Read Akha Aˇ dahˬ 26 Bible Online

Aˇ dahˬ 26 - Akha bible

Aˇ dahˬ 26

¹Aˬbyaˬhaˬ-euˬ ziˇ-ahˇ keuˆ le-euˬ mehꞈ-eu shuꞈ-eu kʼoeˇ poˆ dzeuˇ-awˇ, miˇ kʼahˬ kʼoeˇ kʼahˬ laꞈ kʼoeˇ mehꞈ-eu shuꞈ-eu jeˬ tiˬ poˆ paˇ keuˆ le-euˬ meh. Iˇtsaˆ-aˬ, Geˬlawˬ meuˬ-ahˇ, Piˇliˇtiˆ sahˬpaˬ Aˬbiˇmaˬlehˆ jawˇ gaˇ le-euˬ meh.

²Sahˬpaˬ Miˬyehˇ Iˇtsaˆ jawˇ gaˇ oe-awˇ ehˇ-eu, “Iˇjiˇtuˆ miˇ kʼahˬ-ahˇ taˬ iˇ. Miˇ kʼahˬ heu kʼahˬ laꞈ kʼoeˇ ngaˇ nawˬ-ahˇ kʼaˇ bi jawˇ-eu tsahˇ-ahˇ jawˇ-awˬ.

³Nawˇ heu gaˇ jawˇ naˇ, nawˬ nehˬ-ehˇ ngaˇ jawˇ-awˇ nawˬ-ahˇ ngaˇ guiˬ lahˬ biꞈ nehˬ ma. Miˇ kʼahˬ heu kʼahˬ kʼahˬ lah ni nawˇ hawˇ-eu nawˬ-euˬ zaˬ nawˬ-euˬ uˆ deuˬ-ahˇ ngaˇ biꞈ ma. Nawˬ da Aˬbyaˬhaˬ nehˬ-ehˇ ngaˬ neh dzaˬ taˬ-euˬ saˇ jaˇ-ahˇ ngaˇ mˇ byah ma.

⁴Nawˬ-euˬ zaˬ nawˬ-euˬ uˆ deuˬ-ahˇ, mˬ kʼoeˇ taˆ tsehˬ-eu aˬ guiˇ deuˬ loꞈ-ehˇ bi jeuˬ bi o le-awˇ, miˇ kʼahˬ heu kʼahˬ kʼahˬ lah ni, aˬ yawꞈ maꞈ-ahˇ ngaˇ biꞈ ma. Nawˬ-euˬ zaˬ nawˬ-euˬ uˆ deuˬ-ahˇ ngaˇ guiˬ lahˬ biꞈ nehˬ-eu loꞈ-ehˇ, aˬ yawꞈ maꞈ-ahˇ kʼawꞈ biꞈ nehˬ laꞈ lehˇ, tsawˇ jeuˬ dawˬ tawˆ luꞈ ngaˬ-ahˇ shaˇ tehꞈ-a.

⁵Aˬbyaˬhaˬ ngaˬ-euˬ ehˇ dawˬ naˇ haˬ-awˇ, ngaˬ-euˬ zahˇ dawˬ kʼoꞈ dawˬ dawˬ tawˆ luꞈ-ahˇ caw teh-euˬ miˇ neh, ngaˇ nawˬ-ahˇ guiˬ lahˬ biꞈ-eu ma.”

⁶Kʼoeˇ naˇ, Geˬlawˬ meuˬ-ahˇ Iˇtsaˆ jawˇ-euˬ meh.

⁷Kʼoeˇ gaˇ jawˇ-eu tsawˇ haˬ deuˬ aˬ yawꞈ miˬ zaˬ-euˬ gaˇ kawˆ naˇ haˬ ngeh, aˬ yawꞈ-euˬ dmˇ ma pyeuꞈ-eu ma lehˇ, Iˇtsaˆ ehˇ kʼoꞈ nehˬ-euˬ meh. Leˬbehˇkaꞈ aˬ yawꞈ-euˬ miˬ zaˬ pyeuꞈ-eu gaˇ kawˆ Iˇtsaˆ maˬ ehˇ doˆ peuˬ-a. Aˬ jeˬ miˇ neh ehˇ naˇ, Leˬbehˇkaꞈ aˇ gʼehˇ muiˬ dui dui-eu miˇ neh, kʼoeˇ gaˇ jawˇ-eu tsawˇ haˬ deuˬ aˬ yawꞈ-ahˇ sehꞈ-awˇ, Leˬbehˇkaꞈ-ahˇ sheuˬ geuꞈ gaˇ aˬ yawꞈ guˆ-eu meh.

⁸Iˇtsaˆ kʼoeˇ gaˇ jawˇ luꞈ-eu aˇ yamˬ ui cuiˆ myahˇ laˇ-awˇ, sahˬ paˬ Aˬbiˇmaˬlehˆ laˇ gʼoˆ gʼoˆ zaˬ-ahˇ neh haw ka gʼeh ngeh, Iˇtsaˆ Leˬbehˇkaꞈ nehˬ-ehˇ jawˇ luꞈ gaˇ ya mawˇ-euˬ meh.

⁹Kʼoeˇ ngeh, Iˇtsaˆ-ahˇ bi kuˇ laˬ-iˇ-awˇ, “Leˬbehˇkaꞈ nawˬ-euˬ miˬ zaˬ pyeuꞈ law hawˇ ngaˬ tawˇ. Nawˬ-euˬ dmˇ ma pyeuꞈ-eu ma lehˇ aˬ jeˬ miˇ neh nawˇ jaˬ myawꞈ myawꞈ teˬ” lehˇ ehˇ nehˬ-euˬ meh. Iˇtsaˆ gʼeh, “Aˬ yawꞈ ngaˬ-euˬ miˬ zaˬ ma lehˇ ngaˇ ehˇ naˇ, aˬ cawˬ ngaˬ-ahˇ sehꞈ laˇ-eu baw le lehˇ ngaˇ noeˬ guˆ-eu miˇ neh, kʼoeˇ loꞈ-ehˇ ehˇ-euˬ ma” lehˇ, paˇ ehˇ kʼoꞈ nehˬ-euˬ meh.

¹⁰“Aˬ jeˬ miˇ neh nga maꞈ-ahˇ nawˇ teu loꞈ-ehˇ jahˇ nehˬ laꞈ te. Ngaˬ-euˬ tsawˇ haˬ tiˬ gʼaˬ na, maˬ yehꞈ maˬ caˇ-ehˇ nawˬ-euˬ miˬ zaˬ nehˬ-ehˇ joe naˇ, nga maꞈ kʼoeˇ taˆ iˬ baˇ jaˆ laˇ ni nawˇ mˇ gaˇ duˇ-eu maˬ ngeuˇ nga loˇ” lehˇ, Iˇtsaˆ-ahˇ Aˬbiˇmaˬlehˆ ehˇ nehˬ-euˬ meh.

¹¹Kʼoeˇ naˇ, “Tsawˇ haˬ heu nyiˬ dzeˇ zaˬ-ahˇ kʼaˇ mˇ bahˬ-eu gʼaˬ, sehꞈ gaˇ ya daˬ tehꞈ-a” lehˇ, miˇ kʼahˬ zaˬ dawˬ tawˆ luꞈ-ahˇ Aˬbiˇmaˬlehˆ ehˇ gaˬ nehˬ-euˬ meh.

¹²Miˇ kʼahˬ kʼoeˇ kʼahˬ laꞈ kʼoeˇ Iˇtsaˆ deh yaˇ mˇ-awˇ, kʼoeˇ ngeh kʼoꞈ laꞈ kʼoeˇ, aˬ yawꞈ neh sehˬ-euˬ siˬ yoeˬ naˆ maˬ tseˇ tiˬ yaˇ bymˇ aˬ yawꞈ mˇ za-euˬ meh. Sahˬpaˬ Miˬyehˇ aˬ yawꞈ-ahˇ guiˬ lahˬ biꞈ-euˬ miˇ neh, kʼoeˇ loꞈ-ehˇ mˇ za-euˬ meh.

¹³Tiˬ kʼoꞈ taꞈ-ehˇ tiˬ kʼoꞈ aˬ yawꞈ mˇ za shaˇ za-awˇ, smˇ muiˬ muiˬ dui dui laˇ-euˬ meh.

¹⁴Yawˇ, mawˇ neˇ hawˇ-eu, zaˬ kʼaˆ deuˬ kʼawꞈ jawˇ myaˬ dui dui-eu miˇ neh, Piˇliˇtiˆ tsawˇ haˬ deuˬ aˬ yawꞈ-ahˇ myaˆ naˆ-euˬ meh.

¹⁵Kʼoeˇ miˇ neh, aˬ yawꞈ aˬ da Aˬbyaˬhaˬ neh duˬ taˬ yaꞈ-euˬ lah duˬ dawˬ tawˆ luꞈ-ahˇ, Piˇliˇtiˆ tsawˇ haˬ deuˬ neh duˬ tsoeˬ jiˇ-euˬ meh.

¹⁶Kʼoeˇ naˇ, “Nawˇ nga maꞈ-euˬ miˇ kʼahˬ laꞈ kʼoeˇ taˬ paˇ jawˇ. Nga maꞈ naˆ maˬ tseˇ nawˇ baoˬ ahˇ laˇ-euˬ nga” lehˇ, Iˇtsaˆ-ahˇ Aˬbiˇmaˬlehˆ ehˇ nehˬ-euˬ meh.

¹⁷Kʼoeˇ miˇ neh, Iˇtsaˆ kʼoeˇ gaˇ neh doˆ-iˇ-awˇ, Geˬlawˬ deh kʼawꞈ laꞈ kʼoeˇ sehˬ gʼawˆ gʼawˆ-awˇ gʼawˬ mya kʼoꞈ jawˇ-euˬ meh.

¹⁸Aˬbyaˬhaˬ dehꞈ ngeh duˬ taˬ yaꞈ-awˇ, Aˬbyaˬhaˬ shiˇ dzeuˇ gʼaˬ ngeh, Piˇliˇtiˆ tsawˇ haˬ deuˬ neh duˬ tsoeˬ-euˬ lah duˬ kʼoeˇ deuˬ-ahˇ, Iˇtsaˆ paˇ duˬ pah-euˬ meh. Aˬ yawꞈ-euˬ aˬ da Aˬbyaˬhaˬ neh lah duˬ kʼoeˇ deuˬ-ahˇ tsawˇ myahˇ kʼaˇ biꞈ yaꞈ-euˬ loꞈ-ehˇ, Iˇtsaˆ paˇ myahˇ poˆ nehˬ-euˬ meh.

¹⁹Iˇtsaˆ-euˬ zaˬ kʼaˆ deuˬ deh kʼawꞈ kʼoeˇ kʼawꞈ laꞈ kʼoeˇ lah duˬ tiˬ duˬ paˇ duˬ-awˇ, iˇ cuꞈ duˬ doˆ-euˬ meh.

²⁰Geˬlawˬ meuˬ-ahˇ jawˇ-eu yawˇ cu-eu tsawˇ haˬ deuˬ oe-awˇ, “Lah duˬ heu duˬ nga maꞈ-euˬ lah duˬ ma” lehˇ ehˇ-awˇ, Iˇtsaˆ-euˬ zaˬ kʼaˆ deuˬ nehˬ-ehˇ ceh-euˬ meh. Kʼoeˇ miˇ neh, lah duˬ kʼoeˇ duˬ-ahˇ, “Iˬ dehˬ iˬ ceh” lehˇ Iˇtsaˆ neh myahˇ nehˬ-euˬ meh.

²¹Kʼoeˇ naˇ, Iˇtsaˆ-euˬ zaˬ kʼaˆ deuˬ lah duˬ tiˬ duˬ paˇ duˬ-euˬ meh. Lah duˬ kʼoeˇ duˬ-ahˇ kʼawꞈ, Piˇliˇtiˆ tsawˇ haˬ deuˬ tiˬ poˆ paˇ ceh geuꞈ le-euˬ miˇ neh, “Muiˇ-eu jeˬ” lehˇ Iˇtsaˆ neh myahˇ nehˬ-euˬ meh.

²²Kʼoeˇ gaˇ neh naˇ, ui cuiˆ gaˇ mahˇ kaˬ gaˇ Iˇtsaˆ jiˆ doˆ-iˇ-awˇ, lah duˬ yawˬ duˬ yawˬ paˇ duˬ paˇ-euˬ meh. Kʼoeˇ ngeh poˆ jawˇ, lah duˬ kʼoeˇ duˬ-ahˇ ceh geuꞈ le-eu tiˬ gʼaˬ-iˬ maˬ jawˇ-a. Kʼoeˇ miˇ neh, lah duˬ kʼoeˇ duˬ-ahˇ, “Buˬ-iˇ law-iˇ-eu” lehˇ aˬ yawꞈ myahˇ nehˬ-euˬ meh. Kʼoeˇ ngeh, “Nymˬ-mˇ poˆ jawˇ-aˬ, laˆ tsoeˬ taˬ-euˬ jeˬ maˬ jaˆ-eu laꞈ kʼoeˇ, aˬ dui-ahˇ bi jawˇ laꞈ-euˬ nga. Jawˇ duˬ heu tsahˇ-ahˇ aˬ dui dehꞈ dzaˬ dui dui laˇ tehꞈ-a” lehˇ Iˇtsaˆ ehˇ-eu meh.

²³Jawˇ duˬ kʼoeˇ tsahˇ-ahˇ neh Iˇtsaˆ paˇ doˆ-iˇ-awˇ, Beˬlaˇsheˬba-ahˇ jawˇ-iˇ-euˬ meh.

²⁴Kʼoeˇ ngeh miˇ, Sahˬpaˬ Miˬyehˇ aˬ yawꞈ mehˬ shi doˆ le-awˇ, “Ngaˇ-aˬ, nawˬ da Aˬbyaˬhaˬ-euˬ Miˬyehˇ ma. Taˬ guˆ. Ngaˇ nawˬ nehˬ-ehˇ jawˇ luꞈ ma. Ngaˬ-euˬ zaˬ kʼaˆ Aˬbyaˬhaˬ-ahˇ ngaˇ saˇ jaˇ biꞈ taˬ-euˬ loꞈ-ehˇ, ngaˇ nawˬ-ahˇ guiˬ lahˬ biꞈ-awˇ, nawˬ-euˬ zaˬ nawˬ-euˬ uˆ deuˬ bi jeuˬ bi o le ma” lehˇ ehˇ nehˬ-euˬ meh.

²⁵Kʼoeˇ gaˇ, Iˇtsaˆ lawˇ duˬ tiˬ tsahˇ tsoˆ-awˇ, Sahˬpaˬ Miˬyehˇ-ahˇ uˬ duˬ tahˬ-euˬ meh. Aˬ yawꞈ kʼoeˇ gaˇ jawˇ duˬ dah-awˇ, aˬ yawꞈ-euˬ zaˬ kʼaˆ deuˬ lah duˬ tiˬ duˬ paˇ duˬ-euˬ meh.

²⁶Aˬbiˇmaˬlehˆ-aˬ, aˬ yawꞈ-ahˇ nui noeˬ nui duˇ biꞈ-eu gʼaˬ pyeuꞈ-eu Aˬhuˇzaˆ hawˇ-eu, aˬ yawꞈ-euˬ guiˇ guiˇ maꞈ dawˬ tawˆ luꞈ kʼoeˇ taˆ uˆ lahˇ-eu gʼaˬ pyeuꞈ-eu Piˇkawˇlaˆ aˬ nyaꞈ-ahˇ sheuˬ-awˇ, Iˇtsaˆ jawˇ gaˇ oe-euˬ meh.

²⁷Kʼoeˇ ngeh, “Naw maꞈ ngaˬ-ahˇ maˬ haw nahˇ-eu miˇ neh, naw maꞈ-euˬ miˇ kʼahˬ laꞈ kʼoeˇ neh teh doˆ nehˬ laꞈ-euˬ maˬ ngeuˇ te loˇ. Aˬ jeˬ miˇ neh ngaˇ jawˇ gaˇ paˇ oe te” lehˇ, aˬ yawꞈ maꞈ-ahˇ Iˇtsaˆ naˇ haˬ-euˬ meh.

²⁸Aˬ yawꞈ maꞈ ehˇ-eu, “Sahˬpaˬ Miˬyehˇ nawˬ nehˬ-ehˇ jawˇ-eu gaˇ kawˆ nymˬ-mˇ nga maꞈ siˬ duˬ-eu ma. Kʼoeˇ miˇ neh, nawˇ hawˇ-eu nga maꞈ yaw kaˬ saˇ jaˇ dzaˬ taꞈ-eu tsaˬ tehꞈ-a lehˇ, nga maꞈ noeˬ mawˇ-eu ma.

²⁹Nawˬ-ahˇ coeˬ leˇ ni nga maꞈ neh mˇ taˬ-euˬ tiˬ jeˬ-iˬ maˬ jaˆ-eu loꞈ-ehˇ, nga maꞈ-ahˇ coeˬ laˇ ni nawˇ tiˬ jeˬ-iˬ maˬ mˇ lehˇ bi ehˇ tsehˆ mawꞈ-eu ma. Nga maꞈ nawˬ-ahˇ tiˬ jeˬ-iˬ maˬ laˆ tsoeˬ ni, nui ma saˇ lehˆ ni bi doˆ le-euˬ ma. Nymˬ-mˇ poˆ jawˇ-aˬ, Sahˬpaˬ Miˬyehˇ nawˬ-ahˇ guiˬ lahˬ biꞈ-eu gaˇ kawˆ, nga maꞈ yaw muiˬ paˬ-ehˇ siˬ duˬ-eu ma.”

³⁰Kʼoeˇ naˇ, aˬ yawꞈ maꞈ-ahˇ Iˇtsaˆ hawˬ byawˇ tiˬ byawˇ lawˇ nehˬ-awˇ, tiˬ kawˆ loꞈ-ehˇ dzaˬ taꞈ dawˇ taꞈ-euˬ meh.

³¹Yawˬ nah yawˬ uˬ shawˬ yaw naꞈ-ehˇ, tiˬ kawˆ loꞈ-ehˇ saˇ jaˇ dzaˬ taꞈ gʼaˬ-awˇ, aˬ yawꞈ maꞈ laˬ kʼaˬ tiˬ cehˇ gʼoꞈ leˇ-euˬ meh.

³²Kʼoeˇ ngeh nah, Iˇtsaˆ-euˬ zaˬ kʼaˆ deuˬ Iˇtsaˆ jawˇ gaˇ laˇ-awˇ, aˬ yawꞈ maꞈ duˬ luꞈ-eu lah duˬ kʼoeˇ duˬ iˇ cuꞈ mawˇ le-euˬ gaˇ kawˆ tsaꞈ gaˬ laˇ-euˬ meh.

³³Lah duˬ kʼoeˇ duˬ-ahˇ, “Saˇ jaˇ” lehˇ Iˇtsaˆ myahˇ nehˬ-euˬ meh. Kʼoeˇ miˇ neh, kʼoeˇ gaˇ jaˆ-eu meuˬ kʼoeˇ meuˬ-ahˇ, iˬ nah keuˆ ni Beˬlaˇsheˬba[19] lehˇ kuˇ-eu meh.

³⁴Iˇsawˇ oeˬ tseˇ kʼoꞈ byah laˇ ngeh, Heˬtaˆ tsawˇ jeuˬ zaˬ miˬ zaˬ nyiˬ gʼaˬ-ahˇ sheuˬ-euˬ meh. Zaˬ miˬ zaˬ kʼoeˇ nyiˬ gʼaˬ-aˬ Beˬliˇ-euˬ aˬ buˇ Juˇdiˆ hawˇ-eu Eˇloˬ-euˬ aˬ buˇ Baˬseˬmaˇ pyeuꞈ-eu meh.

³⁵Aˬ yawꞈ nyaꞈ baˬ da neh Iˇtsaˆ hawˇ-eu Leˬbehˇkaꞈ aˬ nyaꞈ dzeˇ zaˬ yaw dehꞈ dehꞈ-eu nui ma tiˬ pawꞈ-iˬ maˬ saˇ-a.