Read Akha Aˇ dahˬ 23 Bible Online

Aˇ dahˬ 23 - Akha bible

Aˇ dahˬ 23

¹Saˬlaˇ-aˬ, tiˬ yaˇ nyiˬ tseˇ shiꞈ kʼoꞈ byah ni dehꞈ-euˬ meh.

²Kaˬnaˬ miˇ kʼahˬ Heˬbyoˬ meuˬ laꞈ kʼoeˇ aˬ yawꞈ ziˇ dehꞈ jiˇ-euˬ meh. Aˬ yawꞈ shiˇ ngeh, Aˬbyaˬhaˬ tsawˇ ngoeˇ ngoeˇ-euˬ meh.

³Aˬbyaˬhaˬ-aˬ, shiˇ taˬ-euˬ aˬ yawꞈ miˬ zaˬ-euˬ gʼawˇ mawˇ jaˆ gaˇ neh tsawˬ tuˇ-awˇ, Heˬtaˆ tsawˇ haˬ deuˬ jawˇ gaˇ iˇ-awˇ, heu loꞈ-ehˇ ehˇ nehˬ-iˇ-euˬ meh.

⁴“Ngaˇ-aˬ, naw maꞈ-euˬ miˇ kʼahˬ-ahˇ pawˇ ahˇ le-euˬ tsawˇ haˬ tiˬ gʼaˬ pyeuꞈ-eu ma. Teu miˇ neh, ngaˬ-euˬ nymˇ dahˬ-ahˇ baꞈ pahˬ-eu gʼaˇ duˬ, miˇ tsaˬ tiˬ tsahˇ ahˬ nehˬ laꞈ-awˬ.”

⁵Kʼoeˇ ngeh, Heˬtaˆ tsawˇ haˬ deuˬ aˬ yawꞈ-ahˇ heu loꞈ-ehˇ ehˇ nehˬ-euˬ meh.

⁶“Aˬ yuiꞈ-oˇ, nga maꞈ ehˇ gaˇ tiˬ poˆ naˇ haˬ nehˬ laꞈ sheˇ. Nga maꞈ nawˬ-ahˇ, baoˬ ahˇ-eu aˬ yuiꞈ aˬ tsu tiˬ gʼaˬ loꞈ-ehˇ sawˇ taˬ-euˬ ma. Nga maꞈ-euˬ lmˬ bymˇ laꞈ kʼoeˇ jawˇ duˬ kʼaˇ tsaˬ dzehˬ-eu tsahˇ-ahˇ, nawˬ-euˬ nymˇ dahˬ-ahˇ baꞈ pahˬ nehˬ nya tehꞈ-a. Nawˬ-euˬ nymˇ dahˬ-ahˇ nga maꞈ-euˬ lmˬ bymˇ laꞈ kʼoeˇ bi baꞈ pahˬ-eu gʼaˇ duˬ, nga maꞈ yawˬ gʼaˬ na luꞈ nui ma tsaˬ-eu ma.”

⁷Kʼoeˇ ngeh, aˬ yawꞈ maꞈ-ahˇ Aˬbyaˬhaˬ yaw zeu baw nehˬ-awˇ uˬ duˬ awˆ moꞈ-eu laꞈ kʼoeˇ, heu loꞈ-ehˇ ehˇ nehˬ-euˬ meh.

⁸“Ngaˬ-euˬ nymˇ dahˬ-ahˇ heu gaˇ bi baꞈ pahˬ-eu gʼaˇ duˬ, naw maꞈ nui ma tsaˬ-eu ma lehˇ ngeuˇ naˇ, Zoˇhaˬlaˆ-euˬ aˬ li Eˇpaˬloˬ-ahˇ,

⁹aˬ yawꞈ-euˬ deh yaˇ deh dzeˇ jaˆ-eu Maˬpeˬlaˇ lo kʼahˬ kʼoeˇ kʼahˬ, kʼaˇ geuˇ-eu loꞈ-ehˇ ngaˬ-ahˇ ahˬ nehˬ laꞈ-eu gʼaˇ duˬ tiˬ poˆ ehˇ nehˬ-iˬ-awˬ. Lmˬ bymˇ kʼoeˇ hmˬ ngaˬ-euˬ lmˬ bymˇ pyeuꞈ tsehˆ ni, naw maꞈ heu myaˆ ni gʼeh-eu mehˬ shi, kʼaˇ geuˇ-eu loꞈ-ehˇ ngaˬ-ahˇ ahˬ nehˬlaꞈ-awˬ lehˇ, aˬ yawꞈ-ahˇ tiˬ poˆ ehˇ nehˬ-awˬ.”

¹⁰Kʼoeˇ ngeh, Eˇpaˬloˬ gʼaˬ kʼawꞈ, meuˬ lahˇ kʼehˬ dawˬ peh uiˬ laˇ taˬ-euˬ Heˬtaˆ tsawˇ haˬ kʼoeˇ deuˬ laꞈ kʼoeˇ nuiˇ luꞈ-eu meh. Kʼoeˇ gaˇ kʼaˇ uiˬ laˇ taˬ-euˬ tsawˇ haˬ dawˬ tawˆ luꞈ ya gaˬ ni, Aˬbyaˬhaˬ-ahˇ Eˇpaˬloˬ heu loꞈ-ehˇ ehˇ nehˬ-euˬ meh.

¹¹“Aˬ yuiꞈ-oˇ, ngaˇ ehˇ gaˇ tiˬ poˆ naˇ haˬ sheˇ. deh yaˇ hawˇ-eu lo kʼahˬ kʼoeˇ kʼahˬ ahˇ leˇ-ehˇ, miˇ tsaˬ pehˇ tsahˇ kʼoeˇ tsahˇ tsahˇ lah ni ngaˇ nawˬ-ahˇ biꞈ-eu ma. Nawˬ-euˬ nymˇ dahˬ bi baꞈ pahˬ-eu gʼaˇ duˬ, ngaˬ-euˬ tsawˇ haˬ heu myaˆ ni gʼeh-eu mehˬ shi, miˇ tsaˬ pehˇ tsahˇ kʼoeˇ tsahˇ ngaˇ nawˬ-ahˇ biꞈ tsehˆ tsehˆ-eu ma.”

¹²Ehˇ kʼawꞈ, aˬ yawꞈ maꞈ-ahˇ yaw zeu baw nehˬ-eu laꞈ kʼoeˇ, Aˬbyaˬhaˬ uˬ duˬ awˆ moꞈ-awˇ, kʼaˇ uiˬ laˇ taˬ-euˬ tsawˇ haˬ yawˬ gʼaˬ na luꞈ ya gaˬ ni, Eˇpaˬloˬ-ahˇ heu loꞈ-ehˇ ehˇ nehˬ-euˬ meh.

¹³“Ngaˇ ehˇ gaˇ nawˇ tiˬ poˆ naˇ haˬ nehˬ laꞈ sheˇ. deh yaˇ ahˇ leˇ-ehˇ, miˇ tsaˬ kʼoeˇ tsahˇ tsahˇ lah ni ngaˇ zeuˇ ma. Aˇ poeˬ yuˇ nehˬ laꞈ-awˬ. Aˇ poeˬ biꞈ-awˇ zeuˇ tsehˆ gʼaˬ miˇ tsa, ngaˬ-euˬ nymˇ dahˬ-ahˇ kʼoeˇ gaˇ ngaˇ baꞈ pahˬ ma.”

¹⁴Kʼoeˇ ngeh, Eˇpaˬloˬ heu loꞈ-ehˇ ehˇ-eu meh. “Aˬ yuiꞈ-oˇ, miˇ tsaˬ pehˇ tsahˇ kʼoeˇ tsahˇ-aˬ, pyuˇ maˇ byaˆ oeˬ yaˇ byaˆ poeˬ-eu tehꞈ meh.

¹⁵Pyuˇ heu myaˆ ni tehꞈ-aˬ, aˇ nyaꞈ yaw kaˬ tiˬ jeˬ-iˬ ehˇ nyaꞈ maˬ nyeuˆ-aˇ. Nawˬ-euˬ nymˇ dahˬ-ahˇ kʼoeˇ gaˇ baꞈ pahˬ-iˇ-awˬ.”

¹⁶Aˬbyaˬhaˬ-aˬ, tsawˇ haˬ kʼoeˇ myaˆ ni gʼeh-eu mehˬ shi Eˇpaˬloˬ neh ehˇ-euˬ aˇ poeˬ-ahˇ nui kʼahˇ shiˇ-awˇ, jeˬ gaꞈ jeˬ ka mˇ-eu kaˇ-ahˇ tsaˬ-eu pyuˇ maˇ byaˆ oeˬ yaˇ byaˆ gui nehˬ-euˬ meh.

¹⁷Kʼoeˇ miˇ neh, Mamˬliˬ meuˬ-euˬ nahˇ ma doˆ kʼehˬ paw jaˆ-eu, Eˇpaˬloˬ-euˬ miˇ tsaˬ pyeuꞈ-eu Maˬpeˬlaˇ lehˇ kuˇ-eu miˇ tsaˬ pehˇ tsahˇ kʼoeˇ tsahˇ-aˬ, Aˬbyaˬhaˬ-euˬ miˇ tsaˬ pyeuꞈ laˇ-euˬ meh. Miˇ tsaˬ pehˇ tsahˇ kʼoeˇ tsahˇ laꞈ kʼoeˇ, deh yaˇ tiˬ kawˬ, lmˬ bymˇ lo kʼahˬ tiˬ kʼahˬ hawˇ-eu, kʼoeˇ gaˇ kʼaˇ dehꞈ-eu aˇ bawˇ deuˬ ahˇ-eu meh.

¹⁸Bawˬ dzaˬ duˬ-ahˇ kʼaˇ uiˬ laˇ taˬ-euˬ Heˬtaˆ tsawˇ haˬ kʼoeˇ myaˆ ni gʼeh-eu mehˬ shi, miˇ tsaˬ kʼoeˇ tsahˇ Aˬbyaˬhaˬ-euˬ miˇ tsaˬ pyeuꞈ tsehˆ-euˬ meh.

¹⁹Kʼoeˇ naˇ, Aˬbyaˬhaˬ-aˬ, Kaˬnaˬ miˇ kʼahˬ laꞈ kʼoeˇ jaˆ-eu lo kʼahˬ kʼoeˇ kʼahˬ laꞈ kʼoeˇ, aˬ yawꞈ-euˬ nymˇ dahˬ-ahˇ baꞈ pahˬ-euˬ meh.

²⁰Kʼoeˇ miˇ neh, Heˬtaˆ tsawˇ haˬ-euˬ miˇ tsaˬ kʼoeˇ tsahˇ hawˇ-eu, kʼoeˇ gaˇ jaˆ-eu lo kʼahˬ kʼoeˇ kʼahˬ-aˬ, Aˬbyaˬhaˬ-euˬ lmˬ bymˇ miˇ tsaˬ pyeuꞈ laˇ-euˬ meh.