Read Akha Aˇ dahˬ 31 Bible Online

Aˇ dahˬ 31 - Akha bible

Aˇ dahˬ 31

¹“Ngaˬ da-euˬ myawˬ gahˬ dawˬ tawˆ luꞈ, Yaˬkoˆ neh yuˇ geuꞈ jiˇ-euˬ meh. Yaˬkoˆ kʼaˇ jaˆ-eu pyuˇ shuiˇ myawˬ gahˬ dawˬ tawˆ luꞈ, ngaˬ da-euˬ tehꞈ meh” lehˇ, Laˬbaˬ-euˬ aˬ li deuˬ ehˇ luꞈ-eu Yaˬkoˆ ya gaˬ-euˬ meh.

²Laˬbaˬ gʼaˬ kʼawꞈ, yaw beh loꞈ-ehˇ myaˆ pyawˬ maˬ pyuˇ ni pyeuꞈ-iˇ-euˬ gaˇ aˬ yawꞈ ya mawˇ-euˬ meh.

³Kʼoeˇ ngeh, “Nawˬ da jawˇ-eu miˇ kʼahˬ-ahˇ, nawˬ-euˬ aˬ yuiꞈ aˬ nyiˇ deuˬ jawˇ gaˇ gʼoꞈ-iˇ-awˬ. Nawˬ nehˬ-ehˇ ngaˇ jawˇ ma” lehˇ, Yaˬkoˆ-ahˇ Sahˬpaˬ Miˬyehˇ ehˇ nehˬ-euˬ meh.

⁴Yaˬkoˆ-aˬ, Laˬkeˬlaˇ hawˇ-eu Leˇaˬ-ahˇ, aˬ yawꞈ jeˬ zaˬ bo luꞈ-eu deh ga-ahˇ oe-awˬ lehˇ tsaꞈ ahˇ gʼeh-euˬ meh.

⁵Aˬ yawꞈ nyaꞈ-ahˇ aˬ yawꞈ heu loꞈ-ehˇ ehˇ nehˬ-euˬ meh. “Naw nyaꞈ nmˇ-euˬ aˬ da-aˬ, aˇ hu aˇ nah loꞈ-ehˇ, ngaˬ-ahˇ yaw kʼaˆ-ehˇ haw mawꞈ gaˇ maˬ duˇ nga. Ehˇ kʼawꞈ, ngaˬ da-euˬ Miˬyehˇ ngaˬ nehˬ-ehˇ jawˇ luꞈ meh.

⁶Naw nyaꞈ-euˬ aˬ da gʼaˇ duˬ, ngaˇ aˇ naˆ ni leh jeh-awˇ gaˇ mˇ-euˬ naw nyaꞈ nyiˬ gʼaˬ luꞈ siˬ nya meh.

⁷Aˬ yawꞈ gʼaˇ duˬ kʼoeˇ naˆ ni ngaˇ mˇ nehˬ gʼaˬ-euˬ kʼawꞈ, aˬ yawꞈ ngaˬ-ahˇ jaˬ myawꞈ myawꞈ-awˇ, tseˇ poˆ keuˆ ni ngaˬ-euˬ gʼaˬ gaˇ aˇ poeˬ-ahˇ mehˇ shuiˇ shuiˇ dzaˬ-euˬ meh. Ehˇ kʼawꞈ, aˬ yawꞈ ngaˬ-ahˇ yehˬ bawˬ sehˇ lu-ehˇ maˬ ya jahˇ ni, Miˬyehˇ haw piˇ nehˬ laꞈ-euˬ meh.

⁸Aˬ myah luꞈ, Yaw byaꞈ byaꞈ-ehˇ gʼeh-eu jeˬ zaˬ deuˬ, nawˬ-euˬ gʼaˬ gaˇ poeˬ sawˇ nehˬ ma lehˇ Laˬbaˬ kʼaˇ ehˇ ngeh, ciꞈ myehꞈ ciꞈ zaˬ hawˇ-eu yawˇ zaˬ dawˬ tawˆ luꞈ, yaw byaꞈ byaꞈ-ehˇ gʼeh-eu deuˬ tehꞈ-ehˇ ga le-eu meh. Yaw kawˆ yaw kawˆ-ehˇ byaꞈ-eu jeˬ zaˬ deuˬ, nawˬ-euˬ gʼaˬ gaˇ poeˬ sawˇ nehˬ ma lehˇ aˬ yawꞈ paˇ ehˇ naˇ, ciꞈ myehꞈ hawˇ-eu yawˇ dawˬ tawˆ luꞈ, yaw kawˆ yaw kawˆ-ehˇ byaꞈ-eu deuˬ tehꞈ-ehˇ ga le-eu meh.

⁹Kʼoeˇ loꞈ-ehˇ jahˇ-awˇ, naw nyaꞈ-euˬ aˬ da-euˬ jeˬ zaˬ deuˬ, Miˬyehˇ ngaˬ-ahˇ biꞈ laꞈ-euˬ meh.

¹⁰“Jeˬ zaˬ deuˬ zaˬ shaˇ-eu aˇ yamˬ keuˆ laˇ ngeh, yaw byaꞈ byaꞈ-ehˇ gʼeh-eu jeˬ zaˬ aˬ buˬ deuˬ hawˇ-eu, yaw kawˆ kawˆ-ehˇ byaꞈ-eu jeˬ zaˬ aˬ buˬ deuˬ zaˬ shaˇ luꞈ gaˇ ngaˇ yuꞈ maˆ maˆ mawˇ-euˬ ma.

¹¹Yuꞈ maˆ maˆ-eu laꞈ kʼoeˇ, Miˬyehˇ gʼaˬ kʼehˇ ngaˬ-ahˇ kuˇ le-awˇ, ngaˇ oˬ toˬ nehˬ-euˬ ma.

¹²Aˬ yawꞈ ehˇ-eu, Haw sheˇ. Zaˬ shaˇ luꞈ-eu jeˬ zaˬ aˬ buˬ deuˬ dawˬ tawˆ luꞈ, yaw byaꞈ byaꞈ-ehˇ gʼeh-eu deuˬ hawˇ-eu, yaw kawˆ kawˆ-ehˇ byaꞈ-eu deuˬ tehꞈ maˬ ngeuˇ nga loˇ. Laˬbaˬ neh nawˬ-ahˇ kʼaˇ jahˇ nehˬ-euˬ dawˬ tawˆ luꞈ ngaˇ siˬ nya-eu miˇ neh, nawˬ-ahˇ muiˬ leˇ ni ngaˇ heu loꞈ-ehˇ jahˇ nehˬ laꞈ-eu ma.

¹³Beˬdeˬlaˇ lehˇ kuˇ-euˬ jawˇ duˬ-ahˇ, kʼaˬ lo tiˬ siˬ kʼoeˇ taˆ nawˇ tsiˇ shehˆ daˆ-awˇ, noeˬ mawˇ-eu gʼaˇ duˬ damˬ nehˬ-eu laꞈ kʼoeˇ, saˇ jaˇ dzaˬ ngeh, nawˬ-euˬ mehˬ shi doˆ le-euˬ Miˬyehˇ-aˬ, ngaˇ ma. Nawˇ dehꞈ le-euˬ miˇ kʼahˬ-ahˇ gʼoꞈ-iˇ-eu gʼaˇ duˬ, nymˬ-mˇ lehˬ hmˬ-awˬ lehˇ ehˇ-eu meh.”

¹⁴Laˬkeˬlaˇ hawˇ-eu Leˇaˬ aˬ nyaꞈ nmˇ Yaˬkoˆ-ahˇ ehˇ nehˬ-eu, “Aˬ da-euˬ jeˬ biˇ nga nyaꞈ nmˇ za paˬ-ehˇ gʼeh-eu tiˬ jeˬ-iˬ maˬ jaˆ.

¹⁵Nga nyaꞈ nmˇ-ahˇ, boeˇ miˬ siˬ kʼaˬ loꞈ-ehˇ aˬ yawꞈ sawˇ dzeh nehˬ laꞈ-euˬ meh. Nga nyaꞈ nmˇ-ahˇ ahˬ dzaˬ-awˇ za-euˬ aˇ poeˬ dawˬ tawˆ luꞈ, aˬ yawꞈ zmˬ dzeh jiˇ-euˬ meh.

¹⁶Nga nyaꞈ nmˇ-euˬ aˬ da-euˬ laꞈ-ahˇ neh, Miˬyehˇ neh yuˇ kʼoꞈ-euˬ pyuˇ shuiˇ myawˬ gahˬ heu deuˬ dawˬ tawˆ luꞈ, aˬ dui maꞈ hawˇ-eu aˬ dui maꞈ-euˬ zaˬ deuˬ-ahˇ oꞈ-eu pyuˇ shuiˇ myawˬ gahˬ deuˬ meh. Miˬyehˇ nawˬ-ahˇ kʼaˇ ehˇ nehˬ laꞈ-euˬ loꞈ-ehˇ mˇ-awˬ.”

¹⁷Kʼoeˇ naˇ, Kaˬnaˬ miˇ kʼahˬ-ahˇ aˬ yawꞈ aˬ da jawˇ gaˇ gʼoꞈ-iˇ-eu lehˇ, Yaˬkoˆ lehˬ hmˬ-euˬ meh. Aˬ yawꞈ-euˬ miˬ zaˬ deuˬ hawˇ-eu aˬ yawꞈ-euˬ zaˬ deuˬ-ahˇ law taw kʼoeˇ taˆ bi dziˬ-awˇ, aˬ yawꞈ-euˬ jeˬ zaˬ deuˬ mehˬ hu paw bi teh dzeuˇ gʼeh-euˬ meh. Maˬsoˬpoˬtaˬmiˇ miˇ kʼahˬ laꞈ kʼoeˇ jawˇ luꞈ ngeh, aˬ yawꞈ neh kʼaˇ mˇ za-euˬ jeˬ dawˬ tawˆ luꞈ yuˇ kʼoꞈ gʼeh-euˬ meh.

¹⁸

¹⁹Laˬbaˬ yawˇ caꞈ hm tehˬ-iˇ-euˬ kaˬ-ahˇ, Laˬbaˬ-euˬ nymˇ jiˇ uˬ duˬ tahˬ-eu tahˬ pahˬ aˬ ma mawˇ kawˇ deuˬ-ahˇ Laˬkeˬlaˇ kʼoeˬ-euˬ meh.

²⁰Yaˬkoˆ-aˬ, aˬ yawꞈ gʼoꞈ-iˇ-eu lehˇ gʼeh-eu gaˇ kawˆ Laˬbaˬ-ahˇ maˬ bi siˬ ni, tsawˇ gahˇ gahˇ dzeuˇ-awˇ cehˆ-euˬ meh.

²¹Aˬ yawꞈ kʼaˇ jaˆ-eu jeˬ dawˬ tawˆ luꞈ yuˇ-awˇ, yaw kawˇ-ehˇ doˆ-iˇ-euˬ meh. Uˇpaˬlaˇ lawˇ baˬ tsehˆ doˆ-awˇ, Giˇlaˆ gawˬ jawˬ paw daˆ leˇ-euˬ meh.

²²Smˬ nah byah laˇ ngeh hawˇ-eu, Yaˬkoˆ cehˆ gʼoꞈ-euˬ gaˇ kawˆ Laˬbaˬ ya siˬ-euˬ meh.

²³Kʼoeˇ ngeh, aˬ yawꞈ-euˬ tsawˇ haˬ deuˬ sheuˬ-awˇ, Yaˬkoˆ-euˬ mehˬ nah teh-euˬ meh. Shiꞈ nah teh keuˆ laꞈ ngeh, Giˇlaˆ gawˬ jawˬ kʼoeˇ taˆ, Yaˬkoˆ-ahˇ aˬ yawꞈ teh miˇ leˇ-euˬ meh.

²⁴Kʼoeˇ ngeh miˇ, yuꞈ maˆ laꞈ kʼoeˇ Laˬbaˬ jawˇ gaˇ Miˬyehˇ oe-awˇ, “Tiˬ jeˬ gʼeh-awˇ neh-iˬ Yaˬkoˆ-ahˇ maˬ ya laˆ guˆ-eu gʼaˇ duˬ, yaw kʼaˆ kʼaˆ-ehˇ yahˇ-awˬ” lehˇ ehˇ nehˬ le-euˬ meh.

²⁵Yaˬkoˆ-aˬ, gawˬ jawˬ tiˬ jawˬ kʼoeˇ taˆ sehˬ gʼawˆ gʼawˆ-awˇ yaꞈ luꞈ-eu meh. Laˬbaˬ gʼaˬ kʼawꞈ, aˬ yawꞈ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ, Giˇlaˆ gawˬ jawˬ kʼoeˇ taˆ bawˇ tsahˬ-ahˇ sehˬ gʼawˆ gʼawˆ-awˇ yaꞈ-euˬ meh.

²⁶Yaˬkoˆ-ahˇ Laˬbaˬ ehˇ nehˬ-eu, “Aˬ jeˬ miˇ neh nawˇ ngaˬ-ahˇ tsawˇ gahˇ gahˇ-awˇ, ngaˬ buˇ deuˬ-ahˇ guiˇ deuˆ gaˇ nyehꞈ mi-euˬ zaˬ mi zaˬ deuˬ loꞈ-ehˇ, aˬ joˆ-ehˇ toˆ-ehˇ sheuˬ-awˇ cehˆ te.

²⁷Aˬ jeˬ miˇ neh, ngaˬ-ahˇ tiˬ pawꞈ-iˬ maˬ bi siˬ ni tsawˇ gahˇ gahˇ dzeuˇ-awˇ cehˆ kʼoeˬ kʼoeˬ te. Nawˇ ngaˬ-ahˇ yaw muiˬ paˬ-ehˇ ehˇ gaˬ law nmˇ-aˬ, tahˬ hawˇ-eu deuˇ-mˬ diˬ-awˇ gaˇ nyeh nyeh-eu laꞈ kʼoeˇ, gaˇ pehˇ sheuˬ keuˆ ha laˇ-eu ma tawˇ.

²⁸Ngaˬ buˇ deuˬ hawˇ-eu ngaˬ-euˬ oeˬ paˬ oeˬ ma deuˬ-ahˇ maˬ ya gʼawˬ-iˇ mi naˆ-ehˇ, mehˬ cuˇ cuˇ nehˬ-eu aˇ yamˬ kʼawꞈ nawˇ ngaˬ-ahˇ maˬ biꞈ laꞈ-a. Nawˇ teu naˆ naˆ-ehˇ aˬ joˆ-ehˇ gʼeh kʼmˬ-eu nya.

²⁹Nymˬ-mˇ poˆ jawˇ-aˬ, ngaˇ nawˬ-ahˇ yehˬ bawˬ-ehˇ jahˇ nehˬ mawꞈ law nmˇ-aˬ, jahˇ nya ma. Ehˇ kʼawꞈ, ‘Tiˬ jeˬ gʼeh-awˇ neh-iˬ nawˬ-ahˇ taˬ laˆ guˆ nehˬ’ lehˇ, nawˬ da-euˬ Miˬyehˇ miˇ ciꞈ ngaˬ-ahˇ ehˇ le-euˬ meh.

³⁰Nawˇ iˇ kahˇ-ahˇ aˇ dzehˬ dzeuˇ ni gʼoꞈ-iˇ mawꞈ-eu miˇ neh cehˆ-euˬ nga lehˇ, ngaˇ siˬ nya ma. Ehˇ kʼawꞈ, ngaˬ-euˬ nymˇ jiˇ uˬ duˬ tahˬ luꞈ-eu tahˬ pahˬ aˬ ma mawˇ kawˇ deuˬ-ahˇ, aˬ jeˬ miˇ neh nawˇ kʼoeˬ teˬ.”

³¹Yaˬkoˆ ehˇ-eu, “Nawˬ buˇ deuˬ-ahˇ nawˇ paˇ sheuˬ kʼoꞈ jiˇ-eu baw le lehˇ ngaˇ noeˬ guˆ-eu miˇ neh cehˆ-euˬ ma.

³²Ehˇ kʼawꞈ, heu gaˇ jawˇ-eu tsawˇ haˬ deuˬ laꞈ kʼoeˇ, tiˬ gʼaˬ na nawˬ-euˬ tahˬ pahˬ aˬ ma mawˇ kawˇ yuˇ lawˬ naˇ, tsawˇ haˬ kʼoeˇ gʼaˬ-ahˇ nawˇ sehꞈ-awˬ. Heu gaˇ jawˇ luꞈ-eu tsawˇ haˬ heu myaˆ ni gʼeh-eu mehˬ shi poˆ haw-awˇ, nawˬ-euˬ mˇ myawˬ jaˆ-eu mawˇ naˇ yuˇ kʼoꞈ-awˬ.” Laˬbaˬ-euˬ tahˬ pahˬ aˬ ma mawˇ kawˇ kʼoeˇ deuˬ-ahˇ, Laˬkeˬlaˇ neh kʼoeˬ taˬ-euˬ gaˇ kawˆ Yaˬkoˆ maˬ siˬ nya-a.

³³Yaˬkoˆ-euˬ sehˬ gʼawˆ laꞈ kʼoeˇ maˬ ehˇ, Leˇaˬ-euˬ sehˬ gʼawˆ laꞈ kʼoeˇ maˬ ehˇ, zaˬ miˬ zaˬ zaˬ kʼaˆ nyiˬ gʼaˬ luꞈ-euˬ sehˬ gʼawˆ laꞈ kʼoeˇ maˬ ehˇ, Laˬbaˬ uˇ-iˇ-awˇ goˬ doe kʼawꞈ, aˬ yawꞈ-euˬ tahˬ pahˬ aˬ ma mawˇ kawˇ kʼoeˇ deuˬ maˬ goˬ mawˇ nya-a. Kʼoeˇ naˇ, Laˬkeˬlaˇ-euˬ sehˬ gʼawˆ laꞈ kʼoeˇ aˬ yawꞈ uˇ-iˇ-euˬ meh.

³⁴Tahˬ pahˬ aˬ ma mawˇ kawˇ kʼoeˇ deuˬ-ahˇ Laˬkeˬlaˇ yuˇ-awˇ, law taw kʼaˆ daˬ laꞈ kʼoeˇ nmꞈ zaꞈ-awˇ, kʼaˆ daˬ kʼoeˇ taˆ nuiˇ luꞈ-eu meh. Laˬkeˬlaˇ-euˬ sehˬ gʼawˆ gʼawˆ lah-ehˇ Laˬbaˬ goˬ doe jiˇ-euˬ kʼawꞈ, tahˬ pahˬ aˬ ma mawˇ kawˇ kʼoeˇ deuˬ-ahˇ maˬ goˬ mawˇ nya-a.

³⁵Kʼoeˇ ngeh, “Ngaˬ-ahˇ nui ma taˬ pehˇ da-oˇ. Nymˬ-mˇ ngaˇ ba la mawˇ-eu aˇ yamˬ pyeuꞈ-eu miˇ neh, gawˬ yawꞈ maˬ yawꞈ nya nya” lehˇ, aˬ yawꞈ aˬ da Laˬbaˬ-ahˇ Laˬkeˬlaˇ ehˇ nehˬ-euˬ meh. Kʼoeˇ naˇ, tahˬ pahˬ aˬ ma mawˇ kawˇ kʼoeˇ deuˬ-ahˇ Laˬbaˬ maˬ goˬ mawˇ nya-ehˇ byehˇ-euˬ meh.

³⁶Kʼoeˇ ngeh jawˇ, Yaˬkoˆ nui ma pehˇ dui dui laˇ-awˇ ehˇ-eu, “Ngaˇ aˬ jeˬ laˆ ca taˬ-eu jaˆ ta. Ngaˬ-euˬ mehˬ nah nawˇ caw teh laˇ paˬ-ehˇ, ngaˬ neh mˇ bahˬ taˬ-euˬ aˬ jeˬ jaˆ ta.

³⁷Ngaˬ-euˬ kʼaˆ behˆ dawˬ tawˆ luꞈ nawˇ goˬ doe jiˇ-euˬ maˬ ngeuˇ loˇ. Nawˬ-euˬ mˇ myawˬ aˇ myaˆ hmˬ goˬ mawˇ teˬ. Nawˬ-euˬ tsawˇ haˬ deuˬ hawˇ-eu, ngaˬ-euˬ tsawˇ haˬ deuˬ mehˬ shi, nymˬ-mˇ yuˇ doˆ leꞈ-awˬ. Aˇ nyaꞈ aˬ geu gʼaˬ lehˬ nga lehˇ aˬ yawꞈ maꞈ bi daˇ law.

³⁸Ngaˇ nawˬ nehˬ-ehˇ jawˇ laꞈ-euˬ, nyiˬ tseˇ kʼoꞈ byah laˇ-euˬ ma. Aˇ yamˬ heu myah ni gʼeh-eu laꞈ kʼoeˇ, nawˬ-euˬ yawˇ hawˇ-eu ciꞈ myehꞈ deuˬ myaˬ laˇ behˇ laˇ tehˇ tehˬ luꞈ-eu kʼawꞈ, nawˬ-euˬ yawˇ yawˇ maꞈ laꞈ kʼoeˇ-euˬ yawˇ tiˬ mawˇ-iˬ ngaˇ maˬ sehꞈ dzaˬ haw-aˬ.

³⁹Nawˬ-euˬ yawˇ deuˬ-ahˇ bawˇ tsahˬ jeˬ zaˬ yaw haiˬ deuˬ neh kawꞈ sehꞈ-awˇ, ya sm-iˇ-euˬ aˬ geu poˆ maˬ kaˬ, sm-euˬ shaˬ bymˇ kʼoeˇ ngaˇ tehꞈ-ehˇ baꞈ-euˬ ma. Yawˬ ha-ahˇ maˬ bi daˇ laˇ-eu gʼaˇ duˬ, ngaˬ neh laˆ sehꞈ-euˬ maˬ ngeuˇ lehˇ ngaˇ ehˇ-awˇ, nawˬ-ahˇ baꞈ mawˇ nehˬ le-euˬ tiˬ poˆ-iˬ maˬ jaˆ. Uˬ ciꞈ nah gʼahˇ maˬ tseˇ paˆ ni, jeˬ zaˬ kʼaˇ byoˆ ngeh nawˇ ngaˬ-ahˇ bi tsoeˬ laꞈ-euˬ meh.

⁴⁰Nah gʼahˇ paw nahˇ tsaˇ kʼaˆ ngeh, nahˇ tsaˇ lawꞈ lawꞈ-ehˇ gʼawˬ mya poˆ ya shaˬ-awˇ, uˬ ciꞈ paw yaw gaˆ gaˆ dui dui-eu miˇ neh, maˬ yuꞈ kʼaˆ leˇ ni gʼawˬ mya miˇ shaˬ bya-euˬ ma.

⁴¹Kʼoeˇ loꞈ-ehˇ shaˬ shaˬ-ehˇ, nawˬ nehˬ-ehˇ nyiˬ tseˇ kʼoꞈ ngaˇ jawˇ byah-euˬ ma. Nawˬ buˇ nyiˬ buˇ-ahˇ sheuˬ-euˬ poeˬ tseˇ oeˬ kʼoꞈ hawˇ-eu, nawˬ-euˬ jeˬ zaˬ bo saˆ-eu gʼaˇ duˬ koꞈ kʼoꞈ jawˇ byah-euˬ ma. Nawˬ-euˬ gaˇ kʼoeˇ naˆ naˆ-ehˇ ngaˇ mˇ nehˬ taˬ-euˬ kʼawꞈ, ngaˬ-euˬ gʼaˬ gaˇ poeˬ-ahˇ, tseˇ poˆ keuˆ ni nawˇ mehˇ shuiˇ shuiˇ dzaˬ-euˬ meh.

⁴²Nymˬ-mˇ kʼawꞈ ni, ngaˬ bawˇ Aˬbyaˬhaˬ hawˇ-eu ngaˬ da Iˇtsaˆ-euˬ Miˬyehˇ ngaˬ nehˬ-ehˇ maˬ jawˇ law nmˇ-aˬ, nawˇ ngaˬ-ahˇ tiˬ jeˬ-iˬ maˬ bi yuˇ ni, yawꞈ ngehꞈ-ehˇ bi gʼoꞈ-iˇ laꞈ-eu yaw duˬ baw tehꞈ-a. Ehˇ kʼawꞈ, ngaˬ neh mˇ-euˬ gaˇ hawˇ-eu, ngaˇ ya daˬ-eu shaˬ zahˬ-ahˇ Miˬyehˇ mawˇ-euˬ miˇ neh, miˇ ciꞈ nawˬ-ahˇ laˆ tsoeˬ-euˬ meh.”

⁴³Yaˬkoˆ-ahˇ Laˬbaˬ ehˇ nehˬ-eu, “Zaˬ miˬ zaˬ heu deuˬ-aˬ, ngaˬ-euˬ zaˬ miˬ pyeuꞈ-eu ma. Aˬ yawꞈ maꞈ-euˬ zaˬ deuˬ hawˇ-eu, jeˬ zaˬ heu deuˬ dawˬ tawˆ luꞈ kʼawꞈ, ngaˬ-euˬ tehꞈ ma. Aˬ diˇ aˬ maˇ ya ehˇ naˇ, nymˬ-mˇ heu gaˇ nawˇ mawˇ luꞈ-eu myawˬ gahˬ heu deuˬ dawˬ tawˆ luꞈ kʼawꞈ, ngaˬ-euˬ tehꞈ-ehˇ pyeuꞈ-eu ma. Ehˇ kʼawꞈ, ngaˬ buˇ deuˬ hawˇ-eu ngaˬ-euˬ oeˬ paˬ oeˬ ma deuˬ-ahˇ ngaˇ maˬ gʼeu tehˬ nya-aˇ.

⁴⁴Teu miˇ neh, aˇ nyaꞈ yaw kaˬ saˇ jaˇ dzaˬ-awˇ, saˇ jaˇ heu maˬ bi byoˆ-iˇ ni noeˬ keuˆ-eu gʼaˇ duˬ, kʼaˬ lo tiˬ bymˇ gʼoˆ bymˇ kaˇ-euˇ.”

⁴⁵Kʼoeˇ ngeh, Yaˬkoˆ kʼaˬ lo yaw huiˬ tiˬ siˬ yuˇ-awˇ, noeˬ keuˆ-eu gʼaˇ duˬ kʼahˬ tuˇ-euˬ meh.

⁴⁶Kʼoeˇ naˇ, aˬ yawꞈ-euˬ tsawˇ haˬ deuˬ-ahˇ, kʼoeˇ gaˇ kʼaˬ lo bi gʼoˆ bymˇ-euˬ meh. Kʼaˬ lo lo bymˇ kʼoeˇ-euˬ gaˇ dzeˇ, aˬ yawꞈ maꞈ hawˬ tiˬ byawˇ dzaˬ taꞈ-euˬ meh.

⁴⁷Kʼaˬ lo lo bymˇ kʼoeˇ bymˇ-ahˇ, Laˬbaˬ neh Yeˇgaˬsaˬhaˬduˇtaˆ[37] lehˇ myahˇ nehˬ-awˇ, Yaˬkoˆ neh Gaˬliˆ[38] lehˇ myahˇ nehˬ-euˬ meh.

⁴⁸Kʼoeˇ ngeh, “Kʼaˬ lo lo bymˇ heu bymˇ-aˬ, aˇ nyaꞈ nyiˬ gʼaˬ luꞈ noeˬ keuˆ-eu gʼaˇ duˬ pyeuꞈ-eu ma” lehˇ, Yaˬkoˆ-ahˇ Laˬbaˬ ehˇ nehˬ-euˬ meh. Kʼoeˇ miˇ neh, jawˇ duˬ kʼoeˇ tsahˇ-ahˇ, Gaˬliˆ lehˇ kuˇ-euˬ meh.

⁴⁹“Aˇ nyaꞈ gʼawˬ-iˇ ngeh, aˇ nyaꞈ yaw kaˬ-ahˇ Miˬyehˇ jawˇ luꞈ-uˇ” lehˇ Laˬbaˬ ehˇ-eu meh. Kʼoeˇ miˇ neh, jawˇ duˬ kʼoeˇ tsahˇ-ahˇ Miˇzaˬpaˬ[39] lehˇ kʼawꞈ kuˇ-eu meh.

⁵⁰Laˬbaˬ ehˇ-eu, “Ngaˬ-euˬ zaˬ miˬ deuˬ-ahˇ nawˇ yehˬ bawˬ sehˇ lu-ehˇ jahˇ nehˬ-eu maˬ kaˬ, nawˇ miˬ zaˬ paˇ sheuˬ-eu maˬ kaˬ, ngaˇ maˬ mawˇ nya kʼawꞈ, Miˬyehˇ aˇ nyaꞈ-ahˇ haw luꞈ meh lehˇ, nawˬ-euˬ nui ma laꞈ kʼoeˇ aˬ myah luꞈ noeˬ taˬ-awˬ.

⁵¹Noeˬ keuˆ-eu gʼaˇ duˬ heu gaˇ kʼahˬ tuˇ taˬ-euˬ kʼaˬ lo kʼawˇ zeuˇ hawˇ-eu, gʼoˆ bymˇ taˬ-euˬ kʼaˬ lo lo bymˇ-ahˇ haw-awˬ.

⁵²Kʼahˬ tuˇ taˬ-euˬ kʼaˬ lo kʼawˇ zeuˇ heu zeuˇ hawˇ-eu, kʼaˬ lo lo bymˇ heu bymˇ-aˬ, saˇ kiˇ pyeuꞈ-eu ma. Kʼaˬ lo lo bymˇ heu bymˇ oe dzeuˇ-awˇ, nawˬ-ahˇ ngaˇ tiˬ jawˇ-iˬ maˬ ceh le lehˇ ngaˇ ehˇ tsehˆ-eu ma. Nawˇ kʼawꞈ, kʼaˬ lo kʼawˇ zeuˇ heu zeuˇ laˇ dzeuˇ-awˇ, ngaˬ-ahˇ tiˬ jawˇ-iˬ taˬ ceh laˇ.

⁵³Aˬbyaˬhaˬ-euˬ Miˬyehˇ hawˇ-eu, Naˬkawˬ-euˬ Miˬyehˇ aˇ nyaꞈ-ahˇ yaˇ kʼaˬ daˇ nehˬ laꞈ tehꞈ-a.” Kʼoeˇ ngeh, aˬ yawꞈ-euˬ aˬ da Iˇtsaˆ uˬ duˬ tahˬ-eu Miˬyehˇ-euˬ tsawˇ myahˇ uˬ moˆ, Yaˬkoˆ saˇ jaˇ dzaˬ-euˬ meh.

⁵⁴Aˬ yawꞈ jeˬ zaˬ tiˬ mawˇ sehꞈ-awˇ, gawˬ jawˬ kʼoeˇ taˆ Miˬyehˇ-ahˇ lawˇ nehˬ-euˬ meh. Kʼoeˇ naˇ, aˬ yawꞈ-euˬ tsawˇ haˬ deuˬ-ahˇ kuˇ-awˇ, aˬ yawꞈ maꞈ tiˬ kawˆ loꞈ-ehˇ dzaˬ taꞈ dawˇ taꞈ-euˬ meh. Aˬ yawꞈ maꞈ dzaˬ-awˇ dawˇ-awˇ, uˬ ciꞈ jawˇ bya-euˬ meh.

⁵⁵Laˬbaˬ-aˬ, yawˬ nah yawˬ uˬ shawˬ yaw naꞈ-ehˇ, aˬ yawꞈ-euˬ aˬ buˇ deuˬ hawˇ-eu, aˬ yawꞈ-euˬ oeˬ paˬ oeˬ ma deuˬ-ahˇ mehˬ cuˇ cuˇ yaꞈ-awˇ gʼoꞈ-iˇ-euˬ meh.