Read Akha Aˇ dahˬ 30 Bible Online

Aˇ dahˬ 30 - Akha bible

Aˇ dahˬ 30

¹Laˬkeˬlaˇ-aˬ, Yaˬkoˆ gʼaˇ duˬ zaˬ tiˬ gʼaˬ-iˬ maˬ bi jawˇ le nya-eu miˇ neh aˬ yawꞈ-euˬ aˬ yuiꞈ Leˇaˬ-ahˇ myaˆ naˆ-awˇ, “Ngaˬ-ahˇ zaˬ bi jawˇ le nehˬ laꞈ. Zaˬ maˬ jawˇ le naˇ, shiˇ-eu maˬ ngeuˇ naˇ maˬ paˇ dzeˇ miˇ-a” lehˇ Yaˬkoˆ-ahˇ ehˇ nehˬ-euˬ meh.

²Kʼoeˇ ngeh, Yaˬkoˆ nui ma pehˇ laˇ-awˇ, “Ngaˇ Miˬyehˇ-euˬ dah zaˇ mˇ dah nya ta loˇ. Nawˬ-ahˇ zaˬ maˬ bi jawˇ le ni jahˇ nehˬ-euˬ gʼaˬ Miˬyehˇ maˬ ngeuˇ-a loˇ” lehˇ ehˇ nehˬ-euˬ meh.

³Laˬkeˬlaˇ ehˇ-eu, “Ngaˬ-euˬ zaˬ kʼaˆ Biˇlaˬhaˇ jawˇ ma. Aˬ yawꞈ zaˬ jawˇ le ni, aˬ yawꞈ nehˬ-ehˇ yuꞈ taꞈ haw sheˇ. Kʼoeˇ loꞈ-ehˇ jahˇ naˇ, aˬ yawꞈ baˬ da neh ngaˇ zaˬ aˬ ma ya pyeuꞈ laˇ tehꞈ-a.”

⁴Kʼoeˇ naˇ, Laˬkeˬlaˇ-aˬ, aˬ yawꞈ-euˬ zaˬ kʼaˆ Biˇlaˬhaˇ-ahˇ Yaˬkoˆ nehˬ-ehˇ bi yuꞈ taꞈ-iˇ-euˬ meh.

⁵Biˇlaˬhaˇ aˬ nyiˇ pi leˇ-awˇ, Yaˬkoˆ gʼaˇ duˬ aˬ li tiˬ li ciˬ-euˬ meh.

⁶Kʼoeˇ ngeh, “Miˬyehˇ ngaˬ-euˬ myaˆ pyawˬ-ahˇ haw-awˇ yaˇ kʼaˬ daˇ-euˬ meh. Ngaˬ-euˬ shaˇ dawˬ-ahˇ aˬ yawꞈ naˇ haˬ-eu laꞈ kʼoeˇ, ngaˬ-ahˇ aˬ li tiˬ li biꞈ leꞈ-euˬ nga” lehˇ Laˬkeˬlaˇ ehˇ-awˇ, aˬ li kʼoeˇ li-ahˇ Daˬ[26] lehˇ myahˇ nehˬ-euˬ meh.

⁷Kʼoeˇ naˇ, Biˇlaˬhaˇ aˬ nyiˇ tiˬ poˆ paˇ pi leˇ-awˇ, Yaˬkoˆ gʼaˇ duˬ aˬ li tiˬ li paˇ ciˬ-euˬ meh.

⁸Kʼoeˇ ngeh, “Ngaˬ-euˬ aˬ yuiꞈ nehˬ-ehˇ ngaˇ yaw kʼaˆ-ehˇ ya dawꞈ ceh ceh-awˇ, nymˬ-mˇ ngaˇ dawꞈ gʼaˬ-euˬ ma” lehˇ Laˬkeˬlaˇ ehˇ-awˇ, aˬ li kʼoeˇ li-ahˇ Naˬtaˬliˇ[27] lehˇ myahˇ nehˬ-euˬ meh.

⁹Leˇaˬ-aˬ, yawˬ ha zaˬ maˬ paˇ jawˇ le nya-euˬ gaˇ kawˆ ya siˬ duˬ ngeh, Yaˬkoˆ-ahˇ aˬ yawꞈ-euˬ zaˬ kʼaˆ Ziˇlaˬpaˬ-ahˇ bi sheuˬ-euˬ meh.

¹⁰Kʼoeˇ naˇ, Yaˬkoˆ gʼaˇ duˬ Ziˇlaˬpaˬ aˬ li tiˬ li ciˬ-euˬ meh.

¹¹Kʼoeˇ ngeh, “Ngaˇ-aˬ, guiˬ lahˬ zawˇ huiˬ-eu tsawˇ haˬ tiˬ gʼaˬ nga” lehˇ Leˇaˬ ehˇ-awˇ, aˬ li kʼoeˇ li-ahˇ Gaˆ[28] lehˇ myahˇ nehˬ-euˬ meh.

¹²Kʼoeˇ naˇ, Yaˬkoˆ gʼaˇ duˬ Ziˇlaˬpaˬ aˬ li tiˬ li paˇ ciˬ-euˬ meh.

¹³Kʼoeˇ ngeh, Leˇaˬ ehˇ-eu, “Ngaˇ laˬ kʼaˬ cehˇ dui dui nya. Aˬ kaˇ naˇ, zaˬ miˬ zaˬ deuˬ ngaˬ-ahˇ Laˬ kʼaˬ cehˇ-eu gʼaˬ” lehˇ kuˇ tehꞈ-a lehˇ ehˇ-awˇ, aˬ li kʼoeˇ li-ahˇ Aˬshaˬ[29] lehˇ myahˇ nehˬ-euˬ meh.

¹⁴Cehˇ laˆ luiˆ yamˬ-ahˇ Luˇbeˬ deh yaˇ-ahˇ iˇ ngeh, zaˬ jawˇ lehˬ oꞈ[30] aˇ siˬ mawˇ-awˇ, aˬ yawꞈ aˬ ma-ahˇ pyaˆ kʼoꞈ nehˬ leꞈ-euˬ meh. “Nawˬ li neh pyaˆ kʼoꞈ laꞈ-euˬ zaˬ jawˇ lehˬ oꞈ aˇ siˬ kʼoeˇ, ngaˬ-ahˇ ui cuiˆ biꞈ laꞈ sheˇ” lehˇ, Leˇaˬ-ahˇ Laˬkeˬlaˇ shaˇ leˇ-euˬ meh.

¹⁵“Ngaˬ-euˬ kʼaˬ dzeˇ zaˬ-ahˇ sheuˬ geuꞈ-euˬ tehꞈ-ehˇ maˬ juˬ ni, ngaˬ li-euˬ zaˬ jawˇ lehˬ oꞈ aˇ siˬ gʼeh paˇ yuˇ-eu gʼeh te loˇ” lehˇ, Leˇaˬ ehˇ-eu meh. “Nawˬ li-euˬ zaˬ jawˇ lehˬ oꞈ aˇ siˬ kʼoeˇ ngaˬ-ahˇ biꞈ laꞈ naˇ, nymˇ ciꞈ nawˬ-ahˇ Yaˬkoˆ nehˬ-ehˇ bi yuꞈ taꞈ ma” lehˇ, Leˇaˬ-ahˇ Laˬkeˬlaˇ paˇ ehˇ nehˬ-euˬ meh.

¹⁶Kʼoeˇ ngeh miˇ, Yaˬkoˆ deh yaˇ-ahˇ iˇ-euˬ gʼoꞈ laˇ luꞈ gaˇ Leˇaˬ ha laˬ-iˇ-awˇ, “Nymˇ ciꞈ nawˇ ngaˬ nehˬ-ehˇ ya yuꞈ laˇ meh. Aˬ jeˬ miˇ neh ehˇ naˇ, ngaˬ li neh ngaˬ-ahˇ pyaˆ kʼoꞈ nehˬ laꞈ-euˬ zaˬ jawˇ lehˬ oꞈ aˇ siˬ Laˬkeˬlaˇ-ahˇ ngaˇ biꞈ-awˇ, nawˬ-ahˇ ngaˬ nehˬ-ehˇ bi yuꞈ-eu gʼaˇ duˬ shaˇ ngaˬ taˬ-euˬ ma” lehˇ ehˇ nehˬ-euˬ meh. Kʼoeˇ miˇ neh, kʼoeˇ ngeh miˇ Yaˬkoˆ hawˇ-eu Leˇaˬ aˬ nyaꞈ dzeˇ zaˬ yuꞈ taꞈ-euˬ meh.

¹⁷Leˇaˬ-euˬ guiˬ lahˬ shaˇ dawˬ-ahˇ Miˬyehˇ naˇ haˬ nehˬ-euˬ miˇ neh, Leˇaˬ aˬ nyiˇ pi leˇ-awˇ, Yaˬkoˆ gʼaˇ duˬ aˬ li ngaˬ gʼaˬ tiˬ gʼaˬ paˇ bi dehꞈ le-euˬ meh.

¹⁸“Ngaˬ-euˬ kʼaˬ dzeˇ zaˬ-ahˇ, ngaˬ-euˬ zaˬ kʼaˆ ngaˇ biꞈ nehˬ-euˬ miˇ neh, Miˬyehˇ ngaˬ-ahˇ aˇ poeˬ biꞈ laꞈ-euˬ nga” lehˇ Leˇaˬ ehˇ-awˇ, aˬ li kʼoeˇ li-ahˇ Iˇsaˬkaˬ[31] lehˇ myahˇ nehˬ-euˬ meh.

¹⁹Kʼoeˇ naˇ, Leˇaˬ aˬ nyiˇ tiˬ poˆ paˇ pi leˇ-awˇ, Yaˬkoˆ gʼaˇ duˬ aˬ li koꞈ li tiˬ li paˇ ciˬ-euˬ meh.

²⁰Kʼoeˇ ngeh, “Miˬyehˇ ngaˬ-ahˇ muiˬ-eu laꞈ sawˬ biꞈ laꞈ-euˬ nga. Nymˬ-mˇ poˆ jawˇ-aˬ, ngaˬ-euˬ kʼaˬ dzeˇ zaˬ ngaˬ-ahˇ ha geuꞈ tehꞈ-a. Aˬ jeˬ miˇ neh ehˇ naˇ, aˬ yawꞈ-euˬ gʼaˇ duˬ ngaˇ aˬ li koꞈ li bi jawˇ le gʼaˬ-euˬ ma” lehˇ Leˇaˬ ehˇ-awˇ, aˬ li kʼoeˇ li-ahˇ Zeˬbuˬloˬ[32] lehˇ myahˇ nehˬ-euˬ meh.

²¹Kʼoeˇ naˇ, aˬ yawꞈ aˬ buˇ tiˬ buˇ paˇ jawˇ le-awˇ, Diˇnaˆ lehˇ myahˇ nehˬ-euˬ meh.

²²Kʼoeˇ naˇ, Laˬkeˬlaˇ-ahˇ Miˬyehˇ noeˬ keuˆ-awˇ, aˬ yawꞈ-euˬ guiˬ lahˬ shaˇ dawˬ-ahˇ naˇ haˬ nehˬ-eu laꞈ kʼoeˇ, aˬ yawꞈ-ahˇ zaˬ bi jawˇ le-euˬ meh.

²³Aˬ yawꞈ aˬ nyiˇ pi leˇ-awˇ, aˬ li tiˬ li ciˬ-euˬ meh. Kʼoeˇ ngeh, “Miˬyehˇ ngaˬ-ahˇ aˬ li tiˬ li bi jawˇ le-awˇ, aˬ cawˬ ja bu-eu jeˬ laꞈ kʼoeˇ, ngaˬ-ahˇ bi buˬ-iˇ laꞈ-euˬ meh.

²⁴Sahˬpaˬ Miˬyehˇ ngaˬ-ahˇ aˬ li tiˬ li paˇ biꞈ laꞈ luꞈ-uˇ” lehˇ Laˬkeˬlaˇ ehˇ-awˇ, aˬ li kʼoeˇ li-ahˇ Yoˇsehˆ[33] lehˇ myahˇ nehˬ-euˬ meh.

²⁵Yoˇsehˆ dehꞈ le gʼaˬ ngeh jawˇ, Laˬbaˬ-ahˇ Yaˬkoˆ heu loꞈ-ehˇ ehˇ nehˬ-euˬ meh. “Ngaˬ-ahˇ pyehˬ nehˬ laꞈ-awˇ, ngaˬ-euˬ miˇ kʼahˬ-ahˇ bi gʼoꞈ-iˇ nehˬ laꞈ-awˬ.

²⁶Ngaˇ nawˬ-euˬ gaˇ mˇ nehˬ-euˬ baˬ da neh nawˬ neh bi sheuˬ dahˬ dzaˬ laꞈ-euˬ nawˬ buˇ deuˬ hawˇ-eu, ngaˬ-euˬ zaˬ deuˬ-ahˇ kʼawꞈ, bi sheuˬ kʼoꞈ gʼeh nehˬ laꞈ-awˬ. Ngaˇ nawˬ-ahˇ aˇ naˆ ni caw ba nehˬ-euˬ nawˇ siˬ nya meh.”

²⁷Laˬbaˬ ehˇ-eu, “Ngaˇ heu loꞈ-ehˇ ehˇ mawꞈ-eu ma. Nawˇ baˬ da neh Sahˬpaˬ Miˬyehˇ ngaˬ-ahˇ guiˬ lahˬ biꞈ laꞈ-euˬ gaˇ kawˆ-ahˇ, ngaˇ ja maw maw haw-awˇ ya siˬ-euˬ ma.

²⁸Teu miˇ neh, nawˇ kʼaˇ geuꞈ mawꞈ-eu jeˬ-ahˇ toeˬ-awˬ. Ngaˇ nawˬ-ahˇ biꞈ ma.”

²⁹Yaˬkoˆ ehˇ-eu, “Nawˬ-euˬ gʼaˇ duˬ ngaˇ gaˇ aˇ naˆ ni mˇ-euˬ gaˇ kawˆ maˬ ehˇ, ngaˬ-euˬ aˬ laꞈ laꞈ kʼoeˇ nawˬ-euˬ yawˇ aˇ myaˆ ni myaˬ laˇ behˇ laˇ-euˬ gaˇ kawˆ maˬ ehˇ, nawˇ siˬ nya luꞈ meh.

³⁰Ngaˇ maˬ laˇ keuˆ mi naˆ-ehˇ nawˬ-euˬ jeˬ zaˬ ui cuiˆ tehꞈ-ehˇ jawˇ-euˬ kʼawꞈ, nymˬ-mˇ myaˬ dui dui laˇ taˬ-euˬ meh. Ngaˇ kʼaˇ iˇ kʼaˇ laˇ, kʼaˇ mˇ kʼaˇ shaˇ-eu jeˬ laꞈ kʼoeˇ, Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-eu meh. Nymˬ-mˇ poˆ jawˇ-aˬ, ngaˇ kʼawꞈ nymˇ dahˬ dahˬ doˆ-iˇ-awˇ, yawˬ ha-euˬ miˬ sawˇ zaˬ deuˬ-ahˇ mˇ cu-eu aˇ yamˬ tsaˬ laˇ-euˬ meh.”

³¹Laˬbaˬ ehˇ-eu, “Ngaˇ nawˬ-ahˇ aˬ jeˬ ya biꞈ nmˇ.” Yaˬkoˆ ehˇ-eu, “Nawˬ-ahˇ ngaˇ tiˬ jeˬ-iˬ maˬ shaˇ. Ehˇ kʼawꞈ, ngaˇ ehˇ gaˇ nawˇ geuꞈ coeˇ naˇ, nawˬ-euˬ yawˇ yawˇ maꞈ-ahˇ ngaˇ bo saˆ te siˬ.

³²Nawˬ-euˬ yawˇ deuˬ hawˇ-eu ciꞈ myehꞈ deuˬ kʼaˇ jawˇ gaˇ iˬ nah ngaˇ iˇ doe-awˇ, yaw naˆ kʼaˇ naˆ-eu yawˇ deuˬ hawˇ-eu yaw byaꞈ kʼaˇ byaꞈ-eu ciꞈ myehꞈ deuˬ tseˇ doˆ ma. Ngaˬ-euˬ gʼaˬ gaˇ poeˬ ngaˇ nawˬ-ahˇ shaˇ mawꞈ-eu-aˬ, heu myaˆ tehꞈ ma.

³³Nawˬ-euˬ kʼoeˇ taˆ ngaˇ nui ma dawˇ coe ni taˬ nga loˇ, maˬ taˬ nga loˇ lehˇ, nawˇ yaw awˇ laꞈ-ehˇ pyehˆ tseˇ duˬ nya tehꞈ-a. Aˬ kaˇ ngaˬ-euˬ jeˬ zaˬ-ahˇ nawˇ pyehˆ tseˇ laˇ ngeh, yaw byaꞈ maˬ byaꞈ-eu ciˬ myehꞈ tiˬ mawˇ na maˬ ehˇ, yaw naˆ maˬ naˆ-eu yawˇ tiˬ mawˇ na maˬ ehˇ, nawˇ ya mawˇ lawˬ naˇ, ngaˬ neh kʼoeˬ geuꞈ-euˬ jeˬ zaˬ nga lehˇ, nawˇ ehˇ nya tehꞈ-a.”

³⁴Laˬbaˬ ehˇ-eu, “Tsaˬ miˇ-a. Nawˇ kʼaˇ ehˇ-eu loꞈ-ehˇ jahˇ-awˬ.”

³⁵Ehˇ kʼawꞈ Laˬbaˬ-aˬ, yaw byaꞈ kʼaˇ byaꞈ-eu ciꞈ myehꞈ ciꞈ buˬ deuˬ maˬ ehˇ, yaw byaꞈ byaꞈ-awˇ yaw pyuˇ kʼaˇ keuˬ-eu ciꞈ myehꞈ ciꞈ ma deuˬ maˬ ehˇ, yaw naˆ kʼaˇ naˆ-eu yawˇ deuˬ maˬ ehˇ, kʼoeˇ ngeh nah neh tseˇ doˆ jiˇ-awˇ, aˬ yawꞈ-euˬ aˬ li deuˬ neh bi bo saˆ taˬ-euˬ meh.

³⁶Kʼoeˇ naˇ, jeˬ zaˬ kʼoeˇ deuˬ-ahˇ, Yaˬkoˆ jawˇ gaˇ neh smˬ nah gaˇ ma kaˬ gaˇ bi teh taˬ-iˇ-euˬ meh. Dzeˇ yaꞈ-euˬ Laˬbaˬ-euˬ jeˬ zaˬ deuˬ-ahˇ, Yaˬkoˆ neh bo saˆ nehˬ-euˬ meh.

³⁷Yaˬkoˆ-aˬ, pawˇpaˬlaˬ,[34] aˬlaˬmoˬ,[35] paˬlaˬneˬ[36] lehˇ kuˇ-eu aˇ bawˇ smˇ jeˬ-euˬ uˬ laꞈ yaw jmˬ deuˆ-awˇ, aˇ kawˆ yaw pyuˇ baw baw-ehˇ yaw byaꞈ byaꞈ-ehˇ pyeuꞈ laˇ ni, baˆ kʼoˆ leuꞈ-euˬ meh.

³⁸Yaw byaꞈ leuꞈ byaꞈ taˬ-euˬ uˬ laꞈ kʼoeˇ deuˬ-ahˇ, jeˬ zaˬ deuˬ iˇ cuꞈ dawˇ-eu kʼawˇ lawˬ mehˬ shi soeˬ tsoˆ taˬ nehˬ-euˬ meh. Jeˬ zaˬ deuˬ iˇ cuꞈ kʼaˇ dawˇ le ngeh zaˬ shaˇ-eu miˇ neh, aˬ yawꞈ kʼoeˇ loꞈ-ehˇ jahˇ-euˬ meh.

³⁹Kʼoeˇ miˇ neh, aˇ bawˇ uˬ laꞈ kʼoeˇ deuˬ mehˬ shi ciꞈ myehꞈ ciꞈ zaˬ shaˇ ngeh, yaw byaꞈ byaꞈ-ehˇ gʼeh-eu ciꞈ myehꞈ ciꞈ zaˬ deuˬ ga le-eu meh.

⁴⁰Yaˬkoˆ-aˬ, yawˇ deuˬ-ahˇ ciꞈ myehꞈ deuˬ nehˬ-ehˇ maˬ bi keuˬ leˇ ni bi jawˇ-awˇ, jeˬ zaˬ kʼoeˇ deuˬ-ahˇ, Laˬbaˬ-euˬ jeˬ zaˬ yaw byaꞈ deuˬ hawˇ-eu yaw naˆ deuˬ jawˇ-eu paw bi pyawˇ-euˬ meh. Aˬ yawꞈ kʼoeˇ loꞈ-ehˇ jahˇ-awˇ, aˬ yawꞈ-euˬ jeˬ zaˬ deuˬ bi myaˬ laˇ-awˇ, Laˬbaˬ-euˬ jeˬ zaˬ deuˬ nehˬ-ehˇ maˬ bi keuˬ leˇ ni cu-euˬ meh.

⁴¹Loˆ dui dui-eu jeˬ zaˬ deuˬ iˇ cuꞈ kʼawˇ lawˬ mehˬ shi zaˬ shaˇ ngeh, jeˬ zaˬ kʼoeˇ deuˬ mehˬ shi baˆ kʼoˆ leuꞈ byaꞈ taˬ-euˬ aˇ bawˇ uˬ laꞈ kʼoeˇ deuˬ soeˬ tsoˆ taˬ nehˬ-euˬ meh.

⁴²Ehˇ kʼawꞈ, maˬ loˆ-eu jeˬ zaˬ deuˬ zaˬ shaˇ ngeh, aˬ yawꞈ kʼoeˇ loꞈ-ehˇ maˬ jahˇ nehˬ-a. Gʼawˬ myahˇ maˬ gʼeh-ehˇ, Yaˬkoˆ-euˬ jeˬ zaˬ deuˬ loˆ dui dui laˇ-awˇ, Laˬbaˬ-euˬ jeˬ zaˬ deuˬ maˬ loˆ ni pyeuꞈ-iˇ-euˬ meh.

⁴³Kʼoeˇ miˇ neh, Yaˬkoˆ smˇ muiˬ muiˬ dui dui laˇ-awˇ, yawˇ maˬ ehˇ, ciꞈ myehꞈ maˬ ehˇ, zaˬ kʼaˆ maˬ ehˇ, law taw maˬ ehˇ, mahˬ tahˬ laˆ maˬ ehˇ, jawˇ myaˬ dui dui laˇ-euˬ meh.