Read Akha Aˇ dahˬ 24 Bible Online

Aˇ dahˬ 24 - Akha bible

Aˇ dahˬ 24

¹Aˬbyaˬhaˬ mawˬ dui dui laˇ-awˇ, aˬ yawꞈ kʼaˇ mˇ-eu jeˬ laꞈ kʼoeˇ Sahˬpaˬ Miˬyehˇ aˬ yawꞈ-ahˇ guiˬ lahˬ biꞈ-euˬ meh.

²Aˬ yawꞈ-euˬ zaˬ kʼaˆ deuˬ laꞈ kʼoeˇ, aˬ cawˬ naˆ maˬ tseˇ aˇ kʼoꞈ kʼawˆ dzehˬ-awˇ, aˬ yawꞈ-euˬ myawˬ gahˬ dawˬ tawˆ luꞈ a nehˬ-awˇ bi haw bi pyaˆ-euˬ gʼaˬ-ahˇ, aˬ yawꞈ heu loꞈ-ehˇ ehˇ nehˬ-euˬ meh. “Ngaˬ-euˬ shaˬ pyaˬ yaw kaˬ-ahˇ nawˬ-euˬ aˬ laꞈ cawˬ ahˇ-awˇ saˇ jaˇ dzaˬ-awˬ.

³Kaˬnaˬ miˇ kʼahˬ laꞈ kʼoeˇ jawˇ-eu zaˬ miˬ aˬ buˇ deuˬ laꞈ kʼoeˇ, ngaˬ li gʼaˇ duˬ miˬ zaˬ maˬ poˆ nehˬ lehˇ, mˬ hawˇ-eu miˇ-ahˇ uˆ lahˇ-eu Miˬyehˇ pyeuꞈ-eu Sahˬpaˬ Miˬyehˇ-euˬ mehˬ shi, nawˬ-ahˇ ngaˇ saˇ jaˇ bi dzaˬ mawꞈ-eu ma.

⁴Ngaˇ dehꞈ le-euˬ miˇ kʼahˬ-ahˇ le-awˇ, ngaˬ-euˬ aˬ yuiꞈ aˬ nyiˇ deuˬ laꞈ kʼoeˇ, ngaˬ li gʼaˇ duˬ miˬ zaˬ tiˬ gʼaˬ nawˇ ya shaˇ poˆ nehˬ-iˇ meh.”

⁵Zaˬ kʼaˆ kʼoeˇ gʼaˬ ehˇ-eu, “Zaˬ miˬ aˬ buˇ kʼoeˇ yawˬ ha-euˬ miˇ kʼahˬ-ahˇ byehˇ dzeh-awˇ, miˇ kʼahˬ heu kʼahˬ-ahˇ maˬ caw teh le naˇ, ngaˇ aˬ joˆ-ehˇ jahˇ nmˇ. Nawˬ li-ahˇ nawˬ neh jawˇ yaꞈ-euˬ miˇ kʼahˬ kʼoeˇ kʼahˬ-ahˇ bi jawˇ leˇ-eu loˇ.”

⁶Aˬbyaˬhaˬ ehˇ-eu, “Ngaˬ li-ahˇ kʼoeˇ paw maˬ ya bi gʼoꞈ jawˇ leˇ-eu gʼaˇ duˬ yaw kʼaˆ kʼaˆ-ehˇ yahˇ-awˬ.

⁷Mˬ kʼoeˇ taˆ jawˇ-eu Miˬyehˇ pyeuꞈ-eu Sahˬpaˬ Miˬyehˇ-aˬ, ngaˬ da-euˬ nymˇ hawˇ-eu ngaˬ-euˬ aˬ yuiꞈ aˬ nyiˇ deuˬ jawˇ-eu miˇ kʼahˬ-ahˇ neh ngaˬ-ahˇ bi doˆ le-awˇ, miˇ kʼahˬ heu kʼahˬ ngaˬ-euˬ zaˬ ngaˬ-euˬ uˆ deuˬ-ahˇ biꞈ ma lehˇ, dawˬ ma saˇ jaˇ dzaˬ taˬ-euˬ jaˆ-eu meh. Ngaˬ li gʼaˇ duˬ miˬ zaˬ tiˬ gʼaˬ nawˇ poˆ mawˇ nya ni, Sahˬpaˬ Miˬyehˇ aˬ yawꞈ-euˬ gʼaˬ kʼehˇ-ahˇ, nawˬ-euˬ mehˬ hu pyehˬ gʼeh tehꞈ-a.

⁸Zaˬ miˬ aˬ buˇ kʼoeˇ gʼaˬ nawˬ-euˬ mehˬ nah maˬ caw teh le mawꞈ naˇ, nawˬ neh ngaˬ-ahˇ biꞈ taˬ-euˬ saˇ jaˇ heu hmˬ-ahˇ nawˇ ya buˬ-iˇ tehꞈ-a. Ehˇ kʼawꞈ, aˬ jeˬ pyeuꞈ laˇ-euˬ maˬ kaˬ, ngaˬ li-ahˇ kʼoeˇ paw maˬ bi jawˇ leˇ nya-a lehˇ nawˇ noeˬ tsehˆ taˬ-awˬ.”

⁹Kʼoeˇ ngeh, zaˬ kʼaˆ kʼoeˇ gʼaˬ Aˬbyaˬhaˬ-euˬ shaˬ pyaˬ yaw kaˬ-ahˇ aˬ laꞈ cawˬ ahˇ-awˇ, Aˬbyaˬhaˬ neh kʼaˇ ehˇ-euˬ loꞈ-ehˇ mˇ-eu gʼaˇ duˬ saˇ jaˇ dzaˬ-euˬ meh.

¹⁰Aˬbyaˬhaˬ-euˬ pyuˇ shuiˇ myawˬ gahˬ dawˬ tawˆ luꞈ-ahˇ haw-eu pyaˆ-eu zaˬ kʼaˆ kʼoeˇ gʼaˬ, Aˬbyaˬhaˬ-euˬ law taw tseˇ mawˇ teh-awˇ, Maˬsoˬpoˬtaˬmiˇ miˇ kʼahˬ laꞈ taˆ paw jaˆ-eu Naˬkawˬ jawˇ-eu meuˬ-ahˇ le-euˬ meh.

¹¹Aˬ yawꞈ kʼoeˇ gaˇ le keuˆ ngeh, meuˬ meuˬ dzeˇ jaˆ-eu lah duˬ dawˬ peh law taw kʼoeˇ deuˬ-ahˇ bi yuꞈ-euˬ meh. Kʼoeˇ ngeh, nahˇ ma biˇ yawꞈ yawꞈ-iˇ-euˬ miˇ neh, zaˬ miˬ zaˬ deuˬ iˇ cuꞈ kʼawꞈ le-eu aˇ yamˬ tsaˬ-eu meh.

¹²“Zaˬ kʼaˆ kʼoeˇ gʼaˬ heu loꞈ-ehˇ guiˬ lahˬ shaˇ-euˬ meh. Ngaˬ-euˬ baw leˬ Aˬbyaˬhaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ, ngaˬ-euˬ baw leˬ Aˬbyaˬhaˬ-ahˇ nawˬ neh biꞈ taˬ-euˬ saˇ jaˇ-ahˇ noeˬ keuˆ-awˇ, iˬ nah ngaˇ mˇ-eu lehˇ gʼeh-eu gaˇ heu hmˬ pyeuꞈ leˇ ni caw ba nehˬ laꞈ-awˬ.

¹³Meuˬ laꞈ kʼoeˇ jawˇ-eu zaˬ miˬ aˬ buˇ zaˬ guˬ deuˬ iˇ cuꞈ kʼawꞈ le-eu lehˇ gʼeh-eu lah duˬ dawˬ peh ngaˇ yawꞈ luꞈ-eu ma.

¹⁴Nawˬ-euˬ muiˇ deuˇ oeˬ lahˬ baꞈ ka-awˇ, ngaˬ-ahˇ iˇ cuꞈ ui cuiˆ bi dawˇ laꞈ sheˇ lehˇ, zaˬ miˬ aˬ buˇ tiˬ gʼaˬ-ahˇ ngaˇ ehˇ nehˬ haw ngeh, Dawˇ-awˬ. Nawˬ-euˬ law taw deuˬ-ahˇ kʼawꞈ, ngaˇ iˇ cuꞈ kʼawꞈ nehˬ ma lehˇ aˬ yawꞈ ehˇ naˇ, zaˬ miˬ aˬ buˇ zaˬ guˬ kʼoeˇ gʼaˬ-aˬ, nawˬ-euˬ zaˬ kʼaˆ Iˇtsaˆ gʼaˇ duˬ nawˬ neh tseˇ doˆ taˬ-euˬ gʼaˬ pyeuꞈ tehꞈ-a. Kʼoeˇ loꞈ-ehˇ pyeuꞈ laˇ naˇ, ngaˬ-euˬ baw leˬ-ahˇ nawˇ saˇ jaˇ ziꞈ-eu gaˇ kawˆ ngaˇ ya siˬ duˬ tehꞈ-a.”

¹⁵Aˬ yawꞈ guiˬ lahˬ shaˇ gʼaˬ-eu maˬ dah ni, Leˬbehˇkaꞈ muiˇ deuˇ oeˬ lahˬ tiˬ siˬ baꞈ-awˇ, lah duˬ-ahˇ oe keuˆ taˬ-euˬ meh. Leˬbehˇkaꞈ-aˬ, Beˬtuˬlaˇ-euˬ aˬ buˇ pyeuꞈ-eu meh. Beˬtuˬlaˇ-aˬ, Aˬbyaˬhaˬ-euˬ aˬ nyiˇ Naˬkawˬ hawˇ-eu Miˇlaˬkah aˬ nyaꞈ dzeˇ zaˬ-euˬ aˬ li pyeuꞈ-eu meh.

¹⁶Leˬbehˇkaꞈ-aˬ, aˇ gʼehˇ muiˬ dui dui-eu shawˇ jehˆ ni gʼeh-eu miˬ daꞈ daꞈ shuiꞈ tiˬ gʼaˬ pyeuꞈ-eu meh. Lah duˬ-ahˇ aˬ yawꞈ iˇ-awˇ, iˇ cuꞈ kʼawꞈ-awˇ gʼoꞈ daˆ leˇ-euˬ meh.

¹⁷Kʼoeˇ ngeh, Aˬbyaˬhaˬ-euˬ zaˬ kʼaˆ kʼoeˇ gʼaˬ aˬ yawꞈ jawˇ gaˇ cehˆ gʼeh-awˇ, “Nawˬ-euˬ muiˇ deuˇ oeˬ lahˬ-ahˇ dahˬ-eu iˇ cuꞈ ngaˬ-ahˇ ui cuiˆ bi dawˇ laꞈ sheˇ” lehˇ ehˇ nehˬ-euˬ meh.

¹⁸“Dawˇ nya tehꞈ-a” lehˇ Leˬbehˇkaꞈ ehˇ-awˇ, muiˇ deuˇ oeˬ lahˬ baꞈ ka nehˬ-awˇ iˇ cuꞈ bi dawˇ-euˬ meh.

¹⁹Zaˬ kʼaˆ kʼoeˇ gʼaˬ iˇ cuꞈ dawˇ gʼaˬ ngeh, “Nawˬ-euˬ law taw deuˬ gʼaˇ duˬ kʼawꞈ ngaˇ iˇ cuꞈ kʼawꞈ nehˬ ma. Tiˬ dehˆ bi dawˇ-awˬ” lehˇ Leˬbehˇkaꞈ ehˇ-eu meh.

²⁰Muiˇ deuˇ oeˬ lahˬ-ahˇ dahˬ-eu iˇ cuꞈ kʼoeˇ, jeˬ zaˬ-euˬ iˇ cuꞈ kʼawˇ lawˬ-ahˇ aˬ yawꞈ shehˆ ahˇ nehˬ jiˇ-awˇ, lah duˬ-ahˇ yaw kawˇ-ehˇ iˇ-awˇ, iˇ cuꞈ paˇ kʼawꞈ-awˇ shehˆ ahˇ lahˬ nehˬ-euˬ meh. Law taw kʼoeˇ deuˬ iˇ cuꞈ dawˇ dehˆ gʼaˬ jiˇ ngeh keuˆ ni, tiˬ doˆ saˇ-iˬ tiˬ doˆ aˬ yawꞈ iˇ cuꞈ kʼawꞈ ahˇ nehˬ-euˬ meh.

²¹Zaˬ kʼaˆ kʼoeˇ gʼaˬ ciˬ cuˇ ni jawˇ-awˇ, aˬ yawꞈ mˇ luꞈ-eu gaˇ-ahˇ Sahˬpaˬ Miˬyehˇ caw ba nehˬ laꞈ nga loˇ, maˬ caw ba nehˬ laꞈ nga loˇ lehˇ shaˇ sawˇ shaˇ sawˇ-ehˇ haw luꞈ-eu meh.

²²Leˬbehˇkaꞈ law taw-ahˇ iˇ cuꞈ bi dawˇ gʼaˬ ngeh, zaˬ kʼaˆ kʼoeˇ gʼaˬ zaˬ miˬ zaˬ-euˬ naˇ mehˇ-ahˇ geuꞈ-eu aˇ poeˬ kʼaˆ-eu shuiˇ laꞈ behˬ yuˇ doˆ-awˇ, Leˬbehˇkaꞈ-euˬ naˇ mehˇ-ahˇ bi geuꞈ-euˬ meh. Shuiˇ laꞈ duꞈ nyiˬ duꞈ paˇ yuˇ doˆ-awˇ, Leˬbehˇkaꞈ-euˬ laꞈ du-ahˇ nyehꞈ duꞈ nehˬ-euˬ meh.

²³“Nawˬ da aˬ suˇ gʼaˬ-a lehˇ ngaˬ-ahˇ tiˬ poˆ ehˇ nehˬ laꞈ sheˇ. Nawˬ da-euˬ nymˇ laꞈ kʼoeˇ ngaˇ hawˇ-eu ngaˬ-euˬ tsawˇ haˬ deuˬ yaꞈ kʼaˇ za meh loˇ” lehˇ, Leˬbehˇkaꞈ-ahˇ aˬ yawꞈ naˇ haˬ-euˬ meh.

²⁴“Ngaˬ da-aˬ, Naˬkawˬ hawˇ-eu Miˇlaˬkah-euˬ aˬ li Beˬtuˬlaˇ meh.

²⁵Ngaˬ pehˬ zaˬ-euˬ nymˇ-ahˇ, jeˬ zaˬ gʼaˇ duˬ gʼo yoeˬ hawˇ-eu dzaˇ tiˬ byah ni jaˆ-awˇ, naw maꞈ gʼaˇ duˬ kʼawꞈ yaꞈ kʼaˇ za meh” lehˇ, Leˬbehˇkaꞈ ehˇ kʼoꞈ nehˬ-euˬ meh.

²⁶Kʼoeˇ naˇ, zaˬ kʼaˆ kʼoeˇ gʼaˬ pawˬ tsuiꞈ pawˬ dmˬ dmˬ-awˇ, Sahˬpaˬ Miˬyehˇ-ahˇ uˬ duˬ tahˬ-euˬ meh.

²⁷“Ngaˬ-euˬ baw leˬ Aˬbyaˬhaˬ-ahˇ saˇ jaˇ ziꞈ-eu aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ guiˬ lahˬ huiˬ luꞈ-uˇ. Sahˬpaˬ Miˬyehˇ-aˬ, ngaˬ-euˬ baw leˬ Aˬbyaˬhaˬ-euˬ aˬ yuiꞈ aˬ nyiˇ deuˬ jawˇ gaˇ, ngaˬ-ahˇ dawˇ coe ni sheuˬ ahˇ nehˬ laꞈ-euˬ nga” lehˇ ehˇ-eu meh.

²⁸Leˬbehˇkaꞈ-aˬ, aˬ yawꞈ aˬ ma jawˇ gaˇ cehˆ gʼoꞈ gʼeh-awˇ, gaˇ kawˆ kʼoeˇ dawˬ tawˆ luꞈ dzawˇ mehˬ nehˬ-euˬ meh.

²⁹Laˬbaˬ lehˇ myahˇ-euˬ Leˬbehˇkaꞈ-euˬ aˬ mahˇ aˬ da tiˬ gʼaˬ jawˇ-eu meh. Lah duˬ-ahˇ Aˬbyaˬhaˬ-euˬ zaˬ kʼaˆ jawˇ gaˇ iˇ-eu lehˇ, Laˬbaˬ coeˬ doˆ gʼeh-euˬ meh.

³⁰Aˬ yawꞈ dmˇ ma-euˬ naˇ mehˇ-ahˇ geuꞈ luꞈ-eu shuiˇ laꞈ behˬ-ahˇ maˬ ehˇ, laꞈ du-ahˇ duꞈ taˬ-euˬ shuiˇ laꞈ duꞈ-ahˇ maˬ ehˇ, aˬ yawꞈ ya mawˇ gʼaˬ-euˬ uˬ taꞈ, tsawˇ haˬ kʼoeˇ gʼaˬ aˬ yawꞈ-euˬ dmˇ ma-ahˇ aˬ joˆ-ehˇ ehˇ nehˬ-euˬ gaˇ kawˆ aˬ yawꞈ-euˬ dmˇ ma paˇ dzawˇ poˆ gaˇ aˬ yawꞈ ya gaˬ-euˬ meh. Kʼoeˇ ngeh, lah duˬ dawˬ peh law taw deuˬ nehˬ-ehˇ yawꞈ luꞈ-eu Aˬbyaˬhaˬ-euˬ zaˬ kʼaˆ jawˇ gaˇ aˬ yawꞈ iˇ-euˬ meh.

³¹Zaˬ kʼaˆ kʼoeˇ gʼaˬ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Ngaˬ nehˬ-ehˇ ngaˬ-euˬ nymˇ-ahˇ laˇ-awˬ. Nawˇ-aˬ, Sahˬpaˬ Miˬyehˇ neh biꞈ-euˬ guiˬ lahˬ za-euˬ tsawˇ haˬ tiˬ gʼaˬ nga. Aˬ jeˬ miˇ neh heu gaˇ yawꞈ yawꞈ-ehˇ jawˇ te. Ngaˬ-euˬ nymˇ-ahˇ nawˬ-euˬ gʼaˇ duˬ yuꞈ duˬ jawˇ duˬ laˆ saˆ taˬ gʼaˬ-euˬ ma. Nawˬ-euˬ law taw deuˬ gʼaˇ duˬ kʼawꞈ, jawˇ duˬ jaˆ ma.”

³²Kʼoeˇ naˇ, zaˬ kʼaˆ kʼoeˇ gʼaˬ Laˬbaˬ-euˬ nymˇ-ahˇ caw teh gʼeh leꞈ-euˬ meh. Law taw kʼaˆ daˬ deuˬ-ahˇ Laˬbaˬ baꞈ ka-awˇ, gʼoˆ yoeˬ hawˇ-eu dzaˇ bi dzaˬ-euˬ meh. Aˬbyaˬhaˬ-euˬ zaˬ kʼaˆ kʼoeˇ gʼaˬ hawˇ-eu aˬ yawꞈ-euˬ tsawˇ haˬ deuˬ aˬ kuiˇ bi dzuiꞈ-eu gʼaˇ duˬ, aˬ yawꞈ iˇ cuꞈ kʼawꞈ nehˬ-euˬ meh.

³³Dzaˬ dzaˬ dawˇ dawˇ lehˬ hmˬ laˆ saˆ gʼaˬ-awˇ, ciˬ doˆ leꞈ ngeh jawˇ, “Ngehˬ paˬ tmˇ paˬ-ehˇ gʼeh-eu gaˇ kawˆ deuˬ maˬ ngehˬ maˬ tmˇ jiˇ kʼoeˇ keuˆ ni, ngaˇ tiˬ jeˬ-iˬ maˬ dzaˬ te siˬ” lehˇ, zaˬ kʼaˆ kʼoeˇ gʼaˬ ehˇ-eu meh. Kʼoeˇ ngeh, “Kʼaˇ ngehˬ kʼaˇ tmˇ paˬ-ehˇ gʼeh-eu jeˬ ngehˬ-awˬ tmˇ-awˬ” lehˇ, zaˬ kʼaˆ kʼoeˇ gʼaˬ-ahˇ Laˬbaˬ ehˇ nehˬ-euˬ meh.

³⁴Zaˬ kʼaˆ kʼoeˇ gʼaˬ ehˇ-eu, “Ngaˇ-aˬ, Aˬbyaˬhaˬ-euˬ zaˬ kʼaˆ ma.

³⁵Sahˬpaˬ Miˬyehˇ-aˬ, ngaˬ-euˬ baw leˬ-ahˇ guiˬ lahˬ yaw kʼaˆ-ehˇ biꞈ-awˇ, smˇ muiˬ muiˬ dui dui-eu tsawˇ haˬ bi pyeuꞈ laˇ-euˬ meh. Myaˬ dui dui-eu yawˇ yawˇ maꞈ, ciˬ myehꞈ ciꞈ maꞈ hawˇ-eu, mawˇ neˇ mawˇ maꞈ deuˬ maˬ ehˇ, pyuˇ deuˬ shuiˇ deuˬ maˬ ehˇ, kʼaˬ dzeˇ zaˬ zaˬ kʼaˆ deuˬ hawˇ-eu zaˬ miˬ zaˬ zaˬ kʼaˆ deuˬ maˬ ehˇ, law taw hawˇ-eu mahˬ tahˬ laˆ deuˬ maˬ ehˇ, ngaˬ-euˬ baw leˬ-ahˇ aˬ yawꞈ biꞈ-euˬ meh.

³⁶Aˬ yawꞈ mawˬ laˇ ngeh hawˇ-eu, aˬ yawꞈ gʼaˇ duˬ aˬ yawꞈ-euˬ nymˇ dahˬ Saˬlaˇ aˬ li tiˬ li ciˬ-awˇ, aˬ li kʼoeˇ li-ahˇ aˬ yawꞈ-euˬ jeˬ biˇ dawˬ tawˆ luꞈ biꞈ nehˬ-euˬ meh.

³⁷Ngaˬ-euˬ baw leˬ ngaˬ-ahˇ heu loꞈ-ehˇ ehˇ-eu meh. ‘Ngaˇ kʼaˇ ehˇ-eu loꞈ-ehˇ mˇ ma lehˇ saˇ jaˇ dzaˬ-awˬ. Ngaˬ li gʼaˇ duˬ miˬ zaˬ poˆ nehˬ ngeh, Kaˬnaˬ miˇ kʼahˬ laꞈ kʼoeˇ jawˇ-eu zaˬ miˬ aˬ buˇ deuˬ-ahˇ taˬ poˆ.

³⁸Ngaˬ da-euˬ tsawˇ jeuˬ tsawˇ ca pyeuꞈ-eu ngaˬ-euˬ aˬ yuiꞈ aˬ nyiˇ deuˬ jawˇ gaˇ le-awˇ, ngaˬ li gʼaˇ duˬ miˬ zaˬ poˆ nehˬ leˇ-awˬ’ lehˇ ehˇ-eu meh.

³⁹Zaˬ miˬ aˬ buˇ zaˬ guˬ kʼoeˇ gʼaˬ maˬ caw teh laˇ naˇ, aˬ joˆ-ehˇ jahˇ nmˇ lehˇ, aˬ yawꞈ-ahˇ ngaˇ naˇ haˬ-euˬ ma.

⁴⁰Kʼoeˇ ngeh, aˬ yawꞈ ngaˬ-ahˇ heu loꞈ-ehˇ ehˇ-eu meh. ‘Aˬ myah luꞈ ngaˇ yaw zeu baw luꞈ-eu ngaˬ-euˬ Sahˬpaˬ Miˬyehˇ-aˬ, aˬ yawꞈ-euˬ gʼaˬ kʼehˇ-ahˇ nawˬ nehˬ-ehˇ bi oe-awˇ, nawˇ mˇ-eu jeˬ pyeuꞈ leˇ nya ni bi caw ba le tehꞈ-a. Ngaˬ da o neh dehꞈ ka leꞈ-euˬ ngaˬ-euˬ tsawˇ jeuˬ tsawˇ ca deuˬ laꞈ kʼoeˇ, ngaˬ li gʼaˇ duˬ miˬ zaˬ tiˬ gʼaˬ nawˇ ya shaˇ poˆ nehˬ meh.

⁴¹Nawˬ-euˬ gʼaˇ duˬ, nawˇ maˬ mˇ-ehˇ maˬ gʼeh nya-eu saˇ jaˇ heu hmˬ-ahˇ buˬ-iˇ nya-eu gaˇ ma tiˬ kahˇ dahˇ-eu tehꞈ meh. Ngaˬ-euˬ aˬ yuiꞈ aˬ nyiˇ deuˬ jawˇ gaˇ nawˇ le ngeh, nawˇ ehˇ gaˇ aˬ yawꞈ maꞈ maˬ ha geuꞈ nehˬ laꞈ naˇ, saˇ jaˇ heu hmˬ-ahˇ nawˇ ya buˬ-iˇ tehꞈ-a’ lehˇ ehˇ nehˬ laꞈ-euˬ meh.”

⁴²Aˬbyaˬhaˬ-euˬ zaˬ kʼaˆ kʼoeˇ gʼaˬ paˇ ehˇ-eu, “Iˬ nah ngaˇ lah duˬ kʼoeˇ duˬ-ahˇ laˇ keuˆ ngeh, heu loꞈ-ehˇ guiˬ lahˬ shaˇ-euˬ ma. ‘Ngaˬ-euˬ baw leˬ Aˬbyaˬhaˬ-euˬ Miˬyehˇ pyeuꞈ-eu Sahˬpaˬ Miˬyehˇ-oˇ. Iˬ nah ngaˇ mˇ luꞈ-eu gaˇ heu hmˬ pyeuꞈ leˇ ni caw ba nehˬ laꞈ-awˬ.

⁴³Heu gaˇ, lah duˬ heu duˬ-euˬ dawˬ peh ngaˇ jawˇ luꞈ-eu ma. Zaˬ miˬ aˬ buˇ tiˬ gʼaˬ heu gaˇ iˇ cuꞈ kʼawꞈ le ngeh, aˬ yawꞈ-euˬ muiˇ deuˇ oeˬ lahˬ-ahˇ dahˬ-eu iˇ cuꞈ ngaˇ shaˇ dawˇ ma.

⁴⁴Zaˬ miˬ aˬ buˇ zaˬ guˬ kʼoeˇ gʼaˬ ngaˬ-ahˇ iˇ cuꞈ bi dawˇ laꞈ-eu uˬ taꞈ, ngaˬ-euˬ law taw deuˬ-ahˇ kʼawꞈ iˇ cuꞈ bi dawˇ ma lehˇ aˬ yawꞈ ehˇ naˇ, zaˬ miˬ aˬ buˇ zaˬ guˬ kʼoeˇ gʼaˬ-aˬ, ngaˬ-euˬ baw leˬ-euˬ aˬ li gʼaˇ duˬ tseˇ doˆ taˬ-euˬ zaˬ miˬ aˬ buˇ pyeuꞈ luꞈ-uˇ’ lehˇ shaˇ-euˬ ma.

⁴⁵Ngaˬ-euˬ nui ma laꞈ kʼoeˇ kʼoeˇ loꞈ-ehˇ guiˬ lahˬ shaˇ gʼaˬ-eu maˬ dah ni, Leˬbehˇkaꞈ muiˇ deuˇ oeˬ lahˬ baꞈ-awˇ oe keuˆ taˬ-euˬ meh. Aˬ yawꞈ lah duˬ-ahˇ iˇ cuꞈ kʼawꞈ-iˇ ngeh, ‘Ngaˬ-ahˇ iˇ cuꞈ ui cuiˆ bi dawˇ laꞈ sheˇ’ lehˇ, aˬ yawꞈ-ahˇ ngaˇ ehˇ nehˬ-euˬ ma.

⁴⁶Kʼoeˇ ngeh, aˬ yawꞈ muiˇ deuˇ oeˬ lahˬ baꞈ ka-awˇ, ‘Dawˇ-awˬ. Nawˇ dawˇ gʼaˬ naˇ, nawˬ-euˬ law taw deuˬ-ahˇ kʼawꞈ ngaˇ iˇ cuꞈ bi dawˇ ma’ lehˇ aˬ yawꞈ ehˇ-eu meh. Ngaˇ iˇ cuꞈ dawˇ gʼaˬ ngeh, law taw deuˬ-ahˇ aˬ yawꞈ iˇ cuꞈ bi dawˇ-euˬ meh.

⁴⁷‘Nawˬ da aˬ suˇ gʼaˬ-a’ lehˇ aˬ yawꞈ-ahˇ ngaˇ naˇ haˬ ngeh, ,‘Ngaˬ da-aˬ, Naˬkawˬ hawˇ-eu Miˇlaˬkah-euˬ aˬ li Beˬtuˬlaˇ meh’ lehˇ aˬ yawꞈ ehˇ-eu meh. Kʼoeˇ ngeh, aˬ yawꞈ-euˬ naˇ mehˇ-ahˇ shuiˇ laꞈ behˬ bi geuꞈ-awˇ, aˬ yawꞈ-euˬ laꞈ du-ahˇ shuiˇ laꞈ duꞈ nyehꞈ duꞈ nehˬ-euˬ ma.

⁴⁸Kʼoeˇ naˇ, ngaˇ pawˬ tsuiꞈ pawˬ dmˬ dmˬ-awˇ, Sahˬpaˬ Miˬyehˇ-ahˇ uˬ duˬ tahˬ-euˬ ma. Ngaˬ-ahˇ ngaˬ-euˬ baw leˬ-euˬ aˬ yuiꞈ aˬ nyiˇ deuˬ jawˇ gaˇ dawˇ coe ni sheuˬ keuˆ nehˬ laꞈ-awˇ, ngaˬ-euˬ baw leˬ-euˬ aˬ li gʼaˇ duˬ aˬ yawꞈ-euˬ aˬ buˇ-ahˇ ya mawˇ-euˬ miˇ neh, ngaˬ-euˬ baw leˬ Aˬbyaˬhaˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ngaˇ ja ceuˬ dui dui-eu ma.

⁴⁹Nymˬ-mˇ poˆ jawˇ-aˬ, ngaˬ-euˬ baw leˬ-euˬ nui kʼahˇ-ahˇ nawˇ mˇ byah mawꞈ-awˇ, aˬ yawꞈ-ahˇ nawˇ yaw muiˬ jeˬ jahˇ nehˬ mawꞈ ma loˇ lehˇ ehˇ haw sheˇ. Maˬ mˇ nehˬ nya naˇ kʼawꞈ, maˬ mˇ nehˬ nya nya lehˇ ehˇ-awˬ. Mehˬ hu paw aˬ joˆ-ehˇ ya jahˇ gʼeh paˬ-ehˇ jaˆ-eu gaˇ kawˆ ngaˇ noeˬ tsehˆ la.”

⁵⁰Laˬbaˬ hawˇ-eu Beˬtuˬlaˇ ehˇ-eu, “Gaˇ heu hmˬ-aˬ, Sahˬpaˬ Miˬyehˇ neh mˇ-euˬ gaˇ pyeuꞈ-eu miˇ neh, nga maꞈ tiˬ jeˬ-iˬ maˬ paˇ ja ma.

⁵¹Leˬbehˇkaꞈ kʼawꞈ nawˬ-euˬ mehˬ shi jawˇ luꞈ meh. Sahˬpaˬ Miˬyehˇ neh ehˇ taˬ-euˬ loꞈ-ehˇ sheuˬ kʼoꞈ gʼeh-awˇ, nawˬ-euˬ baw leˬ-euˬ aˬ li-ahˇ bi dahˬ dzaˬ-iˇ-awˬ.”

⁵²Aˬbyaˬhaˬ-euˬ zaˬ kʼaˆ kʼoeˇ gʼaˬ dawˬ kʼoeˇ dawˬ-ahˇ ya gaˬ ngeh, pawˬ tsuiꞈ pawˬ dmˬ dmˬ-awˇ awˆ byaˆ-eu laꞈ kʼoeˇ, Sahˬpaˬ Miˬyehˇ-ahˇ uˬ duˬ tahˬ-euˬ meh.

⁵³Kʼoeˇ naˇ, dm gʼaˬ dm lmˇ hawˇ-eu pyuˇ myawˬ guˇ, shuiˇ myawˬ guˇ deuˬ aˬ yawꞈ yuˇ doˆ-awˇ, Leˬbehˇkaꞈ-ahˇ biꞈ-euˬ meh. Leˬbehˇkaꞈ-euˬ aˬ mahˇ aˬ da hawˇ-eu aˬ ma gʼaˬ-ahˇ kʼawꞈ, aˇ poeˬ kʼaˆ-eu myawˬ deuˬ aˬ yawꞈ biꞈ-euˬ meh.

⁵⁴Aˬbyaˬhaˬ-euˬ zaˬ kʼaˆ kʼoeˇ gʼaˬ hawˇ-eu aˬ yawꞈ nehˬ-ehˇ laˇ-euˬ tsawˇ haˬ deuˬ, kʼoeˇ ngeh miˇ kʼoeˇ gaˇ yaꞈ-awˇ, tiˬ kawˆ loꞈ-ehˇ dzaˬ taꞈ dawˇ taꞈ-euˬ meh. Uˬ shawˬ paw aˬ yawꞈ maꞈ uˬ suˇ tuˇ gʼaˬ jiˇ ngeh, “Nga maꞈ-ahˇ nga maꞈ-euˬ baw leˬ jawˇ gaˇ bi gʼoꞈ-iˇ laꞈ-awˬ” lehˇ, zaˬ kʼaˆ kʼoeˇ gʼaˬ ehˇ-eu meh.

⁵⁵“Nga pehˬ-euˬ zaˬ miˬ heu gʼaˬ nga pehˬ zaˬ nehˬ-ehˇ nah kaˬ nah jawˇ bi jawˇ gʼaˬ miˇ tsa bi iˇ ma” lehˇ, Laˬbaˬ aˬ nyaꞈ ma zaˬ ehˇ-eu meh.

⁵⁶“Nga maꞈ-ahˇ heu gaˇ taˬ paˇ bi jawˇ nehˬ laꞈ. Gaˇ heu hmˬ pyeuꞈ leˇ ni Sahˬpaˬ Miˬyehˇ nga maꞈ-ahˇ mˇ nehˬ laꞈ gʼaˬ-euˬ miˇ neh, nga maꞈ-euˬ baw leˬ jawˇ gaˇ bi gʼoꞈ-iˇ laꞈ-awˬ” lehˇ, zaˬ kʼaˆ kʼoeˇ gʼaˬ ehˇ-eu meh.

⁵⁷“Leˬbehˇkaꞈ aˬ joˆ-ehˇ ehˇ nga lehˇ kuˇ-awˇ naˇ haˬ haw kaˇ-euˇ” lehˇ aˬ nyaꞈ ma zaˬ ehˇ-eu meh.

⁵⁸Kʼoeˇ ngeh, aˬ yawꞈ maꞈ Leˬbehˇkaꞈ-ahˇ kuˇ-awˇ, “Tsawˇ haˬ heu gʼaˬ-euˬ mehˬ nah nawˇ caw teh gʼeh-iˬ-eu ma loˇ” lehˇ naˇ haˬ haw ngeh, “Caw teh gʼeh-iˬ ma” lehˇ Leˬbehˇkaꞈ ehˇ-eu meh.

⁵⁹Kʼoeˇ miˇ neh, Leˬbehˇkaꞈ hawˇ-eu aˬ yawꞈ-ahˇ bo saˆ-eu zaˬ miˬ zaˬ zaˬ kʼaˆ-ahˇ, Aˬbyaˬhaˬ-euˬ zaˬ kʼaˆ hawˇ-eu aˬ yawꞈ-euˬ tsawˇ haˬ deuˬ nehˬ-ehˇ bi iˇ gʼeh-euˬ meh.

⁶⁰Aˬ yawꞈ maꞈ Leˬbehˇkaꞈ-ahˇ heu loꞈ-ehˇ dawˬ ngehˬ gʼeh nehˬ-euˬ meh. “Zaˬ miˬ dmˇ ma-oˇ, nawˇ-aˬ, maˬ gui jiˇ coeˇ-eu tsawˇ haˬ deuˬ-euˬ aˬ ma ma dzahˇ pyeuꞈ laˇ luꞈ-uˇ. Nawˬ-euˬ zaˬ nawˬ-euˬ uˆ deuˬ-aˬ, aˬ yawꞈ maꞈ-ahˇ muiˇ-eu tsawˇ haˬ deuˬ-euˬ meuˬ deuˬ-ahˇ deuˆ gʼaˬ luꞈ-uˇ.”

⁶¹Kʼoeˇ ngeh, Leˬbehˇkaꞈ hawˇ-eu aˬ yawꞈ-euˬ zaˬ kʼaˆ zaˬ miˬ aˬ buˇ zaˬ guˬ kʼoeˇ gʼaˬ, law taw kʼoeˇ taˆ dziˬ leˇ-awˇ, Aˬbyaˬhaˬ-euˬ zaˬ kʼaˆ nehˬ-ehˇ iˇ gʼeh-euˬ meh.

⁶²Aˇ yamˬ kʼoeˇ yamˬ laꞈ kʼoeˇ, Iˇtsaˆ-aˬ, “Ngaˬ-ahˇ mawˇ-euˬ dehꞈ luꞈ-eu gʼaˬ-euˬ lah duˬ” lehˇ kuˇ-eu bawˇ tsahˬ bawˇ dahˇ kʼoeˇ tsahˇ-ahˇ oe-awˇ, Kaˬnaˬ miˇ kʼahˬ laꞈ oˆ paw dzaˬ-ahˇ jawˇ luꞈ-eu meh.

⁶³Uˬ ciꞈ uˬ taw paw ui cuiˆ yaw naꞈ-ehˇ, deh ga paw gaˇ ma cah baˇ-iˇ-eu lehˇ aˬ yawꞈ iˇ luꞈ ngeh, law taw kʼoeˇ deuˬ gʼoꞈ le luꞈ gaˇ ya mawˇ-euˬ meh.

⁶⁴Iˇtsaˆ-ahˇ Leˬbehˇkaꞈ ya mawˇ ngeh, law taw kʼoeˇ taˆ dziˬ luꞈ-eu zaꞈ ka-iˇ-euˬ meh.

⁶⁵“Deh ga paw neh aˬ dui maꞈ jawˇ paw laˇ luꞈ-eu tsawˇ haˬ kʼoeˇ gʼaˬ aˬ suˇ gʼaˬ-a” lehˇ, Aˬbyaˬhaˬ-euˬ zaˬ kʼaˆ-ahˇ aˬ yawꞈ naˇ haˬ ngeh, “Ngaˬ-euˬ baw leˬ meh” lehˇ, zaˬ kʼaˆ kʼoeˇ gʼaˬ ehˇ kʼoꞈ nehˬ-euˬ meh. Kʼoeˇ ngeh, Leˬbehˇkaꞈ paˇ jeh yuˇ doˆ-awˇ, yawˬ ha-euˬ myaˆ pyawˬ-ahˇ dehˬ kaˬ-euˬ meh.

⁶⁶Zaˬ kʼaˆ kʼoeˇ gʼaˬ-aˬ, aˬ yawꞈ neh kʼaˇ mˇ yaꞈ-euˬ jeˬ dawˬ tawˆ luꞈ Iˇtsaˆ-ahˇ dzawˇ nehˬ-euˬ meh.

⁶⁷Kʼoeˇ ngeh, Iˇtsaˆ-aˬ, aˬ yawꞈ aˬ ma Saˬlaˇ yaw dehꞈ dehꞈ ngeh jawˇ-euˬ sehˬ gʼawˆ laꞈ kʼoeˇ Leˬbehˇkaꞈ-ahˇ sheuˬ uˇ gʼeh-awˇ, aˬ yawꞈ-euˬ miˬ zaˬ bi pyeuꞈ laˇ-euˬ meh. Iˇtsaˆ Leˬbehˇkaꞈ-ahˇ gaˬ-eu miˇ neh, aˬ yawꞈ aˬ ma shiˇ-euˬ gaˇ noeˬ luꞈ-eu nui ma byoˆ-iˇ-euˬ meh.