Read Akha Aˇ dahˬ 16 Bible Online

Aˇ dahˬ 16 - Akha bible

Aˇ dahˬ 16

¹Aˬbyaˬ-euˬ nymˇ dahˬ Saˬlehˇ-aˬ, zaˬ tiˬ gʼaˬ-iˬ maˬ jawˇ le-a. Ehˇ kʼawꞈ, Haˬgaˬlaˇ lehˇ myahˇ-euˬ Iˇjiˇtuˆ tsawˇ jeuˬ zaˬ miˬ zaˬ zaˬ kʼaˆ tiˬ gʼaˬ-ahˇ Saˬlehˇ cu taˬ-euˬ meh.

²Kʼoeˇ miˇ neh, Aˬbyaˬ-ahˇ Saˬlehˇ heu loꞈ-ehˇ ehˇ nehˬ-euˬ meh. “Sahˬpaˬ Miˬyehˇ ngaˬ-ahˇ zaˬ maˬ bi jawˇ le nehˬ laꞈ nga. Ngaˬ-euˬ zaˬ miˬ zaˬ zaˬ kʼaˆ kʼoeˇ gʼaˬ nehˬ-ehˇ nawˇ yuꞈ taꞈ haw-iˇ sheˇ. Ngaˬ-euˬ gʼaˇ duˬ Sahˬpaˬ Miˬyehˇ zaˬ tiˬ gʼaˬ na bi jawˇ le-eu baw le.” Aˬbyaˬ-aˬ, Saˬlehˇ neh aˬ yawꞈ-ahˇ ehˇ nehˬ-euˬ loꞈ-ehˇ mˇ haw-eu gʼaˇ duˬ nui ma tsaˬ-euˬ meh.

³Kʼoeˇ ngeh, Saˬlehˇ neh Haˬgaˬlaˇ-ahˇ Aˬbyaˬ-euˬ ma nyiˇ bi geuꞈ-euˬ meh. Heu-aˬ, Aˬbyaˬ aˬ yawꞈ Kaˬnaˬ miˇ kʼahˬ-ahˇ tseˇ kʼoꞈ jawˇ keuˆ laꞈ ngeh pyeuꞈ laˇ-euˬ gaˇ kawˆ meh.

⁴Aˬbyaˬ hawˇ-eu Haˬgaˬlaˇ aˬ nyaꞈ yuꞈ taꞈ-awˇ, Haˬgaˬlaˇ aˬ nyiˇ pi leˇ-euˬ meh. Haˬgaˬlaˇ-aˬ, yawˬ ha aˬ nyiˇ pi leˇ-euˬ gaˇ kawˆ siˬ leˇ ngeh, nui ma huiˬ laˇ-awˇ, Saˬlehˇ-ahˇ yaw kʼaˆ-ehˇ yaw zeu maˬ baw ni pyeuꞈ-iˇ-euˬ meh.

⁵Kʼoeˇ ngeh, Aˬbyaˬ-ahˇ Saˬlehˇ heu loꞈ-ehˇ ehˇ nehˬ-euˬ meh. “Haˬgaˬlaˇ ngaˬ-ahˇ yaw zeu maˬ baw-eu-aˬ, nawˬ-ahˇ neh ahˇ-eu meh. Ngaˬ neh nawˬ-ahˇ mehˬ-awˇ aˬ yawꞈ-ahˇ bi yuˇ-euˬ ma. Ehˇ kʼawꞈ, yawˬ haˇ yawˬ ha aˬ nyiˇ pi leˇ-euˬ miˇ-a lehˇ siˬ leˇ ngeh tiˬ nah neh, Haˬgaˬlaˇ ngaˬ-ahˇ yaw zeu maˬ baw-a. Nawˇ lehˬ-eu nga loˇ, ngaˇ lehˬ-eu nga loˇ lehˇ, Sahˬpaˬ Miˬyehˇ yaˇ kʼaˬ daˇ nehˬ laꞈ luꞈ-uˇ.”

⁶Aˬbyaˬ gʼeh, “Ngeuˇ tehꞈ-a. Aˬ yawꞈ nawˬ-euˬ zaˬ kʼaˆ pyeuꞈ-eu loꞈ-ehˇ, nawˇ naꞈ-i jaˆ-awˬ. Nawˇ aˬ yawꞈ-ahˇ aˬ joˆ-ehˇ jahˇ nehˬ mawꞈ te lehˇ jahˇ nehˬ-awˬ” lehˇ ehˇ kʼoꞈ nehˬ-euˬ meh. Kʼoeˇ naˇ, Haˬgaˬlaˇ-ahˇ Saˬlehˇ yaw kʼaˆ-ehˇ kʼehˬ nehˬ-euˬ miˇ neh, Haˬgaˬlaˇ cehˆ-euˬ meh.

⁷Shuˇyaˆ meuˬ-ahˇ iˇ-eu gaˇ ma gaˇ pehˇ, bawˇ tsahˬ bawˇ dahˇ-ahˇ jaˆ-eu iˇ cuꞈ lawˇ gawˆ gawˆ zaˬ tiˬ gawˆ dawˬ peh, Sahˬpaˬ Miˬyehˇ-euˬ gʼaˬ kʼehˇ tiˬ gʼaˬ Haˬgaˬlaˇ-ahˇ tahˬ puˬ-awˇ,

⁸“Saˬlehˇ-euˬ zaˬ kʼaˆ Haˬgaˬlaˇ-oˇ, aˬ geu gaˇ neh oe-awˇ aˬ geu paw iˇ-eu gʼeh te” lehˇ naˇ haˬ ngeh, “Ngaˬ-euˬ nymˇ sahˇ aˬ ma-ahˇ maˬ ya mawˇ gaˇ cehˆ byoˆ-eu lehˇ gʼeh-eu ma” lehˇ, Haˬgaˬlaˇ ehˇ kʼoꞈ nehˬ-euˬ meh.

⁹“Aˬ yawꞈ jawˇ gaˇ gʼoꞈ leˇ-awˇ, aˬ yawꞈ-euˬ zaˬ kʼaˆ paˇ geuꞈ kʼoꞈ leˇ-awˬ” lehˇ, Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ Haˬgaˬlaˇ-ahˇ ehˇ nehˬ-euˬ meh.

¹⁰Kʼoeˇ naˇ, Sahˬpaˬ Miˬyehˇ-euˬ gʼaˬ kʼehˇ kʼoeˇ gʼaˬ Haˬgaˬlaˇ-ahˇ heu loꞈ-ehˇ paˇ ehˇ nehˬ-euˬ meh. “Tsawˇ haˬ tiˬ gʼaˬ-iˬ maˬ gui jiˇ coeˇ ngeh keuˆ ni, nawˬ-euˬ zaˬ nawˬ-euˬ uˆ deuˬ-ahˇ ngaˇ bi jeuˬ bi o le ma.

¹¹Nawˇ aˬ li tiˬ li jawˇ le-awˇ, aˬ li kʼoeˇ li-ahˇ Iˇshaˬmeˬlaˇ[9] lehˇ ya myahˇ nehˬ tehꞈ-a. Aˬ jeˬ miˇ neh ehˇ naˇ, nawˇ shaˬ zahˬ naꞈ-eu laꞈ kʼoeˇ ngoeˇ luꞈ-eu teˇ saˇ-ahˇ, Sahˬpaˬ Miˬyehˇ ya gaˬ gʼaˬ-euˬ meh.

¹²Ehˇ kʼawꞈ, nawˬ li kʼoeˇ li-aˬ, bawˇ tsahˬ mahˬ tahˬ laˆ loꞈ-ehˇ pyeuꞈ tehꞈ-a. Aˬ cawˬ yawˬ gʼaˬ na luꞈ-ahˇ aˬ yawꞈ muiˇ-awˇ, aˬ cawˬ yawˬ gʼaˬ na luꞈ kʼawꞈ, aˬ yawꞈ-ahˇ muiˇ tehꞈ-a. Aˬ yawꞈ-euˬ aˬ yuiꞈ aˬ nyiˇ deuˬ nehˬ-ehˇ kʼawꞈ, aˬ yawꞈ dehꞈ gʼawˬ tehꞈ-a.”

¹³Kʼoeˇ ngeh, “Miˬyehˇ-ahˇ ngaˇ aˬ diˇ aˬ maˇ ya mawˇ gʼaˬ-euˬ kʼawꞈ, maˬ ya shiˇ-ehˇ, gaˇ kawˆ kʼoeˇ aˬ cawˬ-ahˇ dzawˇ mehˬ dzawˇ mehˬ-ehˇ paˇ ya dehꞈ ta siˬ loˇ” lehˇ, Haˬgaˬlaˇ yawˬ haˇ yawˬ ha ehˇ-eu meh. Kʼoeˇ miˇ neh, aˬ yawꞈ-ahˇ dawˬ ngehˬ cawˬ le-euˬ Sahˬpaˬ Miˬyehˇ-ahˇ, “Siˬ luꞈ mawˇ luꞈ-eu Miˬyehˇ” lehˇ aˬ yawꞈ kuˇ-euˬ meh.

¹⁴Kʼoeˇ miˇ neh, Kaˬdeˬshaˇ meuˬ hawˇ-eu Beˬyehˆ meuˬ yaw kaˬ-ahˇ jaˆ-eu lah duˬ kʼoeˇ duˬ-ahˇ, “Ngaˬ-ahˇ haw piˇ-eu dehꞈ luꞈ-eu gʼaˬ-euˬ lah duˬ” lehˇ aˬ cawˬ kuˇ-eu meh.

¹⁵Aˬbyaˬ-euˬ gʼaˇ duˬ Haˬgaˬlaˇ aˬ li tiˬ li ciˬ-euˬ meh. Aˬ li kʼoeˇ li-ahˇ Iˇshaˬmeˬlaˇ lehˇ Aˬbyaˬ myahˇ nehˬ-euˬ meh.

¹⁶Kʼoeˇ ngeh, Aˬbyaˬ yehꞈ tseˇ shiꞈ kʼoꞈ kʼawˆ laˇ-euˬ meh.