Read Akha Aˇ dahˬ 9 Bible Online

Aˇ dahˬ 9 - Akha bible

Aˇ dahˬ 9

¹Noˇaˬ hawˇ-eu aˬ yawꞈ-euˬ aˬ li deuˬ-ahˇ Miˬyehˇ guiˬ lahˬ biꞈ-awˇ, heu loꞈ-ehˇ ehˇ nehˬ-euˬ meh. “Miˇ tsaˬ kʼoeˇ taˆ naw maꞈ-euˬ zaˬ deuˬ dehꞈ byah jawˇ byah jiˇ ngeh keuˆ ni jeuˬ le o le-awˬ.

²Jeˬ zaˬ hawˇ-eu ho zaˬ nga jiˇ dawˬ tawˆ luꞈ maˬ ehˇ, ngaˬ shaˬ ngaˬ deˇ dawˬ tawˆ luꞈ maˬ ehˇ, naw maꞈ-ahˇ ya guˆ-awˇ, kʼoeˇ deuˬ dawˬ tawˆ luꞈ naw maꞈ uˆ lahˇ-eu baoˬ uˬ moˆ ya jawˇ tehꞈ-a.

³Kʼoeˇ deuˬ-ahˇ maˬ ehˇ, sahˬ lahˬ gʼawˬ daˇ deuˬ-ahˇ maˬ ehˇ, naw maꞈ dzaˬ nya tehꞈ-a. Kʼoeˇ deuˬ dawˬ tawˆ luꞈ naw maꞈ bi dzaˬ-eu gʼaˇ duˬ, naw maꞈ-ahˇ ngaˇ biꞈ-eu ma.

⁴Ehˇ kʼawꞈ, naw maꞈ maˬ dzaˬ nya-eu tiˬ jeˬ-aˬ, shiˬ maˬ dzeˇ-iˇ-euˬ shaˬ jiˇ meh. Dehꞈ-eu saꞈ laˇ shiˬ laꞈ kʼoeˇ ahˇ-eu miˇ neh, naw maꞈ shiˬ taˬ dzaˬ lehˇ ngaˇ ehˇ-eu ma.

⁵Tsawˇ haˬ-ahˇ sehꞈ-eu tsawˇ haˬ-aˬ, kʼehˬ nehˬ kʼaˆ nehˬ-eu jeˬ-ahˇ ya daˬ tehꞈ-a. Tsawˇ haˬ-ahˇ laˆ sehꞈ-eu jeˬ zaˬ aˬ geu mawˇ maˬ kaˬ, shiˇ gaˇ keuˆ ni ngaˬ neh kʼehˬ nehˬ kʼaˆ nehˬ-eu jeˬ-ahˇ ya daˬ tehꞈ-a.

⁶Tsawˇ haˬ zaˬ-ahˇ, Miˬyehˇ-ahˇ duˇ ni beh taˬ-euˬ meh. Kʼoeˇ miˇ neh, tsawˇ haˬ-ahˇ sehꞈ-eu tsawˇ haˬ aˬ geu gʼaˬ maˬ kaˬ, aˬ yawꞈ-ahˇ sehꞈ gaˇ paˇ ya daˬ tehꞈ-a.

⁷Naw maꞈ zaˬ myaˬ laˇ-awˇ, naw maꞈ-euˬ zaˬ deuˬ miˇ tsaˬ kʼoeˇ taˆ byah laˇ tehꞈ-a” lehˇ ehˇ nehˬ-euˬ meh.

⁸Noˇaˬ hawˇ-eu aˬ yawꞈ-euˬ aˬ li deuˬ-ahˇ, Miˬyehˇ heu loꞈ-ehˇ ehˇ nehˬ-euˬ meh.

⁹“Naw maꞈ nehˬ-ehˇ maˬ ehˇ, naw maꞈ-euˬ zaˬ deuˬ uˆ deuˬ nehˬ-ehˇ maˬ ehˇ, nymˬ-mˇ ngaˇ dawˬ ma saˇ jaˇ dzaˬ taꞈ-eu ma.

¹⁰Kʼaˇ dehꞈ kʼaˇ jawˇ-eu jeˬ zaˬ deuˬ hawˇ-eu ho zaˬ nga jiˇ deuˬ nehˬ-ehˇ maˬ ehˇ, saˇ baoˬ laꞈ kʼoeˇ neh kʼaˇ doˆ le-euˬ jeˬ dawˬ tawˆ luꞈ nehˬ-ehˇ maˬ ehˇ, ngaˇ heu loꞈ-ehˇ dawˬ ma saˇ jaˇ dzaˬ-eu ma.

¹¹Dawˬ heu deuˬ-ahˇ gʼoe-awˇ, naw maꞈ nehˬ-ehˇ dawˬ ma saˇ jaˇ dzaˬ taꞈ-eu ma. Aˬ kaˇ naˇ, kʼaˇ dehꞈ kʼaˇ jawˇ-eu jeˬ dawˬ tawˆ luꞈ-ahˇ laˆ cawˆ-eu gʼaˇ duˬ, iˇ cuꞈ tiˬ jawˇ-iˬ maˬ paˇ bi dahˬ pymˬ ma. Aˬ kaˇ naˇ, iˇ cuꞈ bi dahˬ pymˬ-eu laꞈ kʼoeˇ, miˇ tsaˬ-ahˇ tiˬ jawˇ-iˬ maˬ paˇ laˆ cawˆ ma lehˇ, ngaˇ ehˇ tsehˆ-eu ma.

¹²Naw maꞈ nehˬ-ehˇ maˬ ehˇ, kʼaˇ dehꞈ kʼaˇ jawˇ-eu yawˬ jeˬ na luꞈ nehˬ-ehˇ maˬ ehˇ, ngaˬ neh dzaˬ taˬ-euˬ dawˬ ma saˇ jaˇ heu hmˬ mˬ maˬ maˬ byaˆ zaˇ ziˇ ziꞈ-eu gaˇ kawˆ yaw duˬ yaw ciˇ baw ni, ngaˇ heu loꞈ-ehˇ jahˇ ma.

¹³Aˇ deˇ leˇ kʼah-ahˇ mˬ dmˇ laꞈ kʼoeˇ ngaˇ bi jaˆ ma. Kʼoeˇ-aˬ, ngaˬ neh miˇ tsaˬ-ahˇ dawˬ ma saˇ jaˇ dzaˬ taˬ-euˬ gaˇ kawˆ saˇ kiˇ pyeuꞈ-eu ma.

¹⁴Mˬ kʼoeˇ taˆ juˬ kʼoeˬ tmˬ laˇ-awˇ aˇ deˇ leˇ kʼah kʼaˇ tsehˬ laˇ ngeh,

¹⁵miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ dawˬ tawˆ luꞈ-ahˇ laˆ cawˆ-eu gʼaˇ duˬ, miˇ tsaˬ-ahˇ iˇ cuꞈ tiˬ jawˇ-iˬ maˬ paˇ bi dahˬ pymˬ ma lehˇ, naw maꞈ-ahˇ maˬ ehˇ, jeˬ zaˬ dawˬ tawˆ luꞈ-ahˇ maˬ ehˇ, ngaˬ neh biꞈ taˬ-euˬ dawˬ ma saˇ jaˇ heu hmˬ-ahˇ ngaˇ noeˬ keuˆ ma.

¹⁶Mˬ dmˇ laꞈ kʼoeˇ aˇ deˇ leˇ kʼah tsehˬ gaˇ ngaˇ ya mawˇ ngeh, ngaˇ hawˇ-eu miˇ tsaˬ kʼoeˇ taˆ kʼaˇ dehꞈ kʼaˇ jawˇ-eu jeˬ dawˬ tawˆ luꞈ yaw kaˬ-ahˇ, mˬ maˬ maˬ byaˆ zaˇ ziˇ dzaˬ taˬ-euˬ dawˬ ma saˇ jaˇ-ahˇ ngaˇ noeˬ mawˇ ma.

¹⁷Kʼoeˇ-aˬ, yaw dehꞈ kʼaˇ dehꞈ-eu jeˬ dawˬ tawˆ luꞈ-ahˇ, ngaˬ neh biꞈ taˬ-euˬ dawˬ ma saˇ jaˇ gaˇ kawˆ bi siˬ bi mawˇ-eu jeˬ pyeuꞈ-eu ma.”

¹⁸Saˇ baoˬ laꞈ kʼoeˇ neh doˆ le-euˬ Noˇaˬ-euˬ aˬ li deuˬ-aˬ, Sheˬmaˆ, Haˬmaˇ, Yaˬpahˇ, aˬ ha smˬ mehˇ nmˇ meh. Haˬmaˇ-aˬ, Kaˬnaˬ-euˬ aˬ da meh.

¹⁹Noˇaˬ-euˬ aˬ li heu smˬ li-aˬ, miˇ tsaˬ kʼoeˇ taˆ kʼaˇ jawˇ-eu tsawˇ haˬ deuˬ-euˬ aˬ da yaw dzahˇ deuˬ pyeuꞈ-eu meh.

²⁰Noˇaˬ-aˬ, deh yaˇ mˇ dzaˬ-eu tsawˇ haˬ pyeuꞈ-awˇ, aˬ gaꞈ yaˇ kmˇ mˇ beh beh-euˬ gʼaˬ pyeuꞈ-eu meh.

²¹Aˬ yawꞈ aˬ gaꞈ dzaˇ uiˇ dawˇ yehꞈ-awˇ, mehˬ tsoeˬ lehˆ dzeh-awˇ sehˬ gʼawˆ laꞈ kʼoeˇ neˇ myawˆ ni yuꞈ-euˬ meh.

²²Kaˬnaˬ-euˬ aˬ da Haˬmaˇ-aˬ, aˬ yawꞈ-euˬ aˬ da Noˇaˬ neˇ myawˆ ni yuꞈ luꞈ gaˇ ya mawˇ ngeh, gaˇ kawˆ kʼoeˇ aˬ yawꞈ-euˬ mehˇ nmˇ nyiˬ gʼaˬ-ahˇ dzawˇ nehˬ-iˇ-euˬ meh.

²³Kʼoeˇ ngeh, Sheˬmaˆ hawˇ-eu Yaˬpahˇ aˬ nyaꞈ nmˇ pehˇ kʼahˬ pehˇ mahˇ tiˬ kahˇ aˬ yawꞈ nyaꞈ-euˬ baꞈ pu kʼoeˇ taˆ dzeh ceuˬ-awˇ, sehˬ gʼawˆ laꞈ kʼoeˇ naˇ kʼah paw jeˬ-ehˇ cah uˇ gʼeh-euˬ meh. Yawˬ ha-euˬ aˬ da neˇ myawˆ ni yuꞈ luꞈ gaˇ aˬ yawꞈ nyaꞈ nmˇ maˬ ya haw mawˇ-eu gʼaˇ duˬ, mehˬ shiˬ naˇ kʼah pyawˇ-awˇ, pehˇ kʼahˬ pehˇ mahˇ kʼoeˇ neh dzeh kaˬ nehˬ-euˬ meh.

²⁴Noˇaˬ aˬ gaꞈ dzaˇ uiˇ yehꞈ-eu beuˇ laˇ-awˇ noeˬ gahˇ laˇ ngeh, aˬ yawꞈ-euˬ aˬ li zaˬ saˬ gʼaˬ neh aˬ yawꞈ-ahˇ aˬ joˆ-ehˇ jahˇ nehˬ-euˬ gaˇ kawˆ siˬ nya-euˬ meh. Kʼoeˇ ngeh, aˬ yawꞈ heu loꞈ-ehˇ ehˇ-eu meh.

²⁵“Kaˬnaˬ-euˬ kʼoeˇ taˆ yaˬ kʼehˇ yaˬ-eu jeˬ keuˆ le luꞈ-uˇ. Aˬ yawꞈ-euˬ mehˇ nmˇ deuˬ-euˬ zaˬ kʼaˆ aˬ yawꞈ ya geuꞈ luꞈ-uˇ.

²⁶Sheˬmaˆ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, guiˬ lahˬ huiˬ luꞈ-uˇ. Aˬ yawꞈ-euˬ zaˬ deuˬ uˆ deuˬ, Sheˬmaˆ-euˬ zaˬ deuˬ uˆ deuˬ nehˬ-ehˇ jawˇ luꞈ-uˇ. Kaˬnaˬ-aˬ, Yaˬpahˇ-euˬ zaˬ kʼaˆ ya geuꞈ tehꞈ-a.

²⁷Yaˬpahˇ-ahˇ Miˬyehˇ bi jeuˬ bi o le luꞈ-uˇ. Aˬ yawꞈ-euˬ zaˬ deuˬ uˆ deuˬ Sheˬmaˆ-euˬ zaˬ deuˬ uˆ deuˬ nehˬ-ehˇ jawˇ luꞈ-uˇ. Kaˬnaˬ-aˬ, Yaˬpahˇ-euˬ zaˬ kʼaˆ ya geuꞈ tehꞈ-a” lehˇ ehˇ-eu meh.

²⁸Miˇ tsaˬ kʼoeˇ taˆ iˇ cuꞈ dahˬ pymˬ gʼaˬ miˇ tsa, smˬ yaˇ ngaˬ tseˇ kʼoꞈ

²⁹Noˇaˬ paˇ dehꞈ-euˬ meh. Aˬ yawꞈ-euˬ aˇ kʼoꞈ gʼoeˬ yaˇ ngaˬ tseˇ byah ngeh, aˬ yawꞈ ziˇ jiˇ-euˬ meh.