Read Akha Aˇ dahˬ 22 Bible Online

Aˇ dahˬ 22 - Akha bible

Aˇ dahˬ 22

¹Aˇ yamˬ tiˬ kʼehˬ myahˇ laˇ ngeh, Aˬbyaˬhaˬ-ahˇ Miˬyehˇ lawˬ haw-euˬ meh. “Aˬbyaˬhaˬ-oˇ” lehˇ Miˬyehˇ kuˇ ngeh, “Ngaˇ heu gaˇ jawˇ ma” lehˇ, Aˬbyaˬhaˬ oˬ toˬ-euˬ meh.

²“Aˬ li tiˬ gʼaˬ tehꞈ-ehˇ jawˇ-eu miˇ neh nawˇ gaˬ dui dui-eu nawˬ li Iˇtsaˆ-ahˇ sheuˬ-awˇ, Mawˇliˇyaˆ miˇ kʼahˬ-ahˇ iˇ-awˬ. Kʼoeˇ gaˇ iˇ keuˆ naˇ, ngaˇ nawˬ-ahˇ gawˬ jawˬ tiˬ jawˬ mehˬ nehˬ ma. Gawˬ jawˬ kʼoeˇ jawˬ kʼoeˇ taˆ, Iˇtsaˆ-euˬ gʼawˇ mawˇ ngaˬ-ahˇ lawˇ nehˬ laꞈ-awˬ” lehˇ, Aˬbyaˬhaˬ-ahˇ Miˬyehˇ ehˇ nehˬ-euˬ meh.

³Yawˬ nah yawˬ uˬ shawˬ yaw naꞈ-ehˇ Aˬbyaˬhaˬ tuˇ-awˇ, lawˇ gaˇ shehˇ gaˇ geuꞈ-eu gʼaˇ duˬ miˬ dzaˬ kʼehꞈ-euˬ meh. Kʼoeˇ naˇ, miˬ dzaˬ kʼoeˇ deuˬ-ahˇ mahˬ tahˬ laˆ neh tawˬ-awˇ, Iˇtsaˆ hawˇ-eu aˬ yawꞈ-euˬ zaˬ kʼaˆ nyiˬ gʼaˬ sheuˬ-awˇ, Miˬyehˇ neh aˬ yawꞈ-ahˇ ehˇ nehˬ taˬ-euˬ jawˇ duˬ-ahˇ le-euˬ meh.

⁴Smˬ nah byah laˇ ngeh, Miˬyehˇ neh ehˇ taˬ-euˬ jawˇ duˬ-ahˇ haw mawˇ nya gaˇ aˬ yawꞈ maꞈ le keuˆ-euˬ meh.

⁵Kʼoeˇ ngeh, aˬ yawꞈ-euˬ zaˬ kʼaˆ kʼoeˇ nyiˬ gʼaˬ-ahˇ Aˬbyaˬhaˬ ehˇ nehˬ-eu, “Naw nyaꞈ mahˬ tahˬ laˆ nehˬ-ehˇ heu gaˇ jawˇ tawˬ yaꞈ-awˬ. Ngaˬ li nga nyaꞈ kʼoeˇ gaˇ le-awˇ, Miˬyehˇ-ahˇ uˬ duˬ tahˬ leˇ la. Uˬ duˬ tahˬ gʼaˬ naˇ, naw nyaꞈ jawˇ gaˇ paˇ gʼoꞈ ka le ma.”

⁶Aˬbyaˬhaˬ-aˬ, Iˇtsaˆ-ahˇ miˬ dzaˬ bi baꞈ-awˇ, aˬ yawꞈ gʼaˬ miˬ diˬ hawˇ-eu mi cehˇ jiˇ baˆ yuˇ-awˇ, tiˬ kawˆ loꞈ-ehˇ le-euˬ meh. Aˬ yawꞈ nyaꞈ le luꞈ ngeh,

⁷“Aˬ da-oˇ” lehˇ Iˇtsaˆ kuˇ-awˇ, “Aˬ jeˬ ehˇ te li-oˬ” lehˇ Aˬbyaˬhaˬ ehˇ kʼoꞈ nehˬ-euˬ meh. “Miˬ dzaˬ hawˇ-eu miˬ diˬ law nmˇ-aˬ yuˇ laꞈ-euˬ nga. Ehˇ kʼawꞈ, lawˇ nehˬ-eu gʼaˇ duˬ yawˇ zaˬ maˬ lehˬ hmˬ laꞈ ngaˬ tawˇ” lehˇ, Aˬbyaˬhaˬ-ahˇ Iˇtsaˆ naˇ haˬ-euˬ meh.

⁸Aˬbyaˬhaˬ gʼeh, “Miˬyehˇ laˆ saˆ taˬ tehꞈ-a” lehˇ ehˇ kʼoꞈ nehˬ-euˬ meh. Kʼoeˇ naˇ, aˬ yawꞈ nyaꞈ mehˬ hu paw paˇ le leꞈ-euˬ meh.

⁹Miˬyehˇ neh ehˇ taˬ-euˬ jawˇ duˬ kʼoeˇ tsahˇ-ahˇ aˬ nyaꞈ da zaˬ le keuˆ ngeh, Aˬbyaˬhaˬ lawˇ guiˇ tsoˆ-awˇ, miˬ dzaˬ gahˬ daˆ-euˬ meh. Aˬ yawꞈ-euˬ aˬ li-ahˇ aˬ yawꞈ paꞈ cuꞈ-awˇ, lawˇ duˬ kʼoeˇ taˆ gahˬ daˆ taˬ-euˬ miˬ dzaˬ kʼoeˇ taˆ baꞈ daˆ-euˬ meh.

¹⁰Kʼoeˇ naˇ, aˬ yawꞈ-euˬ aˬ li-ahˇ sehꞈ-eu lehˇ mi cehˇ jiˇ baˆ gʼawˇ doˆ-euˬ meh.

¹¹Ehˇ kʼawꞈ, Sahˬpaˬ Miˬyehˇ-euˬ gʼaˬ kʼehˇ mˬ kʼoeˇ taˆ jawˇ-awˇ, “Aˬbyaˬhaˬ-oˇ, Aˬbyaˬhaˬ-oˇ” lehˇ kuˇ-eu miˇ neh, “Ngaˇ heu gaˇ jawˇ ma” lehˇ Aˬbyaˬhaˬ guˇ kʼoꞈ nehˬ-euˬ meh.

¹²“Aˬ li-ahˇ tiˬ jeˬ-iˬ taˬ paˇ jahˇ. Nawˇ Miˬyehˇ-ahˇ guˆ-eu gaˇ kawˆ nymˬ-mˇ ngaˇ ya siˬ duˬ-euˬ ma. Aˬ jeˬ miˇ neh ehˇ naˇ, aˬ li tiˬ gʼaˬ tehꞈ miˇ neh Miˬyehˇ-ahˇ maˬ lawˇ nehˬ peuˬ nya lehˇ nawˇ maˬ ehˇ-a” lehˇ, mˬ taˆ gʼaˬ kʼehˇ kʼoeˇ gʼaˬ Aˬbyaˬhaˬ-ahˇ ehˇ nehˬ-euˬ meh.

¹³Aˬbyaˬhaˬ jawˬ jawˬ-ehˇ haw gʼeh ngeh, baw duˆ-ahˇ uˬ coeˇ lahˇ leˇ taˬ-awˇ jawˇ-eu yawˇ aˬ buˬ tiˬ mawˇ-ahˇ ya mawˇ-euˬ meh. Yawˇ kʼoeˇ mawˇ-ahˇ aˬ yawꞈ paꞈ laˬ-iˇ-awˇ, aˬ yawꞈ aˬ li-euˬ dah zaˇ, miˬ dzaˬ-ahˇ dzah puiˆ-awˇ lawˇ-eu jeˬ Sahˬpaˬ Miˬyehˇ-ahˇ lawˇ nehˬ-euˬ meh.

¹⁴Jawˇ duˬ kʼoeˇ tsahˇ-ahˇ, “Sahˬpaˬ Miˬyehˇ laˆ saˆ taˬ-euˬ” lehˇ Aˬbyaˬhaˬ myahˇ nehˬ-euˬ meh. “Sahˬpaˬ Miˬyehˇ-euˬ gawˬ jawˬ-ahˇ Sahˬpaˬ Miˬyehˇ laˆ saˆ taˬ-euˬ meh” lehˇ, iˬ nah keuˆ ni aˬ cawˬ dawˬ daˬ daˬ luꞈ-eu meh.

¹⁵Sahˬpaˬ Miˬyehˇ-euˬ gʼaˬ kʼehˇ mˬ kʼoeˇ taˆ jawˇ-awˇ, Aˬbyaˬhaˬ-ahˇ nyiˬ poˆ tiˬ poˆ paˇ kuˇ-eu laꞈ kʼoeˇ, heu loꞈ-ehˇ ehˇ nehˬ-euˬ meh.

¹⁶“Nawˇ smˇ muiˬ muiˬ dui dui laˇ ni guiˬ lahˬ biꞈ-eu gʼaˇ duˬ, ngaˬ-euˬ tsawˇ myahˇ uˬ moˆ ngaˇ nawˬ-ahˇ saˇ jaˇ dzaˬ-eu ma lehˇ, Sahˬpaˬ Miˬyehˇ ehˇ-eu meh. Aˬ jeˬ miˇ neh ehˇ naˇ, nawˬ li tiˬ gʼaˬ tehꞈ-ehˇ jawˇ-eu kʼawꞈ, ngaˬ-euˬ gʼaˇ duˬ nawˇ lawˇ nehˬ peuˬ-eu meh.

¹⁷Nawˬ-euˬ zaˬ nawˬ-euˬ uˆ deuˬ-ahˇ, mˬ kʼoeˇ taˆ jaˆ-eu aˬ guiˇ deuˬ loꞈ-ehˇ maˬ ehˇ, iˬ ma laˆ shaˆ lawˇ deh-ahˇ jaˆ-eu kʼaˇ shuiꞈ deh loꞈ-ehˇ maˬ ehˇ, ngaˇ bi jeuˬ bi o le ma. Aˬ yawꞈ maꞈ-aˬ, aˬ yawꞈ maꞈ-ahˇ muiˇ-eu deuˬ-ahˇ gʼaˬ leˇ tehꞈ-a.

¹⁸Nawˇ ngaˬ-euˬ ehˇ dawˬ naˇ haˬ-eu miˇ neh, nawˬ-euˬ zaˬ nawˬ-euˬ uˆ deuˬ guiˬ lahˬ za-eu loꞈ-ehˇ, aˬ yawꞈ maꞈ-ahˇ kʼawꞈ guiˬ lahˬ biꞈ laꞈ lehˇ, tsawˇ jeuˬ dawˬ tawˆ luꞈ ngaˬ-ahˇ shaˇ tehꞈ-a.”

¹⁹Aˬ yawꞈ-euˬ zaˬ kʼaˆ deuˬ jawˇ gaˇ Aˬbyaˬhaˬ paˇ gʼoꞈ ka-iˇ-awˇ, Aˬbyaˬhaˬ-euˬ jawˇ duˬ pyeuꞈ-eu Beˬlaˇsheˬba-ahˇ tiˬ kawˆ loꞈ-ehˇ gʼoꞈ-iˇ-euˬ meh.

²⁰Aˇ kʼoꞈ aˇ la myahˇ laˇ ngeh jawˇ, Aˬbyaˬhaˬ-euˬ aˬ nyiˇ Naˬkawˬ-euˬ miˬ zaˬ Miˇlaˬkah zaˬ yehꞈ gʼaˬ jawˇ le-euˬ gaˇ kawˆ, Aˬbyaˬhaˬ ya siˬ-euˬ meh.

²¹Zaˬ kʼoeˇ deuˬ laꞈ kʼoeˇ, aˬ yuiꞈ yuiꞈ saˬ gʼaˬ Uˇzaˆ meh. Aˬ nyiˇ deuˬ-aˬ, Buˇzaˆ, Aˬlamˬ-euˬ aˬ da Gaˬmoeˬlaˇ,

²²Ciˇsehˆ, Haˬzawˇ, Piˇlaˬdaˬshaˆ, Yiˇdaˬlaˇ, Beˬtuˬlaˇ aˬ ha mehˇ nmˇ meh.

²³Beˬtuˬlaˇ-aˬ, Leˬbehˇkaꞈ-euˬ aˬ da meh. Miˇlaˬkah-aˬ, Aˬbyaˬhaˬ-euˬ aˬ nyiˇ Naˬkawˬ gʼaˇ duˬ, aˬ li kʼoeˇ yehꞈ li ciˬ-euˬ meh.

²⁴Naˬkawˬ-euˬ ma nyiˇ Luˇma-aˬ, Teˬbah, Gaˬhaˬ, Taˬhaˆ, Mawˇkah, heu deuˬ-ahˇ ciˬ-euˬ meh.