Read Akha Aˇ dahˬ 20 Bible Online

Aˇ dahˬ 20 - Akha bible

Aˇ dahˬ 20

¹Aˬbyaˬhaˬ-aˬ, Mamˬliˬ lehˇ kuˇ-eu jawˇ duˬ-ahˇ neh Kaˬnaˬ miˇ kʼahˬ laꞈ oˆ paw paˇ iˇ ka gʼeh-awˇ, Kaˬdeˬshaˇ meuˬ hawˇ-eu Shuˇyaˆ meuˬ yaw kaˬ-ahˇ jawˇ-iˇ-euˬ meh. Gʼawˬ myahˇ maˬ gʼeh-ehˇ Geˬlawˬ meuˬ-ahˇ aˬ yawꞈ paˇ jawˇ-iˇ-euˬ meh.

²Aˬ yawꞈ kʼoeˇ gaˇ jawˇ luꞈ ngeh, Saˬlaˇ-aˬ ngaˬ-euˬ dmˇ ma ma lehˇ aˬ yawꞈ ehˇ-euˬ meh. Kʼoeˇ naˇ, Geˬlawˬ Sahˬpaˬ Aˬbiˇmaˬlehˆ-aˬ, Saˬlaˇ-ahˇ aˬ yawꞈ jawˇ gaˇ bi sheuˬ laꞈ-euˬ meh.

³Tiˬ miˇ keuˆ laˇ ngeh, Aˬbiˇmaˬlehˆ yuꞈ maˆ maˆ-eu laꞈ kʼoeˇ, aˬ yawꞈ jawˇ gaˇ Miˬyehˇ oe-awˇ, “Zaˬ miˬ zaˬ heu gʼaˬ-ahˇ sheuˬ-euˬ baˬ da neh nawˇ ya shiˇ tehꞈ-a. Aˬ yawꞈ aˬ cawˬ-euˬ miˬ zaˬ meh” lehˇ ehˇ nehˬ le-euˬ meh.

⁴Ehˇ kʼawꞈ, Aˬbiˇmaˬlehˆ Saˬlaˇ nehˬ-ehˇ maˬ ya jawˇ taꞈ dah-aˬ siˬ. Aˬ yawꞈ Miˬyehˇ-ahˇ ehˇ nehˬ-eu, “Sahˬpaˬ Miˬyehˇ-oˇ, ngaˇ iˬ baˇ maˬ ahˇ. Ngaˇ hawˇ-eu ngaˬ-euˬ tsawˇ haˬ deuˬ-ahˇ nawˇ laˆ cawˆ-eu lehˇ gʼeh te loˇ.

⁵Aˬbyaˬhaˬ maˬ ehˇ, Saˬlaˇ maˬ ehˇ, Saˬlaˇ-aˬ Aˬbyaˬhaˬ-euˬ dmˇ ma pyeuꞈ-eu ma lehˇ ehˇ-eu miˇ neh, nui ma shawˇ jehˆ ni gʼeh-eu laꞈ kʼoeˇ aˬ yawꞈ-ahˇ ngaˇ sheuˬ-euˬ ma. Ngaˬ-euˬ yaw lehˬ tiˬ jeˬ-iˬ maˬ jaˆ.”

⁶Yuꞈ maˆ laꞈ kʼoeˇ, Aˬbiˇmaˬlehˆ-ahˇ Miˬyehˇ heu loꞈ-ehˇ paˇ ehˇ nehˬ-euˬ meh. “Ngeuˇ meh. Nawˇ nui ma shawˇ jehˆ ni taˬ-eu laꞈ kʼoeˇ, kʼoeˇ loꞈ-ehˇ mˇ-euˬ meh lehˇ ngaˇ siˬ nya ma. Kʼoeˇ miˇ neh, ngaˬ-euˬ mehˬ shi nawˇ iˬ baˇ maˬ ya mˇ ni, zaˬ miˬ zaˬ heu gʼaˬ nehˬ-ehˇ nawˬ-ahˇ ngaˇ maˬ bi jawˇ taꞈ-aˬ.

⁷Ehˇ kʼawꞈ, nymˬ-mˇ mi naˆ-ehˇ, zaˬ miˬ zaˬ heu gʼaˬ aˬ yawꞈ-euˬ kʼaˬ dzeˇ zaˬ-ahˇ a kʼoꞈ nehˬ-awˬ. Aˬ yawꞈ-euˬ kʼaˬ dzeˇ zaˬ-aˬ, Miˬyehˇ gʼaˇ duˬ ngehˬ dah-eu tsawˇ haˬ pyeuꞈ-eu meh. Nawˇ maˬ ya shiˇ-eu gʼaˇ duˬ aˬ yawꞈ guiˬ lahˬ shaˇ nehˬ laꞈ tehꞈ-a. Ehˇ kʼawꞈ, ngaˇ nawˬ-ahˇ heu loꞈ-ehˇ ehˇ-eu ma. Zaˬ miˬ zaˬ heu gʼaˬ-ahˇ, aˬ yawꞈ-euˬ kʼaˬ dzeˇ zaˬ-euˬ aˬ laꞈ laꞈ kʼoeˇ maˬ a kʼoꞈ nehˬ naˇ, nawˇ ya shiˇ tehꞈ-a. Nawˇ hawˇ-eu nawˬ-euˬ tsawˇ haˬ dawˬ tawˆ luꞈ ya shiˇ jiˇ tehꞈ-a.”

⁸Yawˬ shawˬ yawˬ uˬ shawˬ yaw naꞈ-ehˇ, aˬ yawꞈ-euˬ gaˇ mˇ-eu yaw huiˬ yaw mahˇ deuˬ dawˬ tawˆ luꞈ-ahˇ Aˬbiˇmaˬlehˆ kuˇ uiˬ-awˇ, gaˇ kawˆ kʼoeˇ dzawˇ nehˬ ngeh, yawˬ gʼaˬ na luꞈ guˆ dui dui-iˇ-euˬ meh.

⁹Kʼoeˇ ngeh, Aˬbyaˬhaˬ-ahˇ Aˬbiˇmaˬlehˆ kuˇ-awˇ, heu loꞈ-ehˇ ehˇ nehˬ-euˬ meh. “Aˬ jeˬ miˇ neh nawˇ ngaˬ-ahˇ heu loꞈ-ehˇ jahˇ nehˬ laꞈ te. Ngaˬ-euˬ kʼoeˇ taˆ maˬ ehˇ, ngaˬ-euˬ miˇ kʼahˬ kʼoeˇ taˆ maˬ ehˇ, huiˬ dui dui-eu guˆ-eu gaˆ-eu jeˬ keuˆ le ni nawˇ jahˇ paˬ-ehˇ, nawˬ-euˬ kʼoeˇ taˆ ngaˬ neh mˇ lehˬ taˬ-euˬ aˬ jeˬ jaˆ ta. Nawˬ neh ngaˬ-ahˇ heu poˆ jahˇ nehˬ laꞈ-euˬ loꞈ-ehˇ, tsawˇ haˬ tiˬ gʼaˬ-iˬ ngaˬ-ahˇ maˬ jahˇ nehˬ laꞈ kʼmˬ-aˇ.

¹⁰Aˬ jeˬ noeˬ-awˇ heu loꞈ-ehˇ jahˇ nehˬ laꞈ te.”

¹¹Aˬbyaˬhaˬ ehˇ-eu, “Heu gaˇ jawˇ-eu tsawˇ haˬ tiˬ gʼaˬ-iˬ Miˬyehˇ-ahˇ maˬ guˆ-eu miˇ neh, aˬ cawˬ ngaˬ-ahˇ sehꞈ-awˇ ngaˬ-euˬ miˬ zaˬ-ahˇ sheuˬ geuꞈ-eu baw le lehˇ ngaˇ noeˬ-euˬ ma.

¹²Aˬ yawꞈ ngaˬ-euˬ dmˇ ma aˬ diˇ aˬ maˇ pyeuꞈ-eu ma. Ngaˬ da-euˬ zaˬ maˇ maˇ ni meh. Ehˇ kʼawꞈ, ngaˬ nehˬ-ehˇ tiˬ ma baw zaˬ maˬ ngeuˇ. Aˬ yawꞈ-ahˇ ngaˇ oeˇ mˇ baˇ-awˇ yaw muiˬ paˬ-ehˇ sheuˬ dahˬ dzaˬ taˬ-euˬ ma.

¹³Kʼoeˇ miˇ neh, ngaˬ da-euˬ nymˇ-ahˇ byehˇ dzeh yaꞈ-awˇ, maˬ siˬ maˬ suˇ-eu miˇ kʼahˬ-ahˇ Miˬyehˇ ngaˬ-ahˇ bi iˇ laꞈ ngeh, Nawˇ ngaˬ-euˬ dmˇ ma pyeuꞈ-eu ma lehˇ aˬ cawˬ-ahˇ ehˇ nehˬ-eu laꞈ kʼoeˇ, nawˇ ngaˬ-ahˇ aˇ naˆ ni saˇ jaˇ ziꞈ-eu gaˇ kawˆ bi siˬ bi mawˇ laꞈ-awˬ lehˇ, aˬ yawꞈ-ahˇ ngaˇ ehˇ nehˬ-euˬ ma.”

¹⁴Kʼoeˇ naˇ, Aˬbiˇmaˬlehˆ-aˬ, Saˬlaˇ-ahˇ Aˬbyaˬhaˬ-euˬ aˬ laꞈ laꞈ kʼoeˇ a kʼoꞈ nehˬ-euˬ meh. Kʼoeˇ uˬ taꞈ, yawˇ, mawˇ neˇ hawˇ-eu, zaˬ kʼaˆ deuˬ kʼawꞈ, Aˬbyaˬhaˬ-ahˇ paˇ biꞈ nehˬ-euˬ meh.

¹⁵“Ngaˬ-euˬ miˇ kʼahˬ heu kʼahˬ kʼahˬ lah ni laꞈ kʼoeˇ, nawˇ kʼaˇ jawˇ mawꞈ-eu tsahˇ-ahˇ jawˇ nya tehꞈ-a” lehˇ, Aˬbyaˬhaˬ-ahˇ Aˬbiˇmaˬlehˆ ehˇ nehˬ-euˬ meh.

¹⁶Saˬlaˇ-ahˇ kʼawꞈ, “Nawˇ tiˬ jeˬ-iˬ maˬ dehꞈ bahˬ-euˬ gaˇ kawˆ, nawˬ nehˬ-ehˇ jawˇ-eu tsawˇ haˬ dawˬ tawˆ luꞈ ya siˬ ya mawˇ-eu gʼaˇ duˬ saˇ kiˇ pyeuꞈ ni, nawˬ-euˬ aˬ mahˇ aˬ da-ahˇ pyuˇ maˇ byaˆ tiˬ heˇ byaˆ ngaˇ biꞈ-eu ma. Nawˇ tiˬ jeˬ-iˬ maˬ bahˬ maˬ muˆ-eu gaˇ kawˆ tsawˇ haˬ dawˬ tawˆ luꞈ ya siˬ duˬ tehꞈ-a” lehˇ aˬ yawꞈ ehˇ nehˬ-euˬ meh.

¹⁷Aˬbyaˬhaˬ-euˬ miˬ zaˬ Saˬlaˇ kʼoeˇ taˆ kʼoeˇ loꞈ-ehˇ keuˆ le-euˬ baˬ da neh, Aˬbiˇmaˬlehˆ-euˬ nymˇ laꞈ kʼoeˇ kʼaˇ jawˇ-eu zaˬ mi zaˬ dawˬ tawˆ luꞈ, maˬ baw aˬ ma pyeuꞈ jiˇ ni Sahˬpaˬ Miˬyehˇ jahˇ nehˬ-euˬ meh. Kʼoeˇ ngeh, Aˬbiˇmaˬlehˆ-euˬ gʼaˇ duˬ Aˬbyaˬhaˬ guiˬ lahˬ shaˇ nehˬ-awˇ, Aˬbiˇmaˬlehˆ-ahˇ Miˬyehˇ laˆ taˬ nehˬ-euˬ meh. Aˬbiˇmaˬlehˆ-euˬ miˬ zaˬ hawˇ-eu zaˬ miˬ zaˬ zaˬ kʼaˆ deuˬ kʼawꞈ zaˬ paˇ jawˇ le nya ni, Miˬyehˇ neh laˆ saˆ muiˬ kʼoꞈ nehˬ-euˬ meh.