Read Akha Aˇ dahˬ 12 Bible Online

Aˇ dahˬ 12 - Akha bible

Aˇ dahˬ 12

¹Aˬbyaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Nawˬ-euˬ miˇ kʼahˬ, nawˬ-euˬ aˬ yuiꞈ aˬ nyiˇ deuˬ hawˇ-eu nawˬ da-euˬ nymˇ-ahˇ nawˇ byehˇ dzeh yaꞈ-awˇ, ngaˇ nawˬ-ahˇ mehˬ nehˬ-eu miˇ kʼahˬ-ahˇ iˇ-awˬ.

²Nawˬ-euˬ zaˬ nawˬ-euˬ uˆ deuˬ-ahˇ ngaˇ bi jeuˬ bi o le-awˇ, miˇ tsaˬ kʼoeˇ taˆ tsawˇ myahˇ doˆ-eu tsawˇ jeuˬ tiˬ jeuˬ bi pyeuꞈ laˇ ma. Nawˇ aˬ cawˬ-ahˇ guiˬ lahˬ biꞈ-eu tsawˇ haˬ tiˬ gʼaˬ pyeuꞈ laˇ ngeh keuˆ ni, ngaˇ nawˬ-ahˇ guiˬ lahˬ biꞈ-awˇ tsawˇ myahˇ bi doˆ ma.

³Nawˬ-ahˇ guiˬ lahˬ biꞈ-eu tsawˇ haˬ-ahˇ ngaˇ guiˬ lahˬ biꞈ-awˇ, nawˬ-ahˇ yaˬ kʼehˇ yaˬ-eu tsawˇ haˬ-ahˇ ngaˇ yaˬ kʼehˇ yaˬ ma. Nawˬ-ahˇ gʼoe-awˇ tsawˇ jeuˬ dawˬ tawˆ luꞈ-ahˇ, ngaˇ guiˬ lahˬ biꞈ ma.”

⁴Aˬbyaˬ shiꞈ tseˇ ngaˬ kʼoꞈ kʼawˆ ngeh, Sahˬpaˬ Miˬyehˇ neh aˬ yawꞈ-ahˇ ehˇ nehˬ-euˬ loꞈ-ehˇ, Haˬlaˬ meuˬ-ahˇ neh aˬ yawꞈ doˆ-iˇ-euˬ meh. Lawˇtaˬ gʼaˬ kʼawꞈ, aˬ yawꞈ-euˬ mehˬ nah caw teh gʼeh-euˬ meh.

⁵Aˬbyaˬ-aˬ, aˬ yawꞈ-euˬ miˬ zaˬ Saˬlehˇ hawˇ-eu aˬ yawꞈ-euˬ aˬ duˇ Lawˇtaˬ-ahˇ sheuˬ-awˇ, Kaˬnaˬ miˇ kʼahˬ-ahˇ iˇ-euˬ meh. Haˬlaˬ meuˬ-ahˇ jawˇ ngeh, aˬ yawꞈ neh mˇ jaˆ-euˬ pyuˇ shuiˇ myawˬ gahˬ dawˬ tawˆ luꞈ yuˇ gʼeh-awˇ, zaˬ kʼaˆ dawˬ tawˆ luꞈ sheuˬ gʼeh-euˬ meh. Aˬ yawꞈ maꞈ Kaˬnaˬ miˇ kʼahˬ-ahˇ iˇ keuˆ ngeh,

⁶Sheˬkmˬ meuˬ-euˬ muiˬ-eu shawˇ-eu jawˇ duˬ-ahˇ jaˆ-eu muiˬ-eu shawˇ-eu Mawˇleh aˇ bawˇ-ahˇ maˬ iˇ keuˆ kʼoeˇ keuˆ ni, tiˬ gaˇ saˇ-iˬ tiˬ gaˇ iˇ gʼeh-euˬ meh. Aˇ yamˬ kʼoeˇ yamˬ-ahˇ, Kaˬnaˬ miˇ kʼahˬ laꞈ kʼoeˇ Kaˬnaˬ tsawˇ jeuˬ jawˇ luꞈ-eu meh.

⁷Kʼoeˇ ngeh, Aˬbyaˬ-euˬ mehˬ shi Sahˬpaˬ Miˬyehˇ doˆ le-awˇ, “Miˇ kʼahˬ heu kʼahˬ-aˬ, nawˬ-euˬ zaˬ nawˬ-euˬ uˆ deuˬ-ahˇ biꞈ-eu gʼaˇ duˬ, ngaˬ neh lehˬ hmˬ taˬ-euˬ miˇ kʼahˬ pyeuꞈ-eu ma” lehˇ ehˇ nehˬ-euˬ meh. Aˬbyaˬ-aˬ, aˬ yawꞈ-euˬ mehˬ shi doˆ le-euˬ Sahˬpaˬ Miˬyehˇ-ahˇ lawˇ nehˬ shehˇ nehˬ-eu gʼaˇ duˬ, kʼoeˇ gaˇ lawˇ duˬ tiˬ tsahˇ tsoˆ-euˬ meh.

⁸Kʼoeˇ naˇ, laꞈ oˆ paw jaˆ-eu Beˬdeˬlaˇ meuˬ-euˬ nahˇ ma doˆ kʼehˬ paw, gawˬ jawˬ gawˬ duˇ jaˆ-eu jawˇ duˬ-ahˇ aˬ yawꞈ iˇ-awˇ, nahˇ ma ga kʼehˬ paw jaˆ-eu Beˬdeˬlaˇ meuˬ hawˇ-eu, nahˇ ma doˆ kʼehˬ paw jaˆ-eu Aˬiˇ meuˬ-euˬ yaw kaˬ-ahˇ, sehˬ gʼawˆ gʼawˆ-awˇ jawˇ-euˬ meh. Kʼoeˇ gaˇ kʼawꞈ, lawˇ duˬ tiˬ tsahˇ aˬ yawꞈ tsoˆ-awˇ, Sahˬpaˬ Miˬyehˇ-ahˇ uˬ duˬ tahˬ tahˬ-ehˇ jawˇ-euˬ meh.

⁹Kʼoeˇ naˇ, tiˬ gaˇ saˇ-iˬ tiˬ gaˇ aˬ yawꞈ jawˇ jawˇ-ehˇ, Kaˬnaˬ miˇ kʼahˬ laꞈ oˆ paw pyawˬ-ahˇ iˇ ka gʼeh-euˬ meh.

¹⁰Kaˬnaˬ miˇ kʼahˬ laꞈ kʼoeˇ mehꞈ-eu shuꞈ-eu jeˬ keuˆ le-euˬ miˇ neh, Iˇjiˇtuˆ miˇ kʼahˬ laꞈ kʼoeˇ tiˬ kʼehˬ tiˬ yamˬ cehˆ jawˇ-iˇ-eu gʼaˇ duˬ, laꞈ oˆ paw Aˬbyaˬ iˇ ka gʼeh-euˬ meh.

¹¹Iˇjiˇtuˆ miˇ kʼahˬ-ahˇ iˇ uˇ-eu gʼaˇ duˬ miˇ kaˬ tsehˆ doˆ-eu lehˇ gʼeh ngeh, aˬ yawꞈ-euˬ miˬ zaˬ Saˬlehˇ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Nawˇ-aˬ, aˇ gʼehˇ zawˇ muiˬ-eu zaˬ miˬ zaˬ tiˬ gʼaˬ pyeuꞈ-eu meh.

¹²Teu miˇ neh, Iˇjiˇtuˆ tsawˇ haˬ deuˬ nawˬ-ahˇ mawˇ ngeh, ngaˇ nawˬ-euˬ kʼaˬ dzeˇ zaˬ nga lehˇ aˬ yawꞈ maꞈ haw siˬ naˇ, ngaˬ-ahˇ sehꞈ-awˇ nawˬ-ahˇ tehꞈ-ehˇ bi jawˇ yaꞈ tehꞈ-a.

¹³Nawˇ ngaˬ-euˬ dmˇ ma pyeuꞈ-eu ma lehˇ, aˬ yawꞈ maꞈ-ahˇ ehˇ nehˬ-awˬ. Kʼoeˇ loꞈ-ehˇ ehˇ naˇ, nawˇ baˬ da neh aˬ cawˬ ngaˬ-ahˇ maˬ sehꞈ-eu uˬ taꞈ, cawˬ yaw muiˬ-ehˇ cawˬ nehˬ laꞈ tehꞈ-a.”

¹⁴Miˇ kaˬ iˇ dzeuˇ-awˇ, Iˇjiˇtuˆ miˇ kʼahˬ-ahˇ Aˬbyaˬ iˇ keuˆ ngeh, aˬ yawꞈ-euˬ miˬ zaˬ aˇ gʼehˇ muiˬ dui dui gaˇ Iˇjiˇtuˆ tsawˇ haˬ deuˬ ya mawˇ-euˬ meh.

¹⁵Sahˬ paˬ sahˬ ma gaˇ mˇ-eu yaw huiˬ yaw mahˇ deuˬ kʼawꞈ, Saˬlehˇ aˇ gʼehˇ muiˬ gaˇ ya mawˇ-awˇ, sahˬ paˬ-ahˇ dzawˇ gaˬ leˇ-euˬ meh. Kʼoeˇ ngeh, Saˬlehˇ-ahˇ sahˬ paˬ jawˇ gaˇ aˬ cawˬ sheuˬ gʼeh-euˬ meh.

¹⁶Saˬlehˇ baˬ da neh, sahˬ paˬ kʼoeˇ gʼaˬ Aˬbyaˬ-ahˇ yaw muiˬ paˬ-ehˇ caw ba nehˬ-awˇ, yawˇ yawˇ maꞈ maˬ ehˇ, ciꞈ myehꞈ ciꞈ maꞈ maˬ ehˇ, mawˇ neˇ mawˇ maꞈ maˬ ehˇ, mahˬ tahˬ laˆ deuˬ maˬ ehˇ, zaˬ kʼaˆ deuˬ maˬ ehˇ, law taw deuˬ maˬ ehˇ, biꞈ nehˬ-euˬ meh.

¹⁷Ehˇ kʼawꞈ, sahˬ paˬ kʼoeˇ gʼaˬ Saˬlehˇ-ahˇ sheuˬ-euˬ miˇ neh, aˬ yawꞈ kʼoeˇ taˆ maˬ ehˇ, aˬ yawꞈ-euˬ nymˇ laꞈ kʼoeˇ jawˇ-eu tsawˇ haˬ deuˬ kʼoeˇ taˆ maˬ ehˇ, Sahˬpaˬ Miˬyehˇ neh naˇ gawˇ gawˇ ma bi keuˆ le-euˬ meh.

¹⁸Kʼoeˇ ngeh, sahˬ paˬ kʼoeˇ gʼaˬ Aˬbyaˬ-ahˇ bi kuˇ laˬ-iˇ-awˇ, heu loꞈ-ehˇ ehˇ nehˬ-euˬ meh. “Nawˇ ngaˬ-ahˇ aˬ jeˬ jahˇ nehˬ laꞈ te. Zaˬ miˬ zaˬ heu gʼaˬ nawˬ-euˬ miˬ zaˬ ma lehˇ aˬ jeˬ miˇ neh nawˇ maˬ ehˇ te.

¹⁹Aˬ jeˬ miˇ neh nawˬ-euˬ dmˇ ma pyeuꞈ-eu ma lehˇ jaˬ myawꞈ myawꞈ-awˇ, ngaˬ-ahˇ bi mˇ dzaˬ le te. Nawˬ-euˬ miˬ zaˬ heu gʼaˬ sheuˬ-awˇ doˆ-iˇ-awˬ.”

²⁰Aˬbyaˬ aˬ nyaꞈ dzeˇ zaˬ aˬ yawꞈ nyaꞈ kʼaˇ jaˆ-eu jeˬ dawˬ tawˆ luꞈ yuˇ-awˇ, miˇ kʼahˬ kʼoeˇ kʼahˬ laꞈ kʼoeˇ neh bi doˆ-iˇ-eu gʼaˇ duˬ, sahˬ paˬ kʼoeˇ gʼaˬ aˬ yawꞈ-euˬ tsawˇ haˬ deuˬ-ahˇ dawˬ biꞈ-awˇ, aˬ nyaꞈ dzeˇ zaˬ-ahˇ miˇ kʼahˬ kʼoeˇ kʼahˬ laꞈ kʼoeˇ bi doˆ-iˇ-euˬ meh.