Read Akha Aˇ dahˬ 14 Bible Online

Aˇ dahˬ 14 - Akha bible

Aˇ dahˬ 14

¹Baˬbuˇloˬ sahˬ paˬ Aˬlaˬpeˬ -laˇ, Eˇlaˬsaˬ sahˬ paˬ Aˬliˇoˬ, Eˇlamˬ sahˬ paˬ Sheˬdawˇlawˇmaˬ, Gawˇiˆ sahˬ paˬ Tiˇdaˬ, heu oeˬ gʼaˬ gm leˇ-awˇ,

²Sawˇdoˬ sahˬ paˬ Beˇlaˬ, Gawˇmawˇlaˆ sahˬ paˬ Beuˬshaˬ, Aˬdaˬmaˬ sahˬ paˬ Shiˇ -nahˬ, Zeˬbaiˬ sahˬ paˬ Shehˬmiˇbaˬ hawˇ-eu Beˬlaˬ sahˬ paˬ, heu ngaˬ gʼaˬ-ahˇ guiˇ deuˆ-euˬ meh.

³Sahˬ paˬ heu ngaˬ gʼaˬ gm leˇ-awˇ, Siˇdmˬ deh ga ga ma-ahˇ, aˬ yawꞈ maꞈ-euˬ guiˇ maꞈ deuˬ-ahˇ tiˬ gaˇ tehꞈ-ehˇ kuˇ uiˬ taˬ-euˬ meh. Kʼoeˇ ngeh yamˬ-ahˇ, Siˇdmˬ deh ga ga ma-aˬ, nymˬ-mˇ Shiˇ-euˬ iˬ ma laˆ shaˆ jaˆ luꞈ-eu kʼoeˇ tsahˇ nyiˬ paˆ-ehˇ jaˆ-euˬ meh.

⁴Sahˬ paˬ kʼoeˇ ngaˬ gʼaˬ, sahˬ paˬ Sheˬdawˇlawˇmaˬ uˆ lahˇ-eu uˬ moˆ jawˇ luꞈ-eu tseˇ nyiꞈ kʼoꞈ byah laˇ gʼaˬ-euˬ meh. Ehˇ kʼawꞈ, tseˇ smˇ kʼoꞈ tiˬ kʼoꞈ-ahˇ uˇ leˇ ngeh, aˬ yawꞈ maꞈ aˬ yawꞈ-ahˇ puiˬ-euˬ meh.

⁵Tseˇ oeˬ kʼoꞈ tiˬ kʼoꞈ keuˆ laˇ ngeh jawˇ, sahˬ paˬ Sheˬdawˇlawˇmaˬ hawˇ-eu aˬ yawꞈ-ahˇ nui ma taꞈ-eu sahˬ paˬ deuˬ oe ka-awˇ, Aˬshaˇteˬyoˇkaˬneˬ meuˬ-ahˇ jawˇ-eu Leˬpeˬ tsawˇ jeuˬ-ahˇ maˬ ehˇ, Haˬmaˇ meuˬ-ahˇ jawˇ-eu Zuˬzmˬ tsawˇ jeuˬ-ahˇ maˬ ehˇ, Kiˇlaˬdeˬ meuˬ-euˬ deh ga-ahˇ jawˇ-eu Eˇmiˬ tsawˇ jeuˬ-ahˇ maˬ ehˇ,

⁶Eˬdoˬ meuˬ-euˬ gawˬ jawˬ gawˬ duˇ doe ni jawˇ-eu Hawˇlaˆ tsawˇ jeuˬ-ahˇ maˬ ehˇ, deuˆ gʼaˬ jiˇ-awˇ, bawˇ tsahˬ bawˇ dahˇ dawˬ peh jaˆ-eu Eˇpaˬlaˬ meuˬ-ahˇ keuˆ ni teh keuˆ gʼeh-euˬ meh.

⁷Kʼoeˇ naˇ, aˬ yawꞈ maꞈ naˇ kʼah paw paˇ gʼoꞈ kʼoꞈ laˇ-awˇ, Kaˬdeˬshaˇ meuˬ-ahˇ iˇ-euˬ meh. Kʼoeˇ ngeh yamˬ-ahˇ, Kaˬdeˬshaˇ meuˬ-ahˇ Eˬmiˇshaˬpaˇ meuˬ lehˇ kuˇ-euˬ meh. Aˬ yawꞈ maꞈ-aˬ, Aˬmaˬlehˇ miˇ kʼahˬ kʼahˬ lah ni-ahˇ maˬ ehˇ, Haˬzaˬzoˇdaˬ -maˇ meuˬ-ahˇ jawˇ-eu Aˬmawˇliˆ tsawˇ jeuˬ-ahˇ maˬ ehˇ, deuˆ gʼaˬ-euˬ meh.

⁸Kʼoeˇ naˇ, Sawˇdoˬ sahˬ paˬ, Gawˇmawˇlaˆ sahˬ paˬ, Aˬdaˬmaˬ sahˬ paˬ, Zeˬbaiˬ sahˬ paˬ, Beˬlaˬ sahˬ paˬ kʼoeˇ deuˬ-aˬ, aˬ yawꞈ maꞈ-euˬ guiˇ maꞈ deuˬ-ahˇ Siˇdmˬ deh ga ga ma-ahˇ sheuˬ ka taˬ-awˇ, guiˇ deuˆ-eu gʼaˇ duˬ lehˬ hmˬ taˬ-euˬ meh.

⁹Sahˬ paˬ kʼoeˇ ngaˬ gʼaˬ-euˬ guiˇ maꞈ deuˬ hawˇ-eu, Eˇlamˬ sahˬ paˬ, Gawˇiˆ sahˬ paˬ, Baˬbuˇloˬ sahˬ paˬ, Eˇlaˬsaˬ sahˬ paˬ heu oeˬ gʼaˬ yaw kaˬ guiˇ deuˆ-euˬ meh.

¹⁰Deh ga kʼoeˇ ga laꞈ kʼoeˇ, ju jaˬ ni gʼeh-awˇ, juˇ dui dui-eu duˬ kʼahˬ tiˬ byah ni jaˆ-eu meh. Sawˇdoˬ sahˬ paˬ hawˇ-eu Gawˇmawˇlaˆ sahˬ paˬ aˬ nyaꞈ guiˇ maˬ deuˆ gʼaˬ nya-ehˇ, cehˆ dzeuˇ-eu lehˇ cehˆ ngeh, duˬ kʼahˬ kʼoeˇ deuˬ-ahˇ ga ahˇ-euˬ meh. Ehˇ kʼawꞈ, sahˬ paˬ nui deuˬ kʼoeˇ smˇ gʼaˬ-aˬ, gawˬ jawˬ paw cehˆ daˆ-awˇ cehˆ dzeuˇ-euˬ meh.

¹¹Guiˇ deuˆ gʼaˬ-euˬ sahˬ paˬ kʼoeˇ oeˬ gʼaˬ-aˬ, Sawˇdoˬ meuˬ hawˇ-eu Gawˇmawˇlaˆ meuˬ laꞈ kʼoeˇ kʼaˇ jaˆ-eu jeˬ dawˬ tawˆ luꞈ hawˇ-eu, dzaˬ-eu dawˇ-eu jeˬ dawˬ tawˆ luꞈ yuˇ-awˇ doˆ-iˇ-euˬ meh.

¹²Kʼoeˇ ngeh, Aˬbyaˬ-euˬ aˬ duˇ Lawˇtaˬ gʼaˬ Sawˇdoˬ meuˬ-ahˇ jawˇ luꞈ-eu miˇ neh, sahˬpaˬ kʼoeˇ deuˬ aˬ yawꞈ-ahˇ nyehꞈ gʼeh-awˇ, aˬ yawꞈ-euˬ pyuˇ shuiˇ myawˬ gahˬ dawˬ tawˆ luꞈ yuˇ jiˇ gʼeh-euˬ meh.

¹³Ehˇ kʼawꞈ, tsawˇ haˬ tiˬ gʼaˬ cehˆ dzeuˇ-awˇ, Aˬmawˇliˆ tsawˇ jeuˬ Mamˬliˬ-euˬ muiˬ-eu shawˇ-eu aˇ bawˇ bawˇ yaˇ dawˬ peh jawˇ-eu Heˬbyehˇ tsawˇ haˬ Aˬbyaˬ-ahˇ, gaˇ kawˆ kʼoeˇ dzawˇ nehˬ leˇ-euˬ meh. Mamˬliˬ, Eˇshaˬkawˇlaˆ, Aˬneˬlaˆ aˬ ha smˬ mehˇ nmˇ-aˬ, Aˬbyaˬ nehˬ-ehˇ aˬ byahˇ gʼoeˇ-euˬ meh.

¹⁴Lawˇtaˬ-ahˇ aˬ cawˬ nyehꞈ gʼeh-euˬ gaˇ kawˆ Aˬbyaˬ ya gaˬ ngeh, aˬ yawꞈ nehˬ-ehˇ jawˇ-eu guiˇ kʼaˇ deuˆ nya-eu tsawˇ haˬ deuˬ kuˇ uiˬ-euˬ meh. Guiˇ deuˆ-eu tsawˇ haˬ dawˬ tawˆ luꞈ smˬ yaˇ tseˇ yehꞈ gʼaˬ doˆ laˇ-awˇ, sahˬ paˬ kʼoeˇ oeˬ gʼaˬ-euˬ mehˬ nah Daˬ meuˬ-ahˇ keuˆ ni caw teh-euˬ meh.

¹⁵Kʼoeˇ gaˇ iˇ keuˆ ngeh, aˬ yawꞈ-euˬ tsawˇ haˬ deuˬ-ahˇ aˇ muˇ biˇ paˆ-awˇ, sahˬ paˬ kʼoeˇ deuˬ-ahˇ uˬ ciꞈ paw deuˆ-awˇ deuˆ gʼaˬ-euˬ meh. Daˬmaˬsehˇ meuˬ laꞈ taˆ paw pyawˬ-ahˇ jaˆ-eu Hawˇbaˬ meuˬ-ahˇ keuˆ ni, sahˬ paˬ kʼoeˇ deuˬ-euˬ mehˬ nah aˬ yawꞈ teh-euˬ meh.

¹⁶Kʼoeˇ naˇ, aˬ yawꞈ maꞈ neh yuˇ gʼeh-euˬ pyuˇ shuiˇ myawˬ gahˬ dawˬ tawˆ luꞈ paˇ za kʼoꞈ jiˇ-euˬ uˬ taꞈ, Lawˇtaˬ-ahˇ kʼawꞈ aˬ yawꞈ-euˬ pyuˇ shuiˇ myawˬ gahˬ deuˬ nehˬ-ehˇ tiˬ kawˆ loꞈ-ehˇ sheuˬ kʼoꞈ doˆ laꞈ-euˬ meh. Aˬ cawˬ neh bi nyehꞈ gʼeh-euˬ zaˬ miˬ zaˬ deuˬ hawˇ-eu nui deuˬ-ahˇ kʼawꞈ, Lawˇtaˬ nehˬ-ehˇ tiˬ kawˆ loꞈ-ehˇ sheuˬ-awˇ gʼoꞈ laˇ-euˬ meh.

¹⁷Sahˬ paˬ Sheˬdawˇlawˇmaˬ hawˇ-eu aˬ yawꞈ-euˬ cawˬ sahˬ paˬ deuˬ-ahˇ Aˬbyaˬ guiˇ deuˆ gʼaˬ-awˇ gʼoꞈ laˇ ngeh, Sawˇdoˬ sahˬ paˬ gʼaˬ Shaˬbehˇ deh ga ga ma-ahˇ keuˆ ni oe keuˆ-awˇ ha laˬ le-euˬ meh. Deh ga kʼoeˇ ga-ahˇ sahˬ paˬ-euˬ deh ga lehˇ kʼawꞈ kuˇ-eu meh.

¹⁸Kʼoeˇ ngeh, Huiˬ dui mahˇ dui dui-eu Miˬyehˇ-euˬ piˇ ma pyeuꞈ-eu Saˬleˬ sahˬ paˬ Maˬlaˬkiˇsaˬdehˇ-aˬ, kaˬ muˇ hawˇ-eu aˬ gaꞈ dzaˇ uiˇ yuˇ-awˇ, Aˬbyaˬ jawˇ gaˇ laˇ-euˬ meh.

¹⁹Aˬbyaˬ-ahˇ aˬ yawꞈ heu loꞈ-ehˇ dawˬ ngehˬ gʼeh nehˬ-euˬ meh. “Mˬ hawˇ-eu miˇ-ahˇ beh-euˬ yaw sahˇ pyeuꞈ-eu Huiˬ dui mahˇ dui dui-eu Miˬyehˇ, Aˬbyaˬ-ahˇ guiˬ lahˬ biꞈ luꞈ-uˇ.

²⁰Nawˬ-ahˇ muiˇ-eu deuˬ-ahˇ nawˇ gʼaˬ leˇ nya ni caw ba nehˬ-euˬ gʼaˬ pyeuꞈ-eu, Huiˬ dui mahˇ dui dui-eu Miˬyehˇ-ahˇ aˬ cawˬ ja ceuˬ luꞈ-uˇ” lehˇ ehˇ-eu meh. Kʼoeˇ ngeh, guiˇ deuˆ gʼaˬ-awˇ kʼaˇ deuˆ za kʼoꞈ-euˬ pyuˇ shuiˇ myawˬ gahˬ dawˬ tawˆ luꞈ laꞈ kʼoeˇ, tseˇ bymˇ tiˬ bymˇ Aˬbyaˬ yuˇ doˆ-awˇ, Maˬlaˬkiˇsaˬdehˇ-ahˇ damˬ nehˬ-euˬ meh.

²¹Kʼoeˇ naˇ, Aˬbyaˬ-ahˇ Sawˇdoˬ sahˬ paˬ ehˇ-eu, “Kʼaˇ za kʼoꞈ-euˬ pyuˇ shuiˇ myawˬ gahˬ dawˬ tawˆ luꞈ nawˇ geuꞈ jiˇ-awˬ. Ngaˬ-ahˇ ngaˬ-euˬ tsawˇ haˬ bi sheuˬ kʼoꞈ laꞈ naˇ gʼaˬ-aˇ.”

²²Ehˇ kʼawꞈ, Aˬbyaˬ ehˇ-eu, “Huiˬ dui mahˇ dui dui-eu Miˬyehˇ pyeuꞈ-eu Sahˬpaˬ Miˬyehˇ mehˬ shi ngaˇ heu loꞈ-ehˇ kamˬ tsehˆ-eu ma.

²³‘Aˬbyaˬ-ahˇ ngaˬ neh smˇ muiˬ laˆ muiˬ nehˬ-euˬ ma’ lehˇ aˬ kaˇ tiˬ nah nawˇ maˬ ya ehˇ-eu gʼaˇ duˬ, saˬ kahˇ saˬ lah tiˬ lah-ahˇ neh sehˬ nawˆ aˇ caˆ tiˬ caˆ-ahˇ keuˆ ni, nawˬ-euˬ mˇ myawˬ tiˬ jeˬ-iˬ ngaˇ maˬ yuˇ.

²⁴Ngaˬ-euˬ tsawˇ haˬ deuˬ neh zmˬ dzaˬ gʼaˬ dzeuˇ-euˬ jeˬ maˬ ngeuˇ naˇ, ngaˬ-euˬ gʼaˇ duˬ tiˬ jeˬ-iˬ maˬ paˇ yuˇ ma. Ehˇ kʼawꞈ, ngaˬ nehˬ-ehˇ tiˬ kawˆ loꞈ-ehˇ guiˇ deuˆ-euˬ Aˬneˬlaˆ, Eˇshaˬkawˇlaˆ, Mamˬliˬ aˬ ha mehˇ nmˇ-aˬ, yawˬ ha-ahˇ kʼaˇ oꞈ kʼaˇ geuˇ-eu loꞈ-ehˇ yuˇ geuꞈ luꞈ-uˇ.”