Read Akha Aˇ dahˬ 25 Bible Online

Aˇ dahˬ 25 - Akha bible

Aˇ dahˬ 25

¹Jeˬtuˬlaˇ lehˇ myahˇ-euˬ zaˬ miˬ zaˬ tiˬ gʼaˬ-ahˇ Aˬbyaˬhaˬ paˇ sheuˬ-euˬ meh.

²Jeˬtuˬlaˇ o neh jawˇ le-euˬ Aˬbyaˬhaˬ-euˬ zaˬ deuˬ-aˬ, Zmˇlaˬ, Yoˇshaˬ, Meˬdaˬ, Miˇdiˬyaˬ, Iˇshaˬbehˇ, Shuˇaˬ, aˬ ha mehˇ nmˇ meh.

³Yoˇshaˬ-aˬ, Sheˬba hawˇ-eu Deˬdaˬ-euˬ aˬ da pyeuꞈ-awˇ, Deˬdaˬ-euˬ zaˬ deuˬ uˆ deuˬ-aˬ, Aˬshuˇlmˬ tsawˇ jeuˬ, Leˬtuˇshmˬ tsawˇ jeuˬ, Lmˬmiˬ tsawˇ jeuˬ heu deuˬ pyeuꞈ-eu meh.

⁴Miˇdiˬyaˬ-euˬ aˬ li deuˬ-aˬ, Eˇpaˬ, Eˇpeuˬ, Haˬnoˆ, Aˬbiˇdaˬ, Eˇlaˬdaˬ heu deuˬ meh. Heu deuˬ dawˬ tawˆ luꞈ, Jeˬtuˬlaˇ o neh jeuˬ le o le-euˬ tsawˇ haˬ deuˬ pyeuꞈ-eu meh.

⁵Aˬbyaˬhaˬ-aˬ, aˬ yawꞈ-euˬ pyuˇ shuiˇ myawˬ gahˬ dawˬ tawˆ luꞈ Iˇtsaˆ-ahˇ biꞈ jiˇ yaꞈ-euˬ meh.

⁶Aˬ yawꞈ-euˬ ma nyiˇ deuˬ-euˬ zaˬ deuˬ-ahˇ kʼawꞈ, aˬ yawꞈ maˬ shiˇ mi naˆ-ehˇ laꞈ sawˬ biꞈ yaꞈ-euˬ meh. Kʼoeˇ naˇ, aˬ yawꞈ maꞈ-ahˇ Iˇtsaˆ jawˇ gaˇ neh bi doˆ-iˇ-awˇ, nahˇ ma doˆ kʼehˬ paw bi jawˇ-iˇ-euˬ meh.

⁷Aˬbyaˬhaˬ-aˬ, tiˬ yaˇ shiꞈ tseˇ ngaˬ kʼoꞈ keuˆ ni dehꞈ-euˬ meh.

⁸Aˬ yawꞈ mawˬ dui dui laˇ-awˇ, aˇ yamˬ tsaˬ ngeh ziˇ jiˇ-euˬ meh.

⁹Aˬ yawꞈ-euˬ aˬ li Iˇtsaˆ hawˇ-eu Iˇshaˬmeˬlaˇ aˬ nyaꞈ nmˇ neh, Mamˬliˬ meuˬ-euˬ nahˇ ma doˆ kʼehˬ paw jaˆ-eu miˇ tsaˬ pehˇ tsahˇ kʼoeˇ tsahˇ laꞈ kʼoeˇ, Maˬpeˬlaˇ lo kʼahˬ-ahˇ aˬ yawꞈ-ahˇ baꞈ pahˬ nehˬ-euˬ meh. Miˇ tsaˬ pehˇ tsahˇ kʼoeˇ tsahˇ-aˬ, yaw beh Heˬtaˆ tsawˇ jeuˬ Zoˇhaˬlaˆ-euˬ aˬ li Eˇpyoˬ-euˬ miˇ tsaˬ pyeuꞈ-eu meh.

¹⁰Miˇ tsaˬ pehˇ tsahˇ kʼoeˇ tsahˇ-ahˇ, Heˬtaˆ tsawˇ haˬ-euˬ laꞈ-ahˇ neh Aˬbyaˬhaˬ zeuˇ tsehˆ taˬ-euˬ meh. Aˬbyaˬhaˬ-ahˇ maˬ ehˇ, Saˬlaˇ-ahˇ maˬ ehˇ, kʼoeˇ gaˇ baꞈ pahˬ nehˬ-euˬ meh.

¹¹Aˬbyaˬhaˬ shiˇ dzeuˇ ngeh, “Ngaˬ-ahˇ mawˇ-euˬ Dehꞈ luꞈ-eu gʼaˬ-euˬ lah duˬ” lehˇ kuˇ-eu jawˇ duˬ-ahˇ jawˇ luꞈ-eu Aˬbyaˬhaˬ-euˬ aˬ li Iˇtsaˆ-ahˇ, Miˬyehˇ guiˬ lahˬ biꞈ nehˬ-euˬ meh.

¹²Saˬlaˇ-euˬ zaˬ kʼaˆ Iˇjiˇtuˆ ma Haˬgaˬlaˇ o neh dehꞈ le-euˬ Aˬbyaˬhaˬ-euˬ aˬ li Iˇshaˬmeˬlaˇ-euˬ zaˬ deuˬ uˆ deuˬ-aˬ, heu loꞈ-ehˇ meh.

¹³Aˬ yawꞈ-euˬ aˬ li deuˬ-aˬ, Neˬbaˬyoˇ, Geˬdaˬ, Aˬdaˬbeˬlaˇ, Miˇbaˬsaˬ,

¹⁴Miˇshaˬmaˬ, Duˇmahˬ, Maˬsaˬ,

¹⁵Haˬdaˇ, Teˬmaˇ, Yeˬtuˬlaˇ, Naˬpiˇshaˬ, Geˬdeˬmaˬ, aˬ ha mehˇ nmˇ meh.

¹⁶Aˬ yawꞈ maꞈ-aˬ, tsawˇ jeuˬ tseˇ nyiꞈ jeuˬ-euˬ aˬ da yaw dzahˇ deuˬ pyeuꞈ-eu meh. Tsawˇ jeuˬ kʼoeˇ deuˬ-euˬ pu deuˬ hawˇ-eu, sehˬ gʼawˆ gʼawˆ-awˇ kʼaˇ jawˇ-euˬ jawˇ duˬ deuˬ-ahˇ kʼawꞈ, aˬ yawꞈ maꞈ-euˬ tsawˇ myahˇ myahˇ nehˬ-euˬ meh.

¹⁷Iˇshaˬmeˬlaˇ-aˬ, tiˬ yaˇ smˬ tseˇ shiꞈ kʼoꞈ kʼawˆ ngeh ziˇ jiˇ-euˬ meh.

¹⁸Iˇshaˬmeˬlaˇ-euˬ zaˬ deuˬ uˆ deuˬ-aˬ, Iˇjiˇtuˆ miˇ kʼahˬ nahˇ ma doˆ kʼehˬ paw, Aˬshuˇliˆ miˇ kʼahˬ-ahˇ iˇ-eu gaˇ ma-ahˇ jaˆ-eu Haˬbiˇlaˬ meuˬ hawˇ-eu Shuˇyaˆ meuˬ yaw kaˬ-ahˇ jawˇ-euˬ meh. Aˬ yawꞈ maꞈ-aˬ, Aˬbyaˬhaˬ-euˬ zaˬ yawˬ deuˬ yawˬ nehˬ-ehˇ maˬ jawˇ keuˬ ni jawˇ-euˬ meh.

¹⁹Heu-aˬ, Aˬbyaˬhaˬ-euˬ aˬ li Iˇtsaˆ-euˬ gaˇ kawˆ pyeuꞈ-eu meh.

²⁰Iˇtsaˆ-aˬ, Laˬbaˬ-euˬ dmˇ ma Leˬbehˇkaꞈ-ahˇ sheuˬ ngeh, aˇ kʼoꞈ oeˬ tseˇ byah laˇ-euˬ meh. Leˬbehˇkaꞈ-euˬ aˬ da-aˬ, Beˬtuˬlaˇ lehˇ myahˇ-euˬ Maˬsoˬpoˬtaˬmiˇ miˇ kʼahˬ-ahˇ jawˇ-eu Aˬlamˬ tsawˇ jeuˬ pyeuꞈ-eu meh.

²¹Leˬbehˇkaꞈ zaˬ maˬ jawˇ le-eu miˇ neh, zaˬ jawˇ le nya ni, Sahˬpaˬ Miˬyehˇ-ahˇ Iˇtsaˆ guiˬ lahˬ shaˇ-euˬ meh. Aˬ yawꞈ-euˬ guiˬ lahˬ shaˇ dawˬ-ahˇ Sahˬpaˬ Miˬyehˇ naˇ haˬ nehˬ-awˇ, aˬ nyiˇ pi leˇ-euˬ meh.

²²Leˬbehˇkaꞈ-euˬ uˬ maˆ laꞈ kʼoeˇ zaˬ nyiˬ gʼaˬ uˇ-awˇ, zaˬ kʼoeˇ nyiˬ gʼaˬ maˬ dehꞈ doˆ le mi naˆ-ehˇ, uˬmaˆ laꞈ kʼoeˇ dawꞈ dawꞈ-ehˇ ceh-eu meh. “Aˬ jeˬ miˇ neh ngaˬ-euˬ uˬ maˆ laꞈ kʼoeˇ teu naˆ naˆ-ehˇ luˆ-eu maˬ siˬ miˇ-a. Aˬ jeˬ keuˆ le-eu gʼeh-eu maˬ siˬ miˇ-a” lehˇ Leˬbehˇkaꞈ ehˇ-eu meh. Kʼoeˇ miˇ neh, Sahˬpaˬ Miˬyehˇ-ahˇ aˬ yawꞈ naˇ haˬ leˇ-euˬ meh.

²³Sahˬpaˬ Miˬyehˇ aˬ yawꞈ-ahˇ ehˇ nehˬ-eu, “Nawˬ-euˬ uˬ maˆ laꞈ kʼoeˇ tsawˇ jeuˬ nyiˬ jeuˬ uˇ luꞈ-eu meh. Tiˬ jeuˬ tiˇ jeuˬ maˬ tsaˬ leˇ-eu tsawˇ jeuˬ nyiˬ jeuˬ-ahˇ nawˇ ya bi dehꞈ doˆ le tehꞈ-a. Tsawˇ jeuˬ tiˬ jeuˬ-aˬ, yawˬ jeuˬ yawˬ naˆ maˬ tseˇ gʼaˬ kʼaˆ dzehˬ tehꞈ-a. Aˬ yuiꞈ gʼaˬ-aˬ, aˬ nyiˇ gʼaˬ-euˬ laꞈ oꞈ ya awꞈ tehꞈ-a.”

²⁴Leˬbehˇkaꞈ aˬ nyiˇ ciˬ yamˬ tsaˬ laˇ ngeh, aˬ li nyiˬ li tiˬ poˆ tehꞈ-ehˇ ciˬ-euˬ meh.

²⁵Yaw beh dehꞈ le-euˬ gʼaˬ-aˬ, shaˬ jiˇ neˇ tseuˆ ni gʼeh-awˇ, jeˬ zaˬ baˆ kʼoˆ guꞈ-awˇ bi dm taˬ-euˬ loꞈ-ehˇ, gʼawˇ mawˇ mawˇ lah-ehˇ caꞈ hm shuˬ byehˬ ni tsoꞈ-eu meh. Kʼoeˇ miˇ neh, aˬ yawꞈ-ahˇ Iˇsawˇ[16] lehˇ myahˇ nehˬ-euˬ meh.

²⁶Jeˬ nah dehꞈ le-euˬ gʼaˬ-aˬ, Iˇsawˇ-euˬ aˬ kuiˇ kuiˇ nuiꞈ-ahˇ ziꞈ dah ni tsuˆ tehˬ-awˇ dehꞈ doˆ le-euˬ miˇ neh, Yaˬkoˆ[17] lehˇ myahˇ nehˬ-euˬ meh. Aˬ yawꞈ nyaꞈ nmˇ dehꞈ le ngeh, Iˇtsaˆ koꞈ tseˇ kʼoꞈ kʼawˆ laˇ-euˬ meh.

²⁷Aˬ li kʼoeˇ nyiˬ li huiˬ laˇ ngeh, Iˇsawˇ gʼaˬ-aˬ, bawˇ cah cah-eu nui ma ahˇ-eu shaˬ mi aˬ da tiˬ gʼaˬ pyeuꞈ laˇ-euˬ meh. Yaˬkoˆ gʼaˬ-aˬ, ciˬ cuˇ ni iˇ kahˇ-ahˇ tehꞈ-ehˇ jawˇ-eu meh.

²⁸Iˇtsaˆ-aˬ, Iˇsawˇ neh beuˆ sehꞈ leꞈ-euˬ shaˬ jiˇ tiˬ kʼehˬ maˬ taˬ ni ya dzaˬ-eu miˇ neh, Iˇsawˇ-ahˇ gaˬ dzehˬ-awˇ, Leˬbehˇkaꞈ-aˬ, Yaˬkoˆ-ahˇ gaˬ dzehˬ-eu meh.

²⁹Tiˬ nah-aˬ, Yaˬkoˆ aˇ behˆ aˇ nuiˆ gʼawˬ nyoeˇ jahˇ luꞈ ngeh, Iˇsawˇ bawˇ cah cah-iˇ-euˬ gʼoꞈ keuˆ laˇ-euˬ meh. Kʼoeˇ ngeh, Iˇsawˇ hawˬ mehꞈ mehꞈ dui dui laˇ-awˇ,

³⁰“Nawˬ-euˬ dzaˇ yaw neˇ teu ngaˬ-ahˇ ui cuiˆ bi dzaˬ laꞈ sheˇ” lehˇ, Yaˬkoˆ-ahˇ ehˇ nehˬ-euˬ meh. (Kʼoeˇ miˇ neh, Iˇsawˇ-ahˇ aˬ cawˬ Eˬdoˬ[18] lehˇ kuˇ-euˬ meh.)

³¹“Nawˬ-ahˇ oꞈ-eu aˬ li aˬ yuiꞈ gʼaˬ-euˬ aˇ yaˬ biꞈ laꞈ naˇ bi dzaˬ ma” lehˇ Yaˬkoˆ ehˇ-eu meh.

³²“Biꞈ nehˬ tehꞈ-a. Ngaˇ hawˬ mehꞈ mehꞈ-eu shiˇ-eu keuˆ laˇ taˬ-euˬ-aˬ, aˬ li aˬ yuiꞈ gʼaˬ-euˬ aˇ yaˬ aˬ jeˬ paˇ jahˇ-eu” lehˇ, Yaˬkoˆ-ahˇ Iˇsawˇ ehˇ nehˬ-euˬ meh.

³³“Nawˬ-euˬ aˇ yaˬ ngaˬ-ahˇ biꞈ tsehˆ tsehˆ ma lehˇ, saˇ jaˇ jeˬ huˬ dzaˬ-awˬ” lehˇ, Iˇsawˇ-ahˇ Yaˬkoˆ paˇ ehˇ nehˬ-euˬ meh. Kʼoeˇ ngeh, Iˇsawˇ saˇ jaˇ dzaˬ-awˇ, aˬ yawꞈ-euˬ aˇ yaˬ Yaˬkoˆ-ahˇ biꞈ-euˬ meh. Kʼoeˇ naˇ, gʼawˬ nyoeˇ dzaˇ uiˇ hawˇ-eu kaˬ muˇ, Yaˬkoˆ neh Iˇsawˇ-ahˇ biꞈ nehˬ-awˇ bi dzaˬ-euˬ meh.

³⁴Iˇsawˇ dzaˬ gʼaˬ dawˇ gʼaˬ-awˇ doˆ-iˇ-euˬ meh. Iˇsawˇ-aˬ, kʼoeˇ loꞈ-ehˇ jahˇ-awˇ, aˬ yawꞈ za paˬ-ehˇ gʼeh-eu aˬ li aˬ yuiꞈ gʼaˬ-euˬ aˇ yaˬ-ahˇ yehˬ bawˬ sehˇ lu-ehˇ gʼeh-euˬ meh.