Read Akha Aˇ dahˬ 18 Bible Online

Aˇ dahˬ 18 - Akha bible

Aˇ dahˬ 18

¹Muiˬ-eu shawˇ-eu Mamˬliˬ aˇ bawˇ bawˇ yaˇ-ahˇ, Aˬbyaˬhaˬ jawˇ gaˇ Sahˬpaˬ Miˬyehˇ oe-euˬ meh. Nah gʼahˇ paw nahˇ tsaˇ kʼaˆ ngeh yamˬ-ahˇ, sehˬ gʼawˆ gʼoˆ kʼehˬ-ahˇ Aˬbyaˬhaˬ nuiˇ luꞈ-eu meh.

²Aˬ yawꞈ haw gʼeh leꞈ ngeh, tsawˇ haˬ smˇ gʼaˬ yawꞈ luꞈ gaˇ ya mawˇ-euˬ meh. Tsawˇ haˬ kʼoeˇ smˇ gʼaˬ-ahˇ aˬ yawꞈ ya mawˇ ngeh, tiˬ poˆ tehꞈ-ehˇ coeˬ doˆ gʼeh-awˇ ha laˬ leˇ-euˬ meh. Aˬbyaˬhaˬ pawˬ tsuiꞈ pawˬ dmˬ dmˬ-awˇ, baˬ ba miˇ tsa tuˆ ni awˆ byaˆ-eu laꞈ kʼoeˇ, heu loꞈ-ehˇ ehˇ-eu meh.

³“Yaw huiˬ yaw mahˇ deuˬ-oˇ, ngaˬ-euˬ nymˇ-ahˇ maˬ naˬ ni taˬ iˇ dzeuˇ nehˬ laꞈ. Ngaˇ naw maꞈ-ahˇ yaw muiˬ paˬ-ehˇ lehˬ hmˬ-awˇ ha-eu ma.

⁴Aˇ bawˇ heu bawˇ dawˬ pehˬ-ahˇ tiˬ kʼehˬ naˬ tawˬ. Naw maꞈ aˬ kuiˇ bi dzuiꞈ-eu gʼaˇ duˬ ngaˇ iˇ cuꞈ ui cuiˆ ciˬ laˬ leˇ la.

⁵Mehˬ hu paw paˇ cah gʼeh ngeh, naw maꞈ gʼaˬ ahˇ laˇ ni, dzaˬ dzaˬ dawˇ dawˇ kʼawꞈ ui cuiˆ na dzaˬ-eu tsaˬ tehꞈ-a. Naw maꞈ ngaˬ-euˬ nymˇ-ahˇ oe doˆ-awˇ, ngaˇ naw maꞈ-ahˇ ya ha geuꞈ-eu-aˬ, guiˬ lahˬ huiˬ-eu ngaˇ.” Tsawˇ haˬ kʼoeˇ smˇ gʼaˬ kʼawꞈ, “Guiˬ lahˬ huiˬ miˇ-a. Nga maꞈ heu gaˇ tiˬ kʼehˬ naˬ ma” lehˇ ehˇ-awˇ, gʼaˬ naˬ naˬ-euˬ meh.

⁶Aˬbyaˬhaˬ-aˬ, sehˬ gʼawˆ-ahˇ yaw kawˇ-ehˇ gʼoꞈ uˇ leˇ-awˇ, “Muiˬ dui dui-eu cehˇ meu tiˬ tahˇ sheu doˆ-awˇ, kuiˇ dui dui-eu kaˬ muˇ ui cuiˆ yaw kawˇ-ehˇ jahˇ sheˇ” lehˇ, Saˬlaˇ-ahˇ ehˇ nehˬ-euˬ meh.

⁷Kʼoeˇ naˇ, mawˇ neˇ mawˇ maꞈ jawˇ gaˇ aˬ yawꞈ cehˆ gʼeh-awˇ, muiˬ dui tsuˇ dui dui-eu mawˇ neˇ mawˇ gaw zaˬ tiˬ mawˇ aˬ yawꞈ-euˬ zaˬ kʼaˆ-ahˇ nyehꞈ nehˬ-awˇ, dzaˇ bi jahˇ-euˬ meh.

⁸Kaˬ muˇ, mawˇ neˇ aˬ coeˇ, shaˬ jiˇ heu deuˬ Aˬbyaˬhaˬ yuˇ leꞈ-awˇ, aˬ yawꞈ maꞈ-euˬ mehˬ shi ciˬ taˬ le-euˬ meh. Aˇ bawˇ dawˬ pehˬ kʼoeˇ tsahˇ-ahˇ aˬ yawꞈ dzaˬ kʼmˬ dawˇ gʼawˆ lehˬ hmˬ-awˇ, aˬ yawꞈ maꞈ-ahˇ bi dzaˬ bi dawˇ-euˬ meh.

⁹Kʼoeˇ naˇ, “Nawˬ-euˬ nymˇ dahˬ Saˬlaˇ aˬ geu gaˇ iˇ taˬ” lehˇ, aˬ yawꞈ maꞈ aˬ yawꞈ-ahˇ naˇ haˬ ngeh, “Sehˬ gʼawˆ laꞈ kʼoeˇ jawˇ meh” lehˇ aˬ yawꞈ ehˇ kʼoꞈ nehˬ-euˬ meh.

¹⁰“Ba la gʼoeˬ siˬ kaˇ-iˇ naˇ, ngaˇ tiˬ poˆ paˇ oe ma. Kʼoeˇ ngeh, nawˬ-euˬ nymˇ dahˬ Saˬlaˇ aˬ li tiˬ li ciˬ tehꞈ-a” lehˇ, aˬ yawꞈ maꞈ laꞈ kʼoeˇ tiˬ gʼaˬ ehˇ-eu meh. Kʼoeˇ loꞈ-ehˇ ehˇ luꞈ gaˇ, tsawˇ haˬ kʼoeˇ gʼaˬ-euˬ naˇ kʼah paw laˇ gʼoˆ baˇ laˇ-ahˇ Saˬlaˇ jawˇ-awˇ, kʼoeˬ naˇ haꞈ luꞈ-eu meh.

¹¹Aˬbyaˬhaˬ hawˇ-eu Saˬlaˇ-aˬ, aˇ kʼoꞈ kʼawˆ laˇ-awˇ, tsawˇ mawˬ mawˬ laˇ-euˬ meh. Saˬlaˇ-aˬ, ba la dahˬ-iˇ-awˇ, zaˬ ciˬ zaˬ cu mˇ-eu aˇ yamˬ dzeuˇ-iˇ gʼaˬ-euˬ meh.

¹²Kʼoeˇ miˇ neh, Saˬlaˇ-euˬ nui ma laꞈ kʼoeˇ, “Ngaˇ loꞈ-ehˇ mawˬ laˇ taˬ-euˬ tsawˇ haˬ tiˬ gʼaˬ, byawˬ gʼa mo gʼa-eu nui ma aˬ joˆ-ehˇ paˇ ahˇ nmˇ. Kʼoeˇ uˬ taꞈ, ngaˬ-euˬ kʼaˬ dzeˇ zaˬ gʼaˬ kʼawꞈ mawˬ laˇ gʼaˬ-euˬ maˬ ngeuˇ nga loˇ” lehˇ, yawˬ haˇ yawˬ ha shaˇ noeˬ-awˇ, uiˇ kʼoeˬ kʼoeˬ-euˬ meh.

¹³Aˬbyaˬhaˬ-ahˇ Sahˬpaˬ Miˬyehˇ ehˇ nehˬ-eu, “Aˬ jeˬ miˇ neh Saˬlaˇ uiˇ uiˇ-ehˇ, ‘Ngaˇ loꞈ-ehˇ gʼeh-eu tsawˇ mawˬ tiˬ gʼaˬ zaˬ paˇ jawˇ le nya ta siˬ loˇ’ lehˇ ehˇ ta. Sahˬpaˬ Miˬyehˇ maˬ jahˇ nya-eu jeˬ jaˆ ta loˇ.

¹⁴Ngaˬ neh ehˇ gʼaˬ-euˬ loꞈ-ehˇ, ba la gʼoeˬ siˬ kaˇ-iˇ naˇ ngaˇ tiˬ poˆ paˇ oe ma. Kʼoeˇ ngeh jawˇ, Saˬlaˇ aˬ li tiˬ li ciˬ tehꞈ-a” lehˇ ehˇ nehˬ-euˬ meh.

¹⁵Ehˇ kʼawꞈ, Saˬlaˇ guˆ-eu miˇ neh, “Ngaˇ maˬ uiˇ-aˬ-eˬ” lehˇ pyehˇ-euˬ meh. Sahˬpaˬ Miˬyehˇ gʼeh, “Ngeuˇ meh. Nawˇ uiˇ-euˬ meh. Nawˇ aˬ diˇ aˬ maˇ uiˇ-euˬ meh” lehˇ ehˇ-eu meh.

¹⁶Kʼoeˇ naˇ, tsawˇ haˬ kʼoeˇ smˇ gʼaˬ tsawˬ tuˇ-awˇ, Sawˇdoˬ meuˬ-ahˇ haw mawˇ nya-eu jawˇ duˬ-ahˇ le daˆ-euˬ meh. Aˬbyaˬhaˬ kʼawꞈ, aˬ yawꞈ maꞈ-ahˇ ui cuiˆ gaˇ mahˇ kaˬ gaˇ keuˆ ni sheuˬ ha keuˆ leˇ-eu lehˇ, aˬ yawꞈ maꞈ nehˬ-ehˇ caw teh gʼeh-euˬ meh.

¹⁷Kʼoeˇ ngeh, Sahˬpaˬ Miˬyehˇ-euˬ nui ma laꞈ kʼoeˇ, yawˬ haˇ yawˬ ha heu loꞈ-ehˇ ehˇ luꞈ-eu meh. “Ngaˇ mˇ-eu lehˇ gʼeh-eu gaˇ heu hmˬ Aˬbyaˬhaˬ-ahˇ maˬ bi siˬ ni maˬ paˇ zaꞈ taˬ ma.

¹⁸Aˬ yawꞈ-euˬ zaˬ deuˬ uˆ deuˬ-aˬ, tsawˇ myahˇ doˆ-awˇ baoˬ huiˬ-eu tsawˇ jeuˬ pyeuꞈ laˇ tehꞈ-a. Aˬ yawꞈ-ahˇ gʼoe-awˇ tsawˇ jeuˬ dawˬ tawˆ luꞈ-ahˇ ngaˇ guiˬ lahˬ biꞈ nehˬ ma.

¹⁹Aˬ yawꞈ-euˬ aˬ li deuˬ-ahˇ maˬ ehˇ, aˬ yawꞈ-euˬ zaˬ deuˬ uˆ deuˬ-ahˇ maˬ ehˇ, yaw tsaˬ yaw dawˇ jeˬ mˇ ni bi mehˬ nehˬ-eu gʼaˇ duˬ, ngaˇ aˬ yawꞈ-ahˇ tseˇ doˆ-eu ma. Aˬ yawꞈ maꞈ kʼoeˇ loꞈ-ehˇ mˇ naˇ, aˬ yawꞈ nehˬ-ehˇ ngaˇ saˇ jaˇ kʼaˇ dzaˬ taˬ-euˬ jeˬ dawˬ tawˆ luꞈ mˇ byah nehˬ ma.”

²⁰Kʼoeˇ naˇ, Aˬbyaˬhaˬ-ahˇ Sahˬpaˬ Miˬyehˇ heu loꞈ-ehˇ ehˇ nehˬ-euˬ meh. “Sawˇdoˬ meuˬ hawˇ-eu Gawˇmawˇlaˆ meuˬ gaˇ kawˆ, guˆ laˇ paˬ-ehˇ gʼeh-eu jeˬ ehˇ taˬ-euˬ gʼawˬ mya ni jaˆ-eu meh. Aˬ yawꞈ maꞈ iˬ baˇ huiˬ dui dui meh.

²¹Aˬ yawꞈ maꞈ-euˬ gaˇ kawˆ kʼaˇ ehˇ taˬ-euˬ loꞈ-ehˇ tsaˬ nga loˇ maˬ tsaˬ nga loˇ lehˇ, ngaˇ iˇ-awˇ ya pyehˆ tseˇ haw-iˇ meh.”

²²Kʼoeˇ naˇ, tsawˇ haˬ kʼoeˇ nyiˬ gʼaˬ Sawˇdoˬ meuˬ paw iˇ gʼeh-euˬ meh. Ehˇ kʼawꞈ, Sahˬpaˬ Miˬyehˇ gʼaˬ-aˬ, Aˬbyaˬhaˬ nehˬ-ehˇ jawˇ nahˬ yaꞈ-euˬ meh.

²³Kʼoeˇ ngeh, Sahˬpaˬ Miˬyehˇ-euˬ dawˬ peh Aˬbyaˬhaˬ jiˆ-iˇ-awˇ, heu loꞈ-ehˇ naˇ haˬ-euˬ meh. “Iˬ baˇ maˬ ahˇ-eu tsawˇ haˬ deuˬ-ahˇ kʼawꞈ, iˬ baˇ ahˇ-eu tsawˇ haˬ deuˬ nehˬ-ehˇ tiˬ kawˆ loꞈ-ehˇ nawˇ laˆ cawˆ nehˬ-eu lehˇ gʼeh te loˇ.

²⁴Iˬ baˇ maˬ mˇ-eu tsawˇ haˬ ngaˬ tseˇ gʼaˬ jawˇ lawˬ naˇ kʼawꞈ, meuˬ kʼoeˇ meuˬ meuˬ lah ni nawˇ laˆ cawˆ ma loˇ. Maˬ ngeuˇ naˇ, kʼoeˇ ngaˬ tseˇ gʼaˬ baˬ da neh, meuˬ kʼoeˇ meuˬ-ahˇ nawˇ maˬ laˆ cawˆ ni taˬ nehˬ nmˇ loˇ.

²⁵Iˬ baˇ maˬ mˇ-eu tsawˇ haˬ deuˬ-ahˇ, iˬ baˇ mˇ-eu tsawˇ haˬ deuˬ nehˬ-ehˇ tiˬ kawˆ loꞈ-ehˇ, nawˇ aˬ diˇ aˬ maˇ maˬ laˆ sehꞈ nehˬ-aˇ. Kʼoeˇ loꞈ-ehˇ maˬ jahˇ kʼmˬ-eu uˬ taꞈ, jahˇ-eu kʼawꞈ maˬ tsaˬ-aˇ. Kʼoeˇ loꞈ-ehˇ jahˇ naˇ, iˬ baˇ maˬ mˇ-eu deuˬ-ahˇ kʼawꞈ, iˬ baˇ mˇ-eu deuˬ nehˬ-ehˇ tiˬ kawˆ loꞈ-ehˇ shehˆ keuˬ-awˇ kʼehˬ nehˬ kʼaˆ nehˬ gaˇ duˇ tehꞈ-a. Heu-aˬ, maˬ jahˇ kʼmˬ-eu tiˬ jeˬ meh. Miˇ kʼahˬ dawˬ tawˆ luꞈ kʼoeˇ taˆ yaˇ kʼaˬ daˇ-eu yaw sahˇ gʼaˬ-aˬ, dawˇ coe ni mˇ-eu tsaˬ tehꞈ-a.”

²⁶Sahˬpaˬ Miˬyehˇ ehˇ-eu, “Sawˇdoˬ meuˬ laꞈ kʼoeˇ iˬ baˇ maˬ mˇ-eu tsawˇ haˬ ngaˬ tseˇ gʼaˬ ngaˇ ya mawˇ naˇ, aˬ yawꞈ maꞈ baˬ da neh, meuˬ meuˬ lah-ehˇ kʼehˬ-eu kʼaˆ-eu jeˬ-ahˇ maˬ ya daˬ ni bi buˬ-iˇ ma.”

²⁷Aˬbyaˬhaˬ paˇ ehˇ-eu, “Sahˬpaˬ Miˬyehˇ-oˇ, ngaˇ nawˬ-ahˇ dawˬ ngehˬ cawˬ laˇ gaˇ iˬ baˇ taˬ taˬ nehˬ laꞈ. Ngaˇ-aˬ, tsawˇ haˬ zaˬ tiˬ gʼaˬ pyeuꞈ-eu miˇ neh, nawˬ-ahˇ teh ngehˬ laˇ-eu maˬ tsaˬ-a. Ehˇ kʼawꞈ, oˇ oꞈ-eu laꞈ kʼoeˇ tiˬ poˆ naˇ haˬ nehˬ laꞈ siˬ.

²⁸Meuˬ kʼoeˇ meuˬ laꞈ kʼoeˇ iˬ baˇ maˬ mˇ-eu tsawˇ haˬ ngaˬ tseˇ gʼaˬ maˬ byah ni, oeˬ tseˇ ngaˬ gʼaˬ tehꞈ-ehˇ jawˇ lawˬ naˇ, ngaˬ gʼaˬ teˬ-iˇ-euˬ baˬ da neh, meuˬ kʼoeˇ meuˬ meuˬ lah ni-ahˇ nawˇ laˆ cawˆ nehˬ ma loˇ” lehˇ naˇ haˬ ngeh, “Iˬ baˇ maˬ mˇ-eu tsawˇ haˬ oeˬ tseˇ ngaˬ gʼaˬ ya mawˇ naˇ, meuˬ kʼoeˇ meuˬ-ahˇ ngaˇ maˬ laˆ cawˆ” lehˇ, Sahˬpaˬ Miˬyehˇ ehˇ-eu meh.

²⁹“Oeˬ tseˇ gʼaˬ tehꞈ-ehˇ byah naˇ laˆ cawˆ nehˬ ma loˇ” lehˇ Aˬbyaˬhaˬ paˇ naˇ haˬ ngeh, “Oeˬ tseˇ gʼaˬ jawˇ naˇ, meuˬ kʼoeˇ meuˬ-ahˇ ngaˇ maˬ laˆ cawˆ” lehˇ, Sahˬpaˬ Miˬyehˇ ehˇ-eu meh.

³⁰“Sahˬpaˬ Miˬyehˇ-oˇ, ngaˇ heu loꞈ-ehˇ paˇ naˇ haˬ-eu miˇ neh nui ma taˬ pehˇ nehˬ laꞈ siˬ. Iˬ baˇ maˬ mˇ-eu tsawˇ haˬ smˬ tseˇ gʼaˬ tehꞈ-ehˇ jawˇ lawˬ naˇ, meuˬ kʼoeˇ meuˬ-ahˇ nawˇ laˆ cawˆ nehˬ ma loˇ” lehˇ Sahˬpaˬ Miˬyehˇ-ahˇ Aˬbyaˬhaˬ paˇ naˇ haˬ ngeh, “Smˬ tseˇ gʼaˬ jawˇ naˇ, meuˬ kʼoeˇ meuˬ-ahˇ ngaˇ maˬ laˆ cawˆ” lehˇ Sahˬpaˬ Miˬyehˇ ehˇ-eu meh.

³¹“Ngaˇ heu loꞈ-ehˇ paˇ ya ehˇ-eu miˇ neh iˬ baˇ taˬ taˬ nehˬ laꞈ siˬ. Nyiˬ tseˇ gʼaˬ tehꞈ-ehˇ jawˇ naˇ laˆ cawˆ nehˬ ma loˇ” lehˇ, Aˬbyaˬhaˬ tiˬ poˆ paˇ naˇ haˬ ngeh, “Nyiˬ tseˇ gʼaˬ jawˇ naˇ, meuˬ kʼoeˇ meuˬ-ahˇ ngaˇ maˬ laˆ cawˆ” lehˇ Sahˬpaˬ Miˬyehˇ ehˇ-eu meh.

³²“Sahˬpaˬ Miˬyehˇ-oˇ, nui ma taˬ pehˇ nehˬ laꞈ siˬ. Ngaˇ heu loꞈ-ehˇ tiˬ dawˬ paˇ naˇ haˬ la siˬ. Tseˇ gʼaˬ tehꞈ-ehˇ jawˇ naˇ aˬ joˆ-ehˇ jahˇ nehˬ nmˇ” lehˇ, Aˬbyaˬhaˬ paˇ naˇ haˬ ngeh, “Iˬ baˇ maˬ mˇ-eu tsawˇ haˬ tseˇ gʼaˬ tehꞈ-ehˇ jawˇ lawˬ naˇ kʼawꞈ, meuˬ kʼoeˇ meuˬ-ahˇ ngaˇ maˬ laˆ cawˆ” lehˇ, Sahˬpaˬ Miˬyehˇ ehˇ kʼoꞈ nehˬ-euˬ meh.

³³Aˬbyaˬhaˬ aˬ yawꞈ nyaꞈ kʼoeˇ loꞈ-ehˇ dawˬ ngehˬ cawˬ gʼaˬ ngeh, Sahˬpaˬ Miˬyehˇ doˆ-iˇ-euˬ meh. Aˬbyaˬhaˬ gʼaˬ kʼawꞈ, iˇ kahˇ gʼoꞈ-iˇ-euˬ meh.