Read A'ingae Tson'fa'cho 10 Bible Online

Tson'fa'cho 10 - A'ingae bible

Tson'fa'cho 10

¹Sundaro capitán tsu can'jen Cesarea canqqueni, Cornelio qquen inisecho'cho. Tise sundarondeccuja Italiano Sundarondeccu qquen inisecho'cho.

²Cornelio poiyi'cco tise tsaoni can'jensundeccu'qque Chigave in'jan'fa. Tiseja dyoe'sui'ccu Chigama in'jamba paña. Se'pimbe'yi tsu osha'choma afeye atesu israendeccunga. Poi a'ta tsu Chigama iñajan'jen.

³Tsa'camba fae a'ta tayo ondusesi Cornelioja attian'choma atte. Chigama sefacconi'su shondo'su tise cuartonga ca'nisi tsu atte. Tsa'caen attiamba su: —¡Cornelio!

⁴Qquen susi Cornelioja dyopa Chigama sefacconi'su shondo'suma can'boemba iñajampaña: —Na'su, ¿jongoesu qquen qui in'jamba ji? Tsonsi Chigama sefacconi'su shondo'suja su: —Chiga Quitsa tsu ñotsse pañamba in'jan que iñajan'choma. Ñotsse tsu attepa in'jan que ñotsse se'pimbe'yi mendeqquianga afe'choma.

⁵Mandaja a'ima Jope canqqueni Simón Pedro, qquen inisecho'choma cuintsu ttu'sengaye.

⁶Tsata tsu can'jen faesu Simón ettini, tsa ttonoma qque'shopa ñoña'sui'ccu. Tsambe tsa'oja mar otafani. Pedro tsu quenga condaya ma'caen tsoña'chove.

⁷Chigama sefacconi'su shondo'su jasi Cornelioja ttu'se dos tisema coirasundeccuma. Toya'caen fae sundaroma'qque ttu'se. Tsa sundaroja Cornelioma shondo'supa tise'qque Chigave ñotsse in'jan'cho.

⁸Tsa'caen ttu'sepa Cornelioja pa'tssima condapa Jope canqqueni tsendeccuma mandamoen.

⁹Ccaqui a'ta mandasi ja'chondeccu toya tsaiqui'ye jiñamba ca'tsa Jope canqqueni napiji'fa'ni Pedroja tsa'o tansinfani'su ppappacconga ansunde Chigama iñajañe tayo enttinge a'tave dasi.

¹⁰Chigama iñajan'jemba qquipoe'supa añe in'jan. Tsa'ma toya tise'be shoccoen'jen'ni Pedroja ayo'oqquia'caen attian'choma atte,

¹¹sefacco fettaye'choma. Tsa'caen fettayesi randeje'a sarupama cuatro suivo'fai'ccu tandandusiamba andian'fa'choma atte.

¹²Tsa sarupani tsu sheque osha'cho aña'cho –anqque'su, toya'caen an'masia'qque. Tsu'tte, tivei'ccu jacanqque'su, osha'cho andeye manguqque'su, osha'cho sefane chhajepa jacanqque'su tsu sheque.

¹³Tsa'caen attiansi Pedroja afa'choma paña qquen su'choma: —Pedro, jangipa fi'ttipa anjan.

¹⁴Tsa'ma Pedroja su: —Me'i, Na'su, in'jambi gi. Minga'ni'qque gi ambi tsa'caen an'masia aña'chomaja.

¹⁵Tsonsi afa'je'choja ccase afapa su: —Que atte'choja anqque'su tsu. Chiga Quitsa “Tsa aña'choja ñotssi” qquen su'ninda ¿jongoesie qui asettu'je?

¹⁶Tres se tsa'caen Pedronga attiamba pa'cco sarupa toequi sefacconi ansunde.

¹⁷¿Jongoesune tsu attian? qquen Pedro toya asi'ttaen'jen'ni Cornelio aindeccuja jipa tsotefasu sombo'ttini ccutsu'fa. Nane tsendeccuja Simón tsa'ove iñajampañamba ji'fa.

¹⁸Tsa'onga napipa quia'me afa'je'fa: —¿Ñoa'me ti vani Simón Pedro qquen inisecho'chota can'jen?

¹⁹Pedro toya attian'choma asi'ttaen'jen'ni Chiga Qquendya'pa tisenga conda: —Tres a'i tsu queve tta'tta'je'fa.

²⁰Jangipa andepa dyombe'yi tsendeccui'ccu jaja. Nane ña gi tsendeccuma manda queve ttu'seye.

²¹Tsonsi Pedroja ande Cornelio manda'cho aindeccu ccutsu'fani. Andepa qquen su: —Ña gi que'i tta'tta'je'cho. ¿Jongoesie in'jamba qui ji'fa?

²²Tsendeccuja su'fa: —Capitán Cornelio mandasi gi ji'fa. Tiseja ño'a a'i. Chigave in'jamba dyoe'sui'ccu Tisema pañamba canse. Poiyi'cco israendeccu'qque tisema ñotsse in'jan'fa. Tsa ño'a Chigama sefacconi'su shondo'su tsu Cornelioma manda cuintsu quema ttu'sesi queja tise tsaoni japa afasi tiseja que su'choma pañañe.

²³Tse'i Pedroja su: —Jipa ja'ño cose vani ana'faja. Ana atapa Pedro tsendeccui'ccu fae'ngae ja. Faesu Jope canqque'su Jesúsve in'jan'chondeccu'qque fae'ngae jaja'fa.

²⁴Ccaqui a'ta napi'fa Cesarea canqqueni. Cornelioja tise antiandeccu, tise ñotsse in'jan'cho amigondeccuma'qque ttu'sepa ronda'je'fa.

²⁵Tsa'caen ronda'jepa Pedro tsa'onga napisi Cornelioja sombopa cachui. Cachuipa Pedronga ccarupa Chigama iñajanqquia'caen iñajan.

²⁶Tsa'ma Pedroja tisema qquitssa jangiamba su: —Ccutsuja. Ña'qque quia'caen, aqquia a'iyi gi.

²⁷Condasé ca'nimba atte'fa tsain'bitssi a'i bojin sheque'fa'choma.

²⁸Attepa Pedroja su: —Que'ija atesu'fa qui israendeccuja asettu'chopa pa'o israembindeqquiai'ccu boye osha'fambi. Ni cca'imbe tsa'onga'qque ca'niñe osha'fambi. Tsa'ma Chiga Quitsa ñama atesiansi gi in'jan majameñi'qque ega qquen su'masia.

²⁹Tsa'camba gi que ttu'sesi isha'qque afambe'yi ji. Tsa'camba gi atesuye in'jan, ¿jongoesie qui ñama ttu'se'fa?

³⁰Tsonsi Cornelioja su: —Tayo tsu cuatro a'ta pasa ña atte'cho. Qquia'ni gi toya ambe'yi sime Chigama iñajaña'cho hora napisi iñajan'jemba atte a'ima. Tise ondiccu'jeja chhariccotssi.

³¹Tsa tsu ñama su: “Cornelio, Chiga Quitsa tsu ñotsse pañamba in'jan que iñajan'choma. Ñotsse tsu attepa in'jan que ñotsse se'pimbe'yi mendeqquianga afe'choma.

³²A'ima mandaja Jope canqqueni Simón Pedro, qquen inisecho'choma, cuintsu ttu'sengaye. Tsata tsu can'jen faesu Simón ettini, tsa ttonoma qque'shopa ñoña'sui'ccu. Tsambe tsa'oja mar otafani. Pedro jipa tsu quei'ccu afaya.”

³³Qquen pañamba gi junde mandamoen queve tta'ttangaye. Ñotsse qui queja vani ji. Ja'ñojan ingi poiyi'cco gi va'tti can'jen'fa. Chiga Quitsa'qque tsu va'tti can'jen. Tsa'camba gi pañañe in'jan'fa pa'cco osha'cho jongoesuma Na'su Chiga quenga manda'choma. Pedro Cornelio tsaoni afa'cho

³⁴Tsonsi Pedroja afaye ashaemba su: —Ja'ño gi atesu Chiga Quitsaja israendeccuveyi in'jambi. Tsa'ma poiyi'cco israembindeqquiama'qque tsu in'jan.

³⁵Nane poiyi'cco majan dyoe'sui'ccu Tise've in'jamba canse'fa'nijan ccane'qque tsu Chigaja tise'pama in'jan.

³⁶Chiga Quitsa tsu israendeccunga conda va ñotsse condase'choma ma'caen Jesucristoja a'i injama'choma ñoquian'suve. Tsa Jesúsyi tsu poiyi'ccombe na'su.

³⁷Que'i'qque tayo paña'fa pa'cco Judea ande'ye ma'caen da'choma. Nane Galileani tsu ashaen Juan candusiamba feti'cho nanisi.

³⁸Toya'caen qui paña'fa ma'caen Chiga Quitsaja Tise Qquendya'pai'ccu Jesús Nasareno'suma in'jaensi tiseja ñotsse tsoñe jacamba poiyi'cco cocoya na'su vanaen'jendeccuma ccushaen. Chiga tisei'ccu can'jensi Jesúsja tsa'caen tson.

³⁹Ingija attepa condasundeccu gi pa'cco Jesús ma'caen tson'choma Judea andeni, Jerusalén canqqueni'qque. Tsa'caen jacansi tsu tsendeccuja Jesúsma avuja'cconga otipa fi'tti'fa.

⁴⁰Tsa'caen fi'tti'fasi Chiga Quitsaja tres a'tangae ccase Jesúsma qquendyaen. Tsa'caen qquendyaemba inginga attian.

⁴¹Nane poiyi'cco a'inga attiambipa ingingayi tsu attian. Jesús toya pambi'te Chigaja ingima ttu'se tisene afa'suve. Tsa'cansi ingija Jesús papa ccase qquendyasi tisei'ccu amba cu'i'fa.

⁴²Tsonsi Chiga Quitsaja ingima manda a'inga candusiamba qquen condase'faye: “Chigaja Jesúsma na'suve tson cuintsu cansendeqquiambe injama'choma, toya'caen pa'chondeccumbe injama'choma'qque somboeñe.”

⁴³Toya'caen tayopi'su Chiga Aya'fama afasundeccu'qque Jesúsne afapa su'fa: “Poiyi'cco majan tise've in'jan'chondeccu tise a'ive dasi tsu Chiga Quitsaja tise'pa egae tsincon'choma joqquitssiaña.” Chiga Qquendya'pa israembindeqquianga ca'ni'cho

⁴⁴Toya Pedro afa'je'ni Chiga Qquendya'paja poiyi'cco tisema pañasundeccunga ca'ni.

⁴⁵Tsa'caen ca'nisi faesu aya'fangae afapa Chigama ñotsse afa'fa. Tsonsi Pedroi'ccu ji'cho Cristove in'jan'cho israendeccuja attepa can'boen ccutsu'fa. Nane ¿Chiga Qquendya'pa ti israembindeqquianga'qque ca'ni? qquen in'jamba can'boen ccutsu'fa. Tsonsi Pedroja su:

⁴⁶(null)

⁴⁷—Tayo ingia'caen Chiga Qquendya'pama isu'fa'ninda ¿ma'caen gi se'pi'faya va aindeccu fetiyeya'chone?

⁴⁸Tsa'caen supa manda cuintsu tayo Na'su Jesucristo a'ive da'ta fetiye'faye. Qquen susi poiyi'cco a'i fetiyepa Pedroma su'fa cuintsu boyi a'ta tise'pai'ccu can'jeñe.