Read Akha Aˇ dahˬ 43 Bible Online

Aˇ dahˬ 43 - Akha bible

Aˇ dahˬ 43

¹Kaˬnaˬ miˇ kʼahˬ laꞈ kʼoeˇ, mehꞈ-eu shuꞈ-eu jeˬ yaw beh naˆ maˬ tseˇ paˇ kʼaˆ dzehˬ laˇ-euˬ meh.

²Yaˬkoˆ-euˬ zaˬ deuˬ neh Iˇjiˇtuˆ miˇ kʼahˬ-ahˇ zeuˇ laˬ-iˇ-euˬ cehˇ kʼoeˇ deuˬ dzaˬ jiˇ ngeh, “Aˬ dui dzaˬ-eu gʼaˇ duˬ cehˇ ui cuiˆ paˇ zeuˇ laˬ-iˇ siˬ” lehˇ, aˬ yawꞈ-euˬ aˬ li deuˬ-ahˇ Yaˬkoˆ paˇ ehˇ nehˬ-euˬ meh.

³Yuˇdaˆ ehˇ-eu, “Ngaˬ ha mehˇ nmˇ-euˬ aˬ nyiˇ nyiˇ saˬ gʼaˬ maˬ sheuˬ leꞈ naˇ, aˬ yawꞈ jawˇ gaˇ taˬ paˇ oe lehˇ, Iˇjiˇtuˆ miˇ kʼahˬ-ahˇ uˆ lahˇ-awˇ haw luꞈ pyaˆ luꞈ-eu tsawˇ haˬ kʼoeˇ gʼaˬ neh ehˇ duˬ taˬ-euˬ dawˬ jaˆ-eu meh.

⁴Ngaˬ ha mehˇ nmˇ-euˬ aˬ nyiˇ nyiˇ saˬ gʼaˬ-ahˇ, ngaˬ ha mehˇ nmˇ nehˬ-ehˇ bi iˇ-eu gʼaˇ duˬ nawˇ nui ma tsaˬ naˇ, nawˬ-euˬ gʼaˇ duˬ cehˇ zeuˇ laˬ-iˇ ma.

⁵Ehˇ kʼawꞈ, aˬ nyiˇ nyiˇ saˬ gʼaˬ-ahˇ nga maꞈ nehˬ-ehˇ maˬ bi iˇ te lehˇ ngeuˇ naˇ, nga maꞈ cehˇ maˬ zeuˇ-iˇ nya-a. Aˬ jeˬ miˇ neh ehˇ naˇ, aˬ nyiˇ nyiˇ saˬ gʼaˬ maˬ sheuˬ leꞈ naˇ aˬ yawꞈ jawˇ gaˇ taˬ oe lehˇ, tsawˇ haˬ kʼoeˇ gʼaˬ neh ehˇ tsehˆ taˬ-euˬ dawˬ jaˆ-eu meh.”

⁶Yaˬkoˆ ehˇ-eu, “Aˬ jeˬ miˇ neh ngaˬ-euˬ nui ma shaˬ zahˬ bi mˇ-eu lehˇ, nawˬ ha mehˇ nmˇ-euˬ aˬ nyiˇ tiˬ gʼaˬ jawˇ-eu gaˇ kawˆ tsawˇ haˬ kʼoeˇ gʼaˬ-ahˇ ehˇ nehˬ yaꞈ teˬ.”

⁷Aˬ ha mehˇ nmˇ ehˇ-eu, “Ngaˬ ha mehˇ nmˇ-euˬ gaˇ kawˆ hawˇ-eu, ngaˬ ha mehˇ nmˇ-euˬ aˬ yuiꞈ aˬ nyiˇ aˇ jeuˬ aˇ ca deuˬ gaˇ kawˆ-ahˇ, tsawˇ haˬ kʼoeˇ gʼaˬ pyehˆ tseˇ naˇ haˬ-eu meh. Nawˬ ha mehˇ nmˇ-euˬ aˬ da dehꞈ te siˬ loˇ. Nawˬ ha mehˇ nmˇ-euˬ aˬ nyiˇ jawˇ te siˬ loˇ lehˇ, tiˬ jeˬ saˇ-iˬ tiˬ jeˬ aˬ yawꞈ naˇ haˬ-eu meh. Kʼoeˇ miˇ neh, ngaˬ ha mehˇ nmˇ kʼaˇ ehˇ nya-eu loꞈ-ehˇ ehˇ kʼoꞈ nehˬ-euˬ ma. Naw maꞈ-euˬ aˬ nyiˇ-ahˇ ngaˇ jawˇ gaˇ ya sheuˬ laꞈ meh lehˇ aˬ yawꞈ ehˇ laˇ tehꞈ-a lehˇ, ngaˬ ha mehˇ nmˇ tiˬ duˇ-iˬ maˬ duˇ-aˬ.”

⁸Aˬ yawꞈ-euˬ aˬ da-ahˇ Yuˇdaˆ ehˇ nehˬ-eu, “Aˬ li-ahˇ ngaˬ-euˬ mehˬ nah bi caw teh le-awˬ. Aˬ dui pehˬ tiˬ gʼaˬ-iˬ hawˬ mehꞈ ya mehꞈ sehꞈ gaˇ maˬ keuˆ mi naˆ-ehˇ, ngaˬ ha mehˇ nmˇ cehˇ zeuˇ laˬ-iˇ ma.

⁹Aˬ li-euˬ gʼaˇ duˬ ngaˬ-euˬ saꞈ laˇ nawˬ-ahˇ biꞈ dah ma. Aˬ yawꞈ-ahˇ tiˬ jeˬ paˬ ca laˇ naˇ, ngaˬ-ahˇ kʼaˇ jahˇ mawꞈ-eu jahˇ nya tehꞈ-a. Aˬ yawꞈ-ahˇ tiˬ jeˬ-iˬ maˬ bi ca laˇ ni, nawˇ jawˇ gaˇ ngaˇ maˬ sheuˬ kʼoꞈ keuˆ laꞈ naˇ, iˬ baˇ kʼoeˇ mˬ maˬ maˬ byaˆ zaˇ ziˇ ngaˇ pi ma.

¹⁰Heu loꞈ-ehˇ nyi naˬ nyi naˬ-ehˇ maˬ jawˇ law nmˇ-aˬ, nymˬ-mˇ keuˆ keuˆ-ehˇ-aˬ, ngaˬ ha mehˇ nmˇ iˇ-awˇ gʼoꞈ keuˆ laˇ-euˬ nyiˬ doˆ byah laˇ-euˬ duˇ.”

¹¹Aˬ da gʼaˬ aˬ ha mehˇ nmˇ-ahˇ ehˇ nehˬ-eu, “Kʼoeˇ loꞈ-ehˇ maˬ jahˇ naˇ maˬ geuꞈ nya-eu jeˬ maˇ-iˬ, aˬ dui-euˬ miˇ kʼahˬ-ahˇ doˆ-eu aˇ poeˬ kʼaˆ-eu mˇ myawˬ deuˬ pyeuꞈ-eu, tsiˇ yaw saw jeˬ ui cuiˆ, byaˬ byaˬ uiˇ ui cuiˆ, dzaˇ muiˇ dzaˇ sawˇ, tsuiꞈ siˬ tsuiꞈ shehˇ hawˇ-eu, aˬlaˬmoˬ[51] aˇ siˬ heu deuˬ yuˇ gʼeh-awˇ, Iˇjiˇtuˆ miˇ kʼahˬ-ahˇ uˆ lahˇ-awˇ haw luꞈ pyaˆ luꞈ-eu kʼoeˇ gʼaˬ-ahˇ biꞈ nehˬ-iˇ-awˬ.

¹²Pyuˇ gʼeh, yaw beh poˆ myaˆ maˬ tseˇ nyiˬ myaˆ yuˇ gʼeh-awˬ. Aˬ jeˬ miˇ neh ehˇ naˇ, naw maꞈ-euˬ cehˇ pehˇ zeuˇ laꞈ kʼoeˇ dawˆ ahˇ kʼoꞈ taˬ-euˬ pyuˇ kʼoeˇ deuˬ kʼawꞈ paˇ biꞈ kʼoꞈ-iˇ-eu tsaˬ tehꞈ-a. Aˬ yawꞈ maꞈ ngehˇ-awˇ dawˆ ahˇ bahˬ-euˬ baw le.

¹³Nawˬ ha mehˇ nmˇ-euˬ aˬ nyiˇ-ahˇ gʼeh sheuˬ gʼeh-awˇ, yaw kawˇ ma-ehˇ gʼoꞈ laˇ lawˬ.

¹⁴Tsawˇ haˬ kʼoeˇ gʼaˬ nawˬ ha mehˇ nmˇ-ahˇ gʼawˬ shaˬ gaˬ nehˬ laꞈ-eu laꞈ kʼoeˇ, Beˬyaˬmiˬ hawˇ-eu Suˇmoˬ-ahˇ pyehˬ nehˬ-awˇ bi gʼoꞈ laˇ-eu gʼaˇ duˬ, baoˬ huiˬ-eu Miˬyehˇ aˬ yawꞈ-euˬ nui ma-ahˇ laˆ saˆ nehˬ luꞈ-uˇ. Ngaˬ-euˬ gʼaˇ duˬ law nmˇ-aˬ, ngaˬ-euˬ zaˬ heu deuˬ-ahˇ maˇ maˇ ni ya sm-iˇ meh lehˇ ngeuˇ naˇ kʼawꞈ, bi sm-iˇ-eu maˬ ngeuˇ naˇ tiˬ jeˬ-iˬ maˬ paˇ gʼeh nya miˇ-a” lehˇ ehˇ nehˬ-euˬ meh.

¹⁵Kʼoeˇ ngeh, aˬ ha mehˇ nmˇ laꞈ sawˬ lehˬ hmˬ-awˇ, yaw beh poˆ myaˆ maˬ tseˇ pyuˇ nyiˬ myaˆ ni pi-awˇ, Beˬyaˬmiˬ gʼaˬ-ahˇ gʼeh sheuˬ-awˇ, Iˇjiˇtuˆ miˇ kʼahˬ-ahˇ Yoˇsehˆ jawˇ gaˇ iˇ-euˬ meh.

¹⁶Aˬ ha mehˇ nmˇ nehˬ-ehˇ Beˬyaˬmiˬ gʼaˬ kʼawꞈ caw teh le-euˬ gaˇ Yoˇsehˆ ya mawˇ ngeh, “Tsawˇ haˬ heu deuˬ-ahˇ ngaˬ-euˬ nymˇ-ahˇ sheuˬ gʼeh-awˬ. Iˬ nah nah gʼahˇ aˬ yawꞈ maꞈ nehˬ-ehˇ ngaˇ dzaˬ taꞈ dawˇ taꞈ-eu gʼaˇ duˬ, jeˬ zaˬ sehꞈ-awˇ dzaˬ byawˇ laˆ dawˆ taˬ-awˬ” lehˇ, aˬ yawꞈ-euˬ nymˇ-ahˇ bi haw bi pyaˆ-euˬ zaˬ kʼaˆ-ahˇ ehˇ nehˬ-euˬ meh.

¹⁷Zaˬ kʼaˆ kʼoeˇ gʼaˬ Yoˇsehˆ neh kʼaˇ ehˇ nehˬ-euˬ loꞈ-ehˇ jahˇ-awˇ, aˬ ha mehˇ nmˇ-ahˇ Yoˇsehˆ-euˬ nymˇ-ahˇ sheuˬ gʼeh nehˬ-euˬ meh.

¹⁸Aˬ ha mehˇ nmˇ-aˬ, aˬ cawˬ neh aˬ yawꞈ maꞈ-ahˇ Yoˇsehˆ-euˬ nymˇ-ahˇ sheuˬ gʼeh-euˬ miˇ neh, guˆ laˇ-awˇ, nui ma laꞈ kʼoeˇ heu loꞈ-ehˇ noeˬ-euˬ meh. “Yaw beh poˆ cehˇ zeuˇ dzaˬ le ngeh ngaˬ ha mehˇ nmˇ-euˬ cehˇ pehˇ zeuˇ deuˬ laꞈ kʼoeˇ paˇ dawˆ ahˇ kʼoꞈ taˬ-euˬ pyuˇ kʼoeˇ deuˬ baˬ da neh, ngaˬ ha mehˇ nmˇ-ahˇ heu gaˇ kuˇ ahˇ laꞈ-euˬ jeˬ nga. Ngaˬ ha mehˇ nmˇ-ahˇ iˬ baˇ poˆ-awˇ, mahˬ tahˬ laˆ heu deuˬ tsahˇ geuꞈ-eu uˬ taꞈ, nga maꞈ-ahˇ kʼawꞈ aˬ yawꞈ-euˬ zaˬ kʼaˆ bi geuꞈ-eu lehˇ gʼeh-eu jeˬ nga.”

¹⁹Kʼoeˇ miˇ neh, Yoˇsehˆ-euˬ nymˇ gʼoˆ kʼehˬ dawˬ peh le keuˆ ngeh, Yoˇsehˆ-euˬ nymˇ-ahˇ haw luꞈ pyaˆ luꞈ-eu zaˬ kʼaˆ kʼoeˇ gʼaˬ-ahˇ, aˬ yawꞈ maꞈ heu loꞈ-ehˇ ehˇ nehˬ-euˬ meh.

²⁰“Aˬ yuiꞈ-oˇ, nga maꞈ ehˇ gaˇ tiˬ poˆ naˇ haˬ sheˇ. Dzeuˇ laˇ ngeh nga maꞈ heu gaˇ oe-awˇ cehˇ tiˬ poˆ zeuˇ dzaˬ le haw-euˬ ma.

²¹Nga maꞈ cehˇ zeuˇ-awˇ gʼoꞈ leˇ ngeh, uˬ ciꞈ paw gaˇ pehˇ yaꞈ-euˬ ma. Nga maꞈ-euˬ cehˇ pehˇ zeuˇ puiˇ haw ngeh, aˬ yawꞈ gʼaˬ yawꞈ-euˬ cehˇ pehˇ zeuˇ laꞈ kʼoeˇ, cehˇ aˇ poeˬ biꞈ-euˬ pyuˇ kʼoeˇ deuˬ tiˬ pehˆ-iˬ maˬ teˬ-iˇ ni ahˇ jiˇ gaˇ ya mawˇ-euˬ ma. Pyuˇ kʼoeˇ deuˬ nymˬ-mˇ poˆ nga maꞈ paˇ pi leꞈ-euˬ ma.

²²Kʼoeˇ uˬ taꞈ, cehˇ zeuˇ-eu gʼaˇ duˬ pyuˇ aˇ dzehˬ kʼawꞈ pi luꞈ-eu ma. Cehˇ zeuˇ poeˬ biꞈ gʼaˬ dzeuˇ-euˬ pyuˇ kʼoeˇ deuˬ-ahˇ, aˬ suˇ gʼaˬ neh nga maꞈ-euˬ cehˇ pehˇ zeuˇ deuˬ laꞈ kʼoeˇ paˇ dawˆ ahˇ kʼoꞈ taˬ-euˬ maˬ siˬ. Gaˇ kawˆ heu ngaˬ ha mehˇ nmˇ tiˬ pawꞈ-iˬ maˬ ya siˬ-aˬ.”

²³Zaˬ kʼaˆ kʼoeˇ gʼaˬ ehˇ-eu, “Taˬ noeˬ shaˬ. Taˬ guˆ. Nawˬ ha mehˇ nmˇ aˬ da-euˬ Miˬyehˇ pyeuꞈ-eu naw maꞈ-euˬ Miˬyehˇ neh naw maꞈ gʼaˇ duˬ shaˇ noeˬ-awˇ, naw maꞈ-euˬ cehˇ pehˇ zeuˇ laꞈ kʼoeˇ pyuˇ kʼoeˇ deuˬ paˇ dawˆ ahˇ kʼoꞈ nehˬ laꞈ-euˬ tehꞈ-a. Naw maꞈ neh cehˇ aˇ poeˬ biꞈ laꞈ-euˬ pyuˇ kʼoeˇ-aˬ, kʼoeˇ ngeh neh ngaˇ yuˇ-euˬ ma lehˇ ehˇ-eu meh. Kʼoeˇ naˇ, zaˬ kʼaˆ kʼoeˇ gʼaˬ neh, Suˇmoˬ-ahˇ aˬ yawꞈ maꞈ jawˇ gaˇ sheuˬ laꞈ-euˬ meh.

²⁴Zaˬ kʼaˆ kʼoeˇ gʼaˬ aˬ ha mehˇ nmˇ-ahˇ nymˇ laꞈ kʼoeˇ sheuˬ uˇ gʼeh-euˬ meh. Kʼoeˇ naˇ, aˬ ha mehˇ nmˇ aˬ kuiˇ dzuiꞈ-eu gʼaˇ duˬ iˇ cuꞈ ciˬ nehˬ-awˇ, aˬ ha mehˇ nmˇ-euˬ mahˬ tahˬ laˆ-ahˇ dzaˇ bi dzaˬ-euˬ meh.

²⁵Aˬ ha mehˇ nmˇ-aˬ, nah gʼahˇ paw Yoˇsehˆ gʼoꞈ laˇ ngeh biꞈ-eu gʼaˇ duˬ, aˬ yawꞈ maꞈ neh yuˇ leꞈ-euˬ laꞈ sawˬ deuˬ lehˬ hmˬ taˬ-euˬ meh. Aˬ jeˬ miˇ neh ehˇ naˇ, aˬ yawꞈ maꞈ Yoˇsehˆ nehˬ-ehˇ hawˬ ya dzaˬ taꞈ tehꞈ-a lehˇ, aˬ cawˬ aˬ yawꞈ maꞈ-ahˇ ehˇ nehˬ taˬ-euˬ meh.

²⁶Yoˇsehˆ iˇ kahˇ gʼoꞈ keuˆ laˇ ngeh, aˬ ha mehˇ nmˇ nymˇ laꞈ kʼoeˇ paw Yoˇsehˆ jawˇ gaˇ laꞈ sawˬ yuˇ gʼeh nehˬ-awˇ, pawˬ tsuiꞈ pawˬ dmˬ dmˬ-awˇ awˆ byaˆ-eu laꞈ kʼoeˇ, Yoˇsehˆ-ahˇ yaw zeu baw nehˬ-euˬ meh.

²⁷Aˬ ha mehˇ nmˇ-ahˇ, Yoˇsehˆ dawˬ cawˬ puˬ nehˬ-awˇ, heu loꞈ-ehˇ naˇ haˬ-euˬ meh. “Yaw beh poˆ nawˬ ha mehˇ nmˇ-euˬ aˬ da da mawˬ gaˇ kawˆ naw maꞈ ngaˬ-ahˇ ja nehˬ laꞈ-euˬ meh. Nymˬ-mˇ aˬ yawꞈ jawˇ saˇ doˆ doˆ-ehˇ jawˇ luꞈ meh loˇ. Nymˬ-mˇ keuˆ ni dehꞈ luꞈ-a siˬ loˇ.”

²⁸Aˬ ha mehˇ nmˇ ehˇ-eu, “Nawˬ-euˬ zaˬ kʼaˆ pyeuꞈ-eu ngaˬ ha mehˇ nmˇ-euˬ aˬ da-aˬ, nymˬ-mˇ keuˆ ni dehꞈ luꞈ-awˇ, jawˇ saˇ kʼawꞈ doˆ luꞈ meh.” Kʼoeˇ loꞈ-ehˇ ehˇ gʼaˬ ngeh, aˬ yawꞈ maꞈ pawˬ tsuiꞈ pawˬ dmˬ dmˬ-awˇ awˆ byaˆ-eu laꞈ kʼoeˇ, Yoˇsehˆ-ahˇ yaw zeu paˇ baw nehˬ-euˬ meh.

²⁹Aˬ yawꞈ-euˬ aˬ nyiˇ Beˬyaˬmiˬ-ahˇ Yoˇsehˆ ya mawˇ ngeh, “Naw maꞈ ehˇ-eu aˬ nyiˇ nyiˇ saˬ kʼoeˇ gʼaˬ heu gʼaˬ meh loˇ” lehˇ, aˬ ha mehˇ nmˇ-ahˇ naˇ haˬ-awˇ, “Miˬyehˇ nawˬ-ahˇ guiˬ lahˬ biꞈ luꞈ-uˇ li-oˇ” lehˇ, Beˬyaˬmiˬ-ahˇ aˬ yawꞈ ehˇ nehˬ-euˬ meh.

³⁰Kʼoeˇ ngeh, aˬ ha mehˇ nmˇ jawˇ gaˇ neh Yoˇsehˆ tiˬ poˆ tehꞈ-ehˇ doˆ-iˇ-euˬ meh. Aˬ jeˬ miˇ neh ehˇ naˇ, aˬ yawꞈ-euˬ nui ma laꞈ kʼoeˇ aˬ ha mehˇ nmˇ-ahˇ gʼawˬ shaˇ shaˬ-ehˇ gʼeh-euˬ meh.

³¹Aˬ yawꞈ ngoeˇ doˆ shaw-iˬ-eu miˇ neh, aˬ yawꞈ yuꞈ-eu kuˆ lawˆ paw uˇ leˇ-awˇ, kʼoeˇ gaˇ ngoeˇ-euˬ meh. Aˬ yawꞈ myaˆ duꞈ puꞈ shawˇ-awˇ paˇ doˆ le ngeh, maˬ ya ngoeˇ doˆ ni dzahˬ tehˬ taˬ-awˇ, hawˬ byawˇ bi laˆ dawˆ-euˬ meh.

³²Yoˇsehˆ gʼaˇ duˬ hawˬ jeh tiˬ jeh, aˬ ha mehˇ nmˇ gʼaˇ duˬ hawˬ jeh tiˬ jeh, Iˇjiˇtuˆ tsawˇ haˬ deuˬ gʼaˇ duˬ hawˬ jeh tiˬ jeh lehˇ bi shaˇ dahˇ-euˬ meh. Aˬ jeˬ miˇ neh ehˇ naˇ, Heˬbyehˇ tsawˇ haˬ nehˬ-ehˇ dzaˬ taꞈ dawˇ taꞈ naˇ daˬ ga nya lehˇ, Iˇjiˇtuˆ tsawˇ haˬ deuˬ noeˬ-eu meh.

³³Kʼoeˇ ngeh, aˬ ha mehˇ nmˇ-ahˇ Yoˇsehˆ jawˇ paw mehˬ shiˬ pyawˇ-ehˇ, aˇ kʼoꞈ huiˬ nyiˇ baw-ehˇ aˇ cehˆ bi nuiˇ baw taˬ-euˬ meh. Aˬ yawꞈ maꞈ-ahˇ kʼoeˇ loꞈ-ehˇ bi nuiˇ laꞈ gaˇ ya mawˇ ngeh, aˬ ha mehˇ nmˇ zahˬ leˇ-awˇ, tiˬ gʼaˬ tiˇ gʼaˬ haw cawˬ haw cawˬ-ehˇ jawˇ-euˬ meh.

³⁴Yoˇsehˆ-euˬ hawˬ jeh kʼoeˇ taˆ jaˆ-eu dzaˇ deuˬ aˬ ha mehˇ nmˇ-ahˇ kuˬ ahˇ nehˬ-awˇ bi dzaˬ-euˬ meh. Beˬyaˬmiˬ gʼaˬ-ahˇ-aˬ, aˬ yawꞈ-euˬ aˇ doˆ deuˬ-ahˇ naˆ maˬ tseˇ, ngaˬ poˆ keuˆ ni kuˬ lahˬ nehˬ-euˬ meh. Aˬ yawꞈ maꞈ dzaˬ yehꞈ dawˇ yehꞈ jiˇ ngeh keuˆ ni, tiˬ kawˆ loꞈ-ehˇ dzaˬ taꞈ dawˇ taꞈ-euˬ meh.