Read Akha Aˇ dahˬ 4 Bible Online

Aˇ dahˬ 4 - Akha bible

Aˇ dahˬ 4

¹Kʼoeˇ naˇ, Aˬdaˬ hawˇ-eu Eˇbaˆ aˬ nyaꞈ dzeˇ zaˬ jawˇ taꞈ-awˇ, Eˇbaˆ aˬ nyiˇ pi leˇ-euˬ meh. Eˇbaˆ aˬ nyiˇ ciˬ ngeh, “Sahˬpaˬ Miˬyehˇ-euˬ guiˬ lahˬ baˬ da neh aˬ li tiˬ li jawˇ le-euˬ ma” lehˇ aˬ yawꞈ ehˇ-awˇ, aˬ li kʼoeˇ li-ahˇ Gaˬiˇnaˆ[3] lehˇ myahˇ nehˬ-euˬ meh.

²Kʼoeˇ naˇ, Aˬbeˬlaˆ lehˇ myahˇ-euˬ aˬ li tiˬ li paˇ ciˬ-euˬ meh. Aˬbeˬlaˆ gʼaˬ yawˇ cu-eu tsawˇ haˬ pyeuꞈ laˇ-awˇ, Gaˬiˇnaˆ gʼaˬ yaˇ mˇ dzaˬ-eu tsawˇ haˬ pyeuꞈ laˇ-euˬ meh.

³Aˇ yamˬ ui cuiˆ myahˇ laˇ ngeh jawˇ, Gaˬiˇnaˆ gʼaˬ, aˬ yawꞈ neh mˇ za shaˇ za-euˬ aˇ siˬ aˇ lu deuˬ yuˇ laꞈ-awˇ, Sahˬpaˬ Miˬyehˇ-ahˇ lawˇ nehˬ-euˬ meh.

⁴Aˬbeˬlaˆ gʼaˬ kʼawꞈ, aˬ yawꞈ-euˬ yawˇ tiˬ ma neh gʼaw beh beh-euˬ yawˇ zaˬ tiˬ mawˇ sehꞈ-awˇ, muiˬ dui dui-eu shaˬ jiˇ kaˇ doˆ-awˇ, Sahˬpaˬ Miˬyehˇ-ahˇ lawˇ nehˬ-euˬ meh. Aˬbeˬlaˆ neh lawˇ nehˬ-euˬ jeˬ-ahˇ maˬ ehˇ, Aˬbeˬlaˆ-ahˇ maˬ ehˇ, Sahˬpaˬ Miˬyehˇ nui kʼahˇ shiˇ-euˬ meh.

⁵Ehˇ kʼawꞈ, Gaˬiˇnaˆ-ahˇ maˬ ehˇ, Gaˬiˇnaˆ neh lawˇ nehˬ-euˬ jeˬ-ahˇ maˬ ehˇ, Sahˬpaˬ Miˬyehˇ nui kʼahˇ maˬ shiˇ-a. Kʼoeˇ miˇ neh, Gaˬiˇnaˆ nui ma pehˇ laˇ-awˇ, myaˆ pyawˬ maˬ muiˬ-a.

⁶Kʼoeˇ ngeh, Gaˬiˇnaˆ-ahˇ Sahˬpaˬ Miˬyehˇ ehˇ nehˬ-eu, “Aˬ jeˬ miˇ neh nawˇ nui ma pehˇ te. Aˬ jeˬ miˇ neh nawˬ-euˬ myaˆ pyawˬ maˬ muiˬ ta.

⁷Nawˇ dawˇ coe ni mˇ law nmˇ-aˬ, laˬ kʼaˬ ya cehˇ tehꞈ-a. Ehˇ kʼawꞈ, nawˇ yaw tsaˬ yaw dawˇ dawˇ-ehˇ maˬ mˇ-euˬ miˇ neh, nawˬ-euˬ nymˇ gʼoˆ kʼehˬ-ahˇ iˬ baˇ keuˆ le luꞈ meh. Iˬ baˇ kʼoeˇ nawˬ-ahˇ uˆ lahˇ mawꞈ-eu meh. Iˬ baˇ-ahˇ gʼaˬ leˇ ni nawˇ leh jeh-awˬ.”

⁸Kʼoeˇ naˇ, Gaˬiˇnaˆ gʼaˬ, aˬ yawꞈ-euˬ aˬ nyiˇ Aˬbeˬlaˆ-ahˇ, “Deh ma-ahˇ iˇ kaˇ-euˇ” lehˇ cawˬ-euˬ meh. Aˬ yawꞈ nyaꞈ nmˇ deh yaˇ-ahˇ iˇ keuˆ-awˇ jawˇ ngeh, Gaˬiˇnaˆ tsawˬ tuˇ-awˇ, aˬ yawꞈ-euˬ aˬ nyiˇ-ahˇ sehꞈ-euˬ meh.

⁹“Nawˬ-euˬ aˬ nyiˇ aˬ gaˇ iˇ taˬ” lehˇ, Gaˬiˇnaˆ-ahˇ Sahˬpaˬ Miˬyehˇ naˇ haˬ ngeh, “Ngaˇ maˬ siˬ. Ngaˇ ngaˬ-euˬ aˬ nyiˇ-ahˇ bo-eu tsawˇ haˬ nga loˇ” lehˇ, Gaˬiˇnaˆ ehˇ-eu meh.

¹⁰Kʼoeˇ ngeh, Sahˬpaˬ Miˬyehˇ ehˇ-eu, “Aˬ jeˬ miˇ neh teu naˆ naˆ-ehˇ bahˬ-eu jeˬ nawˇ mˇ yaꞈ teˬ. Nawˬ-ahˇ laꞈ poˆ bi poˆ kʼoꞈ nehˬ mawꞈ-eu teˇ saˇ loꞈ-ehˇ, nawˬ-euˬ aˬ nyiˇ-euˬ shiˬ, miˇ tsaˬ dawˬ dah paw neh ngaˬ-ahˇ kuˇ luꞈ meh.

¹¹Nawˇ-aˬ, yaˬ kʼehˇ yaˬ nehˬ-eu jeˬ-ahˇ ya daˬ-eu tsawˇ haˬ tiˬ gʼaˬ pyeuꞈ-awˇ, miˇ tsaˬ-ahˇ nawˇ maˬ paˇ tsehˬ dzaˬ nya meh. Nawˬ-euˬ aˬ nyiˇ-ahˇ nawˇ sehꞈ ngeh, miˇ tsaˬ kʼaˬ meh mˇ nga-awˇ, nawˬ-euˬ aˬ nyiˇ-euˬ shiˬ dawˇ ahˇ-euˬ meh.

¹²Miˇ tsaˬ-ahˇ nawˇ aˬ geu jeˬ ka dzaˬ-eu maˬ kaˬ, miˇ tsaˬ nawˬ-ahˇ maˬ bi za le-ehˇ, nymˇ jiˇ maˬ baw ni miˇ tsaˬ kʼoeˇ taˆ doe doe-ehˇ cah cah-ehˇ ya jawˇ tehꞈ-a.”

¹³Kʼoeˇ naˇ, Sahˬpaˬ Miˬyehˇ-ahˇ Gaˬiˇnaˆ ehˇ nehˬ-eu, “Nawˇ ngaˬ-ahˇ yaˬ kʼehˇ yaˬ nehˬ laꞈ-euˬ heu aˇ dzehˬ dzeuˇ-eu miˇ neh, ngaˇ aˬ joˆ-ehˇ daˬ coeˇ nmˇ.

¹⁴Miˇ kʼahˬ heu kʼahˬ-ahˇ neh nawˬ-euˬ myaˆ pyawˬ maˬ ya mawˇ-eu jawˇ duˬ-ahˇ, nawˇ ngaˬ-ahˇ teh dzeh nehˬ laꞈ-euˬ meh. Ngaˇ tiˬ gaˇ-iˬ jawˇ duˬ dah leˇ kʼaˇ maˬ za ni, miˇ kʼahˬ doe doe-ehˇ cah cah-ehˇ ya jawˇ naˇ, kʼaˇ puˬ kʼaˇ mawˇ le-eu tsawˇ haˬ deuˬ ngaˬ-ahˇ sehꞈ laˇ tehꞈ-a.”

¹⁵Gaˬiˇnaˆ-ahˇ Sahˬpaˬ Miˬyehˇ ehˇ nehˬ-eu,“Aˬ cawˬ nawˬ-ahˇ maˬ sehꞈ laˇ-aˇ. Tsawˇ haˬ tiˬ gʼaˬ nawˬ-ahˇ sehꞈ naˇ, shiꞈ poˆ keuˆ ni paˇ jahˇ kʼoꞈ nehˬ gaˇ ya daˬ tehꞈ-a.” Kʼoeˇ ngeh, Gaˬiˇnaˆ-ahˇ kʼaˇ tahˬ puˬ-eu tsawˇ haˬ deuˬ aˬ yawꞈ-ahˇ maˬ ya sehꞈ ni, Gaˬiˇnaˆ-ahˇ Sahˬpaˬ Miˬyehˇ tsaˬ tsoˆ nehˬ-euˬ meh.

¹⁶Kʼoeˇ naˇ, Sahˬpaˬ Miˬyehˇ-euˬ mehˬ shi neh Gaˬiˇnaˆ iˇ doˆ gʼeh-awˇ, Eˬdeˬ yaˇ kmˇ-euˬ nahˇ ma doˆ kʼehˬ paw jaˆ-eu Nawˇdaˆ[4] miˇ kʼahˬ-ahˇ jawˇ-iˇ-euˬ meh.

¹⁷Gaˬiˇnaˆ aˬ nyaꞈ dzeˇ zaˬ aˬ li tiˬ li jawˇ le-awˇ, Iˇnawˆ lehˇ myahˇ nehˬ-euˬ meh. Kʼoeˇ naˇ, Gaˬiˇnaˆ meuˬ tiˬ meuˬ teˬ-awˇ, meuˬ kʼoeˇ meuˬ-ahˇ aˬ yawꞈ aˬ li-euˬ tsawˇ myahˇ biꞈ-awˇ, Iˇnawˆ meuˬ lehˇ myahˇ nehˬ-euˬ meh.

¹⁸Iˇnawˆ-euˬ aˬ li-aˬ, Iˇlaˆ meh. Iˇlaˆ-euˬ aˬ li-aˬ, Maˬhuˇyeˬlaˇ meh. Maˬhuˇyeˬlaˇ-euˬ aˬ li-aˬ, Maˬtuˇsheˬlaˇ meh. Maˬtuˇsheˬlaˇ-euˬ aˬ li-aˬ, Laˬmehˇ meh.

¹⁹Laˬmehˇ-aˬ, Aˬdaˇ hawˇ-eu Ziˇlahˬ lehˇ myahˇ-euˬ miˬ zaˬ nyiˬ gʼaˬ jawˇ-eu meh.

²⁰Aˬdaˇ gʼaˬ o neh Yaˬbaˬlaˇ lehˇ myahˇ-euˬ aˬ li tiˬ li jawˇ le-euˬ meh. Yaˬbaˬlaˇ-aˬ, bawˇ tsahˬ-ahˇ sehˬ gʼawˆ gʼawˆ-awˇ jeˬ zaˬ kʼaˇ cu dzaˬ-eu tsawˇ haˬ deuˬ-euˬ aˬ da yaw dzahˇ meh.

²¹Yuˇbaˬlaˇ lehˇ myahˇ-euˬ aˬ yawꞈ-euˬ aˬ nyiˇ gʼaˬ-aˬ, bawˬ law baw, deuˇ-mˬ diˬ, laꞈ jeˬ tsawˬ, gaˇ nyeh nyeh-eu heu deuˬ kʼaˇ mˇ nya-eu tsawˇ haˬ dawˬ tawˆ luꞈ-euˬ aˬ da yaw dzahˇ gʼaˬ pyeuꞈ-eu meh.

²²Ziˇlahˬ gʼaˬ o neh, Tuˇbaˬlaˇgaˬiˇnaˆ lehˇ myahˇ-euˬ aˬ li tiˬ li jawˇ le-euˬ meh. Tuˇbaˬlaˇgaˬiˇnaˆ-aˬ, guiˬ shuiˇ hawˇ-eu shmˇ tehˆ-eu ba jiˬ pyeuꞈ-eu meh. Aˬ yawꞈ-euˬ dmˇ ma-aˬ, Naˬmaˬ meh.

²³Laˬmehˇ-aˬ, aˬ yawꞈ-euˬ miˬ zaˬ kʼoeˇ nyiˬ gʼaˬ-ahˇ heu loꞈ-ehˇ ehˇ nehˬ-euˬ meh. “Aˬdaˇ hawˇ-eu Ziˇlahˬ-oˇ, ngaˇ ehˇ gaˇ tiˬ poˆ naˇ haˬ sheˇ. Ngaˬ-ahˇ dawꞈ laˇ-euˬ zaˬ guˬ tiˬ gʼaˬ-ahˇ ngaˇ sehꞈ-euˬ ma.

²⁴Gaˬiˇnaˆ-ahˇ sehꞈ-eu tsawˇ haˬ-ahˇ shiꞈ poˆ keuˆ ni ya jahˇ kʼoꞈ nehˬ gaˇ keuˆ naˇ, ngaˬ-ahˇ sehꞈ laˇ-eu tsawˇ haˬ-ahˇ-aˬ, shiꞈ tseˇ shiꞈ poˆ keuˆ ni paˇ ya jahˇ kʼoꞈ nehˬ tehꞈ-a.”

²⁵Aˬdaˬ hawˇ-eu Eˇbaˆ aˬ nyaꞈ dzeˇ zaˬ aˬ li tiˬ li paˇ jawˇ le-euˬ meh. “Gaˬiˇnaˆ neh bi sehꞈ-euˬ Aˬbeˬlaˆ-euˬ dah zaˇ, Miˬyehˇ ngaˬ-ahˇ aˬ li tiˬ li paˇ biꞈ laꞈ-euˬ nga” lehˇ Eˇbaˆ ehˇ-awˇ, aˬ li kʼoeˇ li-ahˇ, Seˬtaˆ[5] lehˇ myahˇ nehˬ-euˬ meh.

²⁶Seˬtaˆ aˬ li tiˬ li jawˇ le-awˇ, Iˇnoˆ lehˇ myahˇ nehˬ-euˬ meh. Aˇ yamˬ kʼoeˇ yamˬ-ahˇ neh aˇ dahˬ beh-awˇ, tsawˇ haˬ zaˬ deuˬ uˬ duˬ tahˬ ngeh, Sahˬpaˬ Miˬyehˇ-euˬ muiˬ-eu shawˇ-eu tsawˇ myahˇ-ahˇ kuˇ kuˇ-ehˇ uˬ duˬ tahˬ-euˬ meh.