Read A'ingae Juan 5 Bible Online

Juan 5 - A'ingae bible

Juan 5

¹Tsa'caen tsomba omboe israendeccu fiestama panshaeñe tson'jensi Jesúsja toequi Jerusaléni ja.

²Jerusaléni'su Oveja Sombo'tti jin'tti onjon'jen'cho singu'ccu jin. Tsa singu'ccuja Betesda qquen inisecho'cho, hevreo aya'fangae. Singu'ccufani tsu cinco etticcu'cho jin.

³Tsanga ronda'je'fa tsain'bitssia pajisundeccu. Nane binindeccu, ccareshendeccu, ishopa paqque'sunga dañonge'chondeccu tse'tti tsa'ccu oya'je'chove ronda'je'fa.

⁴Maqui Chigama sefacconi'su shondo'su singu'ccunga andepa tsa'ccuma oyaen. Tsa'ccu oyasi majan o'tie ca'ni'da tsu ccushaya tise jongoesui'ccu paji'suja.

⁵Fae tsandie treinta y ocho canqque'fa paji'su tse'tti ccui.

⁶Jesúsja tise ccui'choma attepa tsain'bio canqque'fa tsa'caen pajipa ccui'choma atesupa tisema su: —¿Ccushaye'ta ti qui in'jan?

⁷Paji'suja pañamba su: —Na'su, me'i'on tsu tsa'ccu oyasi ñama fuitepa ca'niañe singu'ccunga. Tsa'ma ña toya ca'nimbi'te faesu tsu otupa ca'ni.

⁸Tsonsi Jesúsja tisema su: —Jangipa que ana'jen'choma isupa tsui jaja.

⁹Tse'faei'ccuyi a'ija quinsetsse ccushapa tise ana'jen'choma isupa tsui ja. Tsequi a'ta tsu Sabado, israendeccu sema'ma'qquia a'ta.

¹⁰Tsa'cansi israendeccuja pajipa ccusha'choma su'fa: —Ja'ñonda tsu sema'ma'qquia a'ta. ¿Jongoesie qui ana'jen'choma angaji?

¹¹Tiseja pañamba su: —Ñama ccushaen'su tsu ñama manda ana'jen'choma isupa tsui jaye.

¹²Tsonsi tisema iñajampaña'fa: —¿Majan tsu quema tsa'caen manda, “ana'jen'choma isupa tsui jaye'ja”?

¹³Tsa'ma pajipa ccusha'choja atesumbi majan tisema ccushaen'chove. Nane tsain'bitssia a'i tseni shequesi Jesúsja tsambe enttingenga jasi tisema ccase attembi.

¹⁴Tsa'ma omboe Jesúsja ccusha'choma Chiga ettini attepa su: —Que canjan. Tayo ccushapa ti'tsse egae tsinconjama bove dapa vanasa'ne.

¹⁵Tsonsi japa israendeccunga conda tisema ccushaen'suja Jesús.

¹⁶Tsa'caen pañamba israendeccuja Jesúsma noñangiamba fi'ttiye in'jan'fa tise tsa'caen sema'ma'qquia a'ta tsinconsi.

¹⁷Tsa'ma Jesúsja tise'pama su: —Ña Yaya ja'ño pan sema'jensi gi ña'qque sema'jen.

¹⁸Tsa'caen susi ti'tsse'tsse tsu israendeccuja tta'tta'fa ma'caen Jesúsma fi'ttiya'chove. Nane Jesús tise'pa sema'ma'qquia a'ta se'pi'choma catisi israendeccuja tisema fi'ttiye in'jan'fa. Ja'ño Chigaja tise Yaya qquen supa tsu tisuma Chigai'ccu fae'ngatsse tson. Tsa'caen tsonsi ti'tsse tisema fi'ttiye in'jan'fa. Dutssi'yeja osha'choma oshacho

¹⁹Tsonsi Jesúsja tise'panga su: —Nane ñoa'me gi su: Tisuyi'ta gi Chiga Dutssi'ye'qque oshambi. Tsa'ma tisu Yaya tson'jensi attepa gi osha. Osha'choma tisu Yaya tson'jen'choma gi ña'qque tson'jen.

²⁰Tisu Yayaja Dutssi'yema in'jamba osha'choma tsu canjaeña cuintsu que'i can'boen'faye.

²¹Nane ña Yaya pa'chondeccuma qquendyaemba cansianqquia'caen Dutssi'ye'qque gi majame in'jan'da tsa'caen cansiaña cuintsu pambe canseye.

²²Chiga ña Quitsaja a'i injama'choma somboeña'bi. Tsa'ma Tise Dutssi'yenga tsu pa'ccoma antte injama'choma somboen'suve

²³cuintsu poiyi'cco a'i Chiga Quitsama in'janqquia'caen Dutssi'yema'qque in'jan'faye. Toya'caen majan Dutssi'yema chi'ga'ta tisema moen'su Chiga Quitsama'qque tsu chi'ga.

²⁴Nane ñoa'me gi su: Majan ña atesian'choma pañamba ñama moen'suve'qque in'jan'da tsangae tsu canse'fa. Tsendeccuja catiyeya'bi'choa tsu. Nane paya'chondeccu'ye sombopa ñoa'me cansendeccui'ccu canse'fa.

²⁵Ñoa'me gi su: Tayo tsu napiji paya'chondeccu Chiga Dutssi'ye aya'fama paña'faya'cho. Nane ja'ño tsu paña'jen'fa. Majan paña'da tsu canse'faya.

²⁶Chiga Quitsaja tisutsseyi canseye jincho. Tsa'caeñi Tise Dutssi'yenga'qque antte cuintsu tisutsseyi canseye jinchoye.

²⁷Toya'caen Dutssi'ye a'ive dasi tisenga antte cuintsu faenga'su a'i injama'choma somboeñe.

²⁸Can'boembe can'faja. Nane tayo tsu napiji poiyi'cco pa'chondeccu tise aya'fama pañaña'cho.

²⁹Pañamba atu'ttie sombo'faya. Ñotsse tson'chondeccuja qquendyapa canse'faya. Tsa'ma egae tson'chondeccuja qquendyapa catiye'faya. Chiga Dutssi'ye qquen canjaen'cho

³⁰Tisuyi'ta gi tsoñe oshambi. Tsa'ma ñama mandaqquia'caen gi tansintsse afa'je. Nane tansintsse in'jamba gi tansintsse afa'je. Ña in'jan'chove in'jambipa ñama moen'su Chiga Quitsa in'jan'chove gi in'jan.

³¹Ña tisune ñotsse afa'chota barembi tsu.

³²Tsa'ma faesu tsu ñane ñotsse afa'su. Atesu gi tise afa'choja ñoa'me tansintsse afa'cho tsu.

³³Que'ija a'ima manda Juanma iñajampañañe. Juan su'chota tsu ñoa'me su'cho.

³⁴Tsa'ma tta'ttambi gi a'i su'cho ñajan Chiga Dutssi'ye qquen canjaeñe. Aqquia vaveyi gi su que'i ccusha'faya'chone.

³⁵Nane tuño setsapa chanjunqquia'caen tsu Juanjan que'inga a'tatsse condase. Condasesi qui pañamba avujatssi'fa re'ricco'nejan.

³⁶Tsa'ma Juan su'choma bove ñotsse canjaen'cho tsu jin. Ña Yaya ñama mandasi gi tsa'caen tson'jen. Tsa'caen tson'jensi tsu tsa tson'choja ñoa'me canjaen Chiga ñama manda'suve.

³⁷Toya'caen ñama moen'su Chiga Quitsa tsu ñane canjaen'jen. Tsa'ma que'ija Tise Aya'fama paña'fambi ni Tise tsovejuma atte'fambi.

³⁸Tsa'camba que'i injama'choi'ccu Tise ñotsse su'choma in'jambipa qui Tise moe'cho a'ive'qque in'jan'fambi.

³⁹Que'ija Chiga Tevaen'jema tsain'bitsse can'fa tsangae canseya'chove atesuye in'jamba. Nane tsa Chiga Tevaen'jen tsu ñane conda.

⁴⁰Tsa'ma tsa'caen tsangae canseye in'jan'ma qui ñama chi'ga'fa.

⁴¹Tta'ttambi gi a'i ñane ñotsse suya'chove.

⁴²Toya'caen que'ima atesupa gi atesucho que'i Chigama in'jambi'choama.

⁴³Ña Yaya moensi jisi qui ñama paña'fambi. Tsa'ma faesu a'i jipa tisune afa'nijan tsama qui paña'faya.

⁴⁴A'i “Queja ñotssi” qquen su'choma in'jamba tsa fae'ccoa Chiga “Queja ñotssi” qquen su'choma in'jambi'ta, ¿ma'caen qui que'ija Chigave in'jan'faya?

⁴⁵Que'ija dyojo'fajama. Ñajan que'i shacama Chiga Quitsanga afaya'bi gi. Tsa'ma faesu tsu que'i shacama afa'su. Tsa tsu Moisés, que'ine ñotsse afa'su qquen que'i in'jan'cho.

⁴⁶Que'ija Moisés su'chove in'jan'choecan'da qui ñame'qque in'jañe'can Moisésja ñane tevaensi.

⁴⁷Tsa'ma tise tevaen'chove in'jambi'ta ¿ma'caen qui in'jan'faya ña su'choveja?