Read A'ingae Tson'fa'cho 25 Bible Online

Tson'fa'cho 25 - A'ingae bible

Tson'fa'cho 25

¹Festoja tayo governarorve dapa tres a'ta Cesareani can'jemba Jerusaléni ja.

²Tseni napisi Chigama afa'su nasundeccu, israe'su coenzandeccu'qque tisenga conda'fa Pablo ma'caen tsincon'chone. Tsa'caen condapa Festoma iñajan'fa

³cuintsu tise'pama fuiteye in'jamba Pabloma Jerusaléni i'faye mandaye. Tsa'caen iñajamba tayo in'jan'fa tisema i'ninda ma'caen ron'dapa Pabloma fi'ttiya'chove.

⁴Tsa'ma Festoja su: —Ingija Pabloma Cesareani piccopa an'bian'fa. Ñajan junde tseni jaye tson'jen.

⁵Ñai'ccuta tsu ji'faya'cho jo'su que'i nasundeccuyi Cesareani japa Pablo ma'caen tsincon'chone afaye.

⁶Tsomba Festoja ocho a'ta, nane diez a'taqquia'caen tsendeccui'ccu can'jemba toequi Cesareani ja. Japa ccaqui a'ta na'su dyaipa'chonga ansundepa dyai. Dyaipa manda cuintsu Pabloma i'ngaye.

⁷Tsonsi Pabloma isi Jerusaléne ji'cho israendeccu tisenga shonquendi'e ccutsu'fa. Tsa'caen ccutsupa Pablone osha'cho ñoa'me egae tsincon'chove afa'fa. Tsa'ma tise'pa afa'choja tansintsse su'cho qquen canjaeñe osha'fambi.

⁸Tsonsi Pablo'qque tisúne qquen afa: —Ñajan egae tsincombi gi. Israendeccu manda'choma egae tsincombe gi can'jen. Ni Chiga ettima'qque egae tsincombi, ni Romano na'su César manda'choma'qque.

⁹Tsa'ma Festoja israendeccu tiseja ño'a qquen in'jan'faye in'jamba Pabloma iñajampaña: —¿In'jan ti qui Jerusaléni japa tseni ccutsupa ñanga afaye israendeccu queja egae tsincon qquen su'chone?

¹⁰Tsa'ma Pabloja su: —Va'tti gi ccutsu César Na'su mandasi dyai'choni. Va'ttinga tsu ñama pañaña'cho ña egae tsincon'choma atteyeta. Tsa'ma egae tsincombi gi israendeccunga. Que'qque tsamajan atesu.

¹¹Ñanda egae tsincomba ñoa'me paye jincho'choecan'da dyojombi gi paye. Tsa'ma tise'pa ña egae tsincon qquen afapa aqquia afopoen'fa'ninda oshambi qui ñama tise'panga moeñe. In'jan gi cuintsu César Na'suyi ña tsincon'choma pañamba tsane tansintsse afaye.

¹²Tsonsi tse'i Festoja injama'pandeqquiai'ccu condaseccopa su: —Que César Na'su que tsincon'choma pañamba tsane tansintsse afaye qquen in'jan'ninda gi na'su Césarnga moeña. Ande Na'su Agripa pañañe in'jan'cho

¹³Re'ricco a'ta pasasi ande na'su Agripa, Berenicei'ccu Cesareani Festoma chigambiañe ji'fa.

¹⁴Bo'tsse can'jensi Festoja ande na'su Agripanga Pablone conda. Qquen tsu su: —Félix somboembeyi piccopa ja'cho a'i tsu can'jen.

¹⁵Ña Jerusaléni can'jensi tsu Chigama afa'su nasundeccu, israe'su coenzandeccu'qque ñanga tisene egae condapa iñajan'fa tisema fi'ttiye ña mandaye.

¹⁶Tsonsi ñajan su romanondeccuja qquen indiye'choma injanga fi'ttiye atesu'fambi. O'tie tsu egae afaséye'su tisuma egae afasesundeccui'ccu tsovejunaccu afaccoya'cho. Tsa'caen tsu afaya'cho tisuma egae su'chone.

¹⁷Tsa'camba tsendeccu vani bo'fasi ñajan junde, ccaqui a'ta, na'su dyaipa'chonga dyaipa Pabloma iye manda.

¹⁸Tsa'ma tisema egae afasesundeccu ccutsupa afa'ma ña in'janqquia'caen egave afa'fambi.

¹⁹Nane tise'pa Chigave in'jan'chone tsendeccuja Pabloma ccaningae in'jamba afacco'fa. Toya'caen majan Jesúsne tsu afacco'fa. Cca'ija Jesús tayo pa qquen susi Pabloja toya canse qquen su.

²⁰Tsa'caen su'fasi ñajan ma'caen tsoña'chove atesumbipa gi Pabloma iñajampaña: “¿Jerusaléni jaye'ta ti qui in'jan tseni japa iñajansepoeñe que egae tsincon qquen su'fa'chone?”

²¹Tsa'ma Pabloja su: “Na'su César Agosto tsu ña tsincon'choma pañamba tsane tansintsse afaya.” Qquen susi gi ñajan manda tisema piccopa an'biañe na'su César Agostonga moeña'gae.

²²Tsonsi Agripaja Festoma su: —Ña'qque gi tise afa'choma pañañe in'jan. Festoja su: —Tu'i qui pañaña.

²³Ccaqui a'ta Na'su Agripaja Berenicei'ccu jiji'fa. Nane ñoa'me pa'tsutsse ondiccupa osha'cho na'su jinchoqque'suma attiamba na'suma paña'jen'cho ettinga jiña'fa. Poiyi'cco sundaro nasundeccu, canqque nasundeccu'qque tsu fae'ngae jiña'fa. Tsa'caen ji'fasi Festoja Pabloma iye manda.

²⁴Isi Festoja su: —Ande Na'su Agripa, poiyi'cco vani bo'fa'chondeccu, que canjan'faja va'tti ccutsu'cho a'ima. Poiyi'cco israendeccu, Jerusaléni, vani'qque ñama anttembe'yi iñajan'jen'fa tisema fi'ttiya'chone.

²⁵Tsa'ma attembi gi ma'caen tsincon'chove tisema fi'ttiyeja. Tise'yi César Na'su tise tsincon'choma pañamba tsane tansintsse afaye qquen in'jansi gi tisema na'sunga moeña.

²⁶Tsa'ma ña na'sunga tisene jongoesu qquen tevaeñe atesumbi gi. Tsa'camba gi que'inga canjaeñe tisema i. Na'su Agripa, ñoa'me gi quenga tisema canjaen'jen tisema iñajansepoemba jongoesu qquen tevaeña'chove atesuye.

²⁷¿Ma'caen gi indiye'choma Na'su Césarnga moeña, tise ma'caen tsincon'choma tevaembi'ta? Tsa'caen moeñe'jan sumbi tsu qquen gi in'jan.