Read Akha Aˇ dahˬ 42 Bible Online

Aˇ dahˬ 42 - Akha bible

Aˇ dahˬ 42

¹Iˇjiˇtuˆ miˇ kʼahˬ laꞈ kʼoeˇ cehˇ jaˆ-eu gaˇ kawˆ Yaˬkoˆ ya gaˬ ngeh, aˬ yawꞈ-euˬ aˬ li deuˬ-ahˇ, “Aˬ jeˬ miˇ neh naw maꞈ tiˬ jeˬ-iˬ maˬ shaˇ noeˬ ni jawˇ te.

²Iˇjiˇtuˆ miˇ kʼahˬ laꞈ kʼoeˇ cehˇ jaˆ meh lehˇ aˬ cawˬ ehˇ-eu ngaˇ ya gaˬ-euˬ ma. Aˬ dui pehˬ hawˬ mehꞈ maˬ ya dzahˬ sehꞈ-eu gʼaˇ duˬ, kʼoeˇ gaˇ iˇ-awˇ cehˇ zeuˇ dzaˬ-iˇ-awˬ” lehˇ ehˇ nehˬ-euˬ meh.

³Kʼoeˇ ngeh, Yoˇsehˆ nehˬ-ehˇ tiˬ uˇ pyehˆ zaˬ maˬ ngeuˇ-eu Yoˇsehˆ-euˬ aˇ doˆ tseˇ gʼaˬ, Iˇjiˇtuˆ miˇ kʼaˬ-ahˇ cehˇ zeuˇ dzaˬ-iˇ-eu lehˇ iˇ-euˬ meh.

⁴Ehˇ kʼawꞈ, Yoˇsehˆ nehˬ-ehˇ tiˬ uˇ pyehˆ zaˬ pyeuꞈ-eu Beˬyaˬmiˬ gʼaˬ-ahˇ, Yaˬkoˆ maˬ bi iˇ-a. Aˬ jeˬ miˇ neh ehˇ naˇ, Beˬyaˬmiˬ-ahˇ tiˬ jeˬ paˬ pyeuꞈ laˇ gaˇ Yaˬkoˆ kʼahˬ lahˇ-eu meh.

⁵Kaˬnaˬ miˇ kʼahˬ laꞈ kʼoeˇ mehꞈ dui shuꞈ dui dui-eu jeˬ keuˆ le-euˬ miˇ neh, Yaˬkoˆ-euˬ aˬ li kʼoeˇ deuˬ cehˇ zeuˇ dzaˬ-iˇ-eu lehˇ, aˬ cawˬ nehˬ-ehˇ iˇ gʼeh-euˬ meh.

⁶Yoˇsehˆ-aˬ, Iˇjiˇtuˆ miˇ kʼahˬ kʼoeˇ taˆ uˆ lahˇ-awˇ haw-eu pyaˆ-eu gʼaˬ pyeuꞈ-eu loꞈ-ehˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ deuˬ cehˇ zeuˇ dzaˬ laˇ gaˇ cehˇ ahˬ nehˬ luꞈ-eu meh. Kʼoeˇ ngeh, Yoˇsehˆ-euˬ aˇ doˆ deuˬ oe-awˇ, baˬ ba miˇ tsa tuˆ ni awˆ byaˆ-eu laꞈ kʼoeˇ, Yoˇsehˆ-ahˇ yaw zeu baw nehˬ-euˬ meh.

⁷Aˬ yawꞈ maꞈ-ahˇ Yoˇsehˆ ya mawˇ ngeh, aˬ yawꞈ-euˬ aˇ doˆ deuˬ nga lehˇ tiˬ poˆ tehꞈ-ehˇ haw siˬ-euˬ meh. Ehˇ kʼawꞈ, aˬ yawꞈ maꞈ-ahˇ maˬ siˬ nya-eu geuꞈ-awˇ, dawˬ kʼaˆ ngehˬ-eu laꞈ kʼoeˇ, “Naw maꞈ aˬ gaˇ jawˇ-eu oe teˬ” lehˇ naˇ haˬ ngeh, “Nga maꞈ Kaˬnaˬ miˇ kʼahˬ-ahˇ jawˇ-eu, cehˇ zeuˇ dzaˬ le-euˬ ma” lehˇ aˬ ha mehˇ nmˇ ehˇ kʼoꞈ nehˬ-euˬ meh.

⁸Aˬ ha mehˇ nmˇ-ahˇ Yoˇsehˆ haw siˬ-euˬ kʼawꞈ, Yoˇsehˆ-ahˇ aˬ ha mehˇ nmˇ maˬ haw siˬ nya-a.

⁹Kʼoeˇ ngeh, Yoˇsehˆ-aˬ, aˬ ha mehˇ nmˇ gaˇ kawˆ aˇ hu aˬ yawꞈ neh yuꞈ maˆ maˆ mawˇ-euˬ gaˇ paˇ noeˬ doˆ leˇ-awˇ, “Naw maꞈ kʼoeˬ sho haw le-euˬ tsawˇ haˬ ngaˇ. Nga maꞈ-euˬ miˇ kʼahˬ gʼaˬ baˬ duˬ-ahˇ pyehˆ tseˇ haw le-euˬ ngaˇ” lehˇ, aˬ ha mehˇ nmˇ-ahˇ ehˇ nehˬ-euˬ meh.

¹⁰Aˬ ha mehˇ nmˇ ehˇ-eu, “Sahˬ paˬ-oˇ, nga maꞈ naw maꞈ-euˬ miˇ kʼahˬ-ahˇ kʼoeˬ sho haw le-euˬ tsawˇ haˬ maˬ ngeuˇ. Nga maꞈ-aˬ, nawˬ-euˬ zaˬ kʼaˆ loꞈ-ehˇ gʼeh-eu tsawˇ haˬ pyeuꞈ-awˇ, cehˇ zeuˇ dzaˬ le-eu oe-euˬ tehꞈ ma.

¹¹Nga maꞈ dawˬ tawˆ luꞈ tiˬ mehˇ nmˇ tehꞈ ma. Nga maꞈ kʼoeˬ sho haw le-euˬ tsawˇ haˬ maˬ ngeuˇ. Tsawˇ haˬ yaw muiˬ pyeuꞈ-eu ma.”

¹²Yoˇsehˆ ehˇ-eu, “Maˬ ngeuˇ luꞈ-a. Nga maꞈ miˇ kʼahˬ gʼaˬ baˬ duˬ-ahˇ pyehˆ tseˇ haw-eu lehˇ oe-euˬ ngaˇ.”

¹³Aˬ ha mehˇ nmˇ ehˇ-eu, “Ngaˬ ha mehˇ nmˇ tseˇ nyiꞈ gʼaˬ jawˇ-awˇ, dawˬ tawˆ luꞈ Kaˬnaˬ miˇ kʼahˬ-ahˇ jawˇ-eu tsawˇ haˬ tiˬ gʼaˬ-euˬ zaˬ tehꞈ ma. Ngaˬ ha mehˇ nmˇ-euˬ aˬ nyiˇ tiˬ gʼaˬ shiˇ dzeuˇ-awˇ, aˬ nyiˇ nyiˇ saˬ gʼaˬ aˬ da nehˬ-ehˇ jawˇ yaꞈ-euˬ meh.”

¹⁴Ehˇ kʼawꞈ, Yoˇsehˆ paˇ ehˇ-eu, “Ngaˬ neh kʼaˇ ehˇ-euˬ loꞈ-ehˇ ngaˇ. Naw maꞈ-aˬ, kʼoeˬ sho haw le-euˬ tsawˇ haˬ deuˬ tehꞈ ngaˇ.

¹⁵Ngaˇ naw maꞈ-ahˇ heu loꞈ-ehˇ lawˬ haw ma. Sahˬpaˬ-euˬ tsawˇ myahˇ uˬ moˆ naw maꞈ-ahˇ ngaˇ heu loꞈ-ehˇ ehˇ tsehˆ nehˬ-eu ma. Nawˬ ha mehˇ nmˇ-euˬ aˬ nyiˇ nyiˇ saˬ gʼaˬ heu gaˇ maˬ oe keuˆ kʼoeˇ keuˆ ni, naw maꞈ-ahˇ maˬ bi gʼoꞈ leˇ.

¹⁶Naw maꞈ laꞈ kʼoeˇ tiˬ gʼaˬ gʼoꞈ leˇ-awˇ, naw maꞈ-euˬ aˬ nyiˇ nyiˇ saˬ gʼaˬ-ahˇ ya sheuˬ laˬ leˇ meh. Naw maꞈ neh kʼaˇ ehˇ-euˬ loꞈ-ehˇ tsaˬ nga loˇ maˬ tsaˬ nga loˇ lehˇ maˬ siˬ duˬ laˇ kʼoeˇ keuˆ ni, aˬ nyiˇ nyiˇ saˬ gʼaˬ-ahˇ bi sheuˬ laˬ leˇ-euˬ kʼoeˇ gʼaˬ maˬ ngeuˇ naˇ, naw maꞈ dawˬ tawˆ luꞈ paꞈ kuˆ laꞈ kʼoeˇ ya uˇ tawˬ yaꞈ tehꞈ-a. Kʼoeˇ loꞈ-ehˇ maˬ ngeuˇ naˇ, sahˬ paˬ yaw dehꞈ kʼaˇ dehꞈ kʼoeˇ keuˆ ni, kʼoeˬ sho haw le-euˬ tsawˇ haˬ lehˇ sawˇ-eu ma.”

¹⁷Kʼoeˇ naˇ, Yoˇsehˆ neh aˬ ha mehˇ nmˇ-ahˇ smˬ nah keuˆ ni paꞈ kuˆ laꞈ kʼoeˇ paꞈ ahˇ-awˇ bi jawˇ-euˬ meh.

¹⁸Smˬ nah byah laˇ ngeh, aˬ ha mehˇ nmˇ-ahˇ Yoˇsehˆ heu loꞈ-ehˇ ehˇ nehˬ-euˬ meh. “Ngaˇ-aˬ, Miˬyehˇ-ahˇ guˆ-eu tsawˇ haˬ ma. Teu miˇ neh, ngaˬ neh kʼaˇ ehˇ-euˬ loꞈ-ehˇ naw maꞈ jahˇ naˇ, shiˇ gaˇ maˬ keuˆ ni bi dzeuˇ-iˇ ma.

¹⁹Naw maꞈ muiˬ-eu tsawˇ haˬ ma lehˇ ngeuˇ naˇ, nymˬ-mˇ naw maꞈ uˇ luꞈ-eu paꞈ kuˆ laꞈ kʼoeˇ tiˬ gʼaˬ uˇ yaꞈ-awˇ, nui deuˬ dawˬ tawˆ luꞈ mehꞈ-eu shuꞈ-eu jeˬ-ahˇ ya daˬ luꞈ-eu naw maꞈ-euˬ miˬ sawˇ zaˬ deuˬ jawˇ gaˇ, cehˇ tawˬ kʼoꞈ ha nehˬ leˇ-awˬ.

²⁰Kʼoeˇ naˇ, nawˬ ha mehˇ nmˇ-euˬ aˬ nyiˇ nyiˇ saˬ gʼaˬ-ahˇ ngaˇ jawˇ gaˇ sheuˬ leꞈ-awˬ. Naw maꞈ kʼoeˇ loꞈ-ehˇ jahˇ-awˇ, naw maꞈ neh kʼaˇ ehˇ-euˬ loꞈ-ehˇ ngeuˇ ngaˇ lehˇ ngaˇ ya siˬ duˬ naˇ, naw maꞈ-ahˇ shiˇ gaˇ maˬ keuˆ ni bi dzeuˇ-iˇ ma.” Yoˇsehˆ neh kʼaˇ ehˇ nehˬ-euˬ loꞈ-ehˇ mˇ-eu gʼaˇ duˬ, aˬ ha mehˇ nmˇ nui ma tsaˬ-euˬ meh.

²¹Kʼoeˇ ngeh, aˬ ha mehˇ nmˇ tiˬ gʼaˬ tiˇ gʼaˬ ehˇ-eu, “Aˬ dui mehˇ nmˇ neh aˬ dui-euˬ aˬ nyiˇ kʼoeˇ gʼaˬ-ahˇ yehˬ bawˬ sehˇ lu-ehˇ jahˇ nehˬ-euˬ miˇ neh, aˬ dui mehˇ nmˇ iˬ baˇ naꞈ-eu nga. Aˬ yawꞈ noeˬ shaˬ dui dui-eu laꞈ kʼoeˇ, kʼoeˇ loꞈ-ehˇ taˬ jahˇ nehˬ laꞈ lehˇ aˬ dui-ahˇ shaˇ-euˬ kʼawꞈ, aˬ dui mehˇ nmˇ maˬ naˇ haˬ nehˬ-aˬ. Kʼoeˇ miˇ neh, aˬ dui heu loꞈ-ehˇ paˇ ya daˬ poˆ-eu nga.”

²²Luˇbeˬ ehˇ-eu, “Aˬ li-ahˇ taˬ laˆ tahˬ taˬ laˆ naˇ lehˇ naw maꞈ-ahˇ ngaˇ ehˇ nehˬ kʼawꞈ, naw maꞈ maˬ naˇ haˬ-a. Nymˬ-mˇ poˆ jawˇ-aˬ, aˬ yawꞈ-ahˇ laˆ sehꞈ-euˬ loꞈ-ehˇ aˬ dui paˇ ya daˬ poˆ-eu keuˆ laˇ taˬ-euˬ nga.”

²³Aˬ yawꞈ maꞈ kʼoeˇ loꞈ-ehˇ ehˇ luꞈ-eu Yoˇsehˆ yaw muiˬ paˬ-ehˇ gʼoˆ shaw nya-awˇ siˬ nya-eu meh. Ehˇ kʼawꞈ, Yoˇsehˆ kʼoeˇ loꞈ-ehˇ siˬ nya tehꞈ-a lehˇ aˬ yawꞈ maꞈ maˬ noeˬ-a. Aˬ jeˬ miˇ neh ehˇ naˇ, Yoˇsehˆ hawˇ-eu aˬ yawꞈ maꞈ yaw kaˬ dawˬ ngehˬ cawˬ ngeh, Iˇjiˇtuˆ dawˬ hawˇ-eu Heˬbyehˇ dawˬ heu nyiˬ jeˬ luꞈ ngehˬ nya-eu tsawˇ kaˬ-ahˇ gʼoe-awˇ ngehˬ cawˬ-euˬ meh.

²⁴Kʼoeˇ ngeh, aˬ yawꞈ maꞈ jawˇ gaˇ neh Yoˇsehˆ doˆ-iˇ-awˇ, ngoeˇ-euˬ meh. Aˬ yawꞈ ngoeˇ taˬ gʼaˬ ngeh, aˬ yawꞈ maꞈ jawˇ gaˇ paˇ gʼoꞈ laˇ-awˇ, aˬ yawꞈ maꞈ-euˬ mehˬ shi Suˇmoˬ-ahˇ gʼeu doˆ-awˇ, paꞈ cuꞈ-euˬ meh.

²⁵Yoˇsehˆ-aˬ, aˬ yawꞈ-euˬ aˇ doˆ deuˬ-euˬ cehˇ pehˇ zeuˇ-ahˇ cehˇ tiˬ byah ni pehˬ ahˇ nehˬ-awˇ, aˬ yawꞈ maꞈ neh cehˇ aˇ poeˬ biꞈ taˬ-euˬ pyuˇ deuˬ kʼawꞈ, cehˇ pehˇ zeuˇ kʼoeˇ deuˬ laꞈ kʼoeˇ paˇ dawˆ ahˇ kʼoꞈ nehˬ-euˬ uˬ taꞈ, aˬ yawꞈ maꞈ gaˇ pehˇ gʼoꞈ leˇ luꞈ ngeh bi dzaˬ-eu gʼaˇ duˬ, dzaˬ dzaˬ dawˇ dawˇ tiˬ byah tiˬ loꞈ biꞈ nehˬ-eu gʼaˇ duˬ, aˬ yawꞈ-euˬ tsawˇ haˬ deuˬ-ahˇ ehˇ nehˬ taˬ-euˬ meh. Yawˬ jeˬ na luꞈ aˬ yawꞈ neh kʼaˇ ehˇ nehˬ-euˬ loꞈ-ehˇ jahˇ-euˬ meh.

²⁶Aˬ ha mehˇ nmˇ-aˬ, aˬ yawꞈ maꞈ neh zeuˇ-euˬ cehˇ kʼoeˇ deuˬ mahˬ tahˬ laˆ kʼoeˇ taˆ baꞈ daˆ-awˇ gʼoꞈ leˇ-euˬ meh.

²⁷Uˬ ciꞈ paw gaˇ pehˇ yaꞈ luꞈ ngeh, aˬ yawꞈ maꞈ laꞈ kʼoeˇ tiˬ gʼaˬ mahˬ tahˬ laˆ-ahˇ cehˇ bi dzaˬ-eu lehˇ cehˇ pehˇ zeuˇ puiˇ-euˬ meh. Kʼoeˇ ngeh, cehˇ kʼoeˇ taˆ pyuˇ dawˆ ahˇ kʼoꞈ taˬ-euˬ gaˇ aˬ yawꞈ ya mawˇ-euˬ meh.

²⁸“Ngaˬ-euˬ pyuˇ ngaˬ-ahˇ paˇ biꞈ kʼoꞈ nehˬ laꞈ-euˬ nga. Heu gaˇ ngaˬ-euˬ cehˇ pehˇ zeuˇ laꞈ kʼoeˇ dawˆ ahˇ kʼoꞈ taˬ ngaˬ” lehˇ aˬ ha mehˇ nmˇ-ahˇ aˬ yawꞈ guˇ gaˬ nehˬ ngeh, aˬ yawꞈ maꞈ zahˬ leˇ-awˇ guˆ-eu laꞈ kʼoeˇ, “Aˬ dui mehˇ nmˇ-ahˇ Miˬyehˇ aˬ jeˬ paˇ jahˇ nehˬ laꞈ-euˬ maˬ siˬ miˇ-a” lehˇ, tiˬ gʼaˬ tiˇ gʼaˬ ehˇ-eu meh.

²⁹Kaˬnaˬ miˇ kʼahˬ-ahˇ aˬ da Yaˬkoˆ jawˇ gaˇ aˬ ha mehˇ nmˇ gʼoꞈ keuˆ leˇ ngeh, kʼaˇ pyeuꞈ laˇ-euˬ gaˇ kawˆ dawˬ tawˆ luꞈ, aˬ yawꞈ maꞈ-euˬ aˬ da-ahˇ heu loꞈ-ehˇ dzawˇ nehˬ-euˬ meh.

³⁰“Iˇjiˇtuˆ miˇ kʼahˬ-ahˇ uˆ lahˇ-eu gʼaˬ ngaˬ ha mehˇ nmˇ-ahˇ dawˬ kʼaˆ ngehˬ-awˇ, aˬ yawꞈ maꞈ-euˬ miˇ kʼahˬ-ahˇ kʼoeˬ sho haw le-euˬ nga lehˇ ehˇ-eu meh.

³¹Ngaˬ ha mehˇ nmˇ kʼawꞈ heu loꞈ-ehˇ ehˇ kʼoꞈ nehˬ-euˬ ma. ‘Nga maꞈ nawˬ-euˬ miˇ kʼahˬ-ahˇ kʼoeˬ sho-eu tsawˇ haˬ maˬ ngeuˇ. Muiˬ-eu jaˬ-eu tsawˇ haˬ ma.

³²Ngaˬ ha mehˇ nmˇ tseˇ nyiꞈ gʼaˬ jawˇ-awˇ, dawˬ tawˆ luꞈ aˬ da tiˬ da-euˬ zaˬ tehꞈ ma. Ngaˬ ha mehˇ nmˇ-euˬ aˬ nyiˇ tiˬ gʼaˬ shiˇ dzeuˇ-awˇ, aˬ nyiˇ nyiˇ saˬ gʼaˬ-aˬ, aˬ da nehˬ-ehˇ Kaˬnaˬ miˇ kʼahˬ-ahˇ jawˇ yaꞈ-euˬ meh’ lehˇ ehˇ nehˬ-euˬ ma.

³³Kʼoeˇ ngeh, tsawˇ haˬ kʼoeˇ gʼaˬ heu loꞈ-ehˇ paˇ ehˇ-eu meh. ‘Naw maꞈ tsawˇ haˬ yaw muiˬ nga loˇ lehˇ, ngaˇ naw maꞈ-ahˇ heu loꞈ-ehˇ lawˬ haw ma. Naw maꞈ laꞈ kʼoeˇ tiˬ gʼaˬ bi jawˇ yaꞈ-awˇ, nui deuˬ dawˬ tawˆ luꞈ mehꞈ-eu shuꞈ-eu jeˬ-ahˇ ya daˬ luꞈ-eu naw maꞈ-euˬ miˬ sawˇ zaˬ deuˬ jawˇ gaˇ cehˇ tawˬ kʼoꞈ ha leˇ nya tehꞈ-a.

³⁴Naw maꞈ kʼoeˬ sho haw le-euˬ tsawˇ haˬ maˬ ngeuˇ-ehˇ, tsawˇ haˬ yaw muiˬ pyeuꞈ-eu duˬ laˇ ni, naw maꞈ-euˬ aˬ nyiˇ nyiˇ saˬ gʼaˬ-ahˇ heu gaˇ sheuˬ leꞈ-awˬ. Kʼoeˇ ngeh jawˇ, naw maꞈ-euˬ mehˇ nmˇ heu gʼaˬ naw maꞈ-ahˇ paˇ biꞈ kʼoꞈ nehˬ ma. Naw maꞈ kʼawꞈ, miˇ kʼahˬ heu kʼahˬ-ahˇ jeˬ gaꞈ taꞈ nya tehꞈ-a’ lehˇ ehˇ-eu meh.”

³⁵Kʼoeˇ naˇ, mahˬ kʼaˆ daˬ puiˇ-awˇ cehˇ pehˇ zeuˇ shehˆ ngehꞈ haw ngeh, aˬ yawꞈ maꞈ yawˬ gʼaˬ na luꞈ yawˬ ha-euˬ pyuˇ paꞈ toeˆ-ahˇ yawˬ ha ya mawˇ-euˬ meh. Kʼoeˇ ngeh, aˬ da Yaˬkoˆ hawˇ-eu aˬ yawꞈ ha mehˇ nmˇ dawˬ tawˆ luꞈ guˆ dui dui-euˬ meh.

³⁶Aˬ ha mehˇ nmˇ-ahˇ Yaˬkoˆ ehˇ nehˬ-eu, “Naw maꞈ ngaˬ-euˬ zaˬ dawˬ tawˆ luꞈ sheuˬ byoˆ jiˇ-eu gʼeh te loˇ. Yoˇsehˆ gʼaˬ maˬ paˇ jawˇ-eu uˬ taꞈ, Suˇmoˬ gʼaˬ gʼeh maˬ paˇ jawˇ ngaˇ. Nymˬ-mˇ poˆ jawˇ-aˬ Beˬyaˬmiˬ-ahˇ gʼeh paˇ sheuˬ byoˆ-eu lehˇ gʼeh te loˇ. Shaˬ zahˬ kʼaˇ ngeuˇ-eu dawˬ tawˆ luꞈ, ngaˬ-euˬ kʼoeˇ taˆ kaꞈ dzahˬ-awˇ keuˆ le-euˬ miˇ-a.”

³⁷Aˬ yawꞈ-euˬ aˬ da-ahˇ Luˇbeˬ ehˇ nehˬ-eu, “Beˬyaˬmiˬ-ahˇ nawˇ jawˇ gaˇ maˬ sheuˬ kʼoꞈ keuˆ laꞈ naˇ, ngaˬ li nyiˬ li luꞈ-ahˇ nawˇ sehꞈ nya tehꞈ-a. Ngaˬ-ahˇ a nehˬ laꞈ-awˬ. Ngaˇ aˬ yawꞈ-ahˇ yaw muiˬ paˬ-ehˇ sheuˬ kʼoꞈ keuˆ laꞈ ma.”

³⁸Ehˇ kʼawꞈ, Yaˬkoˆ ehˇ-eu, “Ngaˬ li-ahˇ nawˬ nehˬ-ehˇ maˬ bi iˇ nya-a. Aˬ yawꞈ-euˬ aˇ doˆ shiˇ-awˇ, aˬ yawꞈ tiˬ gʼaˬ dzeˇ-eu tehꞈ meh. Gaˇ pehˇ iˇ luꞈ ngeh, aˬ yawꞈ-ahˇ tiˬ jeˬ paˬ pyeuꞈ laˇ gaˇ ngaˇ kʼahˬ lahˇ dui dui nya. Ngaˇ mawˬ dui dui laˇ-euˬ gaˇ hawˇ-eu shaˬ zahˬ naꞈ dzehˬ laˇ ni naw maꞈ paˇ mˇ nehˬ laꞈ-eu lehˇ gʼeh-eu jeˬ maˇ-iˬ, ngaˇ bi shiˇ-eu lehˇ naw maꞈ jahˇ gaˇ duˇ-eu ngaˇ.”