Juan 4 - A'ingae bible

Juan 4

¹Jesúsja Juanma ti'tsse'o a'ima fetisi tsain'bitssi tisei'ccu fae'ngae jacan'fa. Nane Jesúsja tisu fetimbi. Tsa'ma ingi tisema shondosundeccu gi a'ima feti'fa. Fariseondeccu feti'chone pañasi Na'su Jesúsja tise'pa paña'choma in'jamba

²(null)

³Judeane sombopa ccase Galileani jayisi ingi'qque fae'ngae ja'fa.

⁴Tseni jayi'ta tsu Samaria ande'ye panshaña'cho.

⁵Tsangae japa gi napi'fa Samaria'su canqquenga, Sicar qquen inisecho'chonga. Tse'tti pporotsse tayopi'su Jacob andema afe tise dutssi'ye Josénga.

⁶Tse'tti tsu jin tayopi'su Jacobmbe tsa'ccu poso. Jesúsja biane jiñamba quimbipa ño'fa dyai poso utufani, tayo chiga tansinjinqquiaca'ni.

⁷Ingija anqque'suve chava'su canqqueni tayo ja'fasi Samaria'su pushesu tsa'ccuma ichhoi'su ji. Jisi Jesúsja tisema su: —Ñanga cui'ñajan tsa'ccuma.

⁸(null)

⁹Qquen susi tsa Samaria'su pushesuja Jesúsnga su: —Queja israe'su a'ita, ¿ma'caen qui ña samaritanamajan tsa'ccuve iñajan? Nane israendeccuja samariasundeccui'ccu ñotsse jincho'fambisi tsa pushesuja tsa'caen su.

¹⁰Tsa'caen susi Jesúsja su: —Queja Chiga afe'chove in'jan'choecan'da, majan quema tsa'ccuve iñajan'chove in'jan'choecan'da, ñoa'me qui ñama tsa'ccuve iñajañe'can. Iñajan'choecan'da gi cansiaña'cho tsa'ccuma afeye'can.

¹¹Pushesuja su: —Na'su, queja jongoesui'ccu ichhoiye mechota ¿ma'caen qui cansiaña'cho tsa'ccumanda afeya? Tsa'ccu poso'qque tso'sio tsu.

¹²¿Queta ti qui ingi tayopi'su yaya Jacobma ti'tsse'tssia? Tise tsu va posoma inginga afe. Tise'qque vani cu'iqque'a. Tise dutssiyendeccu'qque vani cu'i'fa'qque'a. Tise vaurama'qque vani cui'ña'fa'qque'a.

¹³Qquen susi Jesúsja su: —Majan va tsa'ccuma cui'a'qque tsu ccase tsaqquie'su'faya.

¹⁴Tsa'ma majan ña cui'ña'cho tsa'ccuma cu'i'ta minga'ni'qque tsu tsaqquie'su'faya'bi. Ña cui'ña'cho tsa'ccuta tsu tisenga sombopa oshaqquia'caen tsangae canseya'chove cansiaña.

¹⁵Tsonsi pushesuja su: —Na'su, ñanga afeja tsesu tsa'ccuma ña minga'ni'qque tsaqquie'sumbecañe ni vani tsa'ccuve ichhoin'gimbecañe.

¹⁶Jesúsja su: —Japa ttusengaja que tsa'nduma. Tsomba vani ji'faja.

¹⁷Pushesuja su: —Tsa'nduve mecho gi. Qquen susi Jesúsja su: —Tansintsse qui su tsa'nduve mecho.

¹⁸Cinco se tsa'ndupa qui ja'ño faesui'ccu tsa'ndumbeyi fae'ngae can'jen. Ñoa'me qui tansintsse afa'je.

¹⁹Tsa'caen susi pañamba pushesuja su: —Na'su, queja ñoa'me Chiga Aya'fama afa'su qquen gi in'jan.

²⁰Ingi tayopi'su samariasundeccuja va ccotta'cconga tsu Chigama iñajan'fa. Tsa'ma que'i israendeccuja su'fa Jerusaléni tsu ñoa'me Chigama iñajaña'tti.

²¹Jesúsja tisenga su: —Pushesu, ñama pañajan. Pan tsu napiji maqui a'ta a'ija ni va ccotta'cconga ni Jerusaléni ja'faya'bi tsu Chigama iñajañe.

²²Nane que'i samariasundeccuja Chigama atesumbipa qui injanga iñajan'fa. Tsa'ma ingi israendeccuja Chigama atesupa gi iñajan'fa. Israelne tsu ccushaen'suja jiya.

²³Tsa'ma pan tsu napiji –nane ja'ño tsu napi– maqui a'ta Chigama ñoa'me in'jan'chondeccuja tansintsse tisu injama'chone Chiga Quitsama iñajan'faya. Tsa'caen tsu Chiga Quitsaja in'jan cuintsu Tise've in'jan'chondeccu Tisema iñajañe.

²⁴Chigaja In'jaen'cho Qquendya'pa tsu. Tsa'cansi majan Tisema iñajan'da ñoa'me tansintsse tisu injama'chone tsu iñajaña'cho.

²⁵Tsonsi pushesuja su: —Atesu gi Mesías jiya'chove –tsa Cristo qquen su'cho. Tise jipa tsu tansintsse osha'choma inginga condaya.

²⁶Jesúsja su: —Ña gi Cristo, quei'ccu afa'je'cho.

²⁷Tsa'caen condase'je'ni ingija canqquene jipa can'boen ccutsu'fa Jesús pushesui'ccu condase'jesi. Tsa'ma majañi'qque gi iñajampaña'fambi “¿Jongoesie qui in'jan?” ni “¿Jongoesune qui tisei'ccu condase'fa?”

²⁸Tse'i pushesuja tise tsa'ccu tsoripama catipa canqqueni ja. Tseni napipa a'inga qquen condase:

²⁹—Ñai'ccu jipa can'gi'faja a'ima. Ña osha'chove tsincon'choma pa'ccoma in'jamba tsu ñanga condase. ¿Tsata ti Cristombi?

³⁰Pañamba a'ija canqquene sombopa Jesús can'jeni ji'fa.

³¹Toya jiña'fa'ni ingija Jesúsma su'fa: —Atesian'su, anjan.

³²Tsa'ma Jesúsja su: —Ñanda gi an'bian aña'chove ma'caen que'i atesumbi'choama.

³³Tsa'caen susi ingija tisupapora iñajampañacco'fa: —¿Majanda ti tisema o'fiangi'fambi?

³⁴Tsa'ma Jesúsja inginga su: —Ñama moen'su in'jan'choma naniñangae tsoñe tsu ñama quiñaeña panma anqquia'caen.

³⁵Nane que'ita qui su'fa: “Toya tsu shaca cuatro ccovu taiya'cho napiya'cho” Tsa'ma ñanda gi su: Asuccopa nasipama can'faja. Nasipanga jon'cho cu'chosi taiya'cho napiqquia'caen tsu a'ija pañañe ronda'je'fa.

³⁶Taisundeccu taiqquia'caen qui que'ija ñane a'inga conda'ta gana'faya. Pañasundeccu'qque tsu tsangae canse'faya. Tsa'cansi jon'su tsu tai'sui'ccu fae'ngae avujatssi'faya.

³⁷Nane tansintssi tsu qquen su'cho: “Fa'e jonsi faesu tsu tai'su.”

³⁸Ñajan que'ima manda que'i semambi'choama taiye. Faesundeccu semasi que'i'qque tise'pa sema'choma taiye ca'ni'fa.

³⁹Tsain'bio tsa Samaria canqque'su a'i Jesúsve in'jan'fa pushesu qquen su'choma pañamba: “Tiseja ña osha'chove tsincon'choma pa'ccoma in'jamba ñanga condase.”

⁴⁰Tsa'caen in'jamba Jesúsnga catsepa tisema afa'fa cuintsu tise'pai'ccu can'jeñe. Tsonsi ingija tseni dos a'tave can'jen'fa.

⁴¹Jesúsma pañamba ti'tsse'o a'i tise've in'jan'fa.

⁴²Tsendeccuja pushesuma su'fa: —Ja'ñonda gi aqquia que su'choveyi in'jan'faya'bi. Tsa'ma tisupa tsosinai'ccu tisema pañamba gi in'jan'fa tiseja ñoa'me Cristo tsu, poi ande'suma ccushaen'su. Biani'su du'shuma ccushaen'cho

⁴³Tsa'caen dos a'ta can'jemba gi Jesúsi'ccu Samariane sombopa Galileani ja'fa.

⁴⁴Tayo tsu Jesúsja su Chiga Aya'fama afa'suja afasi tisu andesundeccuja tisema ñotsse paña'faya'bi.

⁴⁵Tsa'ma tise Galileani napisi Galileasundeccuja tisema avujatsse chigambian'fa. Tsendeccu'qque Jerusaléni fiestanga japa pa'cco Jesús tseni tson'choma attepa ja'ño tisema avujatsse chigambian'fa.

⁴⁶Tsa'caen tsu Jesús toequi ja Galilea'su Canáni, tise tsa'ccuma vinome tsoni. Tseni tsu can'jen ande na'suma shondo'su. Tsambe dutssi'yeja Capernaum canqqueni pajipa ccui.

⁴⁷Tsa a'ija Jesús tayo Judeane sombopa Galileani ji'choma paña. Pañamba jipa Jesúsma su cuintsu japa tise dutssi'yema ccushaeñe, tayo paye tson'jensi.

⁴⁸Tsonsi Jesúsja su: —¿Que'ija ccushaemba canjaen'choma attembi'ta ti qui in'jan'faya'bi?

⁴⁹Tsa'ma ande na'suma shondo'suja su: —Na'su, utatsse jija ña du'shu pasa'ne.

⁵⁰Tse'i Jesúsja su: —Jaja, Que du'shu canseya tsu. A'ija Jesús su'choma pañamba in'jamba tise tsaoni ja.

⁵¹Tise tsaoni pan napiji'ni tise'be semasundeccuja cachuipa su'fa: —Tayo tsu que du'shuja ccusha.

⁵²Tsonsi iñajampaña ma'ttiani tsu ccusha. Iñajampañasi su'fa: —Cani re'riccoe ondusesi tsu ajema chattien.

⁵³Tsonsi du'shumbe yaya in'jan tsa'cani Jesúsja tisema su'cho: “Que du'shuja canse.” Qquen in'jamba tsa a'i, tise antianaccui'ccu Jesúsve in'jan'fa.

⁵⁴Jesúsja Judeane sombopa ccase Galileani jipa tsa'caen agattoemba canjan'jaen. Tsai'ccu dos se tsu Galileani tsa'caen canjan'jaen.