Read Akha Aˇ dahˬ 50 Bible Online

Aˇ dahˬ 50 - Akha bible

Aˇ dahˬ 50

¹Kʼoeˇ ngeh, aˬ yawꞈ aˬ da kʼoeˇ taˆ Yoˇsehˆ awˆ tsahˬ-awˇ, aˬ yawꞈ aˬ da-ahˇ mehˬ cuˇ cuˇ-awˇ ngoeˇ-euˬ meh.

²Aˬ yawꞈ aˬ da-euˬ gʼawˇ mawˇ maˬ ya buꞈ-iˇ ni, jaˆ gʼaˬ gʼawˬ mya jeˬ lehꞈ-awˇ laˆ saˆ-eu gʼaˇ duˬ, Yoˇsehˆ dawˬ biꞈ-euˬ meh.

³Tsawˇ haˬ zaˬ-euˬ gʼawˇ mawˇ maˬ bi buꞈ-iˇ ni laˆ saˆ-eu jeˬ-aˬ, aˇ kʼaˆ myaˬ dui dui-eu miˇ neh, oeˬ tseˇ nah ga-eu meh. Iˇjiˇtuˆ tsawˇ haˬ deuˬ shiꞈ tseˇ nah keuˆ ni Yaˬkoˆ gʼaˇ duˬ tsawˇ ngoeˇ ngoeˇ-euˬ meh.

⁴Tsawˇ ngoeˇ ngoeˇ-eu aˇ yamˬ buˬ-iˇ ngeh jawˇ, sahˬ paˬ-euˬ gaˇ mˇ-eu tsawˇ haˬ deuˬ-ahˇ Yoˇsehˆ heu loꞈ-ehˇ ehˇ nehˬ-euˬ meh. “Sahˬ paˬ jawˇ gaˇ le-awˇ heu loꞈ-ehˇ ehˇ nehˬ leˇ-awˬ.

⁵‘Ngaˬ da shiˇ-eu lehˇ gʼeh ngeh, Kaˬnaˬ miˇ kʼahˬ laꞈ kʼoeˇ aˬ yawꞈ neh laˆ saˆ taˬ-euˬ lmˬ bymˇ-ahˇ, aˬ yawꞈ-ahˇ baꞈ pahˬ nehˬ-eu gʼaˇ duˬ, ngaˬ-ahˇ saˇ jaˇ bi dzaˬ laꞈ-euˬ meh. Kʼoeˇ miˇ neh, ngaˬ da-ahˇ kʼoeˇ gaˇ bi baꞈ pahˬ leˇ laꞈ-awˬ. Baꞈ pahˬ gʼaˬ naˇ paˇ gʼoꞈ le ma’ lehˇ ehˇ nehˬ leˇ-awˬ.”

⁶Kʼoeˇ ngeh, “Nawˬ neh saˇ jaˇ dzaˬ taˬ-euˬ loꞈ-ehˇ, nawˬ da-ahˇ baꞈ pahˬ nehˬ leˇ-awˬ” lehˇ, Yoˇsehˆ-ahˇ sahˬ paˬ ehˇ kʼoꞈ nehˬ-euˬ meh.

⁷Kʼoeˇ naˇ, aˬ yawꞈ aˬ da-ahˇ baꞈ pahˬ leˇ-eu gʼaˇ duˬ, Yoˇsehˆ luˆ-iˇ-euˬ meh. Sahˬpaˬ-euˬ gaˇ mˇ-eu yaw huiˬ yaw mahˇ deuˬ maˬ ehˇ, sahˬ paˬ-euˬ nymˇ laꞈ kʼoeˇ gaˇ mˇ-eu paw aˬ yuiꞈ geuꞈ-eu deuˬ maˬ ehˇ, Iˇjiˇtuˆ miˇ kʼahˬ laꞈ kʼoeˇ kʼaˇ jawˇ-eu aˬ yuiꞈ aˬ tsu dawˬ tawˆ luꞈ Yoˇsehˆ nehˬ-ehˇ le-euˬ meh.

⁸Aˬ yawꞈ-euˬ miˬ sawˇ zaˬ deuˬ maˬ ehˇ, aˬ yawꞈ-euˬ mehˇ nmˇ deuˬ maˬ ehˇ, aˬ yawꞈ aˬ da-euˬ zaˬ kʼaˇ ngeuˇ-eu deuˬ dawˬ tawˆ luꞈ, aˬ yawꞈ nehˬ-ehˇ le-euˬ meh. Aˬ yawꞈ maꞈ-euˬ zaˬ nahˬ deuˬ hawˇ-eu, yawˇ, ciꞈ myehꞈ, mawˇ neˇ deuˬ tehꞈ-ehˇ, Goˬsheˬ-ahˇ bi jawˇ yaꞈ-euˬ meh.

⁹Mahˬ laˆ lawˬ dziˬ-eu guiˇ maꞈ deuˬ hawˇ-eu mahˬ dziˬ-eu guiˇ maꞈ deuˬ kʼawꞈ, aˬ yawꞈ mehˬ nah caw teh gʼeh-euˬ meh. Yaˬkoˆ-ahˇ baꞈ pahˬ leˇ-eu lehˇ le-euˬ tsawˇ haˬ kʼoeˇ muˇ myaˬ dui dui-eu meh.

¹⁰Yawˇdaˬ lawˇ baˬ-euˬ nahˇ ma doˆ kʼehˬ paw jaˆ-eu Aˬtaˆ lehˇ kuˇ-eu cehˇ bymˇ saˬ kʼawꞈ deh ga-ahˇ le keuˆ ngeh, aˬ yawꞈ maꞈ gʼawˬ myahˇ ni guˇ guˇ-ehˇ tsawˇ ngoeˇ ngoeˇ-euˬ meh. Shiꞈ nah keuˆ ni bawˬ-iˬ gʼeh-awˇ, aˬ yawꞈ-euˬ aˬ da-ahˇ Yoˇsehˆ tsawˇ ngoeˇ ngoeˇ nehˬ-euˬ meh.

¹¹Aˬtaˆ lehˇ kuˇ-eu jawˇ duˬ kʼoeˇ tsahˇ-ahˇ aˬ yawꞈ maꞈ tsawˇ ngoeˇ ngoeˇ luꞈ gaˇ, Kaˬnaˬ miˇ kʼahˬ-ahˇ jawˇ-eu tsawˇ haˬ deuˬ ya mawˇ ngeh, “Iˇjiˇtuˆ tsawˇ haˬ deuˬ tsawˇ ngoeˇ ngoeˇ-eu bawˬ-iˬ teu naˆ naˆ-ehˇ jahˇ jahˇ-ehˇ jawˇ law hawˇ ngaˬ tawˇ” lehˇ ehˇ-eu meh. Kʼoeˇ miˇ neh, jawˇ duˬ kʼoeˇ tsahˇ-ahˇ Aˬbeˬlaˆmiˇzaˬleˬ[52] lehˇ myahˇ nehˬ-euˬ meh.

¹²Kʼoeˇ naˇ, aˬ yawꞈ maꞈ mehˇ nmˇ-euˬ aˬ da neh mehˬ nehˬ tsoˆ nehˬ yaꞈ-euˬ loꞈ-ehˇ, Yaˬkoˆ-euˬ aˬ li deuˬ mˇ-euˬ meh.

¹³Aˬ yawꞈ-euˬ gʼawˇ mawˇ-ahˇ aˬ yawꞈ maꞈ baꞈ gʼeh-awˇ, Kaˬnaˬ miˇ kʼahˬ Mamˬliˬ meuˬ-euˬ nahˇ ma doˆ kʼehˬ paw Maˬpeˬlaˇ lehˇ kuˇ-eu jawˇ duˬ-ahˇ jaˆ-eu, lmˬ bymˇ geuꞈ-eu gʼaˇ duˬ Heˬtaˆ tsawˇ jeuˬ Eˇpaˬloˬ-euˬ laꞈ-ahˇ Aˬbyaˬhaˬ neh zeuˇ tsehˆ yaꞈ-euˬ lo kʼahˬ kʼoeˇ kʼahˬ laꞈ kʼoeˇ, aˬ yawꞈ-ahˇ baꞈ pahˬ nehˬ-euˬ meh.

¹⁴Yaˬkoˆ-ahˇ baꞈ pahˬ gʼaˬ ngeh jawˇ, aˬ yawꞈ-euˬ mehˇ nmˇ deuˬ hawˇ-eu, aˬ yawꞈ-euˬ aˬ da-ahˇ baꞈ pahˬ laˇ-euˬ tsawˇ haˬ deuˬ nehˬ-ehˇ tiˬ kawˆ loꞈ-ehˇ, Iˇjiˇtuˆ miˇ kʼahˬ-ahˇ Yoˇsehˆ gʼoꞈ ka-iˇ-euˬ meh.

¹⁵Aˬ yawꞈ ha mehˇ nmˇ-euˬ aˬ da shiˇ dzeuˇ ngeh jawˇ, “Aˬ dui mehˇ nmˇ-ahˇ Yoˇsehˆ iˬ nah keuˆ ni bye-awˇ, aˬ dui maꞈ neh aˬ yawꞈ-ahˇ jahˇ nehˬ-euˬ loꞈ-ehˇ paˇ jahˇ kʼoꞈ nehˬ laꞈ naˇ, aˬ dui mehˇ nmˇ aˬ joˆ-ehˇ jahˇ nmˇ” lehˇ, Yoˇsehˆ-euˬ aˇ doˆ deuˬ bawˬ dzaˬ-euˬ meh.

¹⁶Kʼoeˇ miˇ neh, Yoˇsehˆ-ahˇ heu loꞈ-ehˇ bi tsaꞈ gaˬ-iˇ-euˬ meh. “Aˬ dui mehˇ nmˇ-euˬ aˬ da maˬ shiˇ mi naˆ-ehˇ, nawˬ-ahˇ heu loꞈ-ehˇ ehˇ taˬ yaꞈ-euˬ meh.

¹⁷‘Nawˬ-euˬ aˬ yuiꞈ deuˬ nawˬ-ahˇ yehˬ bawˬ sehˇ lu-ehˇ jahˇ-awˇ, nawˬ-euˬ kʼoeˇ taˆ mˇ lehˬ laˆ lehˬ taˬ-euˬ iˬ baˇ-ahˇ pyehˬ nehˬ-awˬ’ lehˇ ehˇ taˬ yaꞈ-euˬ meh. Aˬ da neh ehˇ taˬ yaꞈ-euˬ loꞈ-ehˇ, iˬ nah ngaˬ ha mehˇ nmˇ nawˬ-ahˇ heu loꞈ-ehˇ shaˇ-eu ma. Nawˬ da-euˬ Miˬyehˇ-euˬ zaˬ kʼaˆ pyeuꞈ-eu nga maꞈ neh mˇ lehˬ laˆ lehˬ-euˬ iˬ baˇ pyehˬ nehˬ laꞈ-awˬ lehˇ shaˇ-eu ma.” Dawˬ kʼoeˇ dawˬ-ahˇ Yoˇsehˆ ya gaˬ ngeh, noeˬ shaˬ-awˇ ngoeˇ-euˬ meh.

¹⁸Kʼoeˇ naˇ, aˬ yawꞈ-euˬ aˇ doˆ deuˬ oe-awˇ, aˬ yawꞈ-euˬ mehˬ shi awˆ byaˆ-eu laꞈ kʼoeˇ, “Nawˬ-euˬ zaˬ kʼaˆ pyeuꞈ-eu ngaˬ ha mehˇ nmˇ nawˬ-euˬ mehˬ shi oe keuˆ taˬ-euˬ ma.”

¹⁹Ehˇ kʼawꞈ, aˬ yawꞈ maꞈ-ahˇ Yoˇsehˆ heu loꞈ-ehˇ ehˇ kʼoꞈ nehˬ-euˬ meh. “Taˬ guˆ. Miˬyehˇ-euˬ dah zaˇ ngaˇ maˬ mˇ dah nya-a.

²⁰Naw maꞈ ngaˬ-ahˇ yaw haiˬ jeˬ mˇ nehˬ laꞈ-euˬ kʼawꞈ, Miˬyehˇ neh yaw muiˬ jeˬ paˇ bi pyeuꞈ doˆ laˇ-euˬ meh. Iˬ nah dehꞈ luꞈ jawˇ luꞈ-eu myaˬ dui dui-eu tsawˇ haˬ heu deuˬ maˬ ya shiˇ jiˇ ni, kʼoeˇ loꞈ-ehˇ bi pyeuꞈ laˇ-euˬ meh.

²¹Kʼoeˇ miˇ neh, naw maꞈ guˆ-eu maˬ loˬ-a. Naw maꞈ hawˇ-eu naw maꞈ-euˬ zaˬ deuˬ-ahˇ ngaˇ yaw muiˬ paˬ-ehˇ ngehˬ gʼeh nehˬ ma.” Kʼoeˇ loꞈ-ehˇ aˬ yawꞈ-euˬ aˇ doˆ deuˬ-euˬ nui ma-ahˇ zaw leˇ ni, nahˬ yu ni gʼeh-eu dawˬ Yoˇsehˆ ngehˬ-awˇ, aˬ yawꞈ maꞈ-euˬ nui ma-ahˇ laˆ saˆ nehˬ-euˬ meh.

²²Yoˇsehˆ-aˬ, aˬ yawꞈ aˬ da-euˬ miˬ sawˇ zaˬ deuˬ nehˬ-ehˇ Iˇjiˇtuˆ miˇ kʼahˬ laꞈ kʼoeˇ dehꞈ daˆ leꞈ-euˬ meh. Aˬ yawꞈ shiˇ ngeh, aˬ yawꞈ-euˬ aˇ kʼoꞈ yaˇ tseˇ byah laˇ-euˬ meh.

²³Eˇpaˬleˬ-euˬ zaˬ deuˬ hawˇ-eu oeˬ paˬ oeˬ ma deuˬ mawˇ le ngeh keuˆ ni, aˬ yawꞈ dehꞈ keuˆ-euˬ meh. Maˬnaˇseˬ-euˬ aˬ li Maˬkiˬlaˇ-euˬ zaˬ deuˬ-ahˇ kʼawꞈ, aˬ yawꞈ maˬ shiˇ mi naˆ-ehˇ aˬ yawꞈ-euˬ miˬ sawˇ zaˬ deuˬ laꞈ kʼoeˇ ha ahˇ nehˬ yaꞈ-euˬ meh.

²⁴Aˬ yawꞈ-euˬ mehˇ nmˇ deuˬ-ahˇ aˬ yawꞈ ehˇ nehˬ-eu, “Ngaˇ ziˇ jiˇ le shaw-iˬ miˇ-a. Ehˇ kʼawꞈ, Miˬyehˇ naw maꞈ-ahˇ yaw muiˬ paˬ-ehˇ ngehˬ gʼeh dah teˬ nehˬ-eu laꞈ kʼoeˇ, miˇ kʼahˬ heu kʼahˬ laꞈ kʼoeˇ neh naw maꞈ-ahˇ sheuˬ doˆ gʼeh-awˇ, Aˬbyaˬhaˬ, Iˇtsaˆ, Yaˬkoˆ aˬ ha maꞈ-ahˇ aˬ yawꞈ neh saˇ jaˇ dzaˬ tsehˆ taˬ-euˬ miˇ kʼahˬ-ahˇ sheuˬ gʼeh nehˬ laꞈ tehꞈ-a” lehˇ ehˇ nehˬ-euˬ meh.

²⁵“Miˬyehˇ naw maꞈ-ahˇ miˇ kʼahˬ kʼoeˇ kʼahˬ laꞈ kʼoeˇ sheuˬ gʼeh nehˬ laꞈ ngeh, ngaˬ-euˬ gʼawˇ mawˇ-ahˇ kʼawꞈ kʼoeˇ gaˇ baꞈ gʼeh-eu gʼaˇ duˬ, naw maꞈ saˇ jaˇ dzaˬ-awˬ” lehˇ Yoˇsehˆ ehˇ-awˇ, aˬ yawꞈ-euˬ tsawˇ haˬ deuˬ-ahˇ saˇ jaˇ bi dzaˬ-euˬ meh.

²⁶Kʼoeˇ naˇ, Iˇjiˇtuˆ miˇ kʼahˬ laꞈ kʼoeˇ Yoˇsehˆ ziˇ jiˇ-euˬ meh. Aˬ yawꞈ ziˇ jiˇ ngeh, aˬ yawꞈ-euˬ aˇ kʼoꞈ yaˇ tseˇ byah-eu meh. Aˬ yawꞈ-euˬ gʼawˇ mawˇ maˬ ya buꞈ-iˇ ni, aˬ yawꞈ maꞈ yaw muiˬ paˬ-ehˇ laˆ saˆ-awˇ saˬ paˇ neh lahˇ cuꞈ gʼaˬ miˇ tsa, mawˇ dmˬ laꞈ kʼoeˇ baꞈ ahˇ taˬ-euˬ meh.