Read Akha Aˇ dahˬ 17 Bible Online

Aˇ dahˬ 17 - Akha bible

Aˇ dahˬ 17

¹Aˬbyaˬ gʼoeˬ tseˇ gʼoeˬ kʼoꞈ kʼawˆ ngeh, aˬ yawꞈ-euˬ mehˬ shi Sahˬpaˬ Miˬyehˇ doˆ le-awˇ, heu loꞈ-ehˇ ehˇ-eu meh. “Ngaˇ-aˬ, yawˬ jeˬ na luꞈ mˇ nya-eu Baoˬ huiˬ-eu Miˬyehˇ ma. Ngaˬ-euˬ ehˇ dawˬ naˇ haˬ-awˇ yaw tsaˬ yaw dawˇ jeˬ mˇ-awˬ.

²Ngaˇ nawˬ nehˬ-ehˇ dawˬ ma saˇ jaˇ dzaˬ taꞈ-awˇ, nawˬ-euˬ zaˬ nawˬ-euˬ uˆ deuˬ bi jeuˬ bi o le ma.”

³Aˬbyaˬ baˬ ba miˇ tsa tuˆ ni awˆ byaˆ-awˇ, Miˬyehˇ-ahˇ uˬ duˬ tahˬ-euˬ meh. Kʼoeˇ ngeh, Miˬyehˇ heu loꞈ-ehˇ paˇ ehˇ-eu meh.

⁴“Ngaˇ nawˬ nehˬ-ehˇ heu loꞈ-ehˇ dawˬ ma saˇ jaˇ dzaˬ-eu ma. Nawˇ-aˬ, tsawˇ jeuˬ gʼawˬ mya jeuˬ-euˬ aˬ da yaw dzahˇ ya pyeuꞈ laˇ tehꞈ-a lehˇ, ngaˇ saˇ jaˇ biꞈ-eu ma.

⁵Nawˬ-euˬ tsawˇ myahˇ-aˬ, Aˬbyaˬ lehˇ maˬ paˇ ngeuˇ-ehˇ, Aˬbyaˬhaˬ[10] lehˇ nawˬ-ahˇ ya kuˇ meh. Aˬ jeˬ miˇ neh ehˇ naˇ, ngaˇ nawˬ-ahˇ tsawˇ jeuˬ gʼawˬ mya jeuˬ-euˬ aˬ da yaw dzahˇ bi pyeuꞈ laˇ ma.

⁶Nawˬ-euˬ zaˬ nawˬ-euˬ uˆ deuˬ-ahˇ ngaˇ bi jeuˬ bi o le-awˇ, aˬ yawꞈ maꞈ laꞈ kʼoeˇ, tiˬ paˆ na deuˬ sahˬ paˬ pyeuꞈ laˇ tehꞈ-a. Nawˬ-euˬ zaˬ nawˬ-euˬ uˆ deuˬ myaˬ dui dui laˇ-awˇ, tsawˇ jeuˬ gʼawˬ mya jeuˬ pyeuꞈ doˆ laˇ tehꞈ-a.

⁷“Nawˬ nehˬ-ehˇ maˬ ehˇ, aˬ kaˇ dehꞈ le jawˇ le-eu nawˬ-euˬ zaˬ nawˬ-euˬ uˆ deuˬ nehˬ-ehˇ maˬ ehˇ, ngaˇ dzaˬ taˬ-euˬ dawˬ ma saˇ jaˇ heu hmˬ-aˬ, mˬ maˬ maˬ byaˆ zaˇ ziˇ ziꞈ-eu dawˬ ma saˇ jaˇ pyeuꞈ-eu ma. Ngaˇ-aˬ, nawˬ-euˬ Miˬyehˇ hawˇ-eu nawˬ-euˬ zaˬ deuˬ uˆ deuˬ-euˬ Miˬyehˇ pyeuꞈ-eu ma.

⁸Iˬ nah boeˇ miˬ siˬ kʼaˬ tiˬ gʼaˬ loꞈ-ehˇ nawˇ ya dehꞈ ya jawˇ luꞈ-eu miˇ kʼahˬ heu kʼahˬ, nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma. Kaˬnaˬ miˇ kʼahˬ heu kʼahˬ kʼahˬ lah ni, mˬ maˬ maˬ byaˆ zaˇ ziˇ nawˬ-euˬ zaˬ nawˬ-euˬ uˆ deuˬ-euˬ miˇ kʼahˬ pyeuꞈ-awˇ, ngaˇ aˬ yawꞈ maꞈ-euˬ Miˬyehˇ ya pyeuꞈ tehꞈ-a.”

⁹Aˬbyaˬhaˬ-ahˇ Miˬyehˇ ehˇ nehˬ-eu, “Nawˇ hawˇ-eu aˬ kaˇ dehꞈ le jawˇ le-eu nawˬ-euˬ zaˬ nawˬ-euˬ uˆ deuˬ, ngaˬ nehˬ-ehˇ dzaˬ taˬ-euˬ dawˬ ma saˇ jaˇ heu hmˬ-ahˇ ya ziꞈ meh.

¹⁰Nawˇ maˬ ehˇ, nawˬ-euˬ zaˬ nawˬ-euˬ uˆ deuˬ laꞈ kʼoeˇ kʼaˬ dzeˇ zaˬ kʼaˇ ngeuˇ-eu deuˬ dawˬ tawˆ luꞈ maˬ ehˇ, baˆ kʼoˆ mehˬ dzaˬ yehˬ ma lehˇ ya noeˬ tsehˆ meh.

¹¹Ngaˇ hawˇ-eu naw maꞈ-euˬ yaw kaˬ-ahˇ dzaˬ taˬ-euˬ dawˬ ma saˇ jaˇ heu hmˬ gaˇ kawˆ saˇ kiˇ pyeuꞈ-eu gʼaˇ duˬ, naw maꞈ baˆ kʼoˆ mehˬ dzaˬ ya yehˬ meh. Aˬ kaˇ naˇ, kʼaˇ dehꞈ le-eu aˬ li yawˬ gʼaˬ na luꞈ-ahˇ, dehꞈ le gʼaˬ-awˇ yehꞈ nah byah laˇ naˇ, baˆ kʼoˆ mehˬ dzaˬ ya yehˬ nehˬ meh. Nawˬ-euˬ nymˇ laꞈ kʼoeˇ dehꞈ le-euˬ zaˬ kʼaˆ deuˬ hawˇ-eu, nawˬ neh zeuˇ tsehˆ taˬ-euˬ boeˇ miˬ siˬ kʼaˬ zaˬ kʼaˆ deuˬ kʼawꞈ, baˆ kʼoˆ mehˬ dzaˬ ya yehˬ meh.

¹³Yawˬ gʼaˬ na luꞈ baˆ kʼoˆ mehˬ dzaˬ ya yehˬ-awˇ, heu loꞈ-ehˇ mˇ-eu jeˬ-aˬ, ngaˇ hawˇ-eu naw maꞈ yaw kaˬ-ahˇ dzaˬ taˬ-euˬ dawˬ ma saˇ jaˇ heu hmˬ, mˬ maˬ maˬ byaˆ zaˇ ziˇ ziꞈ-eu gaˇ kawˆ saˇ kiˇ pyeuꞈ-eu meh.

¹⁴Baˆ kʼoˆ mehˬ dzaˬ maˬ yehˬ-euˬ kʼaˬ dzeˇ zaˬ aˬ geu gʼaˬ maˬ kaˬ, ngaˬ-euˬ tsawˇ haˬ lehˇ maˬ paˇ sawˇ nehˬ nya meh. Aˬ jeˬ miˇ neh ehˇ naˇ, ngaˬ-euˬ dawˬ ma saˇ jaˇ-ahˇ aˬ yawꞈ maˬ ziꞈ-eu miˇ neh meh.”

¹⁵Aˬbyaˬhaˬ-ahˇ Miˬyehˇ ehˇ nehˬ-eu, “Nawˬ-euˬ nymˇ dahˬ-ahˇ Saˬlehˇ lehˇ taˬ paˇ kuˇ. Iˬ nah taꞈ naˇ, aˬ yawꞈ-euˬ tsawˇ myahˇ Saˬlaˇ lehˇ meh.

¹⁶Ngaˇ aˬ yawꞈ-ahˇ guiˬ lahˬ biꞈ-awˇ, nawˬ-euˬ gʼaˇ duˬ aˬ li tiˬ li bi ciˬ ma. Aˬ yawꞈ-ahˇ ngaˇ dawˬ ngehˬ gʼeh nehˬ-awˇ, tsawˇ jeuˬ dawˬ tawˆ luꞈ-euˬ aˬ ma ma dzahˇ bi pyeuꞈ laˇ ma. Aˬ yawꞈ-euˬ zaˬ deuˬ uˆ deuˬ laꞈ kʼoeˇ sahˬpaˬ deuˬ kʼawꞈ doˆ laˇ tehꞈ-a.”

¹⁷Aˬbyaˬhaˬ-aˬ, pawˬ tsuiꞈ pawˬ dmˬ dmˬ-awˇ, baˬ ba miˇ tsa tuˆ ni awˆ byaˆ taˬ-euˬ meh. Ehˇ kʼawꞈ, “Tsawˇ haˬ tiˬ gʼaˬ aˇ kʼoꞈ tiˬ yaˇ byah laˇ taˬ-euˬ gaˇ zaˬ paˇ jawˇ le nya ta loˇ. Saˬlaˇ aˇ kʼoꞈ gʼoeˬ tseˇ byah laˇ-euˬ zaˬ ciˬ zaˬ cu paˇ mˇ nya ta siˬ loˇ” lehˇ, aˬ yawꞈ-euˬ nui ma laꞈ kʼoeˇ noeˬ doˆ laˇ-awˇ, uiˇ kʼoeˬ-euˬ meh.

¹⁸“Ngaˬ-euˬ jeˬ biˇ dawˬ tawˆ luꞈ Iˇshaˬmeˬlaˇ-ahˇ bi geuꞈ-eu maˬ tsaˬ-a loˇ” lehˇ, Miˬyehˇ-ahˇ aˬ yawꞈ naˇ haˬ-euˬ meh.

¹⁹Ehˇ kʼawꞈ, Miˬyehˇ ehˇ-eu, “Nawˇ teu loꞈ-ehˇ taˬ ehˇ. Nawˬ-euˬ nymˇ dahˬ Saˬlaˇ aˬ li tiˬ li ciˬ-awˇ, aˬ li kʼoeˇ li-ahˇ Iˇtsaˆ[11] lehˇ nawˇ ya myahˇ nehˬ tehꞈ-a. Aˬ yawꞈ-ahˇ maˬ ehˇ, aˬ yawꞈ-euˬ zaˬ deuˬ uˆ deuˬ-ahˇ maˬ ehˇ, mˬ maˬ maˬ byaˆ zaˇ ziˇ ziꞈ-eu saˇ jaˇ ngaˇ dzaˬ ma.

²⁰Iˇshaˬmeˬlaˇ gʼaˇ duˬ kʼawꞈ nawˇ ngaˬ-ahˇ shaˇ-eu ngaˇ ya gaˬ gʼaˬ-euˬ miˇ neh, aˬ yawꞈ-euˬ zaˬ deuˬ uˆ deuˬ-ahˇ ngaˇ bi jeuˬ bi o le ma. Aˬ yawꞈ-ahˇ sahˬpaˬ zaˬ yo tseˇ nyiꞈ gʼaˬ-euˬ aˬ da yaw dzahˇ bi pyeuꞈ laˇ-awˇ, aˬ yawꞈ-euˬ zaˬ deuˬ uˆ deuˬ-ahˇ huiˬ-eu tsawˇ jeuˬ bi pyeuꞈ laˇ ma.

²¹Ehˇ kʼawꞈ, naˬ yaꞈ kʼoꞈ heu yamˬ-ahˇ dehꞈ le-eu Saˬlaˇ-euˬ aˬ li Iˇtsaˆ gʼaˬ nehˬ-ehˇ, ngaˬ-euˬ dawˬ ma saˇ jaˇ ngaˇ taˬ ma.”

²²Miˬyehˇ-aˬ, Aˬbyaˬhaˬ-ahˇ dawˬ ngehˬ cawˬ gʼaˬ-awˇ doˆ-iˇ-euˬ meh.

²³Kʼoeˇ ngeh nah laꞈ kʼoeˇ, Miˬyehˇ-euˬ ehˇ dawˬ-ahˇ Aˬbyaˬhaˬ naˇ haˬ geuꞈ-awˇ, aˬ yawꞈ-euˬ aˬ li Iˇshaˬmeˬlaˇ hawˇ-eu, aˬ yawꞈ-euˬ nymˇ laꞈ kʼoeˇ kʼaˇ jawˇ-eu kʼaˬ dzeˇ zaˬ dawˬ tawˆ luꞈ-ahˇ baˆ kʼoˆ mehˬ dzaˬ yehˬ-euˬ meh. Aˬ yawꞈ-euˬ nymˇ laꞈ kʼoeˇ dehꞈ le-euˬ zaˬ kʼaˆ deuˬ-ahˇ maˬ ehˇ, aˬ yawꞈ neh zeuˇ tsehˆ taˬ-euˬ zaˬ kʼaˆ deuˬ-ahˇ maˬ ehˇ, baˆ kʼoˆ mehˬ dzaˬ yehˬ nehˬ-euˬ meh.

²⁴Aˬbyaˬhaˬ baˆ kʼoˆ mehˬ dzaˬ yehˬ ngeh, aˬ yawꞈ-euˬ aˇ kʼoꞈ gʼoeˬ tseˇ gʼoeˬ kʼoꞈ kʼawˆ laˇ-euˬ meh.

²⁵Aˬ yawꞈ-euˬ aˬ li Iˇshaˬmeˬlaˇ gʼaˬ-aˬ, baˆ kʼoˆ mehˬ dzaˬ yehˬ ngeh tseˇ smˇ kʼoꞈ kʼawˆ laˇ-euˬ meh.

²⁶Aˬ yawꞈ nyaꞈ nyiˬ da zaˬ luꞈ, aˬ yawꞈ tiˬ nah-ahˇ tehꞈ-ehˇ baˆ kʼoˆ mehˬ dzaˬ yehˬ-euˬ meh.

²⁷Aˬbyaˬhaˬ-euˬ zaˬ kʼaˆ dawˬ tawˆ luꞈ kʼawꞈ, kʼoeˇ ngeh nah laꞈ kʼoeˇ baˆ kʼoˆ mehˬ dzaˬ yehˬ jiˇ-euˬ meh.