Read Akha Aˇ dahˬ 38 Bible Online

Aˇ dahˬ 38 - Akha bible

Aˇ dahˬ 38

¹Aˇ nah aˇ yamˬ kʼoeˇ yamˬ laꞈ kʼoeˇ, Yuˇdaˆ gʼaˬ aˬ yawꞈ-euˬ mehˇ nmˇ deuˬ-ahˇ byehˇ yaꞈ-awˇ, Aˬduˬlamˬ meuˬ-ahˇ jawˇ-eu Hiˇlahˬ lehˇ myahˇ-euˬ tsawˇ haˬ tiˬ gʼaˬ nehˬ-ehˇ jawˇ-iˇ-eu lehˇ doˆ-iˇ-euˬ meh.

²Yuˇdaˆ kʼoeˇ gaˇ jawˇ ngeh, Kaˬnaˬ tsawˇ haˬ Shuˇaˆ-euˬ aˬ buˇ-ahˇ tahˬ puˬ-awˇ sheuˬ-euˬ meh.

³Aˬ yawꞈ-euˬ nymˇ dahˬ aˬ li tiˬ li ciˬ-awˇ, aˬ li kʼoeˇ li-ahˇ Iˇlehˆ lehˇ myahˇ nehˬ-euˬ meh.

⁴Aˬ yawꞈ-euˬ nymˇ dahˬ aˬ li tiˬ li paˇ ciˬ-awˇ, Awˇnaˬ lehˇ myahˇ nehˬ-euˬ meh.

⁵Kʼoeˇ naˇ, aˬ li tiˬ li paˇ jawˇ le-awˇ, Sheˬlahˬ lehˇ myahˇ nehˬ-euˬ meh. Aˬ li kʼoeˇ li dehꞈ le ngeh, Aˬkaˬziˇ meuˬ-ahˇ Yuˇdaˆ jawˇ luꞈ-eu meh.

⁶Yuˇdaˆ-aˬ, aˬ yawꞈ-euˬ aˬ li aˬ yuiꞈ yuiꞈ saˬ gʼaˬ pyeuꞈ-eu Iˇlehˆ-ahˇ, Taˬmaˬ lehˇ myahˇ-euˬ zaˬ miˬ aˬ buˇ tiˬ gʼaˬ nehˬ-ehˇ bi sheuˬ dahˬ dzaˬ-euˬ meh.

⁷Iˇlehˆ-aˬ, Sahˬpaˬ Miˬyehˇ nui ma maˬ tsaˬ-eu maˬ muiˬ maˬ jaˬ-eu jeˬ mˇ-eu miˇ neh, Sahˬpaˬ Miˬyehˇ neh aˬ yawꞈ-ahˇ bi shiˇ-euˬ meh.

⁸Kʼoeˇ ngeh, Iˇlehˆ-euˬ aˬ nyiˇ Awˇnaˬ-ahˇ Yuˇdaˆ heu loꞈ-ehˇ ehˇ nehˬ-euˬ meh. “Nawˬ-euˬ aˇ doˆ-euˬ miˬ zaˬ nehˬ-ehˇ yuꞈ-iˇ-awˬ. Nawˇ-aˬ, aˬ yawꞈ-euˬ kʼaˬ dzeˇ zaˬ-euˬ aˬ nyiˇ pyeuꞈ-eu miˇ neh, Iˇlehˆ-euˬ tsuiꞈ maˬ ya dahˬ-iˇ ni, zahˇ jaˆ-eu loꞈ-ehˇ mˇ byah nehˬ-awˬ.”

⁹Aˬ yawꞈ-euˬ aˬ tsu nehˬ-ehˇ aˬ yawꞈ yuꞈ taꞈ-awˇ, zaˬ jawˇ le law hawˇ kʼawꞈ, aˬ yawꞈ maˬ ya geuꞈ-eu gaˇ kawˆ Awˇnaˬ siˬ nya-eu miˇ neh, aˬ yawꞈ-euˬ aˇ doˆ gʼaˇ duˬ zaˬ maˬ bi jawˇ le mawꞈ-ehˇ, aˬ yawꞈ-euˬ aˬ tsu nehˬ-ehˇ kʼaˇ yuꞈ taꞈ-eu yawˬ poˆ na luꞈ, aˇ yoeˬ laꞈ nyiˇ paw poeˬ dzeh-euˬ meh.

¹⁰Aˬ yawꞈ kʼoeˇ loꞈ-ehˇ jahˇ gaˇ Sahˬpaˬ Miˬyehˇ nui ma maˬ tsaˬ-eu miˇ neh, aˬ yawꞈ-ahˇ kʼawꞈ, aˬ yawꞈ-euˬ aˇ doˆ loꞈ-ehˇ bi shiˇ-euˬ meh.

¹¹Kʼoeˇ naˇ, “Ngaˬ li Sheˬlahˬ maˬ huiˬ laˇ kʼoeˇ keuˆ ni, nawˬ da-euˬ nymˇ-ahˇ gʼoꞈ-iˇ-awˇ, miˬ coeˬ miˬ ma geuꞈ tawˬ-iˇ-awˬ lehˇ, aˬ yawꞈ-euˬ kuiˬ ma Taˬmaˬ-ahˇ Yuˇdaˆ ehˇ nehˬ-euˬ meh. Aˬ yawꞈ-euˬ aˬ li aˬ yuiꞈ nyiˬ gʼaˬ shiˇ-euˬ loꞈ-ehˇ, Sheˬlahˬ gʼaˬ paˇ shiˇ gaˇ guˆ-eu miˇ neh, Yuˇdaˆ kʼoeˇ loꞈ-ehˇ ehˇ-eu meh. Kʼoeˇ ngeh, Taˬmaˬ gʼaˬ aˬ yawꞈ aˬ da-euˬ nymˇ-ahˇ gʼoꞈ jawˇ-iˇ-euˬ meh.

¹²Aˇ nah aˇ yamˬ myahˇ laˇ ngeh, Yuˇdaˆ-euˬ miˬ zaˬ shiˇ-euˬ meh. Aˬ yawꞈ-euˬ miˬ zaˬ-ahˇ noeˬ-eu nui ma byoˆ-iˇ ngeh, Aˬduˬlamˬ meuˬ-ahˇ jawˇ-eu aˬ yawꞈ-euˬ cawˬ Hiˇlahˬ nehˬ-ehˇ, Tmˇnahˬ meuˬ-ahˇ aˬ yawꞈ-euˬ yawˇ deuˬ caꞈ hm bi tehˬ luꞈ gaˇ iˇ-euˬ meh.

¹³Tmˇnahˬ meuˬ-ahˇ Yuˇdaˆ yawˇ caꞈ hm tehˬ-iˇ-euˬ gaˇ kawˆ Taˬmaˬ ya gaˬ-euˬ meh.

¹⁴Kʼoeˇ ngeh, Taˬmaˬ-aˬ, aˬ yawꞈ dm luꞈ-eu miˬ coeˬ miˬ ma deuˬ dm-eu mehˬ tsoeˬ lehˆ dzeh-awˇ, aˬ yawꞈ-euˬ myaˆ pyawˬ-ahˇ paˇ jeh dehˬ kaˬ-awˇ, Tmˇnahˬ meuˬ-ahˇ iˇ-eu gaˇ ma-ahˇ jaˆ-eu Eˬneˬ meuˬ-euˬ lahˇ kʼehˬ-ahˇ nuiˇ-awˇ loꞈ-euˬ meh. Aˬ jeˬ miˇ neh ehˇ naˇ, Sheˬlahˬ huiˬ loˆ laˇ-awˇ, zaˬ daꞈ daꞈ laˇ-euˬ gaˇ aˬ yawꞈ ya mawˇ-euˬ kʼawꞈ, aˬ yawꞈ-ahˇ maˬ bi sheuˬ le-eu miˇ neh, aˬ yawꞈ kʼoeˇ loꞈ-ehˇ jahˇ-euˬ meh.

¹⁵Taˬmaˬ-ahˇ Yuˇdaˆ ya mawˇ ngeh, gʼawˇ mawˇ ahˬ dzaˬ-eu zaˬ miˬ zaˬ tiˬ gʼaˬ nga lehˇ noeˬ-euˬ meh. Gʼawˇ mawˇ ahˬ dzaˬ-eu deuˬ jahˇ-eu loꞈ-ehˇ, Taˬmaˬ-euˬ myaˆ pyawˬ-ahˇ paˇ jeh dehˬ kaˬ taˬ-euˬ miˇ neh, aˬ yawꞈ kʼoeˇ loꞈ-ehˇ noeˬ-euˬ meh.

¹⁶Zaˬ miˬ zaˬ kʼoeˇ gʼaˬ dawˬ peh Yuˇdaˆ iˇ-awˇ, “Nawˬ nehˬ-ehˇ yuꞈ taꞈ naˇ, aˇ poeˬ aˇ myaˆ ni shaˇ te” lehˇ naˇ haˬ-euˬ meh. Zaˬ miˬ zaˬ kʼoeˇ gʼaˬ aˬ yawꞈ-euˬ kuiˬ ma pyeuꞈ luꞈ-eu aˬ yawꞈ maˬ siˬ nya-a. “Nawˇ ngaˬ-ahˇ aˬ jeˬ biꞈ nmˇ” lehˇ, zaˬ miˬ zaˬ kʼoeˇ gʼaˬ Yuˇdaˆ-ahˇ naˇ haˬ-euˬ meh.

¹⁷“Ngaˬ-euˬ ciꞈ myehꞈ ciꞈ kʼaˇ tiˬ mawˇ bi tsahˇ ha laˇ ma” lehˇ, zaˬ miˬ zaˬ kʼoeˇ gʼaˬ-ahˇ Yuˇdaˆ ehˇ kʼoꞈ nehˬ-euˬ meh. “Nawˇ ngaˬ-ahˇ ciꞈ myehꞈ aˬ diˇ biꞈ ma lehˇ ngeuˇ naˇ, yaw duˬ yaw ciˇ baw ni, ciꞈ myehꞈ maˬ tsahˇ keuˆ ha laˇ-euˬ nmˇ kaˬ, tiˬ jeˬ paˬ biꞈ dah nehˬ laꞈ-eu tsaˬ tehꞈ-a” lehˇ, zaˬ miˬ zaˬ kʼoeˇ gʼaˬ ehˇ-eu meh.

¹⁸“Ngaˬ neh ehˇ-euˬ dawˬ heu yaw duˬ yaw ciˇ baw ni, ngaˇ nawˬ-ahˇ aˬ jeˬ ya biꞈ dah tawˬ nmˇ” lehˇ Yuˇdaˆ ehˇ ngeh, “Lawˇ dah aˇ caˆ tsoꞈ-eu nawˬ-euˬ juˬ hawˇ-eu, nawˬ-euˬ gawˬ yoeˬ ngaˬ-ahˇ biꞈ dah yaꞈ-awˬ” lehˇ, zaˬ miˬ zaˬ kʼoeˇ gʼaˬ ehˇ-eu meh. Zaˬ miˬ zaˬ kʼoeˇ gʼaˬ kʼaˇ ehˇ-eu loꞈ-ehˇ Yuˇdaˆ biꞈ dah nehˬ yaꞈ-euˬ meh. Kʼoeˇ naˇ, aˬ yawꞈ nyaꞈ yuꞈ taꞈ-awˇ, zaˬ miˬ zaˬ kʼoeˇ gʼaˬ aˬ nyiˇ pi leˇ-euˬ meh.

¹⁹Taˬmaˬ iˇ kahˇ gʼoꞈ-iˇ-awˇ, aˬ yawꞈ-euˬ myaˆ pyawˬ-ahˇ dehˬ kaˬ-euˬ paˇ jeh gʼeu lehˆ-awˇ, miˬ coeˬ miˬ ma-euˬ mehˬ tsoeˬ paˇ dm paˇ-awˇ jawˇ-euˬ meh.

²⁰Zaˬ miˬ zaˬ kʼoeˇ gʼaˬ jawˇ gaˇ ciꞈ myehꞈ bi tsahˇ ha-iˇ-awˇ, aˬ yawꞈ neh biꞈ dah taˬ yaꞈ-euˬ myawˬ kʼoeˇ deuˬ bi yuˇ kʼoꞈ laˬ-iˇ-eu gʼaˇ duˬ, aˬ yawꞈ-euˬ cawˬ Hiˇlahˬ-ahˇ Yuˇdaˆ pyehˬ gʼeh-euˬ meh. Ehˇ kʼawꞈ, zaˬ miˬ zaˬ kʼoeˇ gʼaˬ-ahˇ Hiˇlahˬ maˬ poˆ mawˇ nya-a.

²¹“Gaˇ ma-ahˇ jawˇ-awˇ gʼawˇ mawˇ ahˬ dzaˬ-eu zaˬ miˬ zaˬ kʼoeˇ gʼaˬ aˬ gaˇ iˇ taˬ” lehˇ, Eˬneˬ meuˬ-ahˇ jawˇ-eu tsawˇ haˬ deuˬ-ahˇ aˬ yawꞈ naˇ haˬ ngeh, “Heu gaˇ gʼawˇ mawˇ ahˬ dzaˬ-eu zaˬ miˬ zaˬ tiˬ gʼaˬ-iˬ maˬ jawˇ-a” lehˇ, tsawˇ haˬ kʼoeˇ deuˬ aˬ yawꞈ-ahˇ ehˇ kʼoꞈ nehˬ-euˬ meh.

²²Kʼoeˇ naˇ, Yuˇdaˆ jawˇ gaˇ Hiˇlahˬ gʼoꞈ-iˇ-awˇ, “Zaˬ miˬ zaˬ kʼoeˇ gʼaˬ-ahˇ maˬ poˆ mawˇ nya-a. Kʼoeˇ gaˇ jawˇ-eu tsawˇ haˬ deuˬ-ahˇ naˇ haˬ kʼawꞈ, gʼawˇ mawˇ ahˬ dzaˬ-eu zaˬ miˬ zaˬ tiˬ gʼaˬ-iˬ aˬ yawꞈ maꞈ jawˇ gaˇ maˬ jawˇ lehˇ ehˇ-eu meh” lehˇ ehˇ nehˬ-euˬ meh.

²³Kʼoeˇ ngeh Yuˇdaˆ ehˇ-eu, “Ngaˬ-euˬ mˇ myawˬ kʼoeˇ deuˬ zaˬ miˬ zaˬ kʼoeˇ gʼaˬ jawˇ gaˇ ehˬ-ehˇ jaˆ luꞈ-uˇ. Aˬ dui-euˬ myaˆ pyawˬ naˇ mehˇ cawˆ laˇ gaˇ ya yahˇ nga. Ngaˇ nawˬ-ahˇ aˬ yawꞈ jawˇ gaˇ bi iˇ-euˬ kʼawꞈ, aˬ yawꞈ-ahˇ nawˇ maˬ poˆ mawˇ nya-eu miˇ neh, tiˬ jeˬ-iˬ maˬ paˇ gʼeh nya ngaˇ.”

²⁴Kʼoeˇ sawˇ miˇ tsa ba la smˇ siˬ keuˆ laˇ-awˇ, “Nawˬ-euˬ kuiˬ ma Taˬmaˬ kʼaˇ dehꞈ mawꞈ-eu dehꞈ-awˇ aˬ nyiˇ pi leˇ taˬ nga” lehˇ, Yuˇdaˆ-ahˇ aˬ cawˬ ehˇ nehˬ ngeh, “Aˬ yawꞈ-ahˇ laꞈ nyiˇ sheuˬ doˆ-awˇ miˬ dzaˬ dzah puiˆ sehꞈ-awˬ” lehˇ, Yuˇdaˆ ehˇ kʼoꞈ nehˬ-euˬ meh.

²⁵Aˬ cawˬ Taˬmaˬ-ahˇ sheuˬ doˆ leꞈ ngeh, Yuˇdaˆ jawˇ gaˇ Taˬmaˬ heu loꞈ-ehˇ dawˬ tsaꞈ tsaꞈ ahˇ gʼeh-euˬ meh. “Ngaˇ-aˬ, mˇ myawˬ heu deuˬ-euˬ yaw sahˇ gʼaˬ nehˬ-ehˇ jawˇ-awˇ aˬ nyiˇ pi leˇ-euˬ ma. Mˇ myawˬ heu deuˬ aˬ suˇ gʼaˬ-euˬ mˇ myawˬ pyeuꞈ-eu nga lehˇ, lawˇ dah aˇ caˆ tsoꞈ-eu juˬ heu hmˬ hawˇ-eu, gawˬ yoeˬ heu kahˇ-ahˇ haw-awˬ.”

²⁶Myawˬ kʼoeˇ deuˬ-ahˇ Yuˇdaˆ ya mawˇ ngeh, aˬ yawꞈ-euˬ myawˬ pyeuꞈ-eu tiˬ poˆ tehꞈ-ehˇ haw siˬ-awˇ, “Zaˬ miˬ zaˬ heu gʼaˬ maˬ lehˬ-a. Ngaˇ aˬ yawꞈ-ahˇ mˇ nehˬ paˬ-ehˇ gʼeh-eu jeˬ maˬ mˇ nehˬ-euˬ miˇ neh, ngaˬ-ahˇ neh ahˇ-eu meh. Ngaˇ aˬ yawꞈ-ahˇ ngaˬ li Sheˬlahˬ nehˬ-ehˇ bi sheuˬ dahˬ dzaˬ paˬ-ehˇ gʼeh-eu meh” lehˇ ehˇ-eu meh. Kʼoeˇ naˇ, zaˬ miˬ zaˬ kʼoeˇ gʼaˬ nehˬ-ehˇ Yuˇdaˆ tiˬ jawˇ-iˬ maˬ paˇ yuꞈ taꞈ ni jawˇ-euˬ meh.

²⁷Taˬmaˬ aˬ nyiˇ ciˬ-eu aˇ yamˬ dawˬ peh peh laˇ ngeh, zaˬ nyiˬ gʼaˬ pi luꞈ-eu gaˇ kawˆ ya siˬ-euˬ meh.

²⁸Aˬ nyiˇ ciˬ ngeh, zaˬ tiˬ gʼaˬ aˬ laꞈ tiˬ laꞈ tehꞈ-ehˇ cawˬ doˆ leꞈ-euˬ meh. Aˬ nyiˇ ciˬ gaˇ haw nehˬ-eu zaˬ miˬ zaˬ kʼoeˇ gʼaˬ aˬ laꞈ kʼoeˇ laꞈ-ahˇ nyehꞈ tehˬ-awˇ, saˬ kahˇ kahˇ neˇ paꞈ-awˇ, “Heu gʼaˬ jeˬ huˬ dehꞈ le-euˬ meh” lehˇ ehˇ-eu meh.

²⁹Ehˇ kʼawꞈ, zaˬ kʼoeˇ gʼaˬ aˬ laꞈ paˇ cawˬ ahˇ kʼoꞈ-awˇ, yawˬ gʼaˬ yawˬ jeˬ hu dehꞈ doˆ le-euˬ meh. Kʼoeˇ ngeh, aˬ nyiˇ ciˬ gaˇ haw nehˬ le-euˬ zaˬ miˬ zaˬ kʼoeˇ gʼaˬ, “Aˬ joˆ-ehˇ jahˇ-awˇ neh, nawˇ aˬ kʼmˬ kʼmˬ-awˇ aˬ cawˬ mehˬ hu paˇ tahˬ doˆ leꞈ teˬ” lehˇ ehˇ-awˇ, aˬ li kʼoeˇ li-ahˇ Paˬyehˆ[47] lehˇ myahˇ nehˬ-euˬ meh.

³⁰Kʼoeˇ naˇ, laꞈ du-ahˇ saˬ kahˇ kahˇ neˇ paꞈ taˬ-euˬ gʼaˬ paˇ dehꞈ doˆ le-euˬ meh. Kʼoeˇ gʼaˬ-ahˇ Zeˬlahˬ[48] lehˇ myahˇ nehˬ-euˬ meh.