Read Akha Aˇ dahˬ 41 Bible Online

Aˇ dahˬ 41 - Akha bible

Aˇ dahˬ 41

¹Nyiˬ kʼoꞈ paˇ kaˇ-iˇ ngeh, Iˇjiˇtuˆ sahˬ paˬ heu loꞈ-ehˇ yuꞈ maˆ paˇ maˆ mawˇ-euˬ meh.

²Niˬlaˇ lawˇ baˬ dawˬ peh aˬ yawꞈ yawꞈ luꞈ ngeh, muiˬ dui tsuˇ dui dui-eu mawˇ neˇ mawˇ ma shiꞈ ma lawˇ baˬ laꞈ kʼoeˇ neh doˆ laˇ-awˇ, yaˇ moꞈ tseuˆ dzaˬ luꞈ-eu meh.

³Kʼoeˇ ngeh, behˇ jehˆ kahˬ mawˇ laˇ mawˇ laˇ-ehˇ jeh ngawˇ ni gʼeh-awˇ, aˇ gʼehˇ doeˇ dui dui-eu mawˇ neˇ mawˇ ma shiꞈ ma lawˇ baˬ laꞈ kʼoeˇ neh paˇ doˆ laˇ-awˇ, yaw beh doˆ laˇ taˬ-euˬ mawˇ neˇ mawˇ ma kʼoeˇ shiꞈ ma dawˬ peh yawꞈ luꞈ-eu meh.

⁴Kʼoeˇ naˇ, jeh ngawˇ ni gʼeh-eu mawˇ neˇ mawˇ ma kʼoeˇ deuˬ neh, tsuˇ dahˬ ni gʼeh-eu mawˇ neˇ mawˇ ma kʼoeˇ deuˬ-ahˇ dzaˬ ahˇ jiˇ-euˬ meh. Kʼoeˇ ngeh, sahˬ paˬ yuꞈ kʼaˆ taˬ-euˬ noeˬ laˇ-euˬ meh.

⁵Aˬ yawꞈ tiˬ poˆ paˇ yuꞈ kʼaˆ-awˇ, heu loꞈ-ehˇ yuꞈ maˆ paˇ maˆ mawˇ-euˬ meh. Cehˇ cehˇ kahˬ tiˬ kahˬ-ahˇ tehꞈ-ehˇ, myah laˇ-awˇ maˇ dui dui-eu cehˇ nmˇ shiꞈ nmˇ tsoꞈ-eu meh.

⁶Kʼoeˇ naˇ, nahˇ ma doˆ kʼehˬ paw jaˆ-eu kʼaˇ shuiꞈ deh paw neh baw gʼeh leꞈ-euˬ lahˇ dui dui-eu jaˬ lehˇ baˬ da neh, maˬ maˇ leˇ nya-eu cehˇ cehˇ kʼawꞈ shiꞈ nmˇ paˇ doˆ laˇ-euˬ meh.

⁷Cehˇ cehˇ kʼawꞈ kʼoeˇ shiꞈ nmˇ neh, cehˇ cehˇ maˇ kʼoeˇ shiꞈ nmˇ-ahˇ myoꞈ ahˇ jiˇ-euˬ meh. Kʼoeˇ ngeh, sahˬ paˬ yuꞈ kʼaˆ luꞈ-eu noeˬ laˇ-awˇ, yuꞈ maˆ maˆ luꞈ law hawˇ nyaˬ lehˇ, aˬ yawˇ yawꞈ siˬ leˇ-euˬ meh.

⁸Uˬ bya bya laˇ ngeh, sahˬ paˬ noeˬ shaˬ dui dui-eu miˇ neh, Iˇjiˇtuˆ miˇ kʼahˬ laꞈ kʼoeˇ kʼaˇ jawˇ-eu nyiˇ paˬ shaˆ ma deuˬ hawˇ-eu, zaˬ siˬ tsawˇ gahˇ ahˇ-eu tsawˇ haˬ deuˬ-ahˇ bi kuˇ uiˬ-euˬ meh. Aˬ yawꞈ neh yuꞈ maˆ maˆ mawˇ-euˬ gaˇ kawˆ kʼoeˇ aˬ yawꞈ maꞈ-ahˇ dzawˇ mehˬ nehˬ kʼawꞈ, tiˬ gʼaˬ-iˬ dawˬ tsuiꞈ maˬ yuˇ doˆ nehˬ nya-a.

⁹Kʼoeˇ ngeh, sahˬ paˬ dawˇ-eu aˬ gaꞈ dzaˇ uiˇ jahˇ-eu paw aˬ yuiꞈ geuꞈ-eu kʼoeˇ gʼaˬ sahˬ paˬ jawˇ gaˇ le-awˇ, heu loꞈ-ehˇ ehˇ nehˬ leˇ-euˬ meh. “Ngaˬ-euˬ yaw lehˬ iˬ nah ngaˇ noeˬ poˆ-awˇ, nawˬ-euˬ mehˬ shi ehˇ doˆ-eu ma.

¹⁰Nawˇ dzaˬ-eu kaˬ muˇ jahˇ-eu paw aˬ yuiꞈ geuꞈ-euˬ kʼoeˇ gʼaˬ hawˇ-eu ngaˬ-ahˇ nawˇ nui ma pehˇ-awˇ, nawˬ-euˬ nymˇ-ahˇ loꞈ-eu guiˇ maꞈ kʼoeˇ taˆ uˆ lahˇ-eu gʼaˬ-euˬ nymˇ-ahˇ jaˆ-eu paꞈ kuˆ laꞈ kʼoeˇ, nga nyaꞈ-ahˇ dawˆ nehˬ laꞈ-euˬ meh.

¹¹Tiˬ miˇ-aˬ, nga nyaꞈ nyiˬ gʼaˬ luꞈ, yuꞈ maˆ tiˬ gʼaˬ tiˬ jeˬ maˆ-euˬ ma.

¹²Yaw huiˬ yaw mahˇ kʼoeˇ gʼaˬ-euˬ zaˬ kʼaˆ pyeuꞈ-eu Heˬbyehˇ tsawˇ jeuˬ zaˬ guˬ tiˬ gʼaˬ kʼawꞈ, nga maꞈ nehˬ-ehˇ tiˬ kawˆ loꞈ-ehˇ paꞈ kuˆ laꞈ kʼoeˇ uˇ-euˬ ma. Nga nyaꞈ neh yuꞈ maˆ maˆ-euˬ gaˇ kawˆ aˬ yawꞈ-ahˇ dzawˇ nehˬ ngeh, aˬ yawꞈ dawˬ tsuiꞈ yuˇ doˆ nehˬ laꞈ-euˬ meh.

¹³Aˬ yawꞈ neh dawˬ tsuiꞈ kʼaˇ yuˇ doˆ-euˬ yawˬ jeˬ na luꞈ tsaˬ-eu meh. Aˬ yawꞈ neh ehˇ-euˬ loꞈ-ehˇ, nawˇ ngaˬ-ahˇ gaˇ paˇ bi mˇ nehˬ laꞈ-awˇ, kaˬ muˇ jahˇ-eu paw aˬ yuiꞈ bi geuꞈ-euˬ kʼoeˇ gʼaˬ-ahˇ nawˇ sehꞈ-euˬ meh.”

¹⁴Yoˇsehˆ-ahˇ sahˬ paˬ neh bi kuˇ doˆ laˬ-iˇ-euˬ miˇ neh, paꞈ kuˆ laꞈ kʼoeˇ neh tiˬ poˆ tehꞈ-ehˇ ya doˆ laˇ-euˬ meh. Aˬ yawꞈ mehˬ mahˬ jehˆ dzeh-awˇ, mehˬ tsoeˬ dm paˇ gʼaˬ miˇ tsa, sahˬ paˬ jawˇ gaˇ le-euˬ meh.

¹⁵Sahˬ paˬ ehˇ-eu, “Ngaˇ yuꞈ maˆ maˆ mawˇ-euˬ ma. Ehˇ kʼawꞈ, tsawˇ haˬ tiˬ gʼaˬ-iˬ dawˬ tsuiꞈ maˬ yuˇ doˆ nehˬ laꞈ nya-a. Nawˇ yuꞈ maˆ dawˬ tsuiꞈ yuˇ doˆ nya meh lehˇ aˬ cawˬ ngaˬ-ahˇ ehˇ nehˬ laꞈ-euˬ meh.”

¹⁶Yoˇsehˆ ehˇ-eu, “Sahˬ paˬ-oˇ, ngaˇ yuꞈ maˆ dawˬ tsuiꞈ maˬ yuˇ doˆ nya nya. Ehˇ kʼawꞈ, nawˬ-euˬ gʼaˇ duˬ Miˬyehˇ dawˬ tsuiꞈ yuˇ doˆ nehˬ laꞈ tehꞈ-a.”

¹⁷Sahˬ paˬ ehˇ-eu, “Ngaˇ heu loꞈ-ehˇ yuꞈ maˆ maˆ mawˇ-euˬ ma. Niˬlaˇ lawˇ baˬ lawˇ deh-ahˇ ngaˇ yawꞈ luꞈ-eu ma.

¹⁸Kʼoeˇ ngeh, muiˬ dui tsuˇ dui dui-eu mawˇ neˇ mawˇ ma shiꞈ ma lawˇ baˬ laꞈ kʼoeˇ neh doˆ laˇ-awˇ, yaˇ moꞈ tseuˆ dzaˬ luꞈ-eu meh.

¹⁹Kʼoeˇ naˇ, behˇ jehˆ kahˬ mawˇ laˇ mawˇ laˇ-ehˇ jeh dui dui-eu mawˇ neˇ mawˇ ma shiꞈ ma paˇ doˆ laˇ-euˬ meh. Mawˇ neˇ mawˇ ma kʼoeˇ deuˬ-aˬ, Iˇjiˇtuˆ miˇ kʼahˬ laꞈ kʼoeˇ ngaˇ tiˬ jawˇ-iˬ maˬ mawˇ haw-euˬ doeˇ dui dui-eu mawˇ neˇ mawˇ ma deuˬ pyeuꞈ-eu meh.

²⁰“Kʼoeˇ naˇ, mawˇ neˇ mawˇ ma yaw jeh kʼoeˇ deuˬ mawˇ neˇ mawˇ ma yaw tsuˇ kʼoeˇ deuˬ-ahˇ dzaˬ ahˇ jiˇ-euˬ meh.

²¹Ehˇ kʼawꞈ, mawˇ neˇ mawˇ ma yaw jeh kʼoeˇ deuˬ mawˇ neˇ mawˇ ma yaw tsuˇ kʼoeˇ deuˬ-ahˇ dzaˬ-ahˇ taˬ-euˬ nga lehˇ, tsawˇ haˬ tiˬ gʼaˬ-iˬ maˬ haw siˬ nya-a. Aˬ jeˬ miˇ neh ehˇ naˇ, kʼoeˇ loꞈ-ehˇ dzaˬ ahˇ taˬ-euˬ kʼawꞈ, aˬ yawꞈ yaw oeˇ loꞈ-ehˇ jeh ngawˇ ni gʼeh-eu miˇ neh meh. Kʼoeˇ naˇ, ngaˇ yuꞈ kʼaˆ luꞈ-eu noeˬ laˇ-euˬ ma.

²²Ngaˇ tiˬ poˆ paˇ yuꞈ kʼaˆ-awˇ, yuꞈ maˆ paˇ maˆ-eu laꞈ kʼoeˇ, cehˇ cehˇ kahˬ tiˬ kahˬ-ahˇ tehꞈ-ehˇ, myah laˇ-awˇ maˇ dui dui-eu cehˇ nmˇ shiꞈ nmˇ tsoꞈ luꞈ gaˇ ya mawˇ-euˬ ma.

²³Kʼoeˇ naˇ, kʼaˇ shuiꞈ deh paw neh baw gʼeh leꞈ-euˬ lahˇ dui dui-eu jaˬ lehˇ baˬ da neh maˬ maˇ leˇ nya-eu cehˇ cehˇ kʼawꞈ shiꞈ nmˇ-ahˇ ngaˇ paˇ ya mawˇ-euˬ ma.

²⁴Kʼoeˇ ngeh, cehˇ cehˇ kʼawꞈ kʼoeˇ shiꞈ nmˇ neh, cehˇ cehˇ maˇ kʼoeˇ shiꞈ nmˇ-ahˇ myoꞈ ahˇ jiˇ-euˬ meh. Ngaˬ neh yuꞈ maˆ maˆ mawˇ-euˬ kʼoeˇ, nyiˇ paˬ shaˆ ma deuˬ-ahˇ dzawˇ nehˬ kʼawꞈ, aˬ yawꞈ maꞈ tiˬ gʼaˬ-iˬ ngaˬ-ahˇ dawˬ tsuiꞈ maˬ yuˇ doˆ nehˬ laꞈ nya-a.”

²⁵Sahˬ paˬ kʼoeˇ gʼaˬ-ahˇ Yoˇsehˆ ehˇ nehˬ-eu, “Yuꞈ maˆ nyiˬ hmˬ luꞈ dawˬ tsuiꞈ tiˬ kawˆ meh. Miˬyehˇ mˇ-eu lehˇ lehˬ hmˬ taˬ-euˬ jeˬ, nawˬ-ahˇ pah mehˬ nehˬ laꞈ-euˬ meh.

²⁶Muiˬ dui tsuˇ dui dui-eu mawˇ neˇ mawˇ ma shiꞈ ma hawˇ-eu, maˇ dui dui-eu cehˇ cehˇ nmˇ shiꞈ nmˇ-euˬ dawˬ tsuiꞈ tiˬ gaˇ duˇ-awˇ, aˇ kʼoꞈ shiꞈ kʼoꞈ-ahˇ ehˇ mawꞈ-eu meh.

²⁷Jeˬ nah doˆ laˇ-euˬ mawˇ neˇ mawˇ ma yaw jeh kʼoeˇ shiꞈ ma hawˇ-eu, kʼaˇ shuiꞈ deh paw neh baw gʼeh leꞈ-euˬ jaˬ lehˇ zaw leˇ-euˬ miˇ neh cehˇ kʼawꞈ kʼawꞈ-iˇ-euˬ cehˇ nmˇ kʼoeˇ shiꞈ nmˇ-euˬ dawˬ tsuiꞈ-aˬ, shiꞈ kʼoꞈ keuˆ ni mehꞈ-eu shuꞈ-eu jeˬ keuˆ le gaˇ ehˇ mawꞈ-eu meh.

²⁸Ngaˬ neh nawˬ-ahˇ ehˇ nehˬ gʼaˬ-euˬ loꞈ-ehˇ, Miˬyehˇ mˇ-eu lehˇ gʼeh-eu jeˬ nawˬ-ahˇ pah mehˬ le-euˬ meh.

²⁹Iˇjiˇtuˆ miˇ kʼahˬ laꞈ kʼoeˇ, maˬ dzaˬ maˬ dawˇ jiˇ coeˇ ngeh keuˆ ni baw le za le-eu aˇ kʼoꞈ shiꞈ kʼoꞈ jaˆ tehꞈ-a. Kʼoeˇ jiˇ naˇ, mehꞈ dui shuꞈ dui dui-eu aˇ kʼoꞈ shiꞈ kʼoꞈ paˇ keuˆ le tehꞈ-a.

³⁰Kʼoeˇ ngeh, baw le za le-eu aˇ kʼoꞈ kʼoeˇ deuˬ-ahˇ tsawˇ haˬ dawˬ tawˆ luꞈ ya ngehˇ jiˇ tehꞈ-a. Aˬ jeˬ miˇ neh ehˇ naˇ, mehꞈ-eu shuꞈ-eu kʼoeˇ aˇ dzehˬ dzeuˇ-eu miˇ neh, miˇ kʼahˬ kʼahˬ lah ni ya cawˆ-iˇ gaˇ keuˆ tehꞈ-a.

³¹Maˬ dzaˬ maˬ dawˇ jiˇ coeˇ-eu aˇ kʼoꞈ aˇ la kʼoeˇ deuˬ-ahˇ ngehˇ tsehˆ ya tsehˆ tehꞈ-a. Aˬ jeˬ miˇ neh ehˇ naˇ, mehꞈ-eu shuꞈ-eu kʼoeˇ guˆ dui dui laˇ paˬ-ehˇ gʼeh-eu meh.

³²Nyiˬ poˆ keuˆ ni nawˇ yuꞈ maˆ maˆ mawˇ-euˬ dawˬ tsuiꞈ-aˬ, gʼawˬ myahˇ maˬ gʼeh-ehˇ kʼoeˇ loꞈ-ehˇ bi pyeuꞈ laˇ-eu gʼaˇ duˬ Miˬyehˇ lehˬ hmˬ dah taˬ-euˬ gaˇ ehˇ mawꞈ-eu meh.

³³“Teu miˇ neh, zaˬ siˬ tsawˇ gahˇ ahˇ-awˇ nui noeˬ kʼoˆ tsehˆ-eu tsawˇ haˬ deuˬ-ahˇ, nymˬ-mˇ nawˇ tseˇ doˆ-awˇ, nawˬ-euˬ miˇ kʼahˬ kʼoeˇ taˆ bi haw bi pyaˆ-eu tsaˬ meh.

³⁴Kʼoeˇ uˬ taꞈ, nawˬ-euˬ gaˇ bi mˇ-eu yaw huiˬ yaw mahˇ deuˬ kʼawꞈ tseˇ doˆ-awˇ, maˬ dzaˬ maˬ dawˇ jiˇ coeˇ ngeh keuˆ ni baw le za le-eu aˇ kʼoꞈ kʼoeˇ shiꞈ kʼoꞈ laꞈ kʼoeˇ, kʼaˇ mˇ za-euˬ dzaˬ la gʼo cehˇ deuˬ ngaˬ bymˇ tiˬ bymˇ bi taꞈ uiˬ taˬ-awˬ.

³⁵Aˬ yawꞈ maꞈ-ahˇ dawˬ biꞈ-awˇ, baw le za le-eu aˇ kʼoꞈ kʼoeˇ shiꞈ kʼoꞈ luꞈ laꞈ kʼoeˇ, kʼaˇ jaˆ-eu cehˇ dawˬ tawˆ luꞈ taꞈ uiˬ-awˇ, meuˬ deuˬ laꞈ kʼoeˇ bi tawˬ uiˬ taˬ-awˇ bi loꞈ piˇ-awˬ.

³⁶Jeˬ hmˬ taˬ-euˬ cehˇ kʼoeˇ deuˬ-aˬ, aˬ kaˇ keuˆ le-eu mehꞈ dui shuꞈ dui dui-eu aˇ kʼoꞈ kʼoeˇ shiꞈ kʼoꞈ gʼaˇ duˬ lehˬ hmˬ taˬ-euˬ jeˬ pyeuꞈ tehꞈ-a. Kʼoeˇ loꞈ-ehˇ jahˇ naˇ, mehꞈ-eu shuꞈ-eu baˬ da neh, miˇ kʼahˬ cawˆ gaˇ maˬ keuˆ-aˇ.”

³⁷Yoˇsehˆ neh ehˇ nehˬ-euˬ loꞈ-ehˇ mˇ-eu gʼaˇ duˬ, sahˬ paˬ hawˇ-eu aˬ yawꞈ-euˬ gaˇ mˇ-eu yaw huiˬ yaw mahˇ deuˬ nui ma tsaˬ-euˬ meh.

³⁸“Miˬyehˇ-euˬ Yaw sahˇ jawˇ-eu Yoˇsehˆ loꞈ-ehˇ gʼeh-eu tsawˇ haˬ-ahˇ aˬ dui maˬ paˇ poˆ mawˇ nya-aˇ” lehˇ, sahˬ paˬ kʼoeˇ gʼaˬ aˬ yawꞈ maꞈ-ahˇ ehˇ nehˬ-euˬ meh.

³⁹Kʼoeˇ ngeh, sahˬ paˬ kʼoeˇ gʼaˬ Yoˇsehˆ-ahˇ ehˇ nehˬ-eu, “Gaˇ kawˆ heu deuˬ dawˬ tawˆ luꞈ, Miˬyehˇ neh nawˬ-ahˇ pah mehˬ nehˬ-euˬ meh. Kʼoeˇ miˇ neh, nawˇ-aˬ, yawˬ gʼaˬ na luꞈ naˆ maˬ tseˇ tsawˇ gahˇ ahˇ-awˇ, noeˬ siˬ noeˬ mawˇ nya dzehˬ-eu yaw duˬ baw meh lehˇ nga maꞈ siˬ nya ma.

⁴⁰Ngaˇ nawˬ-ahˇ ngaˬ-euˬ miˇ kʼahˬ kʼoeˇ taˆ uˆ lahˇ-eu gʼaˬ bi geuꞈ-awˇ, ngaˬ-euˬ tsawˇ haˬ dawˬ tawˆ luꞈ, nawˬ-euˬ ehˇ dawˬ-ahˇ bi naˇ haˬ ma. Nawˇ naˆ maˬ tseˇ baoˬ huiˬ dzehˬ-eu tsawˇ haˬ ngaˇ tiˬ gʼaˬ jawˇ-eu tehꞈ ma.

⁴¹Nymˬ-mˇ, ngaˇ nawˬ-ahˇ Iˇjiˇtuˆ miˇ kʼahˬ kʼoeˇ taˆ uˆ lahˇ-awˇ haw-eu pyaˆ-eu gʼaˬ bi geuꞈ ma.”

⁴²Sahˬ paˬ kʼoeˇ gʼaˬ-aˬ, sahˬ paˬ-euˬ jmˬ diˬ taˬ-euˬ aˬ yawꞈ-euˬ shuiˇ laꞈ behˬ lehˆ doˆ-awˇ, Yoˇsehˆ-ahˇ bi behˬ-euˬ meh. Yoˇsehˆ-ahˇ muiˬ dui dui-eu pehˇ kʼahˬ pehˇ mahˇ bi dm-awˇ, shuiˇ lawˇ dah bi dah-euˬ meh.

⁴³Sahˬ paˬ-euˬ mahˬ laˆ lawˬ nyiˬ laˇ tiˬ laˇ kʼawꞈ, Yoˇsehˆ-ahˇ biꞈ-awˇ bi dziˬ-euˬ meh. Yoˇsehˆ-ahˇ loꞈ piˇ-eu guiˇ maꞈ deuˬ mahˬ laˆ lawˬ kʼoeˇ laˇ-euˬ mehˬ hu paw cah-awˇ, “Gaˇ pawˇ pawˇ-awˬ. Gaˇ pawˇ pawˇ-awˬ” lehˇ guˇ guˇ-ehˇ cah-euˬ meh. Yoˇsehˆ-aˬ, kʼoeˇ loꞈ-ehˇ gʼeh-awˇ, Iˇjiˇtuˆ miˇ kʼahˬ-ahˇ uˆ lahˇ-eu gʼaˬ pyeuꞈ laˇ-euˬ meh.

⁴⁴Sahˬ paˬ kʼoeˇ gʼaˬ Yoˇsehˆ-ahˇ ehˇ nehˬ-eu, “Ngaˇ-aˬ, sahˬ paˬ ma. Nawˬ neh dawˬ biꞈ-awˇ bi mˇ-euˬ jeˬ maˬ ngeuˇ naˇ, Iˇjiˇtuˆ tsawˇ haˬ tiˬ gʼaˬ-iˬ yawˬ ha-euˬ aˬ kuiˇ aˬ laꞈ maˬ ya cawˬ diˇ-a.”

⁴⁵Sahˬ paˬ kʼoeˇ gʼaˬ neh Yoˇsehˆ-ahˇ Iˇjiˇtuˆ tsawˇ myahˇ biꞈ-awˇ, Zaˬpaˬnaˆpaˬnehˇ lehˇ myahˇ nehˬ-euˬ meh. Kʼoeˇ naˇ, Heˬliˬpawˇliˆ meuˬ-ahˇ piˇ ma geuꞈ luꞈ-eu Pawˇtiˇpeˬlaˇ-euˬ aˬ buˇ Aˬseˇnaˆ-ahˇ bi sheuˬ-euˬ meh.

⁴⁶Yoˇsehˆ sahˬ paˬ-euˬ gaˇ mˇ dahˬ beh ngeh, aˇ kʼoꞈ smˬ tseˇ kʼawˆ laˇ-euˬ meh. Sahˬ paˬ-euˬ nymˇ-ahˇ neh aˬ yawꞈ doˆ-iˇ-awˇ, miˇ kʼahˬ doe doe-ehˇ cah haw-iˇ-euˬ meh.

⁴⁷Baw le za le-eu shiꞈ kʼoꞈ aˇ yamˬ laꞈ kʼoeˇ, dzaˬ la gʼo cehˇ gʼawˬ mya ni mˇ za-euˬ meh.

⁴⁸Kʼoeˇ deuˬ dawˬ tawˆ luꞈ-ahˇ Yoˇsehˆ taꞈ uiˬ-awˇ, meuˬ deuˬ laꞈ kʼoeˇ tawˬ uiˬ-awˇ jeˬ hmˬ taˬ-euˬ meh. Meuˬ aˬ yawꞈ meuˬ yawꞈ laꞈ kʼoeˇ, meuˬ-euˬ tahˬ gʼoꞈ tahˬ jawˇ jaˆ-eu deh yaˇ hawˇ-eu deh yaˇ deuˬ laꞈ kʼoeˇ kʼaˇ mˇ za-euˬ cehˇ deuˬ bi tawˬ uiˬ-awˇ, bi jeˬ hmˬ taˬ-euˬ meh.

⁴⁹Yoˇsehˆ neh taꞈ uiˬ taˬ-euˬ cehˇ-aˬ, iˬ ma laˆ shaˆ kʼaˇ shuiꞈ deh loꞈ-ehˇ cu laˇ taˬ-awˇ, maˬ pehˬ haw jiˇ coeˇ-a.

⁵⁰Mehꞈ-eu shuꞈ-eu aˇ yamˬ maˬ keuˆ laˇ mi naˆ-ehˇ, Yoˇsehˆ gʼaˇ duˬ Aˬseˇnaˆ aˬ li nyiˬ li ciˬ-euˬ meh.

⁵¹Kʼoeˇ ngeh, “Ngaˬ neh tahˬ puˬ-eu shaˬ-eu zahˬ-eu jeˬ hawˇ-eu, ngaˬ da-euˬ nymˇ jiˇ gaˇ kawˆ ngaˇ ngehˇ ni, Miˬyehˇ jahˇ nehˬ laꞈ-euˬ nga” lehˇ Yoˇsehˆ ehˇ-awˇ, aˬ li aˬ yuiꞈ gʼaˬ-ahˇ Maˬnaˇseˬ[49] lehˇ myahˇ nehˬ-euˬ meh.

⁵²Kʼoeˇ naˇ, “Ngaˇ ya shaˬ ya zahˬ-euˬ miˇ kʼahˬ-ahˇ, Miˬyehˇ ngaˬ-ahˇ guiˬ lahˬ biꞈ-awˇ, zaˬ bi jawˇ le nehˬ laꞈ-euˬ nga” lehˇ aˬ yawꞈ paˇ ehˇ-awˇ, aˬ li aˬ nyiˇ gʼaˬ-ahˇ Eˇpaˬleˬ[50] lehˇ myahˇ nehˬ-euˬ meh.

⁵³Iˇjiˇtuˆ miˇ kʼahˬ laꞈ kʼoeˇ baw le za le-eu aˇ yamˬ kʼoeˇ shiꞈ kʼoꞈ dzeuˇ-iˇ-euˬ meh.

⁵⁴Kʼoeˇ ngeh, Yoˇsehˆ neh ehˇ taˬ-euˬ loꞈ-ehˇ, mehꞈ-eu shuꞈ-eu aˇ yamˬ shiꞈ kʼoꞈ paˇ keuˆ le-euˬ meh. Miˇ kʼahˬ yawˬ kʼahˬ na luꞈ laꞈ kʼoeˇ, mehꞈ-eu shuꞈ-eu jeˬ keuˆ le-euˬ meh. Ehˇ kʼawꞈ, Iˇjiˇtuˆ miˇ kʼahˬ laꞈ kʼoeˇ dzaˬ dzaˬ dawˇ dawˇ tiˬ byah tiˬ loꞈ jaˆ luꞈ-eu meh.

⁵⁵Iˇjiˇtuˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ kʼoeˇ taˆ mehꞈ-eu shuꞈ-eu jeˬ keuˆ le ngeh, sahˬ paˬ jawˇ gaˇ le-awˇ, dzaˬ dzaˬ dawˇ dawˇ shaˇ leˇ-euˬ meh. Kʼoeˇ ngeh, Yoˇsehˆ jawˇ gaˇ iˇ-awˇ, Yoˇsehˆ neh kʼaˇ ehˇ nehˬ laꞈ-euˬ loꞈ-ehˇ jahˇ-iˇ-awˬ lehˇ, aˬ yawꞈ maꞈ-ahˇ sahˬ paˬ ehˇ nehˬ-euˬ meh.

⁵⁶Mehꞈ-eu shuꞈ-eu jeˬ tiˬ nah saˇ-iˬ tiˬ nah kʼaˆ dzehˬ laˇ-awˇ, miˇ kʼahˬ kʼahˬ lah ni byah-iˇ-euˬ meh. Kʼoeˇ ngeh, cehˇ tawˬ ahˇ taˬ-euˬ cehˇ jiˇ jiˇ ma dawˬ tawˆ luꞈ-ahˇ Yoˇsehˆ pah-awˇ, Iˇjiˇtuˆ miˇ kʼahˬ zaˬ deuˬ-ahˇ cehˇ ahˬ nehˬ-euˬ meh.

⁵⁷Mehꞈ dui shuꞈ dui dui-eu jeˬ miˇ tsaˬ kʼoeˇ taˆ byah jiˇ-euˬ miˇ neh, miˇ tsaˬ kʼoeˇ taˆ kʼaˇ jawˇ-eu tsawˇ haˬ deuˬ Yoˇsehˆ jawˇ gaˇ cehˇ zeuˇ dzaˬ le-euˬ meh.