Read Akha Aˇ dahˬ 34 Bible Online

Aˇ dahˬ 34 - Akha bible

Aˇ dahˬ 34

¹Tiˬ nah keuˆ laˇ ngeh, Kaˬnaˬ tsawˇ haˬ zaˬ miˬ zaˬ deuˬ jawˇ gaˇ, Yaˬkoˆ hawˇ-eu Leˇaˬ aˬ nyaꞈ dzeˇ zaˬ-euˬ aˬ buˇ Diˇnaˆ dawˬ deh gʼa leˇ-euˬ meh.

²Miˇ kʼahˬ kʼoeˇ kʼahˬ-ahˇ uˆ lahˇ luꞈ-eu, Hiˇbiˇ tsawˇ jeuˬ Haˬmawˬ-euˬ aˬ li Sheˬkmˬ lehˇ myahˇ-eu gʼaˬ Diˇnaˆ-ahˇ ya mawˇ ngeh, dawꞈ-awˇ yehˬ bawˬ sehˇ lu-ehˇ jahˇ nehˬ-euˬ meh.

³Diˇnaˆ aˇ gʼehˇ muiˬ dui dui-eu miˇ neh, Diˇnaˆ-ahˇ Sheˬkmˬ mawꞈ dui dui leˇ-awˇ, mehˇ shuiˇ shuiˇ shuiˇ-ehˇ muˇ-euˬ meh.

⁴“Aˬ buˇ heu buˇ-ahˇ ngaˇ ya sheuˬ ni jahˇ nehˬ laꞈ-awˬ” lehˇ, aˬ yawꞈ-euˬ aˬ da Haˬmawˬ-ahˇ Sheˬkmˬ shaˇ leˇ-euˬ meh.

⁵Aˬ yawꞈ-euˬ aˬ buˇ-ahˇ aˬ cawˬ yehˬ bawˬ sehˇ lu-ehˇ jahˇ nehˬ-euˬ gaˇ kawˆ, Yaˬkoˆ ya siˬ-euˬ meh. Ehˇ kʼawꞈ, aˬ yawꞈ-euˬ aˬ li deuˬ jeˬ zaˬ bo-iˇ jiˇ-euˬ miˇ neh, aˬ li kʼoeˇ deuˬ maˬ gʼoꞈ keuˆ laˇ kʼoeˇ keuˆ ni, tiˬ jeˬ-iˬ maˬ jahˇ-ehˇ jawˇ-euˬ meh.

⁶Sheˬkmˬ-euˬ aˬ da Haˬmawˬ oe-awˇ, Yaˬkoˆ-ahˇ ja cawˬ le-euˬ meh.

⁷Kʼoeˇ ngeh, Yaˬkoˆ-euˬ aˬ li deuˬ deh yaˇ-ahˇ iˇ-euˬ gʼoꞈ keuˆ laˇ-euˬ tiˬ dehˬ meh. Yaˬkoˆ-euˬ aˬ buˇ-ahˇ Sheˬkmˬ neh yehˬ bawˬ sehˇ lu-ehˇ jahˇ nehˬ-awˇ, kʼoeˇ loꞈ-ehˇ gʼeh-eu maˬ jahˇ kʼmˬ-eu jeˬ Iˇsaˬleˬlaˆ tsawˇ haˬ-ahˇ jahˇ nehˬ laꞈ-euˬ gaˇ kawˆ-ahˇ, Yaˬkoˆ-euˬ aˬ li deuˬ ya gaˬ ngeh, nui ma daˆ laˇ taˬ-euˬ meh.

⁸Yaˬkoˆ-ahˇ Haˬmawˬ ehˇ-eu, “Ngaˬ li Sheˬkmˬ nawˬ buˇ-ahˇ mawꞈ dui dui leˇ-eu miˇ neh, bi sheuˬ dahˬ dzaˬ kaˇ-euˇ.

⁹Naw maꞈ-euˬ zaˬ deuˬ hawˇ-eu nga maꞈ-euˬ zaˬ deuˬ bi sheuˬ dahˬ dzaˬ-eu gʼaˇ duˬ, aˇ nyaꞈ saˇ jaˇ dzaˬ taꞈ kaˇ-euˇ.

¹⁰Nga maꞈ-euˬ miˇ kʼahˬ laꞈ kʼoeˇ naw maꞈ-ahˇ tiˬ jeˬ-iˬ maˬ laˆ tsoeˬ. Naw maꞈ kʼaˇ jawˇ mawꞈ gaˇ jawˇ-awˇ, mˇ dzaˬ kʼawꞈ dawˇ nya tehꞈ-a. Naw maꞈ neh kʼaˇ noeˬ doˆ-euˬ loꞈ-ehˇ jeˬ gaꞈ jeˬ ka gʼeh nya-awˇ, kʼahˬ lahˇ kʼaˇ maˬ za ni mˇ jaˆ shaˇ jaˆ nya tehꞈ-a.”

¹¹Diˇnaˆ-euˬ aˬ da hawˇ-eu aˬ mahˇ aˬ da deuˬ-ahˇ Sheˬkmˬ ehˇ nehˬ-eu, “Ngaˇ ehˇ-eu loꞈ-ehˇ, naw pehˬ-euˬ zaˬ miˬ ngaˬ-ahˇ bi mˇ dzaˬ laˇ-awˬ. Naw maꞈ kʼaˇ geuꞈ mawꞈ-eu jeˬ ngaˇ biꞈ ma.

¹²Naw pehˬ-euˬ zaˬ miˬ heu gʼaˬ aˇ poeˬ, aˬ geu jeˬ aˇ myaˆ ni geuꞈ mawꞈ nya lehˇ ehˇ-awˬ. Zaˬ miˬ heu gʼaˬ ngaˬ-ahˇ bi mˇ dzaˬ laˇ naˇ, naw maꞈ kʼaˇ shaˇ-eu myaˆ ni ngaˇ biꞈ ma.”

¹³Diˇnaˆ-ahˇ Sheˬkmˬ neh yehˬ bawˬ sehˇ lu-ehˇ jahˇ nehˬ-euˬ miˇ neh, Diˇnaˆ-euˬ aˬ mahˇ aˬ da deuˬ pyeuꞈ-eu Yaˬkoˆ-euˬ aˬ li deuˬ, Haˬmawˬ hawˇ-eu Sheˬkmˬ aˬ nyaꞈ da zaˬ-ahˇ tsawˇ gahˇ gahˇ-euˬ meh.

¹⁴Aˬ yawꞈ maꞈ ehˇ-eu, “Ngaˬ ha mehˇ nmˇ-euˬ dmˇ ma heu gʼaˬ, baˆ kʼoˆ mehˬ dzaˬ maˬ yehˬ-euˬ tsawˇ haˬ-ahˇ maˬ bi dahˬ dzaˬ-iˇ nya-a. Kʼoeˇ loꞈ-ehˇ bi dahˬ dzaˬ-iˇ naˇ, maˬ muiˬ maˬ shawˇ-eu jeˬ pyeuꞈ-eu miˇ neh, nga maꞈ gʼaˇ duˬ shaꞈ dawˇ duˬ jaˆ meh.

¹⁵Naw maꞈ-euˬ tsawˇ haˬ kʼaˬ dzeˇ zaˬ kʼaˇ ngeuˇ-eu deuˬ dawˬ tawˆ luꞈ, baˆ kʼoˆ mehˬ dzaˬ yehˬ jiˇ-awˇ, nga maꞈ loꞈ-ehˇ maˬ pyeuꞈ laˇ kʼoeˇ keuˆ ni, naw maꞈ ehˇ-eu loꞈ-ehˇ nga maꞈ maˬ geuꞈ nya-a.

¹⁶Naw maꞈ baˆ kʼoˆ mehˬ dzaˬ yehˬ naˇ, naw maꞈ ehˇ-eu loꞈ-ehˇ, naw maꞈ-euˬ zaˬ deuˬ hawˇ-eu nga maꞈ-euˬ zaˬ deuˬ bi sheuˬ dahˬ dzaˬ taꞈ-eu gʼaˇ duˬ, nga maꞈ nui ma tsaˬ tehꞈ-a. Kʼoeˇ ngeh jawˇ, nga maꞈ kʼawꞈ naw maꞈ nehˬ-ehˇ tiˬ kawˆ loꞈ-ehˇ jawˇ-awˇ, tsawˇ jeuˬ tiˬ jeuˬ tehꞈ-ehˇ pyeuꞈ laˇ tehꞈ-a.

¹⁷Ehˇ kʼawꞈ, nga maꞈ neh ehˇ-euˬ gaˇ naw maꞈ maˬ geuꞈ coeˇ-ehˇ, baˆ kʼoˆ mehˬ dzaˬ maˬ yehˬ naˇ, nga maꞈ heu gaˇ maˬ jawˇ ni, ngaˬ ha mehˇ nmˇ-euˬ dmˇ ma heu gʼaˬ sheuˬ-awˇ doˆ-iˇ ma.”

¹⁸Aˬ ha mehˇ nmˇ kʼoeˇ loꞈ-ehˇ ehˇ gaˇ, Sheˬkmˬ hawˇ-eu Haˬmawˬ aˬ nyaꞈ da zaˬ nui ma tsaˬ-euˬ meh.

¹⁹Yaˬkoˆ-euˬ aˬ buˇ-ahˇ Sheˬkmˬ mawꞈ dui dui leˇ-eu miˇ neh, nyi naˬ nyi naˬ-ehˇ maˬ jawˇ ni, aˬ ha mehˇ nmˇ neh kʼaˇ ehˇ-euˬ loꞈ-ehˇ geuꞈ ma lehˇ, tiˬ poˆ tehꞈ-ehˇ ehˇ tsehˆ-euˬ meh. Sheˬkmˬ-aˬ, Hiˇbiˇ tsawˇ jeuˬ laꞈ kʼoeˇ aˬ cawˬ naˆ maˬ tseˇ myaˆ pyawˬ naˇ mehˇ jaˆ-eu gʼaˬ pyeuꞈ-eu meh.

²⁰Meuˬ-euˬ lahˇ kʼehˬ dawˬ peh jaˆ-eu bawˬ dzaˬ duˬ-ahˇ, Haˬmawˬ hawˇ-eu Sheˬkmˬ aˬ nyaꞈ da zaˬ iˇ-awˇ, meuˬ laꞈ kʼoeˇ jawˇ-eu tsawˇ haˬ deuˬ-ahˇ, heu loꞈ-ehˇ ehˇ nehˬ-iˇ-euˬ meh.

²¹“Tsawˇ haˬ heu deuˬ-aˬ, myaˆ pyawˬ pyuˇ-awˇ, cawˬ cawˬ muiˬ-eu tsawˇ haˬ deuˬ pyeuꞈ-eu meh. Aˬ yawꞈ maꞈ-ahˇ aˬ dui maꞈ nehˬ-ehˇ bi jawˇ-awˇ, tiˬ jeˬ-iˬ maˬ laˆ tsoeˬ nehˬ ni bi iˇ bi laˇ-awˬ. Aˬ dui-euˬ miˇ kʼahˬ yaw jeˇ miˇ neh, aˬ yawꞈ maꞈ gʼaˇ duˬ kʼawꞈ jawˇ kʼaˇ za gahˬ meh. Aˬ dui maꞈ-euˬ aˬ buˇ aˬ li deuˬ hawˇ-eu, aˬ yawꞈ maꞈ-euˬ aˬ buˇ aˬ li deuˬ sheuˬ dahˬ dzaˬ taꞈ luꞈ-uˇ.

²²Ehˇ kʼawꞈ, aˬ yawꞈ maꞈ aˬ dui nehˬ-ehˇ jawˇ taꞈ-awˇ, tsawˇ jeuˬ tiˬ jeuˬ tehꞈ-ehˇ pyeuꞈ laˇ nya ni, aˬ dui kʼawꞈ aˬ yawꞈ maꞈ loꞈ-ehˇ, kʼaˬ dzeˇ zaˬ kʼaˇ ngeuˇ-eu dawˬ tawˆ luꞈ baˆ kʼoˆ mehˬ dzaˬ ya yehˬ meh lehˇ, aˬ dui maꞈ-ahˇ aˬ yawꞈ maꞈ ehˇ-eu meh.

²³Aˬ yawꞈ maꞈ kʼaˇ jawˇ-eu jeˬ zaˬ deuˬ hawˇ-eu, aˬ yawꞈ maꞈ kʼaˇ jaˆ-eu jeˬ dawˬ tawˆ luꞈ, aˬ dui-euˬ pyeuꞈ laˇ tehꞈ-a. Teu miˇ neh, aˬ yawꞈ maꞈ kʼaˇ ehˇ-eu loꞈ-ehˇ geuꞈ-awˇ, aˬ yawꞈ maꞈ-ahˇ aˬ dui maꞈ nehˬ-ehˇ bi jawˇ kaˇ-euˇ.”

²⁴Meuˬ laꞈ kʼoeˇ kʼaˇ jawˇ-eu tsawˇ haˬ dawˬ tawˆ luꞈ, Sheˬkmˬ hawˇ-eu Haˬmawˬ aˬ nyaꞈ da zaˬ ehˇ gaˇ nui kʼahˇ shiˇ-awˇ, kʼaˬ dzeˇ zaˬ yawˬ gʼaˬ na luꞈ, baˆ kʼoˆ mehˬ dzaˬ yehˬ-euˬ meh.

²⁵Smˬ nah byah laˇ-awˇ, tsawˇ haˬ kʼoeˇ deuˬ baˆ kʼoˆ mehˬ dzaˬ yehˬ-euˬ maˇ naˇ maˬ taˬ leˇ mi naˆ-ehˇ, Yaˬkoˆ-euˬ aˬ li deuˬ pyeuꞈ-eu, Diˇnaˆ-euˬ aˇ doˆ Suˇmoˬ hawˇ-eu Leˬbiˇ aˬ nyaꞈ nmˇ mi cehˇ shaꞈ-awˇ, tsawˇ haˬ tiˬ gʼaˬ-iˬ maˬ bi haw siˬ ni meuˬ laꞈ kʼoeˇ le uˇ-awˇ, kʼaˬ dzeˇ zaˬ dawˬ tawˆ luꞈ-ahˇ coeˇ sehꞈ jiˇ-euˬ meh.

²⁶Haˬmawˬ hawˇ-eu Sheˬkmˬ aˬ nyaꞈ da zaˬ-ahˇ kʼawꞈ sehꞈ-euˬ meh. Kʼoeˇ naˇ, Sheˬkmˬ-euˬ nymˇ laꞈ kʼoeˇ jawˇ luꞈ-eu Diˇnaˆ-ahˇ sheuˬ-awˇ, gʼoꞈ le-euˬ meh.

²⁷Meuˬ laꞈ kʼoeˇ jawˇ-eu kʼaˬ dzeˇ zaˬ dawˬ tawˆ luꞈ-ahˇ sehꞈ gʼaˬ ngeh, Yaˬkoˆ-euˬ aˬ li deuˬ meuˬ laꞈ kʼoeˇ uˇ leˇ-awˇ, aˬ yawꞈ ha mehˇ nmˇ-euˬ dmˇ ma-ahˇ myaˆ pyawˬ naˇ mehˇ laˆ cawˆ nehˬ-euˬ aˇ poeˬ, meuˬ kʼoeˇ meuˬ-ahˇ paˇ laˆ cawˆ kʼoꞈ nehˬ-euˬ meh.

²⁸Meuˬ laꞈ kʼoeˇ hawˇ-eu, meuˬ laꞈ nyiˇ deh ga-ahˇ jawˇ-eu, yawˇ, ciꞈ myehꞈ, mawˇ neˇ, mahˬ tahˬ laˆ deuˬ dawˬ tawˆ luꞈ-ahˇ aˬ yawꞈ maꞈ tsahˇ geuꞈ-awˇ, pyuˇ shuiˇ myawˬ gahˬ deuˬ kʼawꞈ yuˇ geuꞈ-euˬ meh.

²⁹Aˇ poeˬ kʼaˇ baw-eu myawˬ deuˬ hawˇ-eu, nymˇ laꞈ kʼoeˇ kʼaˇ jaˆ-eu mˇ myawˬ dawˬ tawˆ luꞈ, aˬ yawꞈ maꞈ yuˇ geuꞈ jiˇ-awˇ, zaˬ miˬ zaˬ deuˬ hawˇ-eu zaˬ dawˬ tawˆ luꞈ sheuˬ kʼoꞈ gʼeh-euˬ meh.

³⁰Suˇmoˬ hawˇ-eu Leˬbiˇ aˬ nyaꞈ nmˇ-ahˇ Yaˬkoˆ ehˇ nehˬ-eu, “Naw nyaꞈ nmˇ ngaˬ-ahˇ laˆ shaˬ nehˬ laꞈ-euˬ nga. Nymˬ-mˇ poˆ jawˇ-aˬ, miˇ kʼahˬ heu kʼahˬ laꞈ kʼoeˇ kʼaˇ jawˇ-eu Kaˬnaˬ tsawˇ jeuˬ maˬ ehˇ, Paˬyehˆ tsawˇ jeuˬ maˬ ehˇ, nui deuˬ tsawˇ jeuˬ dawˬ tawˆ luꞈ maˬ ehˇ, ngaˬ-ahˇ muiˇ-eu nga. Ngaˬ nehˬ-ehˇ tsawˇ haˬ gʼawˬ mya ni jawˇ-eu maˬ ngeuˇ. Aˬ yawꞈ maꞈ dawˬ tawˆ luꞈ ga uiˬ-awˇ ngaˬ-ahˇ guiˇ deuˆ laˇ naˇ, aˬ dui pehˬ pehˬ zaˬ ma zaˬ-ehˇ bi sehꞈ jiˇ gaˇ keuˆ-eu nga.”

³¹Aˬ yawꞈ nyaꞈ nmˇ ehˇ-eu, “Aˬ dui pehˬ-euˬ zaˬ miˬ-ahˇ, ciˇ piˇ ciˇ leuˆ loꞈ-ehˇ sawˇ-awˇ, kʼaˇ jahˇ mawꞈ-eu bi jahˇ nya ta loˇ.”