Read Akha Aˇ dahˬ 49 Bible Online

Aˇ dahˬ 49 - Akha bible

Aˇ dahˬ 49

¹Aˬ yawꞈ-euˬ aˬ li deuˬ-ahˇ Yaˬkoˆ kuˇ uiˬ jiˇ-awˇ, heu loꞈ-ehˇ ehˇ nehˬ-euˬ meh. Heu gaˇ uiˬ laˇ-awˬ. Aˬ kaˇ naw maꞈ-euˬ mehˬ shi keuˆ le-eu gaˇ kawˆ ngaˇ naw maꞈ-ahˇ ehˇ nehˬ nyaˇ.

²Yaˬkoˆ-euˬ aˬ li deuˬ-oˇ, tiˬ kawˆ loꞈ-ehˇ uiˬ laˇ-awˇ naˇ haˬ laˇ-awˬ. Nawˬ ha mehˇ nmˇ-euˬ aˬ da Iˇsaˬleˬlaˆ-euˬ dawˬ-ahˇ naˇ haˬ laˇ-awˬ.

³Ngaˬ li aˬ yuiꞈ yuiꞈ saˬ gʼaˬ pyeuꞈ-eu Luˇbeˬ-oˇ, nawˇ ngaˬ-euˬ gʼaˬ pyeuꞈ-awˇ, Ngaˬ li dawˬ tawˆ luꞈ laꞈ kʼoeˇ nawˇ kʼahˬ sehˇ jaˆ dzehˬ-awˇ, gʼaˬ kʼaˆ dzehˬ-eu gʼaˬ meh.

⁴Nawˇ-aˬ, guˆ laˇ paˬ-ehˇ gʼeh-eu iˇ jeuˬ oe gaˇ duˇ-eu tsawˇ haˬ meh. Ehˇ kʼawꞈ, aˬ cawˬ taꞈ-ehˇ huiˬ dzehˬ-eu gʼaˬ, nawˇ maˬ pyeuꞈ laˇ nya-a. Aˬ jeˬ miˇ neh ehˇ naˇ, ngaˬ-euˬ ma nyiˇ nehˬ-ehˇ nawˇ joe-awˇ, Yawˬ ha aˬ da-euˬ yuꞈ zaˇ-ahˇ nawˇ laˆ jawꞈ-euˬ meh.

⁵Suˇmoˬ hawˇ-eu Leˬbiˇ tiˬ mehˇ nmˇ meh. Yaw haiˬ jeˬ mˇ-eu gʼaˇ duˬ aˬ yawꞈ nyaꞈ mi cehˇ zmˬ-eu meh.

⁶Aˬ yawꞈ nyaꞈ bawˬ dzaˬ kʼoeˬ gaˇ ngaˇ maˬ iˇ. Aˬ yawꞈ nyaꞈ mehˬ bawˬ mˇ gaˇ ngaˇ maˬ ahˇ. Aˬ jeˬ miˇ neh ehˇ naˇ, tsawˇ haˬ-ahˇ sehꞈ-awˇ, mawˇ neˇ kuiˇ guˬ yuˇ niˇ gʼa gaˇ keuˆ ni, aˬ yawꞈ nyaꞈ nui ma pehˇ-eu meh.

⁷Aˬ nyaꞈ nmˇ nui ma pehˇ-eu jeˬ-ahˇ, yaˬ kʼehˇ yaˬ nehˬ luꞈ-uˇ. Aˬ jeˬ miˇ neh ehˇ naˇ, aˬ nyaꞈ nmˇ nui ma pehˇ-eu, guˆ dui dui laˇ paˬ-ehˇ gʼeh-eu meh. Aˬ nyaꞈ nmˇ nui kʼaˬ tsoꞈ gaˇ yaˬ kʼehˇ yaˬ nehˬ luꞈ-uˇ. Aˬ jeˬ miˇ neh ehˇ naˇ, aˬ yawꞈ nyaꞈ-euˬ nui kʼaˬ aˬ cawˬ-ahˇ gʼawˬ shaˬ gaˬ-eu maˬ siˬ nya-a. Iˇsaˬleˬlaˆ miˇ kʼahˬ laꞈ kʼoeˇ aˬ yawꞈ nyaꞈ-ahˇ tiˬ gʼaˬ tiˬ gaˇ bi jawˇ byoˆ ma. Iˇsaˬleˬlaˆ tsawˇ jeuˬ deuˬ yaw kaˬ-ahˇ tiˬ gʼaˬ tiˬ paw bi jawˇ gʼawˬ ma.

⁸Yuˇdaˆ-oˇ, nawˬ-euˬ mehˇ nmˇ deuˬ nawˬ-ahˇ ya ja ceuˬ tehꞈ-a. Nawˬ-ahˇ muiˇ-eu tsawˇ haˬ deuˬ-ahˇ kuˬ byahˬ-ahˇ neh nawˇ nyehꞈ sehꞈ nehˬ tehꞈ-a. Nawˬ-euˬ mehˇ nmˇ deuˬ nawˬ-euˬ mehˬ shi awˆ byaˆ-awˇ, nawˬ-ahˇ yaw zeu ya baw tehꞈ-a.

⁹Yuˇdaˆ-aˬ, aˇ laˬ jaˬ shiˇ-ahˇ duˇ-eu meh. Aˬ cawˬ-ahˇ kawꞈ sehꞈ dzaˬ gʼaˬ-awˇ, yawˬ ha-euˬ lo kʼahˬ-ahˇ paˇ gʼoꞈ yuꞈ laˇ-eu meh. Kʼaˇ cah mawꞈ gaˇ cah-awˇ, kʼaˇ yuꞈ mawꞈ gaˇ yuꞈ kʼawꞈ, aˬ yawꞈ-ahˇ tiˬ gʼaˬ-iˬ maˬ laˆ ciˆ peuˬ-a.

¹⁰Sahˬ paˬ-euˬ gawˬ yoeˬ-ahˇ aˬ yawꞈ tuˆ tehˬ taˬ-awˇ, Aˬ yawꞈ-euˬ zaˬ deuˬ tiˬ ziˇ saˇ-iˬ tiˬ ziˇ dzoeˬ dzaˬ oꞈ tehꞈ-a. Aˬ cawˬ tsawˇ jeuˬ deuˬ aˬ yawꞈ jawˇ gaˇ pyuˇ shuiˇ myawˬ gahˬ taꞈ ha laˇ-awˇ, Aˬ yawꞈ mehˬ shi awˆ byaˆ-eu laꞈ kʼoeˇ aˬ yawꞈ ehˇ dawˬ naˇ haˬ tehꞈ-a.

¹¹Muiˬ dui dui-eu aˬ gaꞈ baw duˆ uˬ moˆ, aˬ yawꞈ-euˬ mahˬ tahˬ laˆ-ahˇ aˬ yawꞈ paꞈ tehꞈ-a. Shiˬ loꞈ-ehˇ neˇ-eu aˬ gaꞈ dzaˇ uiˇ laꞈ kʼoeˇ, aˬ yawꞈ-euˬ mehˬ tsoeˬ lehˬ tsiˬ tehꞈ-a.

¹²Aˬ yawꞈ-euˬ myaˆ nuiˆ neˇ laˇ ngeh keuˆ ni, aˬ gaꞈ dzaˇ uiˇ aˬ yawꞈ ya dawˇ tehꞈ-a. Aˬ yawꞈ-euˬ seuˬ ba ceuˬ ni pyeuꞈ laˇ ngeh keuˆ ni, mawˇ neˇ aˬ coeˇ aˬ yawꞈ ya dawˇ tehꞈ-a.

¹³Zeˬbuˬloˬ-aˬ, iˬ ma laˆ shaˆ dawˬ peh jawˇ tehꞈ-a. Aˬ yawꞈ-euˬ iˬ ma laˆ shaˆ lawˇ deh-aˬ, saˇ baoˬ naˬ duˬ pyeuꞈ laˇ tehꞈ-a. Aˬ yawꞈ jawˇ-eu miˇ kʼahˬ Siˇdoˬ meuˬ-ahˇ keuˆ ni jeˇ laˇ tehꞈ-a.

¹⁴Iˇsaˬkaˬ yaw dehꞈ dehꞈ-eu gaˇ kawˆ-aˬ, kʼaˆ daˬ uˬ moˆ yuꞈ ja taˬ-euˬ mahˬ tahˬ laˆ-ahˇ maˬ beu gaˇ-a.

¹⁵Ehˇ kʼawꞈ, aˬ yawꞈ yuꞈ duˬ muiˬ dui dui-awˇ, Yawˬ jawˇ miˇ yawˬ kʼahˬ saˇ ma lehˇ yawˬ haˇ yawˬ ha noeˬ muiˬ tehꞈ-a. Kʼaˆ daˬ bi baꞈ daˆ-eu gʼaˇ duˬ daˇ tsuiꞈ awˆ daˬ-awˇ, Zaˬ kʼaˆ loꞈ-ehˇ aˬ cawˬ neh bi kʼehˇ dzaˬ tehꞈ-a.

¹⁶Daˬ-aˬ, aˬ yawꞈ-euˬ tsawˇ jeuˬ-ahˇ uˆ lahˇ tehꞈ-a. Aˬ yawꞈ-euˬ tsawˇ jeuˬ kʼawꞈ, Iˇsaˬleˬlaˆ tsawˇ jeuˬ nui deuˬ-ahˇ duˇ tehꞈ-a.

¹⁷Daˬ-aˬ, gaˇ ma gaˇ dzeˇ jawˇ-eu aˇ lawˇ-ahˇ duˇ tehꞈ-a. Doꞈ kʼaˆ-eu aˇ lawˇ kʼoeˇ mawˇ gaˇ ma gaˇ dzeˇ yuꞈ-awˇ, Mahˬ dziˬ-eu deuˬ sehˇ pyaˆ-ehˇ ga-iˇ ni, Mahˬ-euˬ kuiˇ nuiꞈ-ahˇ toˆ tehꞈ-a.

¹⁸Sahˬpaˬ Miˬyehˇ-oˇ, nawˇ ka kʼoꞈ nehˬ laꞈ gaˇ ngaˇ loꞈ luꞈ-eu ma.

¹⁹Gaˆ-aˬ, tahˇ joe bi joe tehꞈ-a. Ehˇ kʼawꞈ, aˬ yawꞈ tsawˬ tuˇ laˇ-awˇ, tahˇ joe kʼoeˇ deuˬ-ahˇ teh byoˆ tehꞈ-a.

²⁰Aˬsaˬ-euˬ miˇ tsaˬ-ahˇ muiˬ-eu dzaˬ dzaˬ dawˇ dawˇ tiˬ byah ni doˆ tehꞈ-a. Sahˬ paˬ dzaˬ-eu dzaˬ dzaˬ dawˇ dawˇ aˬ yawꞈ biꞈ nehˬ tehꞈ-a.

²¹Naˬtaˬliˇ-aˬ, muiˬ-eu kʼaˬ tsehˆ tsehˆ zaˬ puˬ-eu, cehˆ coeˬ coeˬ gahˇ nya-eu kʼaˬ tsehˆ aˬ ma-ahˇ duˇ-eu meh.

²²Yoˇsehˆ-aˬ, lawˇ gawˆ gawˆ zaˬ dawˬ peh jawˇ-eu bawˇ tsahˬ mahˬ tahˬ laˆ hawˇ-eu, Gawˬ jawˬ baˬ gʼa-ahˇ jawˇ-eu bawˇ tsahˬ mahˬ mahˬ paˬ zaˬ-ahˇ duˇ-eu meh.

²³Muiˇ-eu deuˬ aˬ yawꞈ-ahˇ beuˆ sehꞈ-eu lehˇ, Kaˆ hawˇ-eu kaˆ myaˬ yuˇ-awˇ, aˬ yawꞈ mehˬ nah teh-eu meh.

²⁴Ehˇ kʼawꞈ, aˬ yawꞈ-euˬ kaˆ kaˆ poˆ maˬ byehˆ-iˇ-ehˇ, Aˬ yawꞈ-euˬ laꞈ du deuˇ dui dui ni, Iˇsaˬleˬlaˆ-ahˇ haw piˇ-eu yawˇ bo-eu yaw sahˇ, Yaˬkoˆ-euˬ Baoˬ huiˬ-eu Miˬyehˇ-euˬ baoˬ, aˬ yawꞈ-ahˇ caw ba-eu meh.

²⁵Nawˬ da-euˬ Miˬyehˇ nawˬ-ahˇ caw ba tehꞈ-a. Nawˬ-ahˇ guiˬ lahˬ yaw dzahˇ biꞈ-eu yaw sahˇ Baoˬ huiˬ-eu Miˬyehˇ-aˬ, Mˬ kʼoeˇ taˆ neh yoeˇ le-euˬ uˬ yehˇ iˇ cuꞈ hawˇ-eu Miˇ tsaˬ dawˬ dah neh doˆ laˇ-euˬ iˇ cuꞈ biꞈ nehˬ laꞈ tehꞈ-a. Zaˬ oeˬ sahˇ-awˇ jeˬ zaˬ behˇ ni, aˬ yawꞈ guiˬ lahˬ biꞈ laꞈ tehꞈ-a.

²⁶Aˇ siˬ hawˇ-eu aˇ yehˆ guiˬ lahˬ biꞈ laꞈ tehꞈ-a. Aˇ hu ba neh jaˆ-eu gawˬ jawˬ gawˬ duˇ deuˬ pyeuꞈ-eu, Mˬ maˬ maˬ byaˆ zaˇ ziˇ ziꞈ-eu gawˬ jawˬ gawˬ duˇ deuˬ laꞈ kʼoeˇ jaˆ luꞈ-eu muiˬ-eu guiˬ lahˬ deuˬ hawˇ-eu Nui kʼahˇ shiˇ dui dui paˬ-ehˇ gʼeh-eu jeˬ dawˬ tawˆ luꞈ biꞈ nehˬ laꞈ tehꞈ-a. Guiˬ lahˬ yaw dzahˇ heu deuˬ dawˬ tawˆ luꞈ, Aˬ yawꞈ-euˬ mehˇ nmˇ deuˬ-ahˇ maˬ taꞈ-eu Yoˇsehˆ-euˬ uˬ duˬ naˇ kʼawˇ kʼoeˇ taˆ keuˆ le luꞈ-uˇ.

²⁷Beˬyaˬmiˬ-aˬ, smˇ dui dui-eu kʼaˬ yehˇ-ahˇ duˇ-eu meh. Uˬ ciꞈ nah gʼahˇ maˬ tseˇ ni aˬ cawˬ-ahˇ kawꞈ sehꞈ-awˇ, dzaˬ nawˆ nawˆ tehꞈ-a” lehˇ, aˬ ha mehˇ nmˇ-ahˇ Yaˬkoˆ ehˇ nehˬ-euˬ meh.

²⁸Tsawˇ haˬ heu deuˬ-aˬ, Iˇsaˬleˬlaˆ tsawˇ jeuˬ tseˇ nyiꞈ jeuˬ pyeuꞈ-awˇ, dawˬ heu deuˬ kʼawꞈ, aˬ yawꞈ maꞈ-euˬ aˬ da ziˇ jiˇ-eu dawˬ peh peh laˇ-awˇ aˬ yawꞈ maꞈ-ahˇ maˬ ya gʼawˬ-iˇ mi naˆ-ehˇ, aˬ li aˬ yawꞈ gʼaˬ yawꞈ-ahˇ kʼaˇ geuˇ-eu loꞈ-ehˇ ehˇ nehˬ yaꞈ-euˬ dawˬ pyeuꞈ-eu meh.

²⁹Kʼoeˇ naˇ, aˬ yawꞈ-euˬ aˬ li deuˬ-ahˇ Yaˬkoˆ heu loꞈ-ehˇ ehˇ mehˬ nehˬ-euˬ meh. “Nymˬ-mˇ, shiˇ-eu miˇ kʼahˬ-ahˇ ngaˬ-euˬ tsawˇ haˬ deuˬ jawˇ gaˇ ngaˇ iˇ byoˆ gʼeh-eu ma. Kaˬnaˬ miˇ kʼahˬ laꞈ kʼoeˇ, Mamˬliˬ meuˬ-euˬ nahˇ ma doˆ kʼehˬ paw, Maˬpeˬlaˇ lehˇ ehˇ-eu jawˇ duˬ-ahˇ jaˆ-eu ngaˬ bawˇ hawˇ-eu ngaˬ da-ahˇ baꞈ pahˬ taˬ-euˬ Heˬtaˆ tsawˇ jeuˬ, Eˇpaˬloˬ-euˬ lmˬ bymˇ lo kʼahˬ kʼoeˇ kʼahˬ laꞈ kʼoeˇ, ngaˬ-ahˇ baꞈ pahˬ nehˬ laꞈ-awˬ. Lo kʼahˬ kʼoeˇ kʼahˬ jaˆ-eu miˇ tsaˬ kʼoeˇ tsahˇ lmˬ bymˇ geuꞈ-eu lehˇ, Eˇpaˬloˬ-euˬ laꞈ-ahˇ Aˬbyaˬhaˬ neh zeuˇ tsehˆ taˬ yaꞈ-euˬ meh.

³⁰

³¹Aˬbyaˬhaˬ hawˇ-eu aˬ yawꞈ-euˬ nymˇ dahˬ Saˬlaˇ-ahˇ kʼoeˇ gaˇ baꞈ pahˬ taˬ-euˬ meh. Leˇaˬ-ahˇ kʼawꞈ ngaˬ neh kʼoeˇ gaˇ baꞈ pahˬ nehˬ-euˬ ma.

³²Lo kʼahˬ kʼoeˇ kʼahˬ jaˆ-eu miˇ tsaˬ kʼoeˇ tsahˇ-ahˇ, Heˬtaˆ tsawˇ haˬ-euˬ laꞈ-ahˇ neh zeuˇ tsehˆ taˬ-euˬ meh. Ngaˬ-ahˇ kʼawꞈ, kʼoeˇ gaˇ baꞈ pahˬ nehˬ laꞈ-awˬ.”

³³Aˬ yawꞈ-euˬ aˬ li deuˬ-ahˇ Yaˬkoˆ kʼoeˇ loꞈ-ehˇ mehˬ nehˬ tsoˆ nehˬ gʼaˬ ngeh, aˬ za za-ehˇ coˬ yuꞈ gʼeh-awˇ saꞈ gʼawˇ tsehˆ-euˬ meh.