Read Akha Aˇ dahˬ 15 Bible Online

Aˇ dahˬ 15 - Akha bible

Aˇ dahˬ 15

¹Kʼoeˇ naˇ, yaw sahˇ laꞈ kʼoeˇ ya siˬ ya mawˇ-eu jeˬ laꞈ kʼoeˇ, Aˬbyaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Aˬbyaˬ-oˇ, guˆ-eu nui ma taˬ bi ahˇ. Guˆ-eu gaˆ-eu jeˬ laꞈ kʼoeˇ nawˬ-ahˇ ngaˇ haw piˇ-awˇ, huiˬ dui dui-eu guiˬ lahˬ biꞈ ma.”

²Ehˇ kʼawꞈ, Sahˬpaˬ Miˬyehˇ-ahˇ Aˬbyaˬ ehˇ kʼoꞈ nehˬ-eu, “Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, ngaˇ zaˬ maˬ jawˇ. Ngaˬ-euˬ jeˬ biˇ-ahˇ za paˬ-ehˇ gʼeh-eu tsawˇ haˬ-aˬ, Daˬmaˬsehˇ meuˬ-ahˇ neh oe-euˬ Eˇliˇzaˬ tiˬ gʼaˬ jawˇ-eu tehꞈ ma.

³Nawˇ ngaˬ-ahˇ zaˬ maˬ bi jawˇ le-euˬ miˇ neh, ngaˬ-euˬ pyuˇ shuiˇ myawˬ gahˬ dawˬ tawˆ luꞈ ngaˬ-euˬ zaˬ kʼaˆ-euˬ jeˬ biˇ ya bi pyeuꞈ jiˇ meh. Nawˇ ngaˬ-ahˇ guiˬ lahˬ aˬ geu jeˬ paˇ biꞈ-eu gʼeh te” lehˇ ehˇ kʼoꞈ nehˬ-euˬ meh.

⁴Kʼoeˇ ngeh, “Nawˬ-euˬ pyuˇ shuiˇ myawˬ gahˬ deuˬ-ahˇ nawˬ-euˬ zaˬ kʼaˆ Eˇliˇzaˬ gʼaˬ maˬ ya geuꞈ-a. Nawˬ-euˬ aˬ li maˇ maˇ ni gʼeh-eu gʼaˬ-ahˇ tehꞈ-ehˇ nawˬ-euˬ jeˬ biˇ oꞈ tehꞈ-a” lehˇ,Sahˬpaˬ Miˬyehˇ ehˇ gaˇ aˬ yawꞈ ya gaˬ-euˬ meh.

⁵Sahˬpaˬ Miˬyehˇ aˬ yawꞈ-ahˇ laꞈ nyiˇ paw sheuˬ doˆ gʼeh-awˇ ehˇ nehˬ-eu, “Mˬ paw gʼawˇ leuˇ-awˇ aˬ guiˇ kʼoeˇ deuˬ-ahˇ nawˇ gui haw sheˇ. Nawˬ-euˬ zaˬ nawˬ-euˬ uˆ deuˬ aˬ guiˇ kʼoeˇ deuˬ loꞈ-ehˇ jeuˬ le o le tehꞈ-a.”

⁶Kʼoeˇ ngeh, Aˬbyaˬ-aˬ, Sahˬpaˬ Miˬyehˇ-ahˇ gʼoe-awˇ jah-euˬ meh. Aˬ yawꞈ jah-eu baˬ da neh, Sahˬpaˬ Miˬyehˇ aˬ yawꞈ-ahˇ nui kʼahˇ shiˇ-awˇ ha geuꞈ-euˬ meh.

⁷“Ngaˇ-aˬ, miˇ kʼahˬ heu kʼahˬ nawˬ-ahˇ biꞈ-eu gʼaˇ duˬ, Baˬbuˇloˬ miˇ kʼahˬ Uˇlaˆ meuˬ-ahˇ neh nawˬ-ahˇ sheuˬ doˆ laꞈ-euˬ Sahˬpaˬ Miˬyehˇ ma” lehˇ, Aˬbyaˬ-ahˇ Sahˬpaˬ Miˬyehˇ ehˇ nehˬ-euˬ meh.

⁸Ehˇ kʼawꞈ, “Dawˬ tawˆ luꞈ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, miˇ kʼahˬ heu kʼahˬ-ahˇ ngaˇ za-euˬ gaˇ kawˆ aˬ joˆ-ehˇ ya siˬ nmˇ” lehˇ, Sahˬpaˬ Miˬyehˇ-ahˇ Aˬbyaˬ naˇ haˬ-euˬ meh.

⁹Kʼoeˇ ngeh, “Smˇ kʼoꞈ byah laˇ-euˬ mawˇ neˇ mawˇ kʼaˇ tiˬ mawˇ, smˇ kʼoꞈ byah laˇ-euˬ ciꞈ myehꞈ tiˬ mawˇ, smˇ kʼoꞈ byah laˇ-euˬ yawˇ aˬ buˬ tiˬ mawˇ, kʼaˬ kʼoeˬ tiˬ mawˇ, kʼaˬ guˬ tiˬ mawˇ, heu deuˬ ngaˬ-euˬ gʼaˇ duˬ yuˇ laꞈ-awˬ” lehˇ, Aˬbyaˬ-ahˇ Sahˬpaˬ Miˬyehˇ ehˇ nehˬ-euˬ meh.

¹⁰Jeˬ zaˬ kʼoeˇ deuˬ-ahˇ Miˬyehˇ jawˇ gaˇ Aˬbyaˬ yuˇ laꞈ-awˇ, gʼawˇ pah-ahˇ neh deuˆ tm-awˇ, uˬ duˬ tiˬ tsehˆ, dawˬ dahˬ tiˬ tsehˆ lehˇ, kʼoeˇ paˆ maˇ paˆ-ehˇ nyiˬ cehˆ baw-ehˇ bi jaˆ-euˬ meh. Ehˇ kʼawꞈ, aˇ jiˇ deuˬ-ahˇ aˬ yawꞈ maˬ deuˆ tm ni bi jaˆ-euˬ meh.

¹¹Jeˬ zaˬ kʼoeˇ deuˬ kʼoeˇ taˆ ga dawꞈ le-eu jeˬ shiˇ kʼaˬ dzeˇ deuˬ-ahˇ aˬ yawꞈ teh dzeh-euˬ meh.

¹²Nahˇ ma ga shuiˇ ga neˇ yehˆ ni jaˆ ngeh, Aˬbyaˬ tiˬ pawꞈ-iˬ maˬ noeˬ ni yuꞈ kʼaˆ byoˆ-euˬ meh. Kʼoeˇ ngeh, noeˬ shaˬ-eu jeˬ hawˇ-eu guˆ-eu jeˬ aˬ yawꞈ kʼoeˇ taˆ keuˆ le-euˬ meh.

¹³Aˬ yawꞈ-ahˇ Sahˬpaˬ Miˬyehˇ ehˇ nehˬ-eu, “Nawˬ-euˬ zaˬ nawˬ-euˬ uˆ deuˬ, aˬ cawˬ miˇ kʼahˬ laꞈ kʼoeˇ boeˇ miˬ siˬ kʼaˬ loꞈ-ehˇ ya jawˇ tehꞈ-a. Oeˬ yaˇ kʼoꞈ keuˆ ni aˬ yawꞈ maꞈ aˬ cawˬ zaˬ kʼaˆ ya geuꞈ-awˇ, aˬ cawˬ kʼehˬ nehˬ kʼaˆ nehˬ gaˇ ya daˬ tehꞈ-a.

¹⁴Ehˇ kʼawꞈ, aˬ yawꞈ maꞈ-ahˇ zaˬ kʼaˆ bi geuꞈ-euˬ tsawˇ jeuˬ kʼoeˇ jeuˬ-ahˇ ngaˇ kʼehˬ nehˬ kʼaˆ nehˬ-awˇ, miˇ kʼahˬ kʼoeˇ kʼahˬ-ahˇ neh aˬ yawꞈ maꞈ gʼoꞈ doˆ laˇ ngeh, pyuˇ shuiˇ myawˬ gahˬ gʼawˬ mya ni ya yuˇ kʼoꞈ laꞈ tehꞈ-a.

¹⁵Nawˇ-aˬ, mawˬ-iˇ ngeh keuˆ ni saˇ lehˆ ni ya dehꞈ-awˇ, coꞈ ngehˇ ni ziˇ ya dehꞈ jiˇ-eu uˬ taꞈ, aˬ cawˬ nawˬ-ahˇ yaw muiˬ-ehˇ baꞈ pahˬ nehˬ laꞈ tehꞈ-a.

¹⁶Nawˬ-euˬ zaˬ nawˬ-euˬ uˆ deuˬ-aˬ, miˇ kʼahˬ heu kʼahˬ laꞈ kʼoeˇ maˬ gʼoꞈ keuˆ laˇ dah mi naˆ-ehˇ, aˬ cawˬ miˇ kʼahˬ laꞈ kʼoeˇ oeˬ ziˇ keuˆ ni ya jawˇ tehꞈ-a. Aˬ jeˬ miˇ neh ehˇ naˇ, Aˬmawˇliˆ tsawˇ haˬ kʼoeˇ deuˬ ngaˬ neh kʼehˬ nehˬ kʼaˆ nehˬ-eu jeˬ-ahˇ ya daˬ paˬ-ehˇ, maˬ tsaˬ maˬ dawˇ-eu jeˬ maˬ mˇ kʼaˆ laˇ kʼoeˇ keuˆ ni, Aˬmawˇliˆ tsawˇ haˬ kʼoeˇ deuˬ-ahˇ ngaˇ maˬ teh dzeh te siˬ.”

¹⁷Nahˇ ma ga ahˇ gʼaˬ-awˇ zahˇ le ngeh, uˬ kʼoeˬ doˆ luꞈ-eu miˬ dzaˬ tsawˬ bu tiˬ bu hawˇ-eu miˬ lmˇ doˆ luꞈ-eu miˬ dzaˬ miˬ doꞈ tiˬ hmˬ ja pyuˬ ni doˆ le-awˇ, deuˆ tm taˬ-euˬ jeˬ zaˬ kʼoeˇ deuˬ-euˬ gʼahˇ ceh oe tsehˆ leꞈ-euˬ meh.

¹⁸Kʼoeˇ ngeh, jawˇ duˬ kʼoeˇ tsahˇ-ahˇ Aˬbyaˬ nehˬ-ehˇ Sahˬpaˬ Miˬyehˇ dawˬ ma saˇ jaˇ dzaˬ taꞈ-euˬ meh. Sahˬpaˬ Miˬyehˇ ehˇ-eu, “Iˇjiˇtuˆ miˇ kʼahˬ-euˬ miˇ kaˬ-ahˇ neh Uˇpaˬlaˇ lawˇ baˬ-ahˇ keuˆ ni jaˆ-eu miˇ kʼahˬ kʼahˬ ma kʼoeˇ kʼahˬ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ biꞈ ma lehˇ ngaˇ saˇ jaˇ dzaˬ-eu ma.

¹⁹Miˇ kʼahˬ kʼahˬ ma kʼoeˇ kʼahˬ laꞈ kʼoeˇ ahˇ-eu miˇ kʼahˬ deuˬ-aˬ, Kaˬnaˆ tsawˇ jeuˬ-euˬ miˇ kʼahˬ, Gaˬnaˆ tsawˇ jeuˬ-euˬ miˇ kʼahˬ, Kaˬdaˬmawˇniˆ tsawˇ jeuˬ-euˬ miˇ kʼahˬ,

²⁰Heˬtaˆ tsawˇ jeuˬ-euˬ miˇ kʼahˬ, Paˬyehˆ tsawˇ jeuˬ-euˬ miˇ kʼahˬ,

²¹Aˬmawˇliˆ tsawˇ jeuˬ-euˬ miˇ kʼahˬ, Kaˬnaˬ tsawˇ jeuˬ-euˬ miˇ kʼahˬ, Geuˬgaˬshiˇ tsawˇ jeuˬ-euˬ miˇ kʼahˬ, Yeˬbuˇ tsawˇ jeuˬ-euˬ miˇ kʼahˬ, heu deuˬ meh.”