Read A'ingae Juan 9 Bible Online

Juan 9 - A'ingae bible

Juan 9

¹Panshanjimba Jesúsja binima atte. Tsave binime isu'cho.

²Ingija Jesúsma iñajampaña'fa: —Atesian'su, ¿micomba tsu binime va a'imajan isu'cho? ¿Tise yaya, tise mama egae tsincomba ti? Tsambi'ta ¿tisu egae jinchopa ti?

³Jesúsja su: —Me'i, tisu egae jinchópambi tsu ni tise yaya, tise mama'qque egae tsincon'fambi. Tsa'ma tisei'ccu Chiga tson'choma attiañe tsu tsa'caen isu'cho.

⁴Toya a'ta a'ija sema'jen'fa. Cose'nijan majañi'qque semañe osha'fambi. Tsa'caen ja'ño ñajan toya oshapa gi ña Yaya manda'choma tsoña'cho.

⁵Toya va andeni can'jen'da gi va andesundeccuma chanjien'su.

⁶Tsa'caen supa Jesúsja andenga attui tssipoemba bini tso'fenga pechaen.

⁷Pechaemba su: —Japa Siloé singu'ccunga ovashi'ngaja. Siloé tsu “manda moen'cho” qquen su'cho. Binijan japa ovashi. Ovashipa ji'ta tayo atteye osha.

⁸Tsonsi pporotsse can'jendeccu, tayoe binime atte'jendeccuja su'fa: —¿Vambi ti corifin'dive iñajan'su?

⁹Majanjan su'fa: —Ju, tsa tsu. Cca'ija su'fa: —Me'i, tsambi. Tsa'ma tsa'cañi. Tsa'ma tayoeja binimba su: —Ju, ña gi.

¹⁰Tsonsi iñajampaña'fa: —¿Ma'caen qui ja'ñojan atteye osha?

¹¹Tiseja su: —Tsa “Jesús” qquen su'cho a'i tsu andenga attui tssipoemba ña tso'fenga pechaen. Pechaemba tsu manda Siloé singu'ccunga ovashi'ngaye. Japa ovashipa gi atteye osha.

¹²Tsonsi iñajampaña'fa: —¿Mani tsu tsa a'ija? Tiseja su: —Atesumbi gi. Fariseondeccu ccusha'choma iñajansepoen'fa'cho

¹³Tsonsi bini ccusha'choma fariseondeccunga anga'fa.

¹⁴Sema'ma'qquia a'ta tsu Jesúsja tsa'caen andema tssipoemba binima ccushaen.

¹⁵Fariseondeccuja ccase tsa a'ima iñajampaña'fa ma'caen tsu ja'ñojan atteye osha. Tiseja su: —Andema tssipoemba tso'fenga pechaensi ovashipa gi ja'ñojan atte.

¹⁶Qquen susi majan fariseondeccuja su'fa: —Tsa'caen sema'ma'qquia a'ta injansembe tsincon'cho a'ita Chigambembi tsu. Tsa'ma cca'indeccuja su'fa: —¿Ma'caen tsu egae tsincon'su'ta oshaya qquen ñotssiama canjaeñe? Tsa'caen supa fae'ngae in'jan'fambi.

¹⁷Tsomba ccase tayoe binima iñajampaña'fa: —Queja ¿jongoe qquen qui suya que tso'fema ccushaen'sumajan? Tiseja su: —Chiga Aya'fama afa'su tsu.

¹⁸Tsa'ma israendeccuja tayoe binime canse'cho ccusha'chove in'jan'fambi. Tsa'caen in'jambipa ccusha'chombe yaya, tise mamama'qque ttu'sepa

¹⁹iñajampaña'fa: —¿Vata ti que dutssi'ye binime isu'cho qquen su'cho? ¿Ma'caen tsu ja'ñojan atteye osha?

²⁰Tise yaya, tise mama'qque su'fa: —Atesu'fa gi vaja ingi dutssi'ye tsu binime isu'cho.

²¹Tsa'ma atesu'fambi gi ma'caen tsu ja'ñojan atteye osha. Toya'caen atesu'fambi gi majan tise tso'fema ccushaen'chove. Tisema iñajampaña'faja. Tayo coenza tsu. Tise tsu condaye osha.

²²Nane Tise yaya, tise mama'qque israendeccuma dyojopa tsa'caenjan su'fa. Tayo tsu israendeccuja in'jamba manda'fa Chigane atesian'jen'ttinga ca'nimbe can'faye majan Jesúsja Cristo qquen in'jamba su'ta.

²³Tsa'cansi tsu tise'paja qquen su'fa: “Tisema iñajampaña'faja. Tayo coenza tsu.”

²⁴Tsonsi israendeccuja ccase tayoe bini ccusha'choma ttu'sepa su'fa: —Chiga paña'jen'ni tansintsse condaja inginga. Ingita gi atesu'fa tsa a'ita tsu egae tsincon'su.

²⁵Tsonsi tiseja su: —Ñajan atesumbi gi tise egae tsincon'suve. Fae'ccoe gi atesucho. Tayoeja bini gi ja'ñojan atte.

²⁶Tsonsi ccase iñajampaña'fa: —¿Mingae tsu quemajan tson? ¿Micon tsu que tso'fema attiañe'jan?

²⁷Tiseja su: —Tayo susi qui paña'fambi. ¿Jongoesie qui ti'tsse ña condaye in'jan'fa? ¿Que'i'qque ti qui tisema shondo'suve daye in'jan'fa?

²⁸Tsa'caen susi tisema afase'fa: —Que qui tsambe shondo'su. Tsa'ma ingija Moisés shondosundeccu'fa gi.

²⁹Atesu'fa gi Moisésnga Chiga afa'choma. Tsa'ma tsa a'imajan atesu'fambi gi mani'suve'qque.

³⁰Tsa'caen afase'fasi tiseja su: —¡Tsama can'se! Que'i atesu'fambisi mani'suve'qque. Tsa'ma ña tso'fema tsu attian.

³¹Tayo gi ñotsse atesu'fa Chigaja egae tsinconsundeccuma pañambi. Tsa'ma poiyi'cco majan Tisema in'jamba Tise in'janqquia'caen tso'ninda tsu Tiseja tsendeccuma paña.

³²Minguite'qque pañaembi tsu binime isu'choma bittaen'jen'chove.

³³Va a'ija Chigane jimbiecan'da tsa'caen tsoñe oshaya'bi tsu.

³⁴Tsonsi nasundeccuja su'fa: —Queja tseyi isusiyi egae jincho'cho'ta, ¿ma'caen qui ingingaja atesiaña? Tsa'caen supa tteya moen'fa. Egambi gi qquen su'su ñoa'me bini

³⁵Bini ccusha'choma tteya moen'fa'chove atesupa Jesúsja tisema cachuipa su: —¿In'jan ti qui queja Sefaccone Ji'cho A'ive?

³⁶A'ija su: —Na'su, ñanga condaja majan tsu tsaja ña tise've in'jañe.

³⁷Jesúsja su: —Tayo qui atte'a. Ña gi, quei'ccu afa'je'cho.

³⁸Tsonsi a'ija Jesúsnga ccaru dyaipa su: —Na'su, in'jan gi.

³⁹Tse'i Jesúsja su: —Ñanda gi ji va ande'su a'i injama'choma somboeñe cuintsu majan binia'can'jan atte'faye: majan atte'je'choja binia'caen atesumbitsse da'faye.

⁴⁰Tsonsi majan fariseondeccu tsse'tti can'jendeccu pañamba iñajampaña'fa: —¿Tsuin'da ti gi ingi'qque binia'caen atesumbindeqquia?

⁴¹Jesúsja su: —Binia'caen atesumbiecan'da qui shacapa'fambiye'can que'i egae tsincon'chone. Tsa'ma “Atesu gi” qquen supa qui binia'caen shacapa'fa.