Read Akha Aˇ dahˬ 19 Bible Online

Aˇ dahˬ 19 - Akha bible

Aˇ dahˬ 19

¹Mˬ taˆ gʼaˬ kʼehˇ kʼoeˇ nyiˬ gʼaˬ uˬ ciꞈ uˬ taw paw Sawˇdoˬ meuˬ-ahˇ oe ngeh, meuˬ-euˬ lahˇ kʼehˬ-ahˇ Lawˇtaˬ nuiˇ luꞈ-eu meh. Aˬ yawꞈ nyaꞈ-ahˇ aˬ yawꞈ ya mawˇ ngeh, tsawˬ tuˇ-awˇ ha laˬ-iˇ-euˬ meh. Aˬ yawꞈ nyaꞈ-euˬ mehˬ shi Lawˇtaˬ pawˬ tsuiꞈ pawˬ dmˬ dmˬ-awˇ, awˆ byaˆ-eu laꞈ kʼoeˇ, heu loꞈ-ehˇ ehˇ-eu meh.

²“Yaw huiˬ yaw mahˇ deuˬ-oˇ, naw nyaꞈ-ahˇ ngaˇ ha-eu ma. Ngaˬ-euˬ nymˇ-ahˇ laˇ-awˬ. Naw nyaꞈ aˬ kuiˇ dzuiꞈ-awˇ ngaˬ-euˬ nymˇ-ahˇ yaꞈ nya tehꞈ-a. Uˬ shawˬ yaw naꞈ-ehˇ tuˇ-awˇ, gaˇ ma paˇ doˆ-iˇ tehꞈ-a.” lehˇ ehˇ nehˬ ngeh,Aˬ yawꞈ nyaꞈ ehˇ-eu, “Tiˬ jeˬ-iˬ maˬ ngeuˇ-aˇ. Nga nyaꞈ heu gaˇ laꞈ nyiˇ yaꞈ ma.”

³Ehˇ kʼawꞈ, Lawˇtaˬ yaw kʼaˆ-ehˇ shaˇ-eu miˇ neh, aˬ yawꞈ nyaꞈ Lawˇtaˬ-euˬ nymˇ-ahˇ naˬ leˇ-euˬ meh. Lawˇtaˬ-aˬ, aˬ yawꞈ-euˬ zaˬ kʼaˆ deuˬ-ahˇ kaˬ muˇ bi jahˇ-awˇ, kuiˇ-eu dzaˬ byawˇ bi laˆ dawˆ-euˬ meh. Dzaˬ byawˇ laˆ dawˆ gʼaˬ ngeh jawˇ, daˬ yah kʼoeˇ nyiˬ gʼaˬ-ahˇ bi dzaˬ bi dawˇ-euˬ meh.

⁴Daˬ yah kʼoeˇ nyiˬ gʼaˬ maˬ yuꞈ leˇ mi naˆ-ehˇ, Sawˇdoˬ meuˬ-ahˇ jawˇ-eu kʼaˬ dzeˇ zaˬ deuˬ, zaˬ guˬ tsawˇ kʼaˆ maˬ ehˇ, Lawˇtaˬ-euˬ nymˇ jawˬ jawˬ-ehˇ shahˇ le-euˬ meh.

⁵Lawˇtaˬ-ahˇ aˬ yawꞈ maꞈ kuˇ-awˇ, “Nymˇ ciꞈ nawˬ-euˬ nymˇ-ahˇ yaꞈ laˇ-euˬ daˬ yah kʼoeˇ nyiˬ gʼaˬ aˬ lehˬ. Nga maꞈ jawˇ gaˇ sheuˬ doˆ leꞈ-awˬ” lehˇ ehˇ nehˬ-euˬ meh. Sawˇdoˬ meuˬ-ahˇ jawˇ-eu tsawˇ haˬ kʼoeˇ deuˬ-aˬ, daˬ yah kʼoeˇ nyiˬ gʼaˬ nehˬ-ehˇ kʼaˬ dzeˇ zaˬ yaw kaˬ kʼaˬ miˬ sheu-awˇ, maˬ mˇ kʼmˬ-eu jeˬ mˇ nehˬ-eu lehˇ leh jeh luꞈ-eu meh.

⁶Lawˇtaˬ laꞈ nyiˇ doˆ-iˇ-awˇ, laˇ gʼoˆ piˬ tehˬ yaꞈ-euˬ meh.

⁷Kʼoeˇ naˇ, tsawˇ haˬ kʼoeˇ deuˬ-ahˇ aˬ yawꞈ heu loꞈ-ehˇ ehˇ nehˬ-euˬ meh.“Cawˬ deuˬ-oˇ, naw maꞈ-ahˇ ngaˇ shaˇ-eu ma. Heu loꞈ-ehˇ gʼeh-eu jawꞈ dui dui-eu jeˬ taˬ mˇ nehˬ laꞈ. Ngaˬ-euˬ dawˬ-ahˇ tiˬ poˆ naˇ haˬ nehˬ laꞈ sheˇ.

⁸Kʼaˬ dzeˇ zaˬ nehˬ-ehˇ tiˬ poˆ-iˬ maˬ jawˇ taꞈ haw-euˬ ngaˬ buˇ miˬ daꞈ nyiˬ gʼaˬ jawˇ ma. Aˬ nyaꞈ nmˇ-ahˇ naw maꞈ jawˇ gaˇ ngaˇ sheuˬ doˆ nehˬ leꞈ ma. Naw maꞈ nui kʼahˇ tiˬ shiˇ byawˬ gʼa muˆ gʼa-awˬ. Ehˇ kʼawꞈ, ngaˬ-euˬ nymˇ-ahˇ daˆ laˇ-euˬ daˬ yah heu nyiˬ gʼaˬ-ahˇ naw maꞈ taˬ toeˬ ciˆ nehˬ laꞈ. Aˬ yawꞈ nyaꞈ-aˬ, ngaˬ-euˬ nymˇ-ahˇ yaꞈ luꞈ-eu ngaˬ-euˬ daˬ yah pyeuꞈ-eu miˇ neh, ngaˇ ya haw piˇ meh.”

⁹Ehˇ kʼawꞈ, aˬ yawꞈ maꞈ heu loꞈ-ehˇ paˇ ehˇ-eu meh. “Cehˆ yawˬ-awˬ. Teu gaˇ taˬ jawˇ tsoeˬ. Nawˇ boeˇ miˬ siˬ kʼaˬ nawˇ. Nga maꞈ-ahˇ, heu loꞈ-ehˇ jahˇ-awˬ, kʼoeˇ loꞈ-ehˇ jahˇ-awˬ lehˇ mehˬ nehˬ laꞈ paˬ-ehˇ, nawˇ aˬ suˇ gʼaˬ te. Heu gaˇ cehˆ jawˇ le-euˬ daˬ yah maˬ ngeuˇ te loˇ. Cehˆ yawˬ-awˬ. Maˬ cehˆ yawˬ-eu jeˬ maˇ-iˬ, kʼoeˇ nyiˬ gʼaˬ-ahˇ naˆ maˬ tseˇ nawˬ-ahˇ jahˇ nehˬ nyaˇ.” Aˬ yawꞈ maꞈ Lawˇtaˬ-ahˇ dehˬ dzeh-awˇ laˇ gʼoˆ ngawˬ pyaˆ-eu lehˇ leh jeh-eu meh.

¹⁰Ehˇ kʼawꞈ, laꞈ kʼoeˇ paw jawˇ luꞈ-eu daˬ yah kʼoeˇ nyiˬ gʼaˬ aˬ laꞈ cawˬ doˆ leꞈ-awˇ, Lawˇtaˬ-ahˇ nymˇ laꞈ kʼoeˇ gʼeu ahˇ kʼoꞈ-awˇ, laˇ gʼoˆ piˬ tehˬ-euˬ meh.

¹¹Kʼoeˇ naˇ, daˬ yah kʼoeˇ nyiˬ gʼaˬ neh, laˇ gʼoˆ dawˬ peh jawˇ-eu tsawˇ haˬ kʼoeˇ deuˬ-ahˇ tahˬ sawˇ bi sawˇ-iˇ jiˇ-awˇ, laˇ gʼoˆ maˬ poˆ mawˇ nya ni bi shaˬ-euˬ meh.

¹²Kʼoeˇ naˇ, daˬ yah kʼoeˇ nyiˬ gʼaˬ Lawˇtaˬ-ahˇ heu loꞈ-ehˇ ehˇ nehˬ-euˬ meh. “Meuˬ heu meuˬ laꞈ kʼoeˇ kʼaˇ jawˇ-eu nawˬ buˇ nawˬ li deuˬ maˬ ehˇ, nawˬ-euˬ aˬ zaˬ deuˬ maˬ ehˇ, nawˬ-euˬ aˬ yuiꞈ aˬ nyiˇ deuˬ maˬ ehˇ, dawˬ tawˆ luꞈ meuˬ laꞈ kʼoeˇ neh bi doˆ-iˇ jiˇ-awˬ.

¹³Aˬ jeˬ miˇ neh ehˇ naˇ, jawˇ duˬ heu tsahˇ-ahˇ nga nyaꞈ laˆ cawˆ-eu lehˇ gʼeh-eu ma. Heu gaˇ jawˇ luꞈ-eu tsawˇ haˬ heu deuˬ huiˬ dui dui-eu iˬ baˇ mˇ luꞈ-eu gaˇ kawˆ, Sahˬpaˬ Miˬyehˇ ya gaˬ-euˬ miˇ neh, meuˬ heu meuˬ-ahˇ laˆ cawˆ-eu gʼaˇ duˬ nga nyaꞈ-ahˇ pyehˬ leꞈ-euˬ meh.”

¹⁴Kʼoeˇ ngeh, Lawˇtaˬ-aˬ, aˬ yawꞈ-euˬ aˬ buˇ deuˬ-ahˇ sheuˬ dahˬ dzaˬ-eu lehˇ lehˬ hmˬ luꞈ-eu kʼaˬ dzeˇ zaˬ zaˬ guˬ deuˬ jawˇ gaˇ iˇ-awˇ, “Yaw kawˇ-ehˇ lehˬ hmˬ-awˇ, meuˬ heu meuˬ laꞈ kʼoeˇ neh doˆ-iˇ-awˬ. Meuˬ heu meuˬ-ahˇ Sahˬpaˬ Miˬyehˇ laˆ cawˆ-eu lehˇ lehˬ hmˬ luꞈ meh” lehˇ ehˇ nehˬ-euˬ meh. Ehˇ kʼawꞈ, aˬ yawꞈ maꞈ-ahˇ Lawˇtaˬ naˬ gʼa le-euˬ nga lehˇ aˬ yawꞈ maꞈ noeˬ-euˬ meh.

¹⁵Uˬ bya bya laˇ ngeh, mˬ taˆ gʼaˬ kʼehˇ deuˬ Lawˇtaˬ-ahˇ yaw kawˇ-ehˇ bi lehˬ hmˬ-euˬ meh. “Yaw kawˇ-ehˇ lehˬ hmˬ tehˇ tehˬ-awˬ. Meuˬ heu meuˬ-ahˇ laˆ cawˆ ngeh naw maꞈ maˬ ya shiˇ ni, nawˬ-euˬ miˬ zaˬ hawˇ-eu nawˬ buˇ nyiˬ buˇ sheuˬ-awˇ yaw kawˇ-ehˇ doˆ-iˇ-awˬ” lehˇ, mˬ taˆ gʼaˬ kʼehˇ kʼoeˇ nyiˬ gʼaˬ Lawˇtaˬ-ahˇ ehˇ nehˬ-euˬ meh.

¹⁶Kʼoeˇ loꞈ-ehˇ ehˇ nehˬ gʼaˬ-euˬ kʼawꞈ, Lawˇtaˬ nyi naˬ nyi naˬ-ehˇ jawˇ-eu meh. Ehˇ kʼawꞈ, Sahˬpaˬ Miˬyehˇ aˬ yawꞈ-ahˇ gʼawˬ shaˬ gaˬ-eu miˇ neh, aˬ yawꞈ-ahˇ maˬ ehˇ, aˬ yawꞈ-euˬ miˬ zaˬ hawˇ-eu aˬ yawꞈ-euˬ aˬ buˇ nyiˬ buˇ-ahˇ maˬ ehˇ, mˬ taˆ gʼaˬ kʼehˇ deuˬ neh aˬ laꞈ-ahˇ bi nyehꞈ tehˬ-awˇ, meuˬ-euˬ laꞈ nyiˇ paw bi tsahˇ doˆ gʼeh-euˬ meh.

¹⁷“Naw maꞈ ya buˬ-iˇ ni cehˆ dzeuˇ tehˇ tehˬ-awˬ. Nahˇ gʼoꞈ taˬ paˇ gʼoꞈ haw. Deh ga heu maˬ cehˆ li kʼoeˇ keuˆ ni tiˬ gaˇ-iˬ taˬ naˬ. Naw maꞈ maˬ shiˇ-ehˇ ya dzeuˇ-iˇ ni, gawˬ jawˬ paw cehˆ daˆ leꞈ-awˬ” lehˇ, mˬ taˆ gʼaˬ kʼehˇ tiˬ gʼaˬ aˬ yawꞈ maꞈ-ahˇ ehˇ nehˬ-euˬ meh.

¹⁸Ehˇ kʼawꞈ, Lawˇtaˬ ehˇ-eu, “Yaw huiˬ yaw mahˇ deuˬ-oˇ, teu naˆ naˆ-ehˇ taˬ bi cehˆ nehˬ laꞈ.

¹⁹Naw maꞈ ngaˬ-ahˇ gʼawˬ shaˬ gaˬ dui dui-eu miˇ neh heu loꞈ-ehˇ bi buˬ-iˇ laꞈ-eu meh lehˇ ngaˇ siˬ nya ma. Ehˇ kʼawꞈ, gawˬ jawˬ kʼoeˇ jawˬ aˇ dzehˬ-ehˇ kaˬ dzeuˇ-eu miˇ neh, kʼoeˇ gaˇ maˬ cehˆ keuˆ mi naˆ-ehˇ, laˆ luˬ laˆ seˇ-eu jeˬ ngaˬ-euˬ kʼoeˇ taˆ keuˆ le-eu ngaˇ.

²⁰Kʼoeˇ gaˇ meuˬ meuˬ zaˬ tiˬ meuˬ jaˆ luꞈ-eu naw maꞈ-ahˇ mawˇ laˇ-eu maˬ ngeuˇ-a loˇ. Kʼoeˇ-aˬ, ui cuiˆ peh dzehˬ-eu miˇ neh, ngaˬ-ahˇ kʼoeˇ gaˇ bi cehˆ-iˇ nehˬ laꞈ-awˬ. Meuˬ kʼoeˇ meuˬ-aˬ, jawˇ duˬ yaw nyiˇ tiˬ tsahˇ pyeuꞈ-awˇ, kʼoeˇ gaˇ bi cehˆ-iˇ laꞈ naˇ ngaˇ cehˆ buˬ nya tehꞈ-a.”

²¹Mˬ taˆ gʼaˬ kʼehˇ kʼoeˇ gʼaˬ ehˇ-eu, “Toˆ-ehˇ ngeuˇ naˇ kʼawꞈ muiˬ tehꞈ-a. Nawˇ shaˇ-eu loꞈ-ehˇ ngaˇ geuꞈ ma. Meuˬ meuˬ zaˬ kʼoeˇ meuˬ-ahˇ ngaˇ maˬ laˆ cawˆ.

²²Yaw kawˇ ma-ehˇ cehˆ coeˬ coeˬ gʼeh-awˬ. Nawˇ kʼoeˇ gaˇ maˬ cehˆ keuˆ kʼoeˇ keuˆ ni, ngaˇ tiˬ jeˬ-iˬ maˬ jahˇ te siˬ.” Meuˬ kʼoeˇ meuˬ-ahˇ Lawˇtaˬ neh meuˬ meuˬ zaˬ lehˇ kuˇ-euˬ miˇ neh, Zoˇlaˆ meuˬ lehˇ myahˇ nehˬ-euˬ meh.

²³Zoˇlaˆ meuˬ-ahˇ Lawˇtaˬ cehˆ keuˆ ngeh, nahˇ ma doˆ laˇ-euˬ meh.

²⁴Tiˬ poˆ tehꞈ-ehˇ, miˬ dzaˬ doꞈ luꞈ-eu miˬ dzaˇ dzaˇ shuiˇ deuˬ, uˬ yehˇ yehˇ-eu loꞈ-ehˇ, Sawˇdoˬ meuˬ hawˇ-eu Gawˇmawˇlaˆ meuˬ kʼoeˇ taˆ Sahˬpaˬ Miˬyehˇ bi ga le-euˬ meh.

²⁵Meuˬ kʼoeˇ nyiˬ meuˬ hawˇ-eu gaˇ dahˬ gaˇ dzeˇ deh ga dawˬ tawˆ luꞈ maˬ ehˇ, kʼoeˇ gaˇ kʼaˇ jawˇ-eu tsawˇ haˬ dawˬ tawˆ luꞈ maˬ ehˇ, yaw dehꞈ kʼaˇ dehꞈ-eu jeˬ dawˬ tawˆ luꞈ hawˇ-eu sahˬ lahˬ aˇ bawˇ dawˬ tawˆ luꞈ maˬ ehˇ, Sahˬpaˬ Miˬyehˇ neh laˆ cawˆ jiˇ-euˬ meh.

²⁶Ehˇ kʼawꞈ, Lawˇtaˬ-euˬ miˬ zaˬ-aˬ, naˇ kʼah nahˇ gʼoꞈ gʼoꞈ haw-euˬ miˇ neh, saˬ deuꞈ kʼawˇ zeuˇ pyeuꞈ-iˇ-euˬ meh.

²⁷Kʼoeˇ ngeh shawˬ yaw naꞈ-ehˇ, dzeuˇ laˇ ngeh Sahˬpaˬ Miˬyehˇ mehˬ shi aˬ yawꞈ gawˬ yawꞈ yawꞈ-awˇ dawˬ ngehˬ ngehˬ cawˬ haw-euˬ jawˇ duˬ kʼoeˇ tsahˇ-ahˇ, Aˬbyaˬhaˬ yaw kawˇ-ehˇ iˇ-euˬ meh.

²⁸Sawˇdoˬ meuˬ hawˇ-eu Gawˇmawˇlaˆ meuˬ-euˬ deh ga paw aˬ yawꞈ haw ka gʼeh ngeh, miˬ dzaˬ tsawˬ bu bu ma-ahˇ uˬ kʼoeˬ du doˆ laˇ-eu loꞈ-ehˇ, miˇ kʼahˬ kʼahˬ lah ni uˬ kʼoeˬ uꞈ uꞈ-ehˇ jaˆ luꞈ gaˇ ya mawˇ-euˬ meh.

²⁹Lawˇtaˬ jawˇ luꞈ-eu deh ga laꞈ kʼoeˇ jaˆ-eu meuˬ kʼoeˇ nyiˬ meuˬ-ahˇ Miˬyehˇ laˆ cawˆ-euˬ kʼawꞈ, Miˬyehˇ-euˬ nui ma laꞈ kʼoeˇ Aˬbyaˬhaˬ-ahˇ noeˬ mawˇ-eu baˬ da neh, Lawˇtaˬ-ahˇ luˬ-iˇ seˇ-iˇ-eu jeˬ laꞈ kʼoeˇ bi buˬ-iˇ-euˬ meh.

³⁰Zoˇlaˆ meuˬ laꞈ kʼoeˇ Lawˇtaˬ maˬ jawˇ peuˬ-eu miˇ neh, aˬ yawꞈ-euˬ aˬ buˇ nyiˬ buˇ nehˬ-ehˇ gawˬ jawˬ paw daˆ leˇ-awˇ, lo kʼahˬ tiˬ kʼahˬ laꞈ kʼoeˇ jawˇ leˇ-euˬ meh.

³¹Kʼoeˇ ngeh, aˬ buˇ aˬ yuiꞈ gʼaˬ aˬ buˇ aˬ nyiˇ gʼaˬ-ahˇ ehˇ nehˬ-eu, “Aˬ da mawˬ laˇ shaw-euˬ ngaˇ. Aˇ nyaꞈ zaˬ jawˇ le nya ni aˇ nyaꞈ-ahˇ sheuˬ dahˬ dzaˬ-eu gʼaˇ duˬ, miˇ tsaˬ kʼoeˇ taˆ kʼaˬ dzeˇ zaˬ tiˬ gʼaˬ-iˬ maˬ paˇ jawˇ meh.

³²Oe-awˬ. Aˇ nyaꞈ nmˇ zaˬ jawˇ le nya ni, aˬ da-ahˇ aˬ gaꞈ dzaˇ uiˇ bi dawˇ yehꞈ-awˇ, aˬ da nehˬ-ehˇ yuꞈ taꞈ kaˇ-euˇ.”

³³Kʼoeˇ ngeh miˇ, aˬ nyaꞈ nmˇ aˬ da gʼaˬ-ahˇ aˬ gaꞈ dzaˇ uiˇ bi dawˇ yehꞈ-awˇ, aˬ buˇ aˬ yuiꞈ gʼaˬ aˬ da gʼaˬ nehˬ-ehˇ yuꞈ taꞈ-euˬ meh. Ehˇ kʼawꞈ, aˬ da gʼaˬ aˬ gaꞈ dzaˇ uiˇ yehꞈ dui dui-eu miˇ neh, aˬ joˆ-ehˇ pyeuꞈ laˇ-euˬ gaˇ kawˆ tiˬ pawꞈ-iˬ maˬ siˬ nya-a.

³⁴Yawˬ nah yawˬ keuˆ laˇ ngeh, aˬ buˇ aˬ yuiꞈ gʼaˬ aˬ nyiˇ gʼaˬ-ahˇ heu loꞈ-ehˇ ehˇ nehˬ-euˬ meh. “Ngaˇ miˇ ciꞈ aˬ da nehˬ-ehˇ yuꞈ leˇ gʼaˬ-euˬ ma. Nymˇ ciꞈ gʼeh aˬ yawꞈ-ahˇ aˬ gaꞈ dzaˇ uiˇ paˇ bi dawˇ yehꞈ-awˇ, nawˇ paˇ yuꞈ leˇ-awˬ. Aˇ nyaꞈ nyiˬ mehˇ nmˇ luꞈ, aˬ da baˇ neh zaˬ jawˇ le luꞈ-uˇ.”

³⁵Kʼoeˇ ngeh miˇ kʼawꞈ, aˬ nyaꞈ nmˇ aˬ da gʼaˬ-ahˇ aˬ gaꞈ dzaˇ uiˇ paˇ bi dawˇ yehꞈ-awˇ, aˬ buˇ aˬ nyiˇ gʼaˬ aˬ yawꞈ nehˬ-ehˇ yuꞈ taꞈ-euˬ meh. Kʼoeˇ ngeh poˆ kʼawꞈ, aˬ yawꞈ aˬ gaꞈ dzaˇ uiˇ aˇ dzehˬ yehꞈ dzeuˇ-euˬ miˇ neh, aˬ joˆ-ehˇ pyeuꞈ laˇ-euˬ gaˇ kawˆ tiˬ pawꞈ-iˬ maˬ siˬ nya-a.

³⁶Kʼoeˇ loꞈ-ehˇ jahˇ-awˇ, Lawˇtaˬ-euˬ aˬ buˇ nyiˬ buˇ luꞈ, aˬ da gʼaˬ baˇ neh aˬ nyiˇ pi leˇ-euˬ meh.

³⁷Aˬ buˇ aˬ yuiꞈ gʼaˬ aˬ li tiˬ li ciˬ-awˇ, Mawˇbaˆ[12] lehˇ myahˇ nehˬ-euˬ meh. Aˬ li kʼoeˇ li-aˬ, iˬ nah dehꞈ luꞈ jawˇ luꞈ-eu Mawˇbaˆ tsawˇ jeuˬ-euˬ aˬ da yaw dzahˇ gʼaˬ pyeuꞈ-eu meh.

³⁸Aˬ buˇ aˬ nyiˇ gʼaˬ kʼawꞈ aˬ li tiˬ li ciˬ-awˇ, Beˬnaˬmiˇ[13] lehˇ myahˇ nehˬ-euˬ meh. Aˬ li kʼoeˇ li-aˬ, iˬ nah dehꞈ luꞈ jawˇ luꞈ-eu Aˬmoˬ tsawˇ jeuˬ-euˬ aˬ da yaw dzahˇ gʼaˬ pyeuꞈ-eu meh.