Read Akha Aˇ dahˬ 2 Bible Online

Aˇ dahˬ 2 - Akha bible

Aˇ dahˬ 2

¹Kʼoeˇ loꞈ-ehˇ jahˇ-awˇ, mˬ beh miˇ beh Miˬyehˇ beh gʼaˬ-euˬ meh.

²Kʼaˇ mˇ kʼaˇ shaˇ paˬ-ehˇ gʼeh-eu jeˬ mˇ gʼaˬ shaˇ gʼaˬ jiˇ-euˬ miˇ neh, shiꞈ nah tiˬ nah keuˆ laˇ ngeh, Miˬyehˇ gʼaˬ naˬ naˬ-euˬ meh.

³Shiꞈ nah kʼoeˇ nah-ahˇ aˬ yawꞈ guiˬ lahˬ biꞈ-awˇ, aˇ nah nui deuˬ-ahˇ maˬ duˇ-eu aˇ nah tiˬ nah bi pyeuꞈ laˇ-euˬ meh. Aˬ jeˬ miˇ neh ehˇ naˇ, aˇ nah kʼoeˇ nah keuˆ laˇ ngeh, mˬ beh miˇ beh aˬ yawꞈ beh gʼaˬ jiˇ-awˇ, gaˇ maˬ mˇ ni gʼaˬ naˬ naˬ-euˬ meh.

⁴Heu-aˬ, Sahˬpaˬ Miˬyehˇ neh mˬ hawˇ-eu miˇ dawˬ tawˆ luꞈ-ahˇ aˬ joˆ-ehˇ beh-euˬ gaˇ kawˆ pyeuꞈ-eu meh. Sahˬpaˬ Miˬyehˇ mˬ beh miˇ beh beh ngeh,

⁵miˇ tsaˬ kʼoeˇ taˆ sahˬ lahˬ aˇ bawˇ tiˬ bawˇ-iˬ maˬ bawˇ-ehˇ, aˇ ji tiˬ ji-iˬ maˬ ji-a. Aˬ jeˬ miˇ neh ehˇ naˇ, Miˬyehˇ neh uˬ yehˇ maˬ bi yehˇ le dah-euˬ uˬ taꞈ, ka dzaˬ ka dawˇ-eu tsawˇ haˬ kʼawꞈ tiˬ gʼaˬ-iˬ maˬ jawˇ le dah-euˬ miˇ neh meh.

⁶Ehˇ kʼawꞈ, miˇ tsaˬ dawˬ dah paw neh iˇ cuꞈ aˬ doˆ laˇ-awˇ, miˇ tsaˬ jmˬ laˇ taˬ-euˬ meh.

⁷Kʼoeˇ ngeh, Miˬyehˇ pyeuꞈ-eu Sahˬpaˬ Miˬyehˇ miˇ tsaˬ-ahˇ shaˬ jehˆ ui cuiˆ tsuˆ doˆ-awˇ, tsawˇ haˬ mawˇ kawˇ tehˆ-euˬ meh. Kʼoeˇ naˇ, naˇ mehˇ laꞈ kʼoeˇ dehꞈ-eu saꞈ laˇ baw ahˇ nehˬ ngeh, tsawˇ haˬ kʼoeˇ gʼaˬ yaw dehꞈ dehꞈ laˇ-euˬ meh.

⁸Kʼoeˇ naˇ, nahˇ ma doˆ kʼehˬ paw Eˬdeˬ lehˇ kuˇ-eu jawˇ duˬ-ahˇ Miˬyehˇ pyeuꞈ-eu Sahˬpaˬ Miˬyehˇ yaˇ kmˇ tiˬ kmˇ beh-awˇ, aˬ yawꞈ neh beh-euˬ tsawˇ haˬ kʼoeˇ gʼaˬ-ahˇ kʼoeˇ gaˇ bi jawˇ-euˬ meh.

⁹Haw muiˬ dui dui-eu aˇ bawˇ kʼaˇ ngeuˇ-eu dawˬ tawˆ luꞈ kʼoeˇ gaˇ bi dehꞈ laˇ-awˇ, muiˬ dui kuiˇ dui dui-eu aˇ siˬ deuˬ Miˬyehˇ pyeuꞈ-eu Sahˬpaˬ Miˬyehˇ neh bi siˬ le-euˬ meh. Dehꞈ-eu saꞈ laˇ aˇ bawˇ pyeuꞈ-eu yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ biꞈ-eu aˇ bawˇ tiˬ bawˇ kʼawꞈ, yaˇ kmˇ kʼoeˇ kmˇ-euˬ gʼahˇ ceh bawˇ-euˬ meh.

¹⁰Iˇ cuꞈ lawˇ baˬ tiˬ gawˆ Eˬdeˬ yaˇ kmˇ-ahˇ yoeˇ uˇ leꞈ-awˇ, yaˇ kmˇ-ahˇ iˇ cuꞈ biꞈ-awˇ shiˬ deuˬ ni bi jaˆ-euˬ meh. Lawˇ baˬ kʼoeˇ gawˆ Eˬdeˬ yaˇ kmˇ yoeˇ dzeuˇ gʼeh ngeh jawˇ, lawˇ baˬ oeˬ gawˆ yoeˇ paˆ-iˇ-euˬ meh.

¹¹Lawˇ baˬ yaw beh gawˆ-aˬ, Piˇshahˬ lawˇ baˬ pyeuꞈ-awˇ, Haˬbiˇlaˬ miˇ kʼahˬ caw caw-ehˇ yoeˇ ka gʼeh-euˬ meh.

¹²(Miˇ kʼahˬ kʼoeˇ kʼahˬ laꞈ kʼoeˇ, muiˬ dui dui-eu shuiˇ, aˇ poeˬ kʼaˆ-eu tsiˇ yaw saw jeˬ hawˇ-eu, kʼaˬ lo sehˇ deuˬ doˆ-eu meh.)

¹³Lawˇ baˬ nyiˬ gawˆ tiˬ gawˆ-aˬ, Giˇhoˬ lawˇ baˬ pyeuꞈ-awˇ, Kuˇshaˆ miˇ kʼahˬ caw caw-ehˇ yoeˇ ka gʼeh-euˬ meh.

¹⁴Lawˇ baˬ smˬ gawˆ tiˬ gawˆ-aˬ, Aˬshuˇliˆ miˇ kʼahˬ nahˇ ma doˆ kʼehˬ paw yoeˇ ka gʼeh-euˬ Tiˇgaˬliˇ lawˇ baˬ pyeuꞈ-awˇ, lawˇ baˬ oeˬ gawˆ tiˬ gawˆ-aˬ, Uˇpaˬlaˇ lawˇ baˬ pyeuꞈ-eu meh.

¹⁵Tsawˇ haˬ zaˬ kʼoeˇ gʼaˬ-ahˇ Miˬyehˇ pyeuꞈ-eu Sahˬpaˬ Miˬyehˇ neh Eˬdeˬ yaˇ kmˇ laꞈ kʼoeˇ bi jawˇ-awˇ, yaˇ kmˇ-ahˇ laˆ saˆ haw piˇ-eu gʼaˬ bi geuꞈ-euˬ meh.

¹⁶Aˬ yawꞈ-ahˇ Miˬyehˇ heu loꞈ-ehˇ ehˇ nehˬ-euˬ meh. “Yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ biꞈ-eu aˇ bawˇ kʼoeˇ bawˇ-euˬ aˇ siˬ maˬ ngeuˇ naˇ, aˇ bawˇ aˬ geu bawˇ-euˬ aˇ siˬ maˬ kaˬ, nawˇ pyaˆ dzaˬ nya tehꞈ-a.

¹⁷Ehˇ kʼawꞈ, yaw muiˬ yaw doeˇ tseˇ paˆ nya-eu zaˬ siˬ tsawˇ gahˇ biꞈ-eu aˇ bawˇ kʼoeˇ bawˇ-euˬ aˇ siˬ nawˇ maˬ ya pyaˆ dzaˬ-a. Pyaˆ dzaˬ naˇ, dzaˬ ngeh nah neh nawˇ ya shiˇ tehꞈ-a” lehˇ ehˇ nehˬ-euˬ meh.

¹⁸Kʼoeˇ naˇ, “Tsawˇ haˬ zaˬ tiˬ gʼaˬ tehꞈ-ehˇ jawˇ-eu maˬ muiˬ-a. Aˬ yawꞈ-ahˇ bi caw ba-eu gʼaˇ duˬ, aˬ yawꞈ-ahˇ geuˇ-eu cawˬ tiˬ gʼaˬ ngaˇ beh nehˬ ma” lehˇ, Miˬyehˇ pyeuꞈ-eu Sahˬpaˬ Miˬyehˇ ehˇ-eu meh.

¹⁹Miˬyehˇ pyeuꞈ-eu Sahˬpaˬ Miˬyehˇ miˇ tsaˬ-ahˇ shaˬ jehˆ ui cuiˆ tsuˆ doˆ-awˇ, jeˬ zaˬ hawˇ-eu aˇ jiˇ dawˬ tawˆ luꞈ-euˬ mawˇ kawˇ tehˆ-euˬ meh. Kʼoeˇ naˇ, tsawˇ haˬ zaˬ neh bi haw-awˇ aˇ myahˇ bi myahˇ nehˬ-eu lehˇ, jeˬ zaˬ hawˇ-eu aˇ jiˇ kʼoeˇ deuˬ-ahˇ, tsawˇ haˬ zaˬ kʼoeˇ gʼaˬ jawˇ gaˇ yuˇ gʼeh nehˬ-euˬ meh. Kʼoeˇ miˇ neh, jeˬ zaˬ hawˇ-eu aˇ jiˇ dawˬ tawˆ luꞈ, yawˬ ha-euˬ aˇ myahˇ yawˬ ha baw laˇ-euˬ meh.

²⁰Jeˬ zaˬ hawˇ-eu aˇ jiˇ dawˬ tawˆ luꞈ-ahˇ tsawˇ haˬ zaˬ neh aˇ myahˇ myahˇ nehˬ-euˬ meh. Ehˇ kʼawꞈ, jeˬ zaˬ aˇ jiˇ kʼoeˇ deuˬ laꞈ kʼoeˇ, aˬ yawꞈ-ahˇ caw ba nya-eu cawˬ maˬ jawˇ-a.

²¹Kʼoeˇ naˇ, tsawˇ haˬ zaˬ kʼoeˇ gʼaˬ-ahˇ Miˬyehˇ pyeuꞈ-eu Sahˬpaˬ Miˬyehˇ neh maˬ noeˬ ni bi yuꞈ kʼaˆ byoˆ-euˬ meh. Aˬ yawꞈ yuꞈ kʼaˆ luꞈ ngeh, aˬ yawꞈ-euˬ behˇ jehˆ tiˬ kahˬ yuˇ doˆ-awˇ, behˇ jehˆ yuˇ doˆ-euˬ maˇ kʼehˬ maˬ bi dahˇ ni, byaˇ gʼaˇ shaˬ jiˇ kʼoeˇ aˬ yawꞈ yaw oeˇ loꞈ-ehˇ paˇ bi myahˬ tawꞈ leˇ-euˬ meh.

²²Behˇ jehˆ kʼoeˇ kahˬ neh zaˬ miˬ zaˬ tiˬ gʼaˬ-ahˇ Miˬyehˇ pyeuꞈ-eu Sahˬpaˬ Miˬyehˇ beh-awˇ, tsawˇ haˬ zaˬ kʼoeˇ gʼaˬ jawˇ gaˇ sheuˬ gʼeh nehˬ-euˬ meh.

²³Kʼoeˇ ngeh, tsawˇ haˬ zaˬ kʼoeˇ gʼaˬ ehˇ-eu, “Aˇ saˬ saˬ laˇ ngeh-aˬ, ngaˬ-euˬ shaˬ yoeˬ-ahˇ neh doˆ le-euˬ shaˬ yoeˬ ngaˬ-euˬ shaˬ jiˇ-ahˇ neh doˆ le-euˬ shaˬ jiˇ, ngaˬ-ahˇ duˇ leˇ-eu ngaˬ-euˬ aˇ jeuˬ tiˬ gʼaˬ doˆ le-euˬ nga. Aˬ yawꞈ-ahˇ zaˬ miˬ zaˬ lehˇ ngaˇ kuˇ ma. Aˬ jeˬ miˇ neh ehˇ naˇ, kʼaˬ dzeˇ zaˬ laꞈ kʼoeˇ neh aˬ yawꞈ doˆ le-euˬ meh” lehˇ ehˇ-eu meh.

²⁴Kʼoeˇ miˇ neh, kʼaˬ dzeˇ zaˬ-aˬ, yawˬ ha-euˬ aˬ ma aˬ da-ahˇ ya gʼawˬ-iˇ-awˇ, yawˬ ha-euˬ miˬ zaˬ nehˬ-ehˇ taꞈ leˇ-eu laꞈ kʼoeˇ, nyiˬ gʼaˬ-euˬ tiˬ shiˬ tiˬ shaˬ tehꞈ-ehˇ ya pyeuꞈ laˇ-eu meh.

²⁵Zaˬ miˬ zaˬ hawˇ-eu kʼaˬ dzeˇ zaˬ kʼoeˇ nyiˬ gʼaˬ luꞈ, neˇ myawˆ ni jawˇ-euˬ meh. Ehˇ kʼawꞈ, shaꞈ dawˇ-eu jeˬ maˬ jaˆ-a.