Read Akha Aˇ dahˬ 47 Bible Online

Aˇ dahˬ 47 - Akha bible

Aˇ dahˬ 47

¹Yoˇsehˆ-aˬ, aˬ yawꞈ-euˬ aˇ doˆ ngaˬ gʼaˬ sheuˬ-awˇ, sahˬ paˬ-ahˇ heu loꞈ-ehˇ ehˇ nehˬ leˇ-euˬ meh. “Kaˬnaˬ miˇ kʼahˬ-ahˇ jawˇ-eu ngaˬ da hawˇ-eu ngaˬ-euˬ mehˇ nmˇ deuˬ, aˬ yawꞈ maꞈ-euˬ jeˬ zaˬ dawˬ tawˆ luꞈ teh-awˇ, pyuˇ shuiˇ myawˬ gahˬ dawˬ tawˆ luꞈ kʼawꞈ pi ka leꞈ-awˇ, heu gaˇ oe keuˆ taˬ-euˬ meh. Nymˬ-mˇ Goˬsheˬ miˇ tsaˬ-ahˇ jawˇ luꞈ meh.”

²Kʼoeˇ naˇ, aˬ yawꞈ-euˬ aˇ doˆ kʼoeˇ deuˬ-ahˇ sahˬ paˬ mehˬ shi sheuˬ gʼeh-euˬ meh.

³“Naw maꞈ aˬ jeˬ mˇ dzaˬ-eu tsawˇ haˬ te” lehˇ sahˬ paˬ naˇ haˬ ngeh, aˬ yawꞈ-euˬ aˇ doˆ deuˬ heu loꞈ-ehˇ ehˇ kʼoꞈ nehˬ-euˬ meh. “Nga maꞈ-euˬ aˬ poeˬ aˬ bawˇ deuˬ-euˬ ziˇ-ahˇ neh mˇ ka shaˇ ka leꞈ-euˬ loꞈ-ehˇ jeˬ zaˬ cu dzaˬ-eu tsawˇ haˬ pyeuꞈ-eu ma.

⁴Kaˬnaˬ miˇ kʼahˬ laꞈ kʼoeˇ mehꞈ dui shuꞈ dui dui-eu jeˬ keuˆ le-awˇ, miˇ tsaˬ gui-iˇ-euˬ miˇ neh, nga maꞈ-euˬ jeˬ zaˬ deuˬ gaˆ dzaˬ kʼaˇ maˬ za ni pyeuꞈ laˇ taˬ-euˬ meh. Teu miˇ neh, nga maꞈ-ahˇ gʼawˬ shaˬ gaˬ-eu laꞈ kʼoeˇ, Goˬsheˬ miˇ tsaˬ-ahˇ bi jawˇ nehˬ laꞈ-awˬ.”

⁵Kʼoeˇ ngeh, Yoˇsehˆ-ahˇ sahˬ paˬ heu loꞈ-ehˇ ehˇ nehˬ-euˬ meh. “Nymˬ-mˇ poˆ jawˇ-aˬ, nawˬ da hawˇ-eu nawˬ-euˬ mehˇ nmˇ deuˬ oe keuˆ gʼaˬ-euˬ ngaˇ.

⁶Iˇjiˇtuˆ miˇ kʼahˬ heu nawˬ-euˬ mehˬ shi jaˆ luꞈ meh. Miˇ kʼahˬ heu kʼahˬ laꞈ kʼoeˇ muiˬ dui dui-eu jawˇ duˬ pyeuꞈ-eu Goˬsheˬ miˇ tsaˬ kʼoeˇ tsahˇ-ahˇ, aˬ yawꞈ maꞈ-ahˇ bi jawˇ-awˬ. Aˬ yawꞈ maꞈ laꞈ kʼoeˇ, jeˬ zaˬ-ahˇ yaw muiˬ paˬ-ehˇ bo saˆ nya-eu tsawˇ haˬ jawˇ naˇ, ngaˬ-euˬ jeˬ zaˬ deuˬ-ahˇ bo saˆ-eu gaˇ bi mˇ-awˬ.”

⁷Kʼoeˇ naˇ, Yoˇsehˆ neh aˬ yawꞈ aˬ da Yaˬkoˆ-ahˇ sahˬ paˬ jawˇ gaˇ sheuˬ gʼeh-awˇ, sahˬ paˬ-ahˇ Yaˬkoˆ dawˬ ngehˬ gʼeh nehˬ-euˬ meh.

⁸Kʼoeˇ ngeh, “Nawˇ aˇ kʼoꞈ aˇ myaˆ kʼoꞈ kʼawˆ laˇ teˬ” lehˇ, Yaˬkoˆ-ahˇ sahˬ paˬ naˇ haˬ-euˬ meh.

⁹Yaˬkoˆ ehˇ-eu, “Ngaˇ jawˇ duˬ maˬ dah leˇ nya ni doe doe-ehˇ jawˇ jawˇ-ehˇ dehꞈ luꞈ-eu laꞈ kʼoeˇ, ngaˬ-euˬ aˇ kʼoꞈ tiˬ yaˇ smˬ tseˇ kʼoꞈ byah laˇ taˬ-euˬ ma. Doe doe-ehˇ jawˇ jawˇ-ehˇ dehꞈ dzeuˇ yaꞈ-euˬ ziˇ baw dui dui-eu ngaˬ poeˬ ngaˬ bawˇ deuˬ hawˇ-eu, ngaˬ da maꞈ yaw dehꞈ dehꞈ yaꞈ-euˬ gaˇ maˬ duˇ ni, ngaˇ yaw dehꞈ dehꞈ-eu aˇ kʼoꞈ nymˇ dzehˬ-awˇ, shaˬ zahˬ ya mˇ myaˬ dzehˬ-euˬ ma.”

¹⁰Kʼoeˇ naˇ, sahˬ paˬ-ahˇ dawˬ ngehˬ gʼeh nehˬ yaꞈ-awˇ, Yaˬkoˆ doˆ-iˇ-euˬ meh.

¹¹Kʼoeˇ naˇ, Yoˇsehˆ-aˬ, sahˬ paˬ neh aˬ yawꞈ-ahˇ ehˇ nehˬ-euˬ loꞈ-ehˇ, aˬ yawꞈ-euˬ aˬ da hawˇ-eu aˬ yawꞈ-euˬ mehˇ nmˇ deuˬ-ahˇ, Iˇjiˇtuˆ miˇ kʼahˬ laꞈ kʼoeˇ aˬ cawˬ naˆ maˬ tseˇ muiˬ-eu jawˇ duˬ pyeuꞈ-eu, Laˬmaˬsehˇ meuˬ dawˬ peh jaˆ-eu miˇ tsaˬ kʼoeˇ tsahˇ-ahˇ jawˇ zaˇ shaˇ nehˬ-euˬ meh.

¹²Aˬ yawꞈ-euˬ aˬ da-ahˇ maˬ ehˇ, aˬ yawꞈ-euˬ mehˇ nmˇ deuˬ-ahˇ maˬ ehˇ, aˬ yawꞈ aˬ da o neh jeuˬ le o le-euˬ tsawˇ haˬ dawˬ tawˆ luꞈ-ahˇ maˬ ehˇ, Yoˇsehˆ yaw muiˬ paˬ-ehˇ bi dzaˬ bi dawˇ-euˬ meh.

¹³Mehꞈ-eu shuꞈ-eu jeˬ kʼaˆ dui dui laˇ-awˇ, dzaˬ-eu dawˇ-eu jeˬ tiˬ gaˇ-iˬ yuˇ doˆ laˬ-iˇ kʼaˇ maˬ za ni pyeuꞈ laˇ taˬ-euˬ miˇ neh, Iˇjiˇtuˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ hawˇ-eu, Kaˬnaˬ miˇ kʼahˬ laꞈ kʼoeˇ jawˇ-eu tsawˇ haˬ deuˬ gʼaˬ juˬ laˇ jiˇ-euˬ meh.

¹⁴Yoˇsehˆ-aˬ, miˇ kʼahˬ zaˬ deuˬ-ahˇ cehˇ ahˬ nehˬ-awˇ za laˇ-euˬ pyuˇ dawˬ tawˆ luꞈ, sahˬ paˬ-euˬ nymˇ laꞈ kʼoeˇ jeˬ hmˬ taˬ-euˬ meh.

¹⁵Iˇjiˇtuˆ miˇ kʼahˬ hawˇ-eu Kaˬnaˬ miˇ kʼahˬ laꞈ kʼoeˇ kʼaˇ jaˆ-eu pyuˇ dawˬ tawˆ luꞈ zmˬ dzaˬ jiˇ ngeh, Iˇjiˇtuˆ miˇ kʼahˬ zaˬ deuˬ Yoˇsehˆ jawˇ gaˇ oe-awˇ, “Nga maꞈ-ahˇ dzaˬ-eu dawˇ-eu jeˬ biꞈ nehˬ laꞈ-awˬ. Taˬ bi shiˇ nehˬ laꞈ. Nga maꞈ kʼaˇ ahˇ-eu pyuˇ zmˬ dzaˬ jiˇ-euˬ miˇ neh, nga maꞈ gʼaˇ duˬ tiˬ jeˬ paˬ paˇ shaˇ noeˬ nehˬ laꞈ-awˬ” lehˇ ehˇ le-euˬ meh.

¹⁶“Naw maꞈ pyuˇ zmˬ cuˆ jiˇ-euˬ ngeuˇ naˇ, naw maꞈ-euˬ jeˬ zaˬ deuˬ teh leꞈ-awˬ. Jeˬ zaˬ-ahˇ cehˇ neh paˇ nehˬ ma” lehˇ, aˬ yawꞈ maꞈ-ahˇ Yoˇsehˆ ehˇ nehˬ-euˬ meh.

¹⁷Kʼoeˇ naˇ, miˇ kʼahˬ zaˬ deuˬ yawˬ ha-euˬ mahˬ, yawˇ, ciꞈ myehꞈ, mawˇ neˇ, mahˬ tahˬ laˆ deuˬ teh leꞈ-awˇ, Yoˇsehˆ jawˇ gaˇ cehˇ paˇ dzaˬ le-euˬ meh. Aˬ yawꞈ maꞈ-euˬ jeˬ zaˬ kʼoeˇ deuˬ-ahˇ cehˇ neh paˇ nehˬ-awˇ, kʼoeˇ ngeh kʼoꞈ, kʼoꞈ bi dehꞈ doˆ-euˬ meh.

¹⁸Kʼoꞈ doˆ le ngeh, aˬ yawꞈ maꞈ Yoˇsehˆ jawˇ gaˇ oe-awˇ paˇ ehˇ-eu, “Yaw huiˬ yaw mahˇ gʼaˬ-oˇ, nawˬ-euˬ mehˬ shi nga maꞈ tiˬ jeˬ-iˬ maˬ zaꞈ taˬ ni heu loꞈ-ehˇ ehˇ-eu ma. Nga maꞈ-euˬ pyuˇ dawˬ tawˆ luꞈ zmˬ dzaˬ jiˇ-awˇ, nga maꞈ-euˬ jeˬ zaˬ deuˬ kʼawꞈ, nawˬ-euˬ jeˬ zaˬ pyeuꞈ jiˇ-euˬ meh. Nga maꞈ-euˬ gʼawˇ mawˇ hawˇ-eu nga maꞈ-euˬ deh yaˇ miˇ tsaˬ deuˬ maˬ ngeuˇ naˇ, nawˬ-ahˇ biꞈ-eu tiˬ jeˬ-iˬ maˬ paˇ jaˆ ma.

¹⁹Nga maꞈ-ahˇ maˬ bi shiˇ nehˬ laꞈ ni, nga maꞈ gʼaˇ duˬ tiˬ jeˬ paˬ paˇ shaˇ noeˬ neh laꞈ-awˬ. Nga maꞈ-euˬ deh yaˇ deuˬ kʼawꞈ yawˬ ngehꞈ-ehˇ taˬ paˇ bi jaˆ cawˆ nehˬ laꞈ. Nga maꞈ-euˬ gʼawˇ mawˇ hawˇ-eu nga maꞈ-euˬ deh yaˇ deuˬ-ahˇ, cehˇ neh paˇ nehˬ laꞈ-awˬ. Nga maꞈ sahˬ paˬ-euˬ zaˬ kʼaˆ geuꞈ jiˇ-awˇ, nga maꞈ-euˬ deh yaˇ deuˬ kʼawꞈ, sahˬ paˬ-ahˇ biꞈ jiˇ ma. Nga maꞈ yaw dehꞈ ya dehꞈ ni cehˇ biꞈ nehˬ laꞈ-awˇ, nga maꞈ deh yaˇ tsehˬ dzaˬ nya ni cehˇ siˬ yoeˬ kʼawꞈ biꞈ nehˬ laꞈ-awˬ.”

²⁰Iˇjiˇtuˆ miˇ kʼahˬ laꞈ kʼoeˇ kʼaˇ jaˆ-eu deh yaˇ dawˬ tawˆ luꞈ, Yoˇsehˆ neh sahˬ paˬ gʼaˇ duˬ zeuˇ tsehˆ jiˇ-euˬ meh. Mehꞈ dui shuꞈ dui dui-eu baˬ da neh, Iˇjiˇtuˆ miˇ kʼahˬ zaˬ yawˬ gʼaˬ na luꞈ maˬ jawˇ tehˬ coeˇ-ehˇ, yawˬ ha-euˬ deh yaˇ ya ahˬ dzaˬ gaˇ keuˆ-awˇ, deh yaˇ miˇ tsaˬ dawˬ tawˆ luꞈ sahˬ paˬ-euˬ deh yaˇ pyeuꞈ jiˇ-euˬ meh.

²¹Iˇjiˇtuˆ miˇ kʼahˬ yawˬ paw yawˬ na luꞈ kʼaˇ jawˇ-eu tsawˇ haˬ dawˬ tawˆ luꞈ, Yoˇsehˆ neh zaˬ kʼaˆ bi geuꞈ jiˇ-euˬ meh.

²²Yoˇsehˆ neh maˬ zeuˇ tsehˆ-ehˇ dzeˇ-eu miˇ tsaˬ-aˬ, piˇ ma deuˬ-ahˇ taꞈ leˇ-eu miˇ tsaˬ pehˇ tsahˇ deuˬ tehꞈ meh. Piˇ ma kʼoeˇ deuˬ-aˬ, yawˬ ha-euˬ miˇ tsaˬ ahˬ dzaˬ gaˇ maˬ keuˆ-a. Aˬ jeˬ miˇ neh ehˇ naˇ, aˬ yawꞈ maꞈ yaw dehꞈ dehꞈ nya ni sahˬ paˬ neh aˬ yawꞈ maꞈ-ahˇ bi dzaˬ bi dawˇ taˬ-euˬ meh.

²³Kʼoeˇ ngeh, miˇ kʼahˬ zaˬ deuˬ-ahˇ Yoˇsehˆ heu loꞈ-ehˇ ehˇ nehˬ-euˬ meh. “Naw maꞈ-euˬ gʼawˇ mawˇ maˬ ehˇ, naw maꞈ-euˬ deh yaˇ deuˬ hawˇ-eu miˇ tsaˬ dawˬ tawˆ luꞈ maˬ ehˇ, sahˬ paˬ-euˬ gʼaˇ duˬ ngaˬ neh zeuˇ tsehˆ jiˇ-euˬ naw maꞈ siˬ nya luꞈ meh. Naw maꞈ deh yaˇ tsehˬ dzaˬ nya-eu gʼaˇ duˬ, cehˇ siˬ yoeˬ yuˇ kʼoꞈ gʼeh-awˬ.

²⁴Cehˇ yehˬ cehˇ diˬ luiˆ gʼaˬ jiˇ ngeh, naw maꞈ neh mˇ za-euˬ cehˇ laꞈ kʼoeˇ, ngaˬ bymˇ tiˬ bymˇ sahˬ paˬ-ahˇ biꞈ kʼoꞈ-awˬ. Dzeˇ-eu deuˬ-ahˇ naw maꞈ hawˇ-eu naw maꞈ-euˬ miˬ sawˇ zaˬ deuˬ dzaˬ-eu gʼaˇ duˬ taˬ-awˇ, cehˇ siˬ yoeˬ kʼawꞈ pehˬ doˆ taˬ-awˬ.”

²⁵Kʼoeˇ ngeh, miˇ kʼahˬ zaˬ deuˬ ehˇ-eu, “Nga maꞈ maˬ ya shiˇ jiˇ ni, nawˇ nga maꞈ-ahˇ ka kʼoꞈ nehˬ laꞈ-euˬ meh. Yaw huiˬ yaw mahˇ gʼaˬ-oˇ, nawˇ nga maꞈ-ahˇ gʼawˬ shaˬ gaˬ dui dui-awˇ, nga maꞈ-euˬ gʼaˇ duˬ muiˬ dui dui-eu jeˬ mˇ nehˬ laꞈ-euˬ meh. Nga maꞈ sahˬ paˬ-euˬ zaˬ kʼaˆ geuꞈ ma.”

²⁶Kʼaˇ mˇ za-euˬ jeˬ laꞈ kʼoeˇ, sahˬ paˬ-ahˇ ngaˬ bymˇ tiˬ bymˇ biꞈ-eu gʼaˇ duˬ, Iˇjiˇtuˆ miˇ kʼahˬ laꞈ kʼoeˇ Yoˇsehˆ neh zahˇ taˬ dahˬ beh-awˇ, zahˇ kʼoeˇ hmˬ iˬ nah keuˆ ni Iˇjiˇtuˆ miˇ kʼahˬ laꞈ kʼoeˇ jaˆ luꞈ-eu meh. Piˇ ma deuˬ-ahˇ taꞈ-eu deh yaˇ hawˇ-eu miˇ tsaˬ maˬ ngeuˇ naˇ, dawˬ tawˆ luꞈ zahˇ kʼoeˇ hmˬ-ahˇ ya caw teh-eu meh.

²⁷Iˇsaˬleˬlaˆ tsawˇ haˬ deuˬ-aˬ, Iˇjiˇtuˆ miˇ kʼahˬ laꞈ kʼoeˇ jaˆ-eu Goˬsheˬ lehˇ kuˇ-eu jawˇ duˬ-ahˇ jawˇ-awˇ, smˇ muiˬ muiˬ dui dui laˇ-euˬ uˬ taꞈ, tsawˇ haˬ behˇ laˇ tehˇ tehˬ luꞈ-eu meh.

²⁸Yaˬkoˆ-aˬ, Iˇjiˇtuˆ miˇ kʼahˬ laꞈ kʼoeˇ tseˇ shiꞈ kʼoꞈ paˇ dehꞈ-awˇ, aˬ yawꞈ-euˬ aˇ kʼoꞈ tiˬ yaˇ oeˬ tseˇ shiꞈ kʼoꞈ byah laˇ-euˬ meh.

²⁹Aˬ yawꞈ ziˇ jiˇ-eu dawˬ peh peh laˇ ngeh, aˬ yawꞈ-euˬ aˬ li Yoˇsehˆ-ahˇ kuˇ-awˇ, heu loꞈ-ehˇ ehˇ nehˬ-euˬ meh. “Nawˬ-euˬ aˬ laꞈ ngaˬ-euˬ shaˬ pyaˬ yaw kaˬ-ahˇ cawˬ ahˇ-awˇ, nawˇ ngaˬ-ahˇ Iˇjiˇtuˆ miˇ kʼahˬ laꞈ kʼoeˇ maˬ baꞈ pahˬ lehˇ saˇ jaˇ dzaˬ-awˬ.

³⁰Ngaˬ bawˇ hawˇ-eu ngaˬ da-ahˇ baꞈ pahˬ-euˬ miˇ tsaˬ-ahˇ, ngaˬ-ahˇ bi baꞈ pahˬ mawꞈ miˇ-a. Ngaˬ-ahˇ Iˇjiˇtuˆ miˇ kʼahˬ laꞈ kʼoeˇ neh baꞈ doˆ gʼeh-awˇ, aˬ yawꞈ nyaꞈ-ahˇ baꞈ pahˬ taˬ-euˬ tsahˇ-ahˇ baꞈ pahˬ nehˬ laꞈ-awˬ.” Yoˇsehˆ ehˇ-eu, “Nawˬ neh kʼaˇ ehˇ nehˬ laꞈ-euˬ loꞈ-ehˇ jahˇ nehˬ ma.”

³¹Yaˬkoˆ ehˇ-eu, “Nawˬ neh kʼaˇ ehˇ tsehˆ taˬ-euˬ loꞈ-ehˇ mˇ ma lehˇ saˇ jaˇ dzaˬ-awˬ.” Kʼoeˇ ngeh, Yoˇsehˆ saˇ jaˇ dzaˬ-euˬ meh. Kʼoeˇ naˇ, Yaˬkoˆ-aˬ, yuꞈ zaˇ kʼoeˇ taˆ Miˬyehˇ-ahˇ ja ceuˬ-euˬ meh.